Tag: WASA Pakistan

ڈیرہ غازی خان (باغی ٹی وی) — رپورٹر شاہد خان
شہر میں واسا کی کارکردگی ایک بار پھر سوالیہ نشان بن گئی ہے۔ شہری حلقوں کی جانب سے الزام عائد کیا گیا ہے کہ مختلف علاقوں میں سیوریج بندش، گندگی اور بارش کے بعد جمع ہونے والے پانی کی شکایات کے باوجود عملی اقدامات نہیں کیے جا رہے، جس کے باعث عوام کو شدید مشکلات کا سامنا ہے۔شہریوں کے مطابق متاثرہ علاقوں کی تصاویر اور شکایات متعلقہ عملے کو بھجوائی جاتی ہیں، تاہم مسئلہ حل کرنے کے بجائے بعض اہلکار انہی تصاویر کو ایڈٹ کر کے “ریزولو” ظاہر کرتے ہوئے افسران کو ارسال کر دیتے ہیں، جبکہ زمینی حقائق اس کے برعکس ہوتے ہیں۔عوامی حلقوں کا کہنا ہے کہ متعدد محلوں اور گلیوں میں گندا پانی کھڑا رہنے سے نہ صرف آمدورفت متاثر ہو رہی ہے بلکہ تعفن اور بیماریوں کے پھیلنے کا خدشہ بھی بڑھتا جا رہا ہے۔شہریوں نے کمشنر ڈیرہ غازی خان، ڈپٹی کمشنر اور دیگر اعلیٰ حکام سے مطالبہ کیا ہے کہ معاملے کی شفاف تحقیقات کرائی جائیں، غفلت کے مرتکب اہلکاروں کے خلاف کارروائی کی جائے اور نکاسی آب کے نظام کو مؤثر بنایا جائے تاکہ شہریوں کو حقیقی ریلیف مل سکے۔