Author: ڈاکٹرغلام مصطفی بڈانی

سیالکوٹ(باغی ٹی وی بیوروچیف، شاہد ریاض) گورنمنٹ بوائز ہائی اسکول چپراڑ کی گراؤنڈ پر ناجائز تجاوز کی کوشش ناکام، اہل علاقہ اور اسکول انتظامیہ کی بروقت کارروائی

تفصیل کے مطابق گورنمنٹ بوائز ہائی اسکول چپراڑ کی گراؤنڈ پر ناجائز قبضے کی کوشش کو اسکول انتظامیہ اور اہل علاقہ کے معززین نے مشترکہ کوشش سے ناکام بنا دیا۔ واقعہ موسم گرما کی تعطیلات کے دوران پیش آیا جب گاؤں چپراڑ کے چند بااثر افراد نے محکمہ مال کے ملازمین کے تعاون سے اسکول گراؤنڈ پر قبضہ کرنے کی کوشش کی۔ تاہم اسکول انتظامیہ، اہل علاقہ اور علاقے کی سرکردہ شخصیات کی فوری کارروائی سے اس تجاوز کی کوشش ناکام بنادی گئی۔

اس کارروائی میں سابق ناظم یونین کونسل چپراڑ، چیئرمین یونین کونسل محمد اعجاز، مسلم لیگ (ن) کے رہنما ڈاکٹر محمد الیاس، ٹیچر سر آصف محمود، اسکول کے پرنسپل محمد احسن نزیر، اور چپراڑ بالا کے نمبردار محمد سلیم نے اہم کردار ادا کیا۔ ان کی بروقت مداخلت نے ممکنہ قبضے کو روکتے ہوئے اسکول کی حدود کو بچا لیا۔

اسسٹنٹ کمشنر سیالکوٹ انم بابر کی ہدایت پر تحصیل دار سیالکوٹ محمد سلیم راں نے علاقے کا دورہ کیا اور مقامی لوگوں کی موجودگی میں اسکول کی حدود کی نشاندہی کی۔ اس کارروائی میں اسکول کی گراؤنڈ کو موجودہ حالت میں درست پایا گیا، جس پر علاقہ مکینوں نے انم بابر اور تحصیل دار کا شکریہ ادا کیا۔

علاقہ مکینوں نے مطالبہ کیا کہ اس نشاندہی کے بعد اسکول کی حدود کی مکمل رپورٹ تیار کی جائے تاکہ آئندہ ایسی کسی بھی غیر قانونی کوشش کا سدباب کیا جا سکے۔

سیالکوٹ (بیوروچیف باغی ٹی وی، شاہد ریاض)پنجاب ٹیچرز یونین کی جانب سے سرکاری اسکولوں کی نجکاری کے خلاف زبردست احتجاجی جلوس نکالا گیا، جس میں ہزاروں اساتذہ نے شرکت کی۔ احتجاجی ریلی جناح اسٹیڈیم سے شروع ہو کر علامہ اقبال چوک پر اختتام پذیر ہوئی۔ اساتذہ نے ہاتھوں میں پلے کارڈز اور بینرز اٹھا رکھے تھے جن پر حکومت کے فیصلے کے خلاف نعرے درج تھے۔

ریلی کی قیادت پنجاب ٹیچرز یونین ضلع سیالکوٹ کے صدر رانا حفیظ، تحصیل ڈسکہ کے صدر محمد زاہد نور ساہی، وومن ونگ کی صدر محترمہ سونیا نیک محمد، ضلع سیالکوٹ کی صدر افشاں زریں، اور جی ٹی اے پنجاب کے سیکرٹری نشر و اشاعت امتیاز طاہر نے کی۔ ان کے علاوہ محمود غوث، عمر خالد، محمد فیصل نظیر، گوہر ایوب، اور دیگر رہنماؤں نے بھی جلوس میں شرکت کی اور اپنے خیالات کا اظہار کیا۔

امتیاز طاہر نے اپنے خطاب میں کہا کہ موجودہ حکومت اساتذہ کے احترام اور ان کے معاشی تحفظ کو بالکل نظر انداز کر رہی ہے۔ انہوں نے کہا، "اساتذہ قوم کے معمار ہیں اور بچوں کے روحانی والدین بھی ہیں۔ جب استاد کو معاشی دباؤ کا سامنا ہوگا، تو وہ اپنی پوری توجہ اور محنت سے طلبا کی تعلیم اور کردار سازی میں کیسے لگا سکے گا؟” انہوں نے یہ بھی کہا کہ ایسی قومیں جو اپنے اساتذہ کو معاشی تحفظ نہیں دیتیں، ہمیشہ پیچھے رہ جاتی ہیں۔

رانا حفیظ نے بھی اپنے خطاب میں حکومت کو خبردار کیا کہ اگر نجکاری کا فیصلہ واپس نہ لیا گیا تو حالات مزید سنگین ہو سکتے ہیں۔ انہوں نے کہا کہ "مہنگائی کے اس دور میں ایک استاد جو پورے لگن اور ایمانداری کے ساتھ بچوں کو تعلیم دے رہا ہے، اس کا روزگار ختم کرنے سے اس کے لیے اپنی زندگی گزارنا مشکل ہو جائے گا۔”

محترمہ سونیا نیک محمد نے خواتین اساتذہ کے مسائل پر روشنی ڈالتے ہوئے کہا کہ خواتین اساتذہ اپنی ذمے داریاں احسن طریقے سے نبھا رہی ہیں اور اپنی ذمہ داریوں کے ساتھ ہر مشکل کا سامنا کر کے بچیوں کو تعلیم کے زیور سے آراستہ کر رہی ہیں۔ انہوں نے کہا کہ سرکاری اسکولوں کی نجکاری خواتین اساتذہ کے روزگار کو خطرے میں ڈال سکتی ہے اور اس سے پورے معاشرے پر منفی اثرات مرتب ہوں گے۔

افشاں زریں نے اپنے خطاب میں کہا کہ اگر حکومت نے اساتذہ کے تحفظات کو نظرانداز کیا اور نجکاری کا فیصلہ واپس نہ لیا تو احتجاج کا دائرہ وسیع کرتے ہوئے اسے وزیراعلیٰ ہاؤس تک لے جایا جائے گا۔ ان کا کہنا تھا کہ اساتذہ اپنے حقوق کے لیے آخری حد تک جائیں گے۔

مظاہرے کے دوران اساتذہ نے پرجوش نعرے لگائے اور حکومت کو خبردار کیا کہ ان کے مطالبات کو جلد از جلد تسلیم کیا جائے۔ اساتذہ نے اعلان کیا کہ اگر حکومت نجکاری کے فیصلے پر نظرثانی نہیں کرتی تو وہ اپنے حقوق کے تحفظ کے لیے ہر ممکنہ اقدام اٹھائیں گے۔

جلوس کے دوران کسی بھی ناخوشگوار واقعے سے بچنے کے لیے پولیس کی بھاری نفری تعینات کی گئی تھی، اور جلوس کے راستے کو محفوظ بنانے کے لیے خصوصی اقدامات کیے گئے تھے۔

سیالکوٹ (باغی ٹی وی، بیوروچیف شاہد ریاض) سیالکوٹ میں نجی کالج کے پروفیسر کے قتل کیس میں ملزمان کو عمر قید کی سزا سنادی گئی۔ یہ واقعہ گزشتہ سال پیش آیا تھا جب کچہری کے قریب نامعلوم افراد نے فائرنگ کر کے پروفیسر فیصل ظفر کو قتل اور 11 سالہ احمد کو زخمی کر دیا تھا، جس کے باعث احمد زندگی بھر کے لیے معذور ہوگیا۔

واقعے کے بعد اس وقت کے ڈی پی او حسن اقبال نے فوری طور پر نوٹس لیا اور ڈی ایس پی سٹی طارق محمود ڈھڈی اور انچارج ہومی سائیڈ انسپکٹر غازی عرفان اشرف سمیت دیگر افسران پر مشتمل ٹیم تشکیل دی۔ پولیس ٹیم نے تفتیش میں ملزمان کو ٹوپی اور عینک کی مدد سے شناخت کرتے ہوئے لاہور سے گرفتار کرلیا۔

ملزم صغیر بٹ نے دورانِ تفتیش انکشاف کیا کہ اس کی بہن نے فیصل ظفر سے شادی کی تھی، جس پر اسے رنج تھا۔ اس نے اپنے بہنوئی کو قتل کرنے کا ارادہ کیا لیکن فائرنگ میں اس کا سوتیلہ بھانجا فیصل جاں بحق ہوگیا اور خریداری کے لیے آئی ہوئی خاتون کا 11 سالہ بیٹا احمد بھی زخمی ہوگیا۔

پولیس نے واقعے کا چالان عدالت میں جمع کیا جہاں ایڈیشنل سیشن جج سیالکوٹ شہزادہ مسعود صادق نے پولیس تحقیقات اور وکیل کے دلائل کی روشنی میں جرم ثابت ہونے پر ملزمان صغیر بٹ اور اس کے ساتھی وشال کو عمر قید اور جرمانے کی سزا سنائی۔