Author: +9251

پاکستان کے ساتھ شراکت کے چالیس سال مکمل ہونے پر آئی این ایل کے معاون وزیرخارجہ کا دورہ پاکستان۔ امریکی معاون وزیر خارجہ برائے انٹرنیشنل نارکوٹکس اینڈ لاء انفورسمینٹ آفیئرز ( آئی این ایل) ٹوڈ ڈی رابنسن نے 29 جون تا دو جولائی کے دوران اسلام آباد کا دورہ کیا جس کا مقصد امریکہ اور پاکستان کے باہمی تعلقات کے قیام کے 75 سال مکمل ہونے کے موقع کو اجاگر کرتے ہوئے دونوں ممالک کے درمیان شراکت پر تبادلہ خیال کرنا تھا۔

اپنے دورے کے موقع پر معاون وزیر خارجہ رابنسن نے پاکستان کے سینئر حکام کے ساتھ ملاقاتوں میں انسداد منشیات، صنفی اُمور، بین الاقوامی جرائم کی روک تھام اور سرحدی حفاظتی معاملات سمیت متعدد موضوعات پر تبادلہ خیال کیا۔

معاون وزیر خارجہ رابنسن نے امریکہ اور پاکستان کے درمیان تعلقات کے قیام کی پچہترویں سالگرہ اور آئی این ایل کی پاکستان کے ساتھ شراکت کے چالیس سال مکمل ہونے کے موقع پر ’’انصاف، سلامتی اور خوشحالی‘‘ کے عنوان کے تحت منائی جانے والی تقریبات میں بھی شرکت کی۔ 30 جون کو معاون وزیر خارجہ اینٹی نارکوٹکس فورس (اے این ایف) اکیڈمی کی تعمیر اور تربیتی سہولت کے منصوبہ کا سنگ بنیاد رکھنے کی تقریب میں شریک ہوئے، جس کی مالیت 22 لاکھ ڈالر یعنی 45 کروڑ 18 لاکھ پاکستانی روپے ہے۔

تقریب کی میزبانی اقوام متحدہ کے ترقیاتی پروگرام ( یو این ڈی پی) نے کی جو کہ منصوبہ پر عملدرآمد میں آئی این ایل کا شراکت دار ہے جبکہ انسداد منشیات کے وفاقی وزیر شاہ زین بگٹی اور اے این ایف کے ڈائریکٹر جنرل شبیر ناریجو نے بھی تقریب میں شرکت کی۔ اس موقع پر اپنے خطاب میں معاون وزیر خارجہ رابنسن نے یو این ڈی پی اور اے این ایف کی کوششوں کو سراہا اور آئی این ایل کے ساتھ شراکت پر امریکی حکومت کی جانب سے اُن کا شکریہ ادا کیا۔

انہوں نے کہا کہ اس مشترکہ منصوبہ کا مقصد پاکستان بھر میں منشیات کی نقل و حرکت کا خاتمہ اور پولیس فورس میں خواتین کی شمولیت، اُن کی برقراری، ترقی اورصنفی اُمور کی بہتری شامل ہے۔معاون وزیر خارجہ نے خیبر پختونخوا میں انسداد منشیات کے ذمہ دار صوبائی ادارے ایکسائز، ٹیکسیشن اینڈ نارکوٹکس کنٹرول کو 29 کروڑ 58 لاکھ روپے مالیت کا سازو سامان دینے کی تقریب میں بھی شرکت کی۔

تقریب سے خطاب کرتے ہوئے رابنسن نے کہا کہ منشیات اور ممنوعہ اشیاء کے خلاف جنگ کرنا پاکستان، امریکہ اور بین الاقوامی برادری کی ترجیحات میں شامل ہے جبکہ انہوں نے پاکستان کو اپنے پڑوس کی وجہ سے درپیش خصوصی مشکلات کا اعتراف کرتے ہوئے کہا کہ ہم سب باہمی کوششوں کے ذریعہ شاندار کام سرانجام دے سکتے ہیں۔

واضح رہے کہ یکم جولائی کو معاون وزیر خارجہ نے انسپکٹر جنرل شمالی فرنٹیئر کور میجر جنرل عادل یامین، انسپکٹر جنرل جنوبی فرنٹیئر کور میجر جنرل محمد منیر افسر اور سینئر ایف سی حکام کے ساتھ ایک افتتاحی تقریب اور 10 کروڑ پانچ لاکھ ڈالر مالیت (دو ارب دس کروڑ روپے) کےدو معاہدوں پر دستخط کرنے کی تقریب میں شرکت کی۔

افتتاحی تقریب میں ایف سی شمالی کے وارسک تربیتی مرکز میں 500 مرد اور 128 خواتین کے لیے رہائشی بیرکس، کمرہ جماعت اور جسمانی تربیت کی سہولیات سمیت 45 نئی سہولیات کا افتتاح کیا گیا۔ مزید برآں حکام نے ایف سی جنوبی کے آٹھ موجودہ ہیڈ کوارٹرز میں خواتین اہلکاروں کے لیے سہولیات کی تعمیر کے معاہدہ پر بھی دستخط کیے۔

امریکی حکومت کی اعانت سے شروع کیے جانے والے اس منصوبہ کے تحت بیرکس، ڈائننگ ہال، باورچی خانے اور دیگر سہولیات فراہم کی جائیں گی جس کے نتیجہ میں ہر مقام پر ایک سو اٹھائیس خواتین ایف سی اہلکاروں کی تعیناتی میں معاونت میسر ہو گی۔ خواتین اہلکاروں کے لیے سہولیات کی تعمیر کے حوالہ سے رابنسن نے کہا کہ امریکہ کے لیے یہ امر باعث مسرت ہے کہ وہ خواتین کو انصاف تک رسائی کے مواقع میں اضافہ اور انصاف کی فراہمی کے عمل میں اُن کی شمولیت یقینی بنا رہا ہے۔

اسلام آباد:الیکشن کمیشن کی طرف سے پنجاب حکومت پر واضح کیا گیا ہے کہ صوبے میں ہونے والے 20 ضمنی الیکشن کے دوران ضابطہ اخلاق کی خلاف ورزی کو برداشت نہیں کیا جائے گا۔

خیال رہے کہ 17 جولائی کو صوبے میں 20 ضمنی الیکشن ہونے ہیں جس کے لیے پاکستان مسلم لیگ ن اور پاکستان تحریک انصاف کے امیدواروں کی طرف زورو شور سے مہم جاری ہے اس دوران مختلف شکایات موصول ہو رہی ہیں کہ صوبائی حکومت ضابطہ اخلاق کی خلاف ورزی کر رہی ہے۔

دوسری طرف چیف الیکشن کمشنر سکندر سلطان راجہ کی سربراہی میں پنجاب کے 20 حلقوں میں ضمنی انتخابات کے انتظامات اور سیکورٹی پر پنجاب سیکریٹریٹ میں اہم اجلاس ہوا، اجلاس میں چیف سیکریٹری پنجاب کامران افضل، آئی جی پنجاب راؤ سردار، ایڈیشنل سیکرٹری داخلہ، ایڈیشنل ڈی جی رینجرز پنجاب سمیت دیگر متعلقہ افسران شریک ہوئے۔

چیف الیکشن کمشنز سکندر سلطان راجہ نے چیف سیکریٹری کے ذریعے صوبائی حکومت کو اہم پیغام دیتے ہوئے کہا ے کہ صوبائی حکومت پر واضح کریں ضابطہ اخلاق کی خلاف ورزی کو برداشت نہیں کیا جائے گا۔ پبلک آفس ہولڈر اگر خلاف ورزی کرے تو سخت تادیبی کارروائی کی جائے گی۔ خلاف ورزی کی صورت میں الیکشن سے نااہلی اور فوجداری کارروائی بھی کی جا سکتی ہے۔

انہوں نے ڈیوٹی انجام دینے والے افسران و اہلکاروں کو پیغام دیتے ہوئے کہا کہ امن و امان قائم رکھنا۔ پولنگ میٹیریل، انتخابی عملہ کی سکیورٹی صوبائی حکومت کی ذمہ داری ہے۔ آپ کا رول اہم ہے۔ آپ ریاست کے ملازم ہیں۔ بغیر سیاسی دباو کے کام کریں۔ ہم بلا امتیاز کارروائیاں کر رہے ہیں۔ اگر آپ کا کوئی افسر/ اہلکار سیاسی دباؤ میں آئے یا کسی پارٹی کا ساتھ دے فوری کمیشن کو رپورٹ کریں۔

سکندر سلطان راجہ نے کہا کہ الیکشن کمیشن پر عوام کا اعتماد بڑھے گا تو جمہوریت و ریاست مضبوط ہوں گے۔ لاہور کے 4 حلقوں اور ملتان کے 1 حلقے کے حساس پولنگ سٹیشنوں پر فوج اور رینجرز کی تعیناتی کے حوالے سے حکام سے رابطے میں ہیں۔

چیف الیکشن کمشنر آف پاکستان نے متعلقہ افسران کو یہ باور کروایا کہ الیکشن کمیشن اس بات کو یقینی بنائے گا کہ تمام امیدواران اور سیاسوں جماعتوں کو انتخابات میں یکساں مواقع میسر ہوں۔

الیکشن کمیشن نے کہا کہ 20حلقوں میں ضمنی انتخابات کی اہمیت وزیر اعلیٰ کے 22جولائی کو ہونے والے انتخاب کی وجہ سے اور بھی بڑھ گئی ہے اور سیاسی پارٹیوں کے کارکنان چارجزڈہیں لہٰذا قانون نافذ کرنے والے ادارے انتخابات سے قبل اور انتخابا ت والے دن امن و امان کے قیام کو یقینی بنائیں۔

اجلاس کے دوران چیف سیکریٹری کامران افضل اور آئی جی پنجاب راو سردار کی طرف سے صاف شفاف غیر جانبدار الیکشن کے انعقاد کی یقین دہانی کروا دی گئی۔

اسلام آباد:حکومت نے توانائی کی بچت کے لئے سرکاری عمارتوں کو سولر انرجی پر منتقل کرنے کا فیصلہ کیا ہے۔شاہد خاقان عباسی کی سربراہی میں حکومت کی انرجی ٹاسک فورس کا اجلاس ہوا جس میں وزیر توانائی خرم دستگیر اور وزیر مملکت برائے پانی و توانائی مصدق ملک اور وزیر اطلاعات مریم اورنگزیب سمیت دیگر ارکان نے شرکت کی۔

اجلاس کے دوران ایندھن کی بچت کے لئے سرکاری عمارتوں کو سولر انرجی پر منتقل کرنے کا فیصلہ کیا گیا ، متعلقہ اداروں کو سرکاری عمارتوں کی شمسی توانائی پر منتقلی کیلئے فزیبلٹی رپورٹ بنانے کی ہدایت کی گئی۔

اجلاس کے دوران ٹاسک فورس نے سولر انرجی کی پیداوار بڑھانے کے لئے مختلف اقدامات کا جائزہ لیا، اس سلسلے میں چھوٹے صارفین کو سولر انرجی پر منتقلی کیلئے سبسڈی اور رعایتی قرضے دینے پر غور کیا گیا۔اجلاس کے بعد مریم اورنگزیب نے میڈیا کو بتایا کہ گزشتہ برس سولر سے بجلی پیدا کرنے کی صلاحیت 600 میگاواٹ رہی، جلد 4 سے 5 ہزار میگاواٹ کے منصوبوں پر کام شروع ہوگا۔

مریم اورنگزیب نے کہا کہ عمارتوں کو شمسی توانائی پر منتقل کرنے کے لئے سولر پینلز کو فروغ دینے کی ضرورت ہے، سولر پینلز کے استعمال سے اضافی بجلی گرڈ اسٹیشنز کو فروخت بھی کی جا سکے گی، جہاں بجلی پر سبسڈی دی جا رہی ہے، وہاں بھی سولر پلانٹس لگائے جائیں گے۔

وفاقی وزیر نے مزید کہا کہ گھروں میں سولر پینلز سے عام بجلی کے استعمال میں بچت اور لائن لاسز بھی کم ہوں گے، سولر انرجی کے کاروبار پر مراعات دی جائیں گی، اجارہ داری قائم نہیں ہونے دیں گے، ٹاسک فورس سفارشات مرتب کر کے وزیراعظم شہباز شریف کو پیش کرے گی۔

اسلام آباد:پریڈ گراؤنڈ جلسہ، ایک شخص سے پستول اور گولیاں برآمد،اطلاعات کے مطابق وفاقی دارالحکومت اسلام آباد کے پریڈ گراؤنڈ میں پاکستان تحریک انصاف کے جلسے میں ایک شخص سے پستول اور گولیاں برآمد ہوئی ہیں ،

اسلام آباد سے ذرائع کے مطابق وفاقی پولیس حکام نےاس وقت اس شخص کی تلاشی لی جب یہ شخص جلسہ گاہ میں داخل ہورہاتھا،پولیس کا کہنا ہے کہ پریڈ گراونڈ جلسہ گاہ انٹری پوائنٹ پر غنی نامی شخص سے اسلحہ برآمد کیا

پولیس حکام کا کہنا ہے کہ اسلام آباد کے پریڈ گراونڈ جلسے میں آنے والا اسلحہ بردار شخص کے پی کے، پبلک ہیلتھ ڈیپارٹمنٹ کا ملازم ہے

پولیس کا کہنا ہے کہ کے پی سے آئے ہوئے اس شخص کے قبضے سے تیس بور پسٹل، دس راؤنڈ برآمد ہوئے ، پولیس کا یہ بھی کہنا ہے کہ اس اسلحہ بردار شخص گرفتار کر لیا گیا،پولیس ذرائع کے مطابق اس شخص سے تفتیش جاری ہے اورتحقیقات کا دائرہ وسیع کردیا گیا ہے

وفاقی پولیس نے ضلع بھر میں سکیورٹی ریڈ الرٹ کردی،آئی جی اسلام آباد ڈاکٹر اکبر ناصر خاں نے احکامات جاری کر دئیے ۔

ڈی آئی جی آپریشنز، ایس ایس پی آپریشنز کو ضلع بھر میں سرچ و کومنگ آپریشنز کرنے کی ہدایات،ضلع بھر کے داخلی و خارجی راستوں پر موثر چیک پوائنٹس لگادئیے گئے جو دوسرے قانون نافذ کرنے والے اداروں اور ایکسائز اینڈ ٹیکسیشن ڈیپارٹمنٹ کے تعاون سے موثر چیکنگ کو یقینی بنائیں گے ۔

اس کے علاوہ ریڈ زون میں بھی سکیورٹی ریڈ الرٹ کر دی گئی اور پولیس کے خصوصی دستے تعینات کر دئیے گئے جبکہ کسی بھی لااینڈآرڈر صورتحال سے نمٹنے کے لئے پولیس اہلکاروں کو10ہزار سے زائد آنسو گیس کے شیل بھی مہیا کر دئیے گئے ہیں ۔ تمام افسران کو ہدایات جاری کردی گئی ہیں کہ وہ خوداپنے اپنے علاقوں میں رہیں اور کسی بھی لااینڈ آرڈر صورتحال سے نمٹنے کے لئے نفری کو بریف کریں اور تمام ڈیوٹی کو خود چیک کریں ۔

ڈیوٹی پر تعینات تمام اہلکاروں کو مکمل کٹ کے ساتھ بھیجا جائے ۔ دوران ڈیوٹی موبائل فون کے استعمال نہیں کیا جائے گا۔ ڈی آئی جی آپریشنز ، ایس ایس پی آپریشنز خود شہر کے مختلف علاقوں کا دورہ کریں اور ان ہدایات پر عمل درآمد کو یقینی بنائیں ۔