Author: ممتاز حیدر

اسرائیلی وزیرِ اعظم بینجمن نیتن یاہو آج بروز جمعرات اپنی اہلیہ کے ہمراہ ہنگری پہنچے ہیں، جہاں ان کا شاندار استقبال کیا گیا۔

غیر ملکی میڈیا کی رپورٹس کے مطابق، ہنگری کے وزیرِ اعظم وکٹر اوربان نے نیتن یاہو کو اس ہفتے اپنے ملک آنے کی دعوت دی تھی۔ہنگری پہنچنے پر اسرائیلی وزیرِ اعظم کا بھرپور استقبال کیا گیا۔ ہنگری کے وزیرِ دفاع کرسٹوف سزالے نے سماجی رابطے کی ویب سائٹ فیس بک پر ایک پوسٹ شیئر کرتے ہوئے نیتن یاہو کا استقبال کیا اور لکھا کہ "ہم اسرائیل کے وزیرِ اعظم بنجمن نیتن یاہو کو بوڈاپیسٹ میں خوش آمدید کہتے ہیں۔”

میڈیا رپورٹس کے مطابق، ہنگری کے وزیرِ اعظم کی جانب سے اسرائیلی وزیرِ اعظم کو دعوت دینا اور ان کا ہنگری کا دورہ، بین الاقوامی فوجداری عدالت (آئی سی سی) کے جاری کردہ وارنٹِ گرفتاری کی خلاف ورزی ہے۔ آئی سی سی نے گزشتہ برس نومبر میں نیتن یاہو کے خلاف جنگی جرائم کے سلسلے میں وارنٹ گرفتاری جاری کیے تھے، جسے نیتن یاہو نے مسترد کر دیا تھا۔ آئی سی سی کا رکن ملک ہونے کے ناطے، ہنگری کی قانونی ذمہ داری ہے کہ وہ جاری شدہ وارنٹ گرفتاری پر عمل کرے۔ تاہم، ہنگری کے وزیرِ اعظم وکٹر اوربان نے اس وارنٹ کو مسترد کرتے ہوئے کہا کہ وہ اسرائیلی وزیرِ اعظم کو گرفتار نہیں کریں گے۔

دریں اثنا، دی ہیگ میں قائم آئی سی سی کے صدر دفتر نے ایک بیان میں کہا ہے کہ یہ ہنگری اور دیگر ریاستی جماعتوں کی قانونی ذمہ داری ہے کہ وہ عدالت کے فیصلوں کو نافذ کریں۔ ایمنسٹی انٹرنیشنل کی گلوبل ریسرچ، ایڈووکیسی اور پالیسی کی سربراہ نے اس دورے پر اپنے ردِعمل میں کہا کہ ہنگری کی جانب سے نیتن یاہو کو دعوت دینا بین الاقوامی قانون کی کھلی توہین ہے۔ اُنہوں نے مزید کہا کہ یہ دعوت اس بات کی تصدیق کرتی ہے کہ یورپی یونین کے رکن ممالک میں آئی سی سی کے مطلوب جنگی مجرموں کو خوش آمدید کہا جاتا ہے۔

مودی سرکار کا جنگی جنون اور فسطایت ایک بار پھر بے نقاب

بیوی،سالے اور 6 سالہ بچے کو فائرنگ سے زخمی کرنیوالا ملزم گرفتار

نیو یارک ٹائمز کی ایک تازہ رپورٹ نے بھارتی حکومت کے جنگی جنون اور فسطایت کو بے نقاب کرتے ہوئے انکشاف کیا ہے کہ بھارت نے حساس ٹیکنالوجی اور اسلحہ روس کو فراہم کیا ہے۔

رپورٹ کے مطابق برطانوی ایرو اسپیس کمپنی ایچ آر اسمتھ گروپ کی”ٹیک ٹیسٹ” کمپنی نے بھارت کو 2 ملین ڈالر کی حساس ٹیکنالوجی فروخت کی، جو بعد ازاں روس کو منتقل کی گئی۔ ایچ آر اسمتھ گروپ کی "ٹیک ٹیسٹ” کمپنی نے 2023-24 کے دوران بھارت کو 70 سے زائد انتہائی حساس ‘ٹائر 2’ ممنوعہ ٹیکنالوجی فراہم کی، جن میں نیویگیشن، ایرو اسپیس، ریڈار، اور جدید سیمی کنڈکٹرز شامل ہیں،یہ ٹیکنالوجی حساس سول و فوجی مقاصد کے لیے استعمال ہوتی ہے اور اس کی فراہمی عالمی سطح پر پابندیوں کی خلاف ورزی ہے۔ "ٹیک ٹیسٹ” کمپنی نے 2023-24 میں بھارتی کمپنی ہندوستان ایرو ناٹکس کو 118 بار ممنوعہ ٹیکنالوجی کی کھیپیں بھیجیں،اس کمپنی نے 13 بار ان حساس ٹیکنالوجیز و پرزوں کو روسی اسلحہ ایجنسی روسوبورون ایکسپورٹ کو فروخت کیا، جو امریکی اور برطانوی پابندیوں کے تحت ہے۔ روسوبورون ایکسپورٹ نے اس کاروبار کے بدلے 14 ملین ڈالر ادا کیے۔

رپورٹ کے مطابق، ہندوستان ایرو ناٹکس نے حساس پرزے خریدنے کے محض 19 دن بعد انہیں روسی اسلحہ ایجنسی کو فروخت کر دیا، اور فروری 2024 میں بھارت سے فروخت شدہ ٹیکنالوجی محض 18 دن میں روس پہنچا دی گئی،اس کاروباری تعلقات کو دیکھتے ہوئے ہندوستان ایرو ناٹکس کو روسوبورون ایکسپورٹ کا سب سے بڑا تجارتی شراکت دار قرار دیا گیا ہے،اس کے علاوہ، برطانیہ کی نیشنل کرائم ایجنسی نے 2023 میں حساس آلات کی روس منتقلی پر ریڈ الرٹ جاری کیا تھا، اور کاروباری اداروں کو اس حوالے سے انتباہ کیا تھا۔ ہندوستان ایرو ناٹکس امریکی حکومتی ڈیٹا بیس میں بھی روسی فوجی سپلائر کے طور پر درج ہے،رپورٹ کے مطابق، روسی جنگی مشینری کے لیے حساس ٹیکنالوجی کی فراہمی مغربی پابندیوں کی کھلی خلاف ورزی ہے، جو عالمی امن اور سلامتی کے لیے سنگین خطرہ بن سکتی ہے۔

بھارت میں مسلمانوں کی کھربوں روپے کی وقف املاک کو ہڑپنے کے لیے مودی حکومت نے ایک نیا قانون متعارف کرایا ہے جسے "وقف ترمیمی بل” کہا جا رہا ہے۔ اس بل کو بھارتی لوک سبھا میں پیش کیا گیا ہے اور اس پر کانگریس کے ارکان نے شدید اعتراضات اٹھائے ہیں۔

راہول گاندھی، کانگریس کے رہنما، نے اس بل کو مسلمانوں کے حقوق پر حملہ قرار دیا۔ ان کا کہنا تھا کہ "وقف ترمیمی بل” کا مقصد مسلمانوں کو پسماندہ کرنا اور ان کے جائیداد کے حقوق کو غصب کرنا ہے۔ راہول گاندھی نے مزید کہا کہ بی جے پی اور اس کے اتحادیوں کی جانب سے آئین پر کیا جانے والا یہ حملہ دراصل مسلمانوں پر حملہ ہے، جو بھارت کے آئین کی بنیادی روح کو پامال کرنے کی کوشش ہے۔ انہوں نے یہ بھی کہا کہ یہ بل مستقبل میں دوسری برادریوں کو بھی نشانہ بنانے کی مثال بنے گا، جو ایک نیا خطرہ ہے۔

اس بل کے حوالے سے بھارت کے مختلف مسلم تنظیموں نے احتجاج شروع کر دیا ہے۔ آل انڈیا مسلم پرسنل لا بورڈ کی جانب سے اس بل کے خلاف آندھرا پردیش میں ایک دھرنا بھی دیا گیا ہے،یہ بل مسلمانوں کی وقف املاک پر حکومت کے اختیار کو مزید بڑھاتا ہے اور اس کے ذریعے حکومت کو مسلمانوں کی مذہبی اور ثقافتی املاک کو اپنے کنٹرول میں لانے کا موقع ملے گا۔ مسلمانوں کا کہنا ہے کہ اس بل کا مقصد ان کی جائیدادوں کو غیر قانونی طور پر قبضہ کرنا اور ان کی حیثیت کو کم کرنا ہے۔

اس بل کے پیش کیے جانے کے بعد بھارتی سیاست میں ایک نیا تنازعہ کھڑا ہو گیا ہے، جس میں مسلمانوں کے حقوق کی حفاظت کرنے والے رہنماؤں اور تنظیموں نے اس پر سخت اعتراض کیا ہے۔ بھارتی حکومت نے اس بل کو مسلمانوں کے مفادات کے خلاف قرار دینے والوں کے اعتراضات کو نظرانداز کرتے ہوئے اسے اپنا قدم مزید مضبوط کرنے کی کوشش کی ہے۔اس وقت بھارت میں مسلمانوں کی ایک بڑی تعداد اس بل کے خلاف احتجاج کر رہی ہے اور ان کا مطالبہ ہے کہ اس بل کو واپس لیا جائے تاکہ ان کی جائیدادوں کی حفاظت کی جا سکے۔

بھارتی شہر حیدرآباد کے رکنِ پارلیمان اسد الدین اویسی نے بھارتی لوک سبھا سے منظوری کے لیے پیش ہونے والا متنازع وقف ترمیمی بل احتجاجاً پھاڑ دیا،بھارتی میڈیا رپورٹس کے مطابق بھارتی لوک سبھا میں گزشتہ روز بحث و مباحثے کے بعد حکمراں جماعت بی جے پی کی جانب سے پیش کیا گیا متنازع وقف ترمیمی بل منظور کر لیا گیا،بھارتی حزبِ اختلاف میں شامل اسد الدین اویسی نے کہا ہے کہ اگر چندرابابو نائیڈو، نتیش کمار، چراغ پاسوان اور جینت چوہدری اس بل کی حمایت کرتے ہیں، تو وہ سیاسی وجہ سے ایسا کریں گے، 5 سال بعد جب وہ عوام کے سامنے جائیں گے، تو انہیں کیا جواب دیں گے،انہوں نے بی جے پی کی مندروں اور مساجد کے نام پر بھارت میں تفرقہ پیدا کرنے کی مذموم کوشش کے خلاف پارلیمنٹ میں اپنا احتجاج بھی ریکارڈ کروایا۔اسد الدین اویسی نے کہا کہ اگر آپ تاریخ پڑھیں تو آپ دیکھیں گے کہ مہاتما گاندھی نے سفید فام جنوبی افریقا کے قوانین کے بارے میں کہا تھا کہ ’میرا ضمیر اسے قبول نہیں کرتا،اور انہوں (مہاتما گاندھی) نے ان قوانین کو پھاڑ دیا تھا، میں بھی مہاتما گاندھی کی طرح اس قانون کو پھاڑ رہا ہوں۔یہ بل غیر آئینی ہے، بی جے پی مندروں اور مساجد کے نام پر اس ملک میں تفرقہ پیدا کرنا چاہتی ہے، میں اس کی مذمت کرتا ہوں اور میں آپ سے گزارش کرتا ہوں کہ جو 10 ترامیم میں نے اس بل میں کی ہیں انہیں قبول کریں۔

جنوبی کوریا کی کم قیمت ایئر لائن ایئر بسن نے اپنے مسافروں کو اوور ہیڈ لاکرز میں پورٹیبل بیٹری پیک رکھنے سے منع کر دیا ہے، یہ فیصلہ اس وقت آیا جب کمپنی کے ایک ایئر بس A321 طیارے میں گمہی انٹرنیشنل ایئرپورٹ پر آگ لگ گئی تھی۔

28 جنوری کو فلائٹ BX391 ہانگ کانگ کے لیے روانہ ہونے والی تھی کہ اچانک طیارے کی اوور ہیڈ بن سے دھواں نکلنے لگا، جس کے بعد 176 مسافروں اور 6 عملے کے ارکان کو ایمرجنسی سلائڈز کے ذریعے طیارے سے نکالنا پڑا۔ اس حادثے کے دوران تین مسافر معمولی زخمی ہوئے، جبکہ چار عملے کے ارکان کو دھویں کے اثرات سے علاج کروانا پڑا۔شبہ ظاہر کیا جا رہا ہے کہ کسی مسافر کے بیگ میں موجود پورٹیبل بیٹری پیک یا لیپ ٹاپ میں اوورہیٹنگ کی وجہ سے یہ آگ لگی، جو کہ ‘تھرمل رن اوے’ کے طور پر جانی جاتی ہے۔

ایئر بسن نے اعلان کیا کہ اب مسافروں کو اپنے پورٹیبل بیٹری پیک کو کابن بیگ میں اوور ہیڈ لاکرز میں رکھنے کی اجازت نہیں ہوگی۔ ان بیٹری پیکس کو اب فلائٹ کے دوران مسافر کو اپنی پوزیشن میں رکھنا ہوگا تاکہ اگر بیٹری پیک میں اوور ہیٹنگ ہو، تو اسے فوراً ملاحظہ کیا جا سکے اور آگ لگنے سے بچا جا سکے۔

حال ہی میں پورٹیبل بیٹری پیک اور دیگر بیٹریوں والے آلات کی وجہ سے جہازوں میں آگ لگنے کے واقعات میں تشویش ناک اضافہ دیکھا گیا ہے۔ لیتیئم بیٹری ‘تھرمل رن اوے’ کی صورت میں اتنی زیادہ حرارت پیدا کرتی ہے کہ آگ کو بجھانا بہت مشکل ہو جاتا ہے۔ اس نوعیت کی آگ کو بجھانے کا ایک مؤثر طریقہ یہ ہے کہ آلے کو مکمل طور پر پانی میں ڈبو دیا جائے۔

مسافروں کو خبردار کیا جا رہا ہے کہ وہ اپنے چیکڈ لگیج میں کسی بھی ایسی ڈیوائس کو نہ رکھیں جس میں لیتیئم بیٹری ہو، کیونکہ تھرمل رن اوے کے واقعات کو سنبھالنا اور بھی مشکل ہو سکتا ہے اور اس سے خطرناک نتائج برآمد ہو سکتے ہیں۔اس کے علاوہ، موبائل فونز، ٹیبلیٹس، اور ویپنگ ڈیوائسز جیسے عام آلات بھی لیتیئم بیٹریوں پر مشتمل ہوتے ہیں۔ 2023 میں، امریکی وفاقی فضائی انتظامیہ نے مسافروں کو یہ مشورہ دیا کہ وہ اپنی ڈیوائسز کو 30 فیصد سے زیادہ چارج نہ کریں تاکہ تھرمل رن اوے کے خطرات کو کم کیا جا سکے۔

پاکستان کے وفاقی تحقیقاتی ادارہ (ایف آئی اے) کے 51 ملازمین کو انسانی سمگلروں کے ساتھ مبینہ ملی بھگت کے الزام پر نوکری سے فارغ کرنے کا انکشاف ہوا ہے۔ یہ ملازمین پچھلے تین سالوں کے دوران نوکری سے فارغ کیے گئے ہیں۔

پارلیمنٹ میں فراہم کردہ تفصیلات کے مطابق، 2022 میں 6، 2023 میں 4 اور 2024 میں 41 ایف آئی اے ملازمین کو انسانی سمگلروں کے ساتھ روابط کی بناء پر برطرف کیا گیا۔ ان برطرفیوں کا عمل 2022 سے 2024 تک جاری رہا۔ 2024 میں جن ملازمین کو نوکری سے فارغ کیا گیا ان میں درج ذیل افراد شامل ہیں:
محمد عاقب،ثمینہ رشید،نمرہ،حبیب احمد،سعید اللہ،ساجد اسماعیل،کشور بخاری،اظہر علی،شعیب محمد،یوسف علی،ربنواز،سلیمان لیاقت،محمد نواز خان،احسان رضا شاہ،محمد عمر،حافظ محمد شمیم،حنا سحرش،شہباز الحسن،ابو بکر،زاہد اقبال،آصف خان،محمد آصف،دانیال افضل،فہد اعوان،محمد رضوان،عابد حسین،وسیم قیصر،محمد شفیق،پرویز اختر،محمد طلحہ،شائستہ امداد،نازش سحر،عرفان احمد میمن،ابراہیم خان،نادیہ پروین و دیگر شامل ہیں

2023 میں جن چار ملازمین کو نوکری سے فارغ کیا گیا، ان میں سعد انور،کامران وحید،احمد عمر،عدیل احمد شامل ہیں،2022 میں جن چھ ملازمین کو نوکری سے فارغ کیا گیا، وہ انسانی سمگلروں سے تعلقات کی وجہ سے برطرف ہوئے تھے۔ ان میں گلزار احمد،شاہدہ یاسمین،محمد عباس،نذر محمد،محمد احسن،محمد وسیم شامل ہیں.

ایف آئی اے کی جانب سے یہ برطرفیاں اس بات کا غماز ہیں کہ ادارہ انسانی سمگلنگ کے خلاف اپنے اقدامات کو مزید سخت کر رہا ہے اور ایسے افراد کے ساتھ کسی بھی قسم کی ملی بھگت یا روابط کو برداشت نہیں کیا جائے گا۔ ان برطرفیوں کا مقصد ادارے کی ساکھ کو بچانا اور غیر قانونی سرگرمیوں میں ملوث افراد کے خلاف سخت ایکشن لینا ہے۔