Author: Aqsa Younas Rana


بنگلادیش میں عام انتخابات سے قبل حکومت نے ملک بھر میں سخت سکیورٹی انتظامات کر دیے ہیں اور فوج کو تعینات کر دیا گیا ہے۔ بین الاقوامی میڈیا کے مطابق انتخابات جمعرات کے روز منعقد ہوں گے، اور ڈھاکا سمیت تمام بڑے اور چھوٹے شہروں میں انتخابی مہم کا آخری دن مکمل ہو چکا ہے۔
حکام نے انتخابات کو پرامن بنانے کے لیے تین روز کے لیے رات 12 بجے سے موٹر سائیکل چلانے پر پابندی عائد کر دی ہے۔ سکیورٹی ادارے پولنگ اسٹیشنز اور حساس مقامات پر تعینات ہیں۔
‎ملک کی 300 رکنی پارلیمان کے لیے بنگلادیش نیشنلسٹ پارٹی، بنگلادیش جماعتِ اسلامی، نیشنل سٹیزن پارٹی اور جماعتی پارٹی سمیت مختلف جماعتوں کے ایک ہزار 981 امیدوار میدان میں ہیں۔ حکومت بنانے کے لیے کسی بھی جماعت یا اتحاد کو کم از کم 151 نشستیں حاصل کرنا ہوں گی۔
‎یہ انتخابات شیخ حسینہ کے استعفیٰ اور ملک چھوڑنے کے بعد منعقد ہو رہے ہیں، جبکہ عبوری حکومت کی سربراہی نوبل انعام یافتہ ڈاکٹر محمد یونس کر رہے ہیں۔


انڈونیشیا نے امریکی صدر ڈونلڈ ٹرمپ کے مجوزہ امن منصوبے کے تحت غزہ میں 5 ہزار سے 8 ہزار فوجیوں کی ممکنہ تعیناتی کی تیاری شروع کر دی ہے۔
یہ اعلان انڈونیشیا کے آرمی چیف آف اسٹاف نے پیر کے روز کیا۔ ان کا کہنا تھا کہ انڈونیشین فوج نے ممکنہ امن مشن کے لیے دستوں کی تیاری کا عمل شروع کر دیا ہے، تاہم فوجیوں کی حتمی تعداد اور ذمہ داریوں سے متعلق بات چیت تاحال جاری ہے۔
‎غیر ملکی میڈیا رپورٹس کے مطابق آئندہ چند ہفتوں کے دوران غزہ میں ہزاروں انڈونیشین فوجیوں کی تعیناتی متوقع ہے۔ یہ پیش رفت اس معاہدے کے چار ماہ بعد سامنے آئی ہے جس کے تحت غزہ میں ایک کثیر القومی فورس قائم کرنے پر اتفاق ہوا تھا۔
‎انڈونیشیا اس معاہدے کے بعد پہلا ملک بن گیا ہے جس نے باضابطہ طور پر غزہ میں امن مشن کے لیے فوج بھیجنے کی تیاری کا اعلان کیا ہے۔ تاہم سفارتی ذرائع کا کہنا ہے کہ انڈونیشیا کا یہ بیان عملی تعیناتی سے زیادہ ایک سیاسی پیغام بھی ہو سکتا ہے، کیونکہ حتمی فیصلے اور تفصیلات ابھی طے ہونا باقی ہیں۔


نوبل انعام یافتہ پاکستانی ملالہ یوسفزئی کی تصویر آکسفورڈ یونیورسٹی کے لیڈی مارگریٹ ہال میں آویزاں کر دی گئی، یہ اعزاز بینظیر بھٹو کے بعد دیا جانے والا دوسرا اہم اعزاز ہے۔ اس موقع پر خصوصی تقریب کا اہتمام کیا گیا جس میں ملالہ نے خطاب کرتے ہوئے کہا کہ طالبان لڑکیوں اور خواتین کو ان کے بنیادی حقوق سے محروم کر رہے ہیں۔
ملالہ نے مزید کہا کہ لڑکیوں کی تعلیم روکنا اسلام کے پیغام کے خلاف ہے، اور بین الاقوامی برادری کو انسانی حقوق کی بنیاد پر طالبان پر دباؤ ڈالنا چاہیے۔
‎ملالہ یوسفزئی نے ایل ایم ایچ سے فلسفہ، سیاست اور معیشت میں تعلیم حاصل کی اور 2020 میں گریجویشن کی۔ وہ لڑکیوں کی تعلیم کے لیے عالمی سطح پر معروف کارکن ہیں اور 2014 میں نوبل امن انعام حاصل کرنے والی سب سے کم عمر شخصیت بنی تھیں۔
‎ملالہ کو 2024 میں ایل ایم ایچ کی آنرری فیلو بھی منتخب کیا گیا تھا اور وہ آکسفورڈ پاکستان پروگرام کے مشاورتی ادارے کی رکن بھی ہیں، جو آکسفورڈ اور پاکستان کے درمیان علمی روابط اور اسکالرشپ مواقع فراہم کرتا ہے۔
‎اس موقع پر پورٹریٹ پینٹر ازابیلا واٹلنگ نے کہا کہ ملالہ کا پورٹریٹ بنانا ایک بہت بڑا اعزاز تھا اور انہوں نے تصویر میں ملالہ کی طاقت اور وقار کو پیش کرنے کی کوشش کی۔ ملالہ نے کہا کہ یہ اعزاز دیگر لوگوں کے لیے دروازے کھولنے میں مددگار ثابت ہوگا اور یہ یاد دہانی ہے کہ وادی سوات کی ایک لڑکی یہاں اپنی جگہ رکھتی ہے، اور ہر لڑکی، چاہے وہ پاکستان، افغانستان یا کہیں بھی سے ہو، کی بھی یہاں اپنی جگہ ہے۔