لاہور:- وزیراعلیٰ پنجاب چودھری پرویز الٰہی کی زیر صدارت آج وزیر اعلی آفس میں صوبائی کابینہ کے 8 واں اجلاس میں فیصلہ کیا گیا کہ عوام کے سماجی تحفظ کو یقینی بنانے اور معاشرے کے کمزور افراد کے سماجی تحفظ کے تمام پروگرامز ایک ہی اتھارٹی مانیٹر کرے گی- پنجاب کابینہ نے پنجاب سوشل پروٹیکشن پالیسی 2022 کی منظوری دی -وزیراعلی چودھری پرویز الٰہی نے کہا کہ پنجاب کی پہلی مربوط سو شل پروٹیکشن پالیسی کے ذریعے عوام کی فلاح و بہبودکا لائحہ طے کیا جائے گا-پنجاب میں 129 جاری سوشل پروٹیکشن پروگرامزمختلف محکموں کے تحت چلائے جا رہے ہیں –
سوشل پروٹیکشن پالیسی کے تحت عوام کی فلاح و بہبود کے پروگرام ایک ہی اتھارٹی کے تحت ہوں گے-پنجاب کابینہ نے محکمہ زکواۃ وعشر، سوشل ویلفیئر اور بیت المال کے انضمام کی منظوری دے دی -تینوں محکمو ں کے ادغام سے ایک علیحدہ محکمہ سوشل پروٹیکشن بنایا جائے گا-کابینہ نے ٹیلی تھون کے ذریعے سیلاب متاثرین کے لئے فنڈز جمع کرنے پر چیئرمین تحریک انصاف عمران خان کو خراج تحسین پیش کیااور کابینہ نے پنجاب احساس پروگرام کی سربراہ ڈاکٹر ثانیہ نشتر کی فلڈ ریلیف پروگرام میں شاندار خدمات کو بھی سراہا-
وزیر اعلی چودھری پرویز الٰہی نے کہا کہ عمران خان نے تنہا 2 ارب روپے سے زائد سیلاب متاثرین کے لئے جمع کر کے قومی خدمت کی ہے – عمران خان کے دل میں عام آدمی کا احساس ہے – انہوں نے بتایا کہ پنجاب حکومت اب تک 5 ارب روپے سیلاب متاثرین میں تقسیم کر چکی ہے-36 ہزار متاثرہ خاندانوں کو ادائیگی مکمل کی جا چکی ہے -گھروں کی تعمیر کے لئے بھی سیلاب متاثرین کی مالی معاونت کی گئی ہے- پنجاب حکومت نے اپنے وسائل اور عمران خان کی ٹیلی تھون سے جمع ہونے والی رقم سے سیلاب متاثرین کی آباد کاری کی ہے – وزیر اعلی چودھری پرویز الٰہی نے کہا کہ وفاق نے پنجاب کے سیلاب زدگان کے لئے ایک روپیہ تک نہیں دیا -غیر ملکی امداد اور سامان سے بھی پنجاب کو وفاق کی طرف سے کچھ نہیں ملا -وفاق کے امتیازی سلوک پر پہلے بھی احتجاج کیا اب بھی کرتے ہیں –
انہوں نے بتایا کہ بار بار یاد دہانی کے باوجود سندھ حکومت نے سیلاب متاثرین کا ڈیٹا شیئر نہیں کیا-سندھ کو تیسری مرتبہ سیلاب متاثرین کا سروے مکمل کرکے ڈیٹا شیئر کرنے کا کہہ چکے ہیں تا کہ ہم اصل حقدار کی مدد کر سکیں -پنجاب حکومت سندھ کے سیلاب متاثرین کی مدد کے لئے ایک ارب روپے مختص کیا ہے-ہم چاہتے ہیں کہ سندھ حکومت جلد مستند ڈیٹا فراہم کرے تا کہ حقدار کو اس کا حق مل سکے- انہوں نے کہا کہ پنجاب بینک کے ذریعے کسی بھی مداخلت کے بغیر براہ راست تقسیم کا پروگرام اپنی مثال آپ ہے -پنجاب کو پہلا ڈیزاسٹرریلیز مینجمنٹ سسٹم تشکیل دینے کا اعزاز حاصل ہے -ڈاکٹر ثانیہ نشتر اور ڈی جی پی ڈی ایم اے نے پنجاب کابینہ کو سیلاب متاثرین کی امداد کے پروگرام کے بارے میں تفصیلی بریفنگ دی-
فیملی پلاننگ کو پنجاب احساس پروگرام کے ساتھ منسلک کر کے دو بچو ں تک خاندان محدود رکھنے والے جوڑے کو گرانٹ ملے گی- ورلڈ بینک فیملی پلاننگ پروگرام کی کامیابی کے لئے 130 ملین ڈالر گرانٹ فراہم کرے گا–پنجاب کابینہ نے یونیورسل ہیلتھ انشورنس پروگرام کی رقم ادا نہ کرنے پر وفاقی حکومت کے رویے پر گہری تشویش کا اظہارکرتے ہوئے مطالبہ کیا کہ وفاقی حکومت پنجاب کی واجب الادا رقم جلد ریلیز کرے -کابینہ نے لاہو رمیں خاتم النبینؐ یونیورسٹی کے قیام اور دیگر سہولتوں کی فراہمی کے لئے ایک ارب روپے کے فنڈز مختص کرنے کی منظوری دے دی-خاتم النبینؐ یونیورسٹی میں اضافی سہولتوں کی فراہمی کیلئے سالانہ ترقیاتی پروگرام کے تحت ایک ارب روپے دیئے جائیں گے۔اپرمال پر واقع سیرت اکیڈمی میں خاتم النبینؐ یونیورسٹی میں وی سی بلاک، مسجد اور ہاسٹل بنائے جائیں گے -داتا دربار آنے والے زائرین کی سہولت کیلئے ملٹی سٹوری پارکنگ پلازہ، اوور ہیڈ برج اور انڈر گراؤنڈ گزر گاہ بنانے کے لئے 3 ارب روپے کی منظوری دے دی گئی- داتا دربار کے قریب پارکنگ پلازہ، اوورہیڈ برج اور پیدل افراد کی گزرگاہ کا پراجیکٹ سالانہ ترقیاتی پروگرام میں شامل کرنے کی منظوری بھی دی گئی-پارکنگ پلازہ میں 400 سے زائد گاڑیاں پارک کرنے کی سہولت ہو گی-
اجلاس میں محکمہ سپیشل ایجوکیشن میں گریڈ 5 سے گریڈ 15 تک کی 580 منظورشدہ خالی آسامیوں پر بھرتی اورمحکمہ سپیشل ایجوکیشن میں اساتذہ اور طلبہ کی شرح میں فرق کم کرنے کے لئے جونیئر اور سینئر سپیشل ایجوکیشن اساتذہ کی 839 نئی پوسٹوں کی منظوری دی گئی- محکمہ سپیشل ایجوکیشن کے بجٹ کی رنگ فینسنگ کرنے کا بھی فیصلہ کیا گیا- محکمہ سکول ایجوکیشن کے اساتذہ کو ریگولر کرنے کا جائزہ لینے کے لئے اعلی سطح کی وزارتی کمیٹی تشکیل دی گئی -کمیٹی میں سینئرصوبائی وزیر میاں اسلم اقبال، میاں محمودالرشید، مراد راس، ہاشم ڈوگر، آصف نکئی اور دیگر شامل ہو ں گے-کمیٹی جلد اپنی سفارشات کابینہ کو پیش کرے گی-اجلاس میں محکمہ محنت اور انسانی وسائل کے اداروں میں 632 آسامیوں،محکمہ بلدیات و دیہی ترقی میں یونین کونسلز کے سیکرٹریز کی 1784 آسامیوں،محکمہ ایکسائز اینڈ ٹیکسیشن میں یکسائز انسپکٹرز بھرتی کرنے اور محکمہ ایکسائز اینڈ ٹیکسیشن میں گریڈ 5 سے گریڈ 15 تک 416منظور شدہ خالی آسامیوں پر بھرتی کی منظوری دی گئی- محکمہ خوراک میں اسسٹنٹ فوڈ کنٹرولرز، فوڈ گرین انسپکٹرز اور فوڈ گرین سپروائزرز کی بھرتی کی منظوری دی گئی-
میرٹ اور قواعد و ضوابط کے مطابق اعلی سطح کی محکمانہ کمیٹی بھرتیاں کرے گی-کابینہ اجلاس میں پنجاب میں فلم انڈسٹری کی بحالی کیلئے سٹیٹ آف دی آرٹ فلم پروڈکشن سٹوڈیو اور سینما کمپلیکس قائم کرنے اور سکیم کو اے ڈی پی کی منظوری دی گئی-وزیر اعلی پرویز الٰہی نے اس موقع پر کہا کہ انڈیا کی طرز پر فلم میکنگ، ٹیکنیک سکھانے کے لئے فلم ٹریننگ اکیڈمی بھی بنائیں گے – پنجاب کے شاندار کلچر کا فلم کے ذریعے احیاء کرنا چاہتے ہیں -ایرانی اور ترکی کے فلم میکنگ ماہرین کی پیشہ وارانہ خدمات حاصل کی جائیں گی-پاکستانی فلم کا انڈیا کے سینما گھروں کی زینت بنناقابل تحسین ہے – کابینہ نے منڈی شاہ جیونہ، ضلع جھنگ کو نئی تحصیل کا درجہ دینے کی منظوری دے دی- شاہ جیونہ ضلع جھنگ کی پانچویں تحصیل بنے گا-
اجلاس میں الزائمر پاکستان کے لیے سالانہ گرانٹ ان ایڈ، پنجاب لوکل گورنمنٹ ایکٹ 2022 کے سیکشن 187 (2)اور (4) میں ترامیم،پنجاب لوکل گورنمنٹ سروس (اپائنٹمنٹ اینڈ کنڈیشنز آف سروس) رولز2018 کے رول 5 کی ذیلی شق (1) میں ترمیم کی منظوری دی گئی،کیٹل مارکیٹ کمپنی کے چیف ایگزیکٹو آفیسر کی تقرری کی منظوری بھی دی گئی-اجلاس میں سول ہسپتال کوٹلہ ارب علی خان کو تحصیل ہیڈ کوارٹرہسپتال کا درجہ دی گئی – وزیر اعلی چودھری پرویز الٰہی نے کہا کہ کوٹلہ ارب علی خان ہسپتال کو 20 سے 100 بیڈ تک اپ گریڈ کیاجائے گا-کابینہ نے فیصل آباد میں 189 کنال پر جرنلسٹ ہاؤسنگ سوسائٹی کے لئے 25 کروڑ روپے گرانٹ اور 189 کنال اراضی جرنلسٹ ہاؤسنگ فاؤنڈیشن کے نام منتقل کرنے کی منظوری دے دی – وزیر اعلی چودھری پرویز الٰہی نے کہا کہ فیصل آباد کے صحافیوں کیلئے اپنی چھت کا خواب پورا کریں گے –
وزیراعلی نے ہدایت کی کہصحافی کالونی فیز 2 کیلئے اراضی کی روڈ ا سے پنجاب جرنلسٹ ہاؤسنگ فاؤنڈیشن کو منتقلی کاکام جلد مکمل کیا جائے – اجلاس میں سی این جی، پٹرول پمپس کیلئے روڈز کی نیگیٹولسٹ کا از سر نو جائزہ لینے کا فیصلہ کیا گیااورٹیوٹا کے لئے 40 کروڑ روپے کی لاگت سے 25 نئی بسیں خریدنے کی منظوری دی گئی-سینئر صوبائی وزیر میاں اسلم اقبال،صوبائی وزراء، مشیران، معاونین خصوصی، چیئرپرسن پنجاب احساس پروگرام ڈاکٹر ثانیہ نشتر، چیف سیکرٹری عبداللہ خان سنبل، پرنسپل سیکرٹری وزیراعلیٰ محمد خان بھٹی، انسپکٹر جنرل پولیس عامر ذوالفقار اور اعلیٰ حکام نے اجلاس میں شرکت کی
