Author: Regional News

چترال۔ (اے پی پی) گیس سلنڈر دھماکے میں جلنے والے متاثرین میں سے ایک اور بچہ اور خاتون بھی جاں بحق ہو گئے، تعداد پانچ ہو گئی۔ تفصیل کے مطابق آیون گاؤں میں گیس سلنڈر دھماکے کی وجہ سے جو آگ لگی تھی اس میں تین بچوں، تین خواتین سمیت آٹھ افراد بری طرح جھلس گئے تھے، جن کو برن اینڈ پلاسٹک سرجری سنٹر حیات آباد پشاور لایا گیا تھا،جہاں وہ تشویش ناک حالت میں زیر علاج ہیں۔ان زحمیوں میں تین پہلے وفات پاچکے تھے،جبکہ ایک شخص منظور کا بیٹا ایان اور اس کی بیوی گلشن بی بی جاں بحق ہوگئی،اس طرح جاں بحق ہونے والوں کی تعداد پانچ ہوگئی۔

پشاور۔(اے پی پی)خیبرپختونخوا فوڈ اتھارٹی پشاور نے حیات آبادرنگ روڈ پرکارروائی کرتے ہوئے صفائی کی ابترصورتحال اورسی او پیز کی خلاف ورزی پرتین فیکٹریاں سیل کردیں جبکہ پشاوررنگ روڈ پرناکہ بندی کے دوران دودھ لے جانے والی گاڑیوں کی چیکنگ سے 12سوکلوگرام مضرصحت دودھ برآمد ہوا جسے تلف کردیا گیا ہے۔

پشاور۔(اے پی پی)وزیراطلاعات خیبرپختونخوا شوکت یوسفزئی نے کہا ہے کہ ڈاکٹروں کاکام احتجاج کرنا نہیں بلکہ مریضوں کا علاج کرنا ہے۔ان خیالات کااظہارانہوں نے جمعرات کومیڈیاسے بات چیت کرتے ہوئے کیا۔شوکت یوسفزئی نے کہاکہ ڈاکٹروں کونہیں پتہ کہ کس طرف جاناہے،ڈاکٹروں کا ایک چھوٹاساٹولہ ہے جواحتجاج کررہاہے۔انہوں نے کہاکہ جن ڈاکٹروں کا تبادلہ متعلقہ ہسپتالوں میں ہوچکاہے وہ ڈیوٹی دینے سے انکاری ہے۔انہوں نے کہاکہ جوڈاکٹراپنے فرائض منصبی سرانجام دینے سے انکاری ہے ان کوبرطرف کیاجائیگا۔انہوں نے کہاکہ ابتدائی طورڈیوٹی سے انکار کرنے والے کچھ ڈاکٹروں کی نشاندہی ہوچکی ہے جن کوجلد برخاست کیاجائیگا۔واضح رہے کہ صوبہ بھرمیں ڈاکٹرکے ہرتال کاآج 16واں دن ہے۔

پشاور۔(اے پی پی)ڈسٹرکٹ پولیس آفیسر لکی مروت قاسم علی خان نے بہترین کارکردگی دکھانے اور ڈیوٹی کو احسن طریقے سے سر انجام دینے پر پولیس افسران اور جوانوں کو اپنے دفتر میں حوصلہ افزائی کے لئے تعریفی اسناد اور نقد انعامات دیئے۔اس موقع پرڈسٹرکٹ پولیس آفیسر نے کہا کہ ایسے پولیس افسران اور جوانوں پر جو اپنی ڈیوٹی کو ایمانداری اور خوش اسلوبی سے سرانجام دے رہے ہیں وہ قابل فخر ہیں اور ان کی حوصلہ افزائی کی جائے۔انہوں نے کہاکہ جو پولیس افسران و جوان ڈیوٹی میں کوتاہی کرینگے ان کے خلاف باقاعدہ محکمانہ کارروائی ہوگی۔قاسم علی خان نے کہا کہ پولیس کے اولین فرائض میں عوام کی خدمت شامل ہے،پورے ضلع کی پولیس افسران اور جوانوں کو میرا پیغام ہے کہ وہ عوام کے ساتھ خوش اخلاقی کا مظاہرہ کریں اور ان کی ہر جائز اور قانونی امداد کریں۔

پشاور۔(اے پی پی)ڈپٹی کمشنر مردان محمد عابد خان وزیر نے کہا ہے کہ خیبرپختونخوا حکومت اور مردان انتظامیہ لوگوں کے مسائل ترجیحی بنیادوں پر حل کرنے کاتہیہ کرچکی ہے جس کیلئے ماسٹر پلان مرتب کیاگیا ہے،عوامی مسائل کی بروقت نشاندہی کرنے والوں کی بھرپور حوصلہ افزائی کی جائے گی۔ان خیالات کااظہارانہوں نے اپنے دفتر میں انجمن تحفظ دوکانداران لوند خوڑ مردان کے وفدسے بات چیت کرتے ہوئے کیا۔انھوں نے وفد کو یقین دلایاکہ لوندخوڑ بازار کے نکاسی آب،صحت و صفائی،سٹریٹ لائیٹس،صحت و تعلیم،ڈینگی بچاؤ سپرے،باؤے کتے مار مہم اور دیگر ضروری عوامی مسائل ضلعی انتظامیہ کے ترجیحات میں شامل ہیں، جس کے لیے مختلف ادارے سرگرم عمل ہیں۔اس موقع پر ڈپٹی کمشنر مردان نے مسائل کے حل کیلئے فوری ہدایات جاری کیں۔

ڈیرہ اسماعیل خان۔(اے پی پی) ڈیرہ پولیس نے جنوبی سرکلر روڈ الائیڈ بینک کے قریب میڈیکل لیبارٹری ملازمین کا لیبارٹری میں چوری کرکے اسے ڈکیتی کارنگ دینے کے واقعہ میں برآمد ہونے والا ساٹھ لاکھ روپے سے زائد مالیت کا سامان مالک کے حوالے کردیا۔ چوری کے واقعہ میں ملوث لیبارٹری کے دونوں گرفتار ملازمین کی درخواست ضمانت دس روز قبل سنیئر سول جج ڈیرہ کی عدالت میں خارج کی گئی۔ پولیس کے مطابق تھانہ سٹی کی حدود میں جنوبی سرکلر روڈ الائیڈ بینک کے قریب موجود نجی میڈیکل لیبارٹری کے دو ملازمین نصیب اللہ ولد خالد خان اور ملازم قاسم خان ولد حبیب الرحمٰن اقوام محسود ساکنان ساؤتھ وزیرستان نے لیبارٹری سے 6لاکھ40ہزار روپے نقد، DVRسیٹ،PCRمشین کو مکمل سیٹ، سپیشل پروٹین مشین، ہارمونیم مشین، پروٹین کیمسٹری مشین، سرالوجی مشین، مائیکرو سکوپ (خورد بین)، 2سپیشل ہارمونیم کٹ، 2لیپ ٹاپ، ایک عدد PCRمکمل سیٹ اپ، 2لیب سیٹ اپ اور دو موبائل فون چوری کرکے اسے ڈکیتی کا رنگ دے دیا اورلیبارٹری کے ٹیکنیشن نصیب اللہ نے واقعہ کے بعد مالک محمد انور کمال محسود کو فون کر بتایا کہ وہ ساتھی ملازم کے ہمراہ لیبارٹری کا گیٹ بند کرکے اندر سورہاتھا کہ اس دوران دستک ہونے پر پینٹ شرٹ میں ملبوس نوجوان نے اسے گیٹ کھولنے کو کہا جیسے ہی میں نے گیٹ کھولا تو تین سے چار مسلح افراد لیبارٹری کے اندر داخل ہوگئے اور ہمیں اسلحہ کی نوک پر یر غمال بنا کر نقدی اور سامان لوٹ کر فرار ہوگئے۔ سٹی پولیس نے مدعی محمد انور کمال محسود کی رپورٹ پر نامعلوم ملزمان کیخلاف زیر دفعہ382ppc مقدمہ درج کرلیا۔ دوران تفتیش ٹیکنیشن نصیب اللہ ولد خالد خان اور ملازم قاسم خان ولد حبیب الرحمٰن اقوام محسود ساکنان ساؤتھ وزیر ستان خودہی واقعہ میں ملوث پائے گئے۔ پولیس نے دونوں ملزمان کو گرفتارکرلیا۔ دونوں گرفتار ملزمان کی درخواست ضمانت دس روز قبل سنیئر سول جج ڈیرہ کی عدالت میں خارج کی گئی۔ڈیرہ پولیس نے ملزمان کے قبضہ سے برآمد ہونے والا ساٹھ لاکھ روپے سے زائد مالیت کا قیمتی سامان گزشتہ روز لیبارٹری کے مالک کے حوالے کردیا ہے۔

ڈیرہ اسماعیل خان۔ (اے پی پی) ڈیرہ پولیس نے سرچ آپریشن کے دوران بھاری مقدار میں چرس اور ناجائز اسلحہ برآمد کرکے ملزمان کو گرفتار کرلیا، کلاچی پولیس نے قبرستان رضا محمد کے قریب سرچ آپریشن کے دوران ملزم غلام مصطفی سکنہ محلہ جعفر زئی سے1100گرام چرس، یادگار چوک کلاچی سے ملزم بہرام خان سکنہ محلہ جعفر زئی کلاچی سے 120گرام چرس جبکہ گرہ محبت کے علاقہ میں ملزم گل جان سکنہ گرہ محبت سے ایک کلاشنکوف بمعہ28کارتوس برآمد کرکے ملزم کو گرفتار کرلیا۔ پولیس نے ان واقعات کے الگ الگ مقدمات درج کرلئے ہیں۔