Author: ممتاز حیدر

سینٹر فار پبلک پالیسی اینڈ گورننس کے زیر اہتمام ایف سی کالج لاہور میں بین الاقوامی کانفرنس کل بدھ کو ہو گی، سینئر صحافی و اینکر پرسن، سی ای او باغی ٹی وی مبشر لقمان کانفرنس میں بطور مہمان خصوصی شریک ہو ں گے،سینٹر فار پبلک پالیسی اینڈ گورننس کی جانب سے خصوصی دعوت نامہ موصول ہو گیا ہے

سینٹر فار پبلک پالیسی اینڈ گورننس کے زیر اہتمام “پاکستان کے لیے مستقبل کے رجحانات اور تبدیلی کے راستوں کی سمت” کے عنوان سے دو روزہ بین الاقوامی کانفرنس 13 اور 14 مئی 2026 کوایف سی کالج میں منعقد ہوگی۔ کانفرنس میں ملکی و غیرملکی پالیسی سازوں، ماہرینِ تعلیم، سیکیورٹی تجزیہ کاروں اور مختلف شعبہ ہائے زندگی سے تعلق رکھنے والے ماہرین شرکت کریں گے۔کانفرنس میں سینئر صحافی و اینکر پرسن ، سی ای او باغی ٹی وی مبشر لقمان “مشرقِ وسطیٰ میں استحکام، پاکستان کا اسٹریٹجک کردار اور مفادات” کے عنوان سے ہونے والے خصوصی سیشن میں خطا ب کریں گے، اس نشست میں سعودی عرب کے ساتھ پاکستان کے دفاعی تعاون، امریکہ اور ایران کے درمیان کشیدگی میں پاکستان کی ثالثی کوششوں، اور خطے میں اقتصادی و توانائی سلامتی کو درپیش چیلنجز پر تفصیلی گفتگو کی جائے گی۔

سینٹر فار پبلک پالیسی اینڈ گورننس منتظمین کا کہنا ہے کہ سینئر صحافی و اینکر پرسن مبشر لقمان کی سیاسی و علاقائی امور پر مہارت اور تجزیاتی بصیرت کانفرنس کے مباحث کو مؤثر بنانے میں اہم کردار ادا کرے گی،مذکورہ سیشن 13 مئی کو صبح 11 بجے ایف سی کالج لاہور کے کمرہ نمبر E-002 میں منعقد ہوگا .

پنجاب حکومت نے صوبے بھر کے تعلیمی اداروں میں گرمیوں کی چھٹیوں کا باضابطہ اعلان کر دیا ہے، جس کے مطابق اس سال طلبہ کو طویل تعطیلات دی جائیں گی۔

پنجاب حکومت نے 3 ماہ سے زائد عرصے پر محیط گرمیوں کی چھٹیوں کا اعلان کیا ہے۔ یہ فیصلہ بڑھتی ہوئی گرمی کی شدت اور طلبہ کی صحت کو مدنظر رکھتے ہوئے کیا گیا ہے۔صوبائی وزیرِ تعلیم رانا سکندر حیات نے اس حوالے سے بتایا کہ گرمیوں کی چھٹیاں 22 مئی (جمعہ) سے شروع ہوں گی۔ ان کے مطابق تمام سرکاری و نجی اسکول اس شیڈول پر عمل کریں گے۔وزیرِ تعلیم نے مزید کہا کہ گرمیوں کی تعطیلات کے بعد تعلیمی ادارے 24 اگست کو دوبارہ کھولے جائیں گے۔ انہوں نے اس امید کا اظہار کیا کہ یہ طویل وقفہ طلبہ اور اساتذہ دونوں کے لیے مفید ثابت ہوگا۔

لاہور،گورنمنٹ گریجویٹ کالج برائے خواتین، اسلام پورہ لاہور میں آج پری بورڈ امتحانات کے بعد ایک اہم پیرنٹس ٹیچرز میٹنگ (پی ٹی ایم) کا انعقاد کیا گیا، جس کا مقصد طالبات کی تعلیمی کارکردگی کا جائزہ لینا اور آئندہ بورڈ امتحانات کے لیے بہتر حکمتِ عملی ترتیب دینا تھا۔

میٹنگ میں بڑی تعداد میں طالبات کے والدین نے شرکت کی جبکہ کالج کی فیکلٹی ممبران بھی اس موقع پر موجود تھیں۔ اس دوران اساتذہ نے والدین سے ملاقات کر کے ہر طالب علم کی مجموعی کارکردگی پر روشنی ڈالی اور انفرادی سطح پر طالبات کی تعلیمی پیش رفت، کمزور پہلوؤں اور بہتری کے امکانات سے والدین کو آگاہ کیا۔اساتذہ نے والدین کو بتایا کہ پری بورڈ امتحانات طالبات کی تیاری کا اہم مرحلہ ہیں جن کے نتائج کی بنیاد پر آئندہ بورڈ امتحانات کی حکمت عملی بہتر بنائی جا سکتی ہے۔ اس موقع پر خصوصی طور پر ان طالبات پر بھی بات کی گئی جنہیں مزید محنت اور رہنمائی کی ضرورت ہے، جبکہ نمایاں کارکردگی دکھانے والی طالبات کی حوصلہ افزائی بھی کی گئی۔میٹنگ کے دوران اساتذہ اور والدین کے درمیان تعلیمی مسائل، گھریلو ماحول کے اثرات، مطالعہ کے طریقہ کار اور امتحانی تیاری کے مختلف پہلوؤں پر تفصیلی تبادلہ خیال کیا گیا۔ اساتذہ نے والدین پر زور دیا کہ وہ گھر کے ماحول میں مطالعے کے لیے سازگار حالات فراہم کریں اور طالبات کی باقاعدہ نگرانی کریں تاکہ وہ بہتر نتائج حاصل کر سکیں۔

والدین نے بھی اس موقع پر اپنے تاثرات کا اظہار کیا اور کالج انتظامیہ و اساتذہ کی کاوشوں کو سراہا۔ انہوں نے کہا کہ اس طرح کی ملاقاتیں نہ صرف اعتماد کو فروغ دیتی ہیں بلکہ طلبہ کی تعلیمی بہتری میں بھی اہم کردار ادا کرتی ہیں۔میٹنگ کے اختتام پر اس عزم کا اظہار کیا گیا کہ والدین اور اساتذہ کے درمیان مسلسل رابطہ رکھا جائے گا تاکہ طالبات کو بورڈ امتحانات میں بہتر نتائج کے حصول کے لیے ہر ممکن رہنمائی اور معاونت فراہم کی جا سکے۔