Author: +9251

اسلام آباد: ہوابازی کے عالمی ادارے کی طرف سے آڈٹ کے بعد ایئرپورٹس مینیجرز کے تبادلے و تقرریاں ،اطلاعات کے مطابق سول ایوی ایشن اتھارٹی نے ایئرپورٹس پر تعینات افسران کے تبادلے اور تقرریوں کا حکم نامہ جاری کردیا۔

ذرائع کے مطابق سول ایوی ایشن اتھارٹی کی جانب سے کیے جانے والے تبادلوں کی زد میں کراچی ایئرپورٹ کے ڈپٹی مینیجر، سکھر ایئرپورٹ کے مینیجر آئے ہیں۔

سی اے اے کی جانب سے جاری نوٹی فکیشن کے مطابق ڈپٹی منیجر کراچی ایئرپورٹ کاشف شاہ کا لاہور ایئرپورٹ پر سینئرایڈیشنل ڈائریکٹر ورکس تعینات کردیا گیا ہے۔

اسی طرح سکھر ایئرپورٹ پر تعینات مینیجرسعیدعباسی کا تبادلہ کیا گیا اور اُن کی جگہ آصف افتخار کو منیجرتعینات کیا گیا۔سعید عباسی کو سکھر ایئرپورٹ سے جناح انٹرنیشنل ایئرپورٹ ڈپٹی مینیجر کے عہدے پر تعینات کیا گیا ہے۔

واضح رہے کہ سول ایوی ایشن کی جانب سے افسران یا ایئرپورٹ مینیجرز کے تبادلے معمول کا حصہ ہیں، افسران کی کارکردگی اور مسافروں کو بہتر خدمات کی فراہمی کے لیے افسران کی تقرریاں اور تبادلے کیے جاتے ہیں۔

قصور:ہیلتھ کیئر کمیشن کے چھاپے: پی ایم اے قصور یوم سیاہ منانے پرمجبور،اطلاعات کے مطابق پاکستان میڈیکل ایسوسی ایشن (پی ایم اے) قصور نے ہیلتھ کیئر کمیشن (ایچ سی سی) کے بےوجہ چھاپوں کے خلاف بلیک ڈے (یوم سیاہ) منایا۔

ہیلتھ کیئر کمیشن (ایچ سی سی) کے خلاف منائے گئے "ڈے” کے موقع پر خطاب کرتے ہوئے صدر پی ایم اے ڈاکٹر خالد کا کہنا تھا پی ایم اے پاکستان بھر میں عوام کی فلاح و بہبود کے لٸے پچھلے کٸی دہاٸیوں سے کام کر رہی ہے۔

ڈاکٹر خالد کا کہنا تھا کہ پی ایم اے کا بنیادی مقصد پاکستان بھر میں عطاٸیت کا خاتمہ اور میڈیکل کے شعبہ میں مزید بہتری لانا ہے، مگر ایچ سی سی کی مداخلت کی وجہ سے ایسا لگتا ہے کہ عطائیت کا خاتمہ ناممکن ہو گیا ہے۔

اس پر خطاب کرتے ہوئے جنرل سیکرٹری پی ایم اے قصور ڈاکٹر عاصم وسیم کا کہنا تھا کہ ہم نے ہیلتھ کٸیر کمیشن کے بناٸے ہوٸے قوانین کی ہمیشہ پاسداری کی ہے اب ہیلتھ کٸیر کمیشن اپنے اصل مقصد سے ہٹ چکا ہے۔

ڈاکٹر عاصم وسیم کا مزید کہنا تھا کہ ہیلتھ کٸیر کمیشن عطاٸیت کو پروان چڑھانے اور ایم بی بی ایس ڈاکٹرز کے کلینک پر چھاپے مارنے اور انہیں بلاوجہ تنگ کرنے پر مصروف عمل ہے، جس کی ہم بھرپور مذمت کرتے ہیں۔

ان کا کہنا تھا کہ پی ایم اے قصور اعلٰیٰ حکام سے مطالبہ کرتی ہے کہ ہیلتھ کٸیر کمیشن کو بتدریج بہتری کی طرف لے جایا جاٸےاور ایم بی بی ایس ڈاکٹرز کے کلینک پر بلاوجہ کے چھاپے مارنا اور انہیں حراساں کرنا بند کیا جاٸے۔

پشاور:خیبر پختونخوامیں بلدیاتی انتخابات کے شیڈول کے اعلان کے بعد ضابطہ اخلاق کی خلاف ورزی پر ڈسٹرکٹ ریٹرننگ افسر نے سپیکر قومی اسمبلی اسد قیصر کو نوٹس جاری کرتے ہوئے 13 دسمبر کو طلب کرلیا۔

واضح رہے کہ پشاور سمیت خیبر پختونخوا کے 17 اضلاع میں 19 دسمبر کو بلدیاتی انتخابات ہوں گے اور ای سی پی نے اس کا شیڈول جاری کردیا ہے۔ بلدیاتی انتخابات کے پہلے مرحلے کے بعد دیگر 18 اضلاع میں انتخابات 16 جنوری 2022 کو ہوں گے۔

ادھر الیکشن کمیشن ذرائع سے یہ معلوم ہوا ہے کہ ابھی تک مجموعی طور پر 19ہزار 282 امیدوار 2 ہزار 359 وی سی این سیز پر جنرل کونسلرز کی نشستوں پر انتخاب لڑ رہے ہیں، جبکہ وی سی این سیز کی اتنی ہی نشستوں کے لیے خواتین امیدواروں کی تعداد 3 ہزار 905 ہے۔

جن اضلاع میں 19 دسمبر کو انتخابات ہوں گے ان میں بونیر، باجوڑ، صوابی، پشاور، نوشہرہ، کوہاٹ، کرک، ڈیرہ اسمٰعیل خان، بنوں، ٹانک، ہری پور، خیبر، مہمند، چارسدہ، مردان، ہنگو اور لکی مروت شامل ہیں۔

الیکشن کمیشن آف پاکستان کی طرف سے جاری کردہ بیان کے مطابق سپیکر قومی اسمبلی کو نوٹس ڈسٹرکٹ مانیٹرنگ افسر صوابی نے جاری کیا اور انہیں 13 دسمبر کو طلب کر لیا گیا ہے۔ نوٹس میں سپیکر اسد قیصر کو ذاتی حیثیت میں یا وکیل کے ذریعے پیش ہونے کی ہدایت کی گئی ہے۔

ڈی ایم او نے کہا کہ اسد قیصر مبینہ طور پر آڈیو کلپ میں ووٹرز سے اپیل کر رہے ہیں اور پاکستان تحریک انصاف (پی ٹی آئی) امیدواروں کو ترقیاتی فنڈز کی بھی یقین دہانی کروائی۔

ڈسٹرکٹ مانیٹرنگ آفیسر پشاور نے پی ٹی آئی کے ایک اور رکن قومی اسمبلی شوکت علی کو بھی ضابطہ اخلاق کی خلاف ورزی پر نوٹس جاری کیا اور انہیں 12 دسمبر کو طلب کر لیا ہے۔

دوسری طرف بلدیاتی انتخابات کے ضابطہ اخلاق کی خلاف ورزی پر عوامی نیشنل پارٹی (اے این پی) کی رکن صوبائی اسمبلی ثمر ہارون بلور کو بھی ضابطہ اخلاق کی خلاف ورزی پر ڈسٹرکٹ مانیٹرنگ افسر پشاور نے 13 دسمبر کو طلب کر لیا۔

اُدھر ڈسٹرکٹ مانیٹرنگ افسر بنوں نے جمعیت علمائے اسلام کے رکن صوبائی اسمبلی اور صوبائی اپوزیشن لیڈر اکرم خان درانی کو تنبیہ کرکے ان کو جاری کیا گیا نوٹس نمٹا دیا۔

اس سے قبل ای سی پی نے علی امین گنڈا پور سمیت پی ٹی آئی کے متعدد وفاقی اور صوبائی وزرا پر 50 ہزار فی کس جرمانہ اور تنبیہ کی تھی

یاد رہے کہ اس سے پہلے پی پی چیئرمین بلاول بھٹو سمیت دیگرکئی پی پی رہنماوں کو بھی جرمانے کیے گئے ہیں

لاہور:سُن لیں‌ سب سیاسی شریف:میں آرہا ہوں : پنجاب کے عوام کا استحصال نہیں ہونے دوں گا : اطلاعات کے مطابق پاکستان پیپلز پارٹی کے چیئر مین بلاول بھٹو زرداری نے کہا ہے کہ پنجاب کے عوام کا مسلسل استحصال کیا جارہا ہے، ظلم و جبر کا سلسلہ اب نہیں چلے گا۔

چیئرمین پی پی پی کی سربراہی میں این اے 133 کی انتخابی مہم کے حوالے سے قائم کوآرڈینیشن کمیٹیوں کے اراکین کا اجلاس ہوا، اجلاس کے دوران این اے 133 کے حلقے کے زون 166 اور 168 کی یوسیز کوآرڈینیٹرز، یوسی صدر، جنرل سیکرٹری سمیت دیگر اراکین نے اپنی کارکردگی سے آگاہ کیا۔

چیئرمین بلاول بھٹو زرداری نے این اے 133 کے ضمنی انتخابات میں بہترین کارکردگی کا مظاہرہ کرنے پر جیالوں کو سراہتے ہوئے کہا کہ صوبے کے عوام کا مسلسل استحصال کیا جارہا ہے، ظلم و جبر کا سلسلہ اب نہیں چلے گا، پیپلزپارٹی عام انتخابات میں لاہور سمیت پنجاب میں سرپرائز دے گی۔

ان کا کہنا تھا کہ پنجاب کے عوام کے مسائل کا واحد حل پیپلزپارٹی کے پاس ہے، جلد پنجاب کے تمام اضلاع کا تفصیلی دورہ کروں گا۔اور کسی بھی نام نہاد سیاسی شریف کو عوام کا استحصال نہیں کرنے دوں گا

لاہور:پنجاب لوکل باڈیزآرڈیننس2021 پردستخط:نیا بلدیاتی نظام کیسا ہوگا تفصیلات آگئیں ،اطلاعات کے مطابق گورنرپنجاب چودھری سرور نے پنجاب لوکل باڈیزآرڈیننس2021پردستخط کردیے، آرڈیننس پردستخط کے بعد نئے نظام کے نفاذ کا عمل مکمل ہوگیا ہے۔

گورنر پنجاب کا کہنا ہے کہ نیا بلدیاتی نظام عوام کوحقیقی معنوں میں با اختیار بنائے گا، وزیراعظم اختیارات نچلی سطح پر منتقل کرنے کاوعدہ پورا کر رہے ہیں۔ اداروں کی مضبوطی وفاقی حکومت کی اولین ترجیح ہے، بااختیاربلدیاتی ادارےوزیراعظم کاخواب ہےجو پوراہورہا ہے۔

ان کا کہنا تھا کہ عوام اپنےمیئرزکاانتخاب براہ راست ووٹ سے کرینگے، میئرزکواداروں کی سربراہی نئےنظام کےتحت منتقل کردی ہے۔

خیال رہے پنجاب میں بلدیاتی انتخابات جماعتی بنیادوں پربراہ راست ہوں گے ، جس میں میٹروپولٹین کےمیئرز،ڈسٹرکٹ میئرزکوبراہ راست عوام منتخب کریں گے۔

پنجاب میں11میٹروپولٹین کارپوریشنز جبکہ لاہورمیں صرف میٹرپولٹین کارپوریشن ہوگی ، اس کے علاوہ گجرات اورسیالکوٹ کو میٹروپولٹین کارپوریشن کا درجہ حاصل ہوگا۔

دوسری طرف حکومتی جماعت نے پنجاب بھر میں اپنے مضبوط امیدواروں کی تلاش شروع کردی ہے ، جس کے بعد یہ یہ خیال ظآہر کیا جارہا ہےکہ حکومت ہونے کی وجہ سے تحریک انصاف بلدیاتی انتخابات کا میدان مار لے گی

اسلام آباد:الیکشن کمیشن نے 8 نئی سیاسی جماعتیں رجسٹرڈ کرلیں:تعداد 135 ہوگئی،اطلاعات کے مطابق الیکشن کمیشن آف پاکستان نے ملک بھر سے آٹھ نئی سیاسی جماعتیں رجسٹرڈ کرلیں ہیں۔رجسٹرڈ سیاسی جماعتوں کی تعداد 135 ہوگئی۔

ذرائع کے مطابق ای سی پی میں رجسٹرڈ سیاسی جماعتوں کی تعداد 135 ہوگئی ہے۔نئی جماعتوں کی رجسٹریشن کے بعد الیکشن کمیشن نے تازہ ترین جماعتوں کی فہرست جاری کردی ہے،

الیکشن کمیشن آف پاکستان کی طرف سے جاری نوٹیفکیشن کےمطابق نئی رجسٹرڈ ہونے والی سیاسی جماعتوں میں عوامی تحریک، پاکستان محافظ پارٹی (نیشنل)، قومی عوامی تحریک پاکستان، پاکستان تحریک اتحاد، فرسٹ ڈیموکریٹ فرنٹ، پاکستان پیپلز الائنس، پاکستان عام آدمی موومنٹ اور کسان اتحاد بھی بھی نئی رجسٹرڈ سیاسی جماعتوں میں شامل ہیں۔

واضح رہے کہ 135 سیاسی جماعتوں میں سے صرف 16 سیاسی جماعتیں پارلیمان کا حصہ ہیں۔

یہ بھی یاد رہے کہ پاکستان میں اس وقت ن لیگ کویہ اعزاز حاصل ہے کہ اس کے ووٹوں میں دیگردرجنوں مذہبی اور علاقائی جماعتوں کا بھی ووٹ بینک شامل ہے اور اگر اس ساری صورت حال کو دیکھا جائے تو یہ بات غلط نہ ہوگی کہ ن لیگ کا بحیثیت پارٹی رکن ووٹ بہت ہی کم ہے

یہ بھی معلوم ہوا ہے کہ ن لیگ کے کل ووٹ میں سے اہلحدیث مکتبہ فکر کا 50 فیصد سے زائد ہے، اس میں اگرصورت حال کا جائزہ لیا جائے تویہ بات سامنے آتی ہے کہ پنجاب کے اکثراضلاع میں‌ اس مکتبہ فکر کے ووٹوں کی تعداد وہاں کے کل ووٹ کا 70 فیصد سے زائد ہے ، مگردوسری طرف یہ بات بھی بڑی قابل غورہے کہ اس قدر بڑا ووٹ رکھنے والے مکتبہ فکرمیں اتحاد واتفاق دور دور سے بھی نظر نہیں آتا جس کی وجہ سے اس مکتبہ فکر کے ووٹرز ہمیشہ سے پہلے پی پی اور اب پی ٹی ٹی اور پی پی کی مخالفت میں بے لوث اپنا ووٹ ن لیگ کو ڈال کراسے اپنا دینی فریضہ سمجھتے ہیں

دلچسپی کی بات ہے کہ 2018 کے عام انتخابات میں‌ اسی مکتبہ فکر کی ایک بڑی جماعت جسے کالعدم جماعت الدعوہ کے نام سے یاد کیا جاتا ہے نے ان انتخابات میں حصہ لیا ، بڑی منظم جماعت ہونے کے باوجود ن لیگ سے فطری محبت کی وجہ سے اس جماعت کے اپنے 65 فیصد سے زائد ووٹرز نے جماعت کی طرف سے ان انتخابات میں اللہ اکبر تحریک کے نام پر حصہ لینے والی جماعت کوووٹ نہیں دیا تھا

اس جماعت کے کارکنان کا اپنی جماعت کے امیدواروں کو ووٹ نہ دینے کی دوسری بنیادی وجہ یہ تھی کہ جماعت نے 31 سال سے زائد عرصہ کے دوران جمہوریت کو کفر اور ووٹ کوغیراسلامی قرار دے کر اپنے کارکنوں کی ذہن سازی کی تھی ، جس کی وجہ سے 2018 کے عام انتخابات میں جہادی نظریات کے حامل کارکنان اپنی جماعت کے الیکشن میں حصہ لینے کو غیرشرعی اور منہج کے خلاف سمجھتے رہے

اس طرح پنجاب میں دیگر مذہبی جماعتوں کا ووٹ بھی 20 سے زائد ہے ، اگر یہ جماعتیں ن لیگ کو ووٹ نہ دیں تو ن لیگ کو اپنا وجود بھی برقرار رکھنا مشکل ہوجائے

اس حساب سے دیکھا جائے تو ن لیگ ایک کثیرتعدادی سیاسی جماعت کا مجموعہ ہے جبکہ اس کے مقابلے میں پی ٹی آئی ،پی پی ،پاکستان مسلم لیگ اور ایم کیو ایم کودیگرجماعتوں کی اس طرح حمایت حاصل نہیں ہے جون لیگ کو حاصل ہے

کراچی :اپوزیشن دیکھتی رہ گئی : سندھ لوکل گورنمنٹ پی پی نے اپنی خواہشات کے مطابق منظورکروا لیا،اطلاعات کے مطابق سندھ لوکل گورنمنٹ ایکٹ نئی ترامیم کےساتھ سندھ اسمبلی سے منظور ہوگیا، بل کی منظوری کے دوران اپوزیشن ارکان نے شور شرابا اور احتجاج کیا۔

اپوزیشن ارکان نے ایوان سر پر اُٹھالیا، اسپیکر ڈائس کا گھیراؤ کی، حکومت مخالف بینرز اُٹھائے، نعرے لگائےاور ایجنڈے کی کاپیاں پھاڑ ڈالیں، معاملہ تلخ کلامی اور گالم گلوچ سے آگے بڑھ کر ہاتھا پائی تک پہنچ گیا۔

وزیراعلیٰ مراد علی شاہ احتجاج کرنے والوں پر ناراض، بولے، وفاق میں تو جاہل حکومت ہے ہی مگر بدقسمتی سے سندھ میں بھی اَن پڑھ اپوزیشن آگئی، بلدیاتی ایکٹ میں اپوزیشن کی دونوں ترامیم شامل کی گئی ہیں، ترمیم شدہ ایکٹ منظوری کیلئے دوبارہ گورنر کو بھجوائیں گے۔

بلدیاتی ایکٹ کے مطابق میئر کا الیکشن شو آف ہینڈ کے ذریعے ہو گا اور منتخب ارکان ہی میئر کا الیکشن لڑ سکیں گے۔ میئر کراچی واٹر اینڈ سیوریج بورڈ کا شریک چیئرمین اور سالڈ ویسٹ کا چیئرمین ہو گا۔

اپوزیشن ارکارن نے اسپیکر ڈائس کا گھیراؤ بھی کیا۔ اس موقع پر پی ٹی آئی اور پیپلزپارٹی اراکین آمنے سامنے آگئے، ایک دوسرے کو دھکے دیے۔

پیپلزپارٹی اوراپوزیشن اراکین کےدرمیان نامناسب جملوں کاتبادلہ بھی ہوا۔ وزیر اعلیٰ سندھ مراد علی شاہ کا کہنا ہے کہ بل عوام کی امنگوں کے مطابق ہے، سندھ کے شہری علاقوں میں ٹاؤن سسٹم لایا جائے گا۔

مراد علی شاہ نے کہا کہ ہمیں پاکستان کاحصہ سمجھو، ایسے حالات پیدا نہ کرو کہ ہم کچھ اور سوچیں۔مراد علی شاہ نے سندھ اسمبلی میں اپوزیشن جماعتوں اور وفاقی حکومت پر بھی شدید تنقید کی۔

سندھ اسمبلی کے اجلاس کے بعد میڈیا سے گفتگو میں پاکستان تحریک انصاف کے پارلیمانی لیڈر بلال غفار نے کہا کہ سندھ اسمبلی میں ایک اور سیاہ دن اور سویلین ڈکٹیٹر شپ ہے۔ حکومت نے سندھ پر قبضے کا قانون منظور کیا اور ہمیں بات کرنے کا موقع نہیں دیا گیا۔

ایم کیو ایم کے رکن کنور نوید جمیل نے کہا کہ سندھ حکومت نے آمدنی والے ادارے اپنے پاس رکھ لیے۔ بلدیاتی اداروں کے اسپتالوں اور اسکولوں کو بھی قومیا لیا ہے۔ یہ کرپشن کا قانون لائے ہیں جس پر اپوزیشن کو بات تک نہیں کرنے دی گئی۔

گرینڈ ڈیموکریٹک الائنس (جی ڈی اے) کے رکن عارف مصطفیٰ جتوئی نے کہا کہ پیپلز پارٹی مشرف کے نظام کو ظلم کا نظام قرار دیتی تھی اور خود بھی وہی نظام لانے کا دعویٰ کر رہی ہے۔

ایم کیو ایم کے رکن محمد حسین نے کہا کہ اپوزیشن کا مشترکہ فیصلہ ہے کہ سندھ اسمبلی میں ان کی ڈکٹیٹر شپ اور بلدیاتی اداروں کے وسائل پر قبضہ نہیں کرنے دیں گے۔