نیویارک (اے پی پی) اقوامِ متحدہ نے دعویٰ کیا ہے کہ شمالی کوریا نے اپنے جوہری ہتھیاروں کے لیے سائبر حملوں کے ذریعے کرپٹو کرنسی ایکسچینجز اور مختلف بینکوں سے تقریباً 2 ارب ڈالرز چرا لیے ہیں۔
غیر ملکی خبر رساں ادارے کے مطابق گزشتہ کو اقوامِ متحدہ کی سکیورٹی کونسل کی شمالی کوریا پر پابندیوں سے متعلق کمیٹی کی ایک خفیہ رپورٹ میں دعویٰ کیا گیا ہے کہ شمالی کوریا نے سائبر حملوں کی مدد سے بین الاقوامی سطح پر رقوم کی چوری کی ہے۔ اقوامِ متحدہ کی سکیورٹی کونسل کی شمالی کوریا پر پابندیوں سے متعلق کمیٹی کے ممبران شمالی کوریا کے معاملات کا گزشتہ 6 ماہ سے باریک بینی سے جائزہ لے رہے ہیں۔ شمالی کوریا کے خلاف یہ رپورٹ اقوامِ متحدہ کی سکیورٹی کونسل کمیٹی میں گزشتہ ہفتے پیش کی گئی تھی جس میں کہا گیا تھا کہ شمالی کوریا نے مختلف معاشی اداروں اور کرپٹو کرنسی ایکسچینج سے رقوم چرانے کے لیے سائبر حملوں کا سہارا لیا ہے اور سائبر حملوں کے ذریعے اپنے جوہری ہتھیاروں کے لیے سرمایہ جمع کررہا ہے،چرائی گئی رقم کی منی لانڈرنگ بھی کرلی ہے۔
ماہرین کے مطابق سائبر حملے ایسے انداز سے کیے جاتے تھے جس سے رقوم کی آمدن کا ذریعہ معلوم کرنا مشکل ہو اور جو روایتی بینکاری کے طریقوں سے بھی مختلف ہو۔ امریکی وزارتِ خارجہ کے ترجمان نے اقوام متحدہ کی اس رپورٹ پر اظہار خیال کرتے ہوئے کہا ہے کہ تمام ذمہ دار ممالک کو شمالی کوریا کی سائبر حملوں پر مشتمل سرگرمیوں کے خلاف اقدامات کرنے چاہیں، سائبر حملے شمالی کوریا کے غیرقانونی جوہری پروگرام اور بڑے پیمانے پر تباہی پھیلانے والے ہتھیاروں کی معاشی ضروریات کو پورا کرتے ہیں۔
