کوئٹہ۔(اے پی پی)میڈیکل سپرنٹنڈنٹ بولان میڈیکل کمپلیکس ہسپتال ڈاکٹر فہیم نے کہا ہے کہ ہسپتال میں مریضوں کی مشکلات کے حوالے سے کسی قسم کی کوئی کوتاہی برادشت نہیں کی جائے گی اور جس طرح ہسپتال کے عملے نے مجھ اعتماد کیا ہے ان کے اعتماد کو بھی ٹھیس نہیں پہنچاوں گا، جتنا ممکن ہوسکے ہسپتال کے بہتری کے لئے کردار ادا کرتا رہوں گا،ان خیالات کااظہار انہوں نے بدھ کے روز بی ایم سی ہسپتال میں اپنا چارج سنبھالنے کے موقع پر میڈیا سے بات چیت کرتے ہوئے کیا، اس موقع پرپروفیسرز، ڈاکٹرز،پیرامیڈیکل اسٹاف، ینگ ڈاکٹرز فارماسسٹ، نرسنگ اسٹاف، پیرامیڈیکل اسٹاف سمیت ہسپتال کے دیگر عملے نے ان کا بی ایم سی کابطور ایم ایس چارج دوبارہ سنبھالنے پر مبارک دی اور ہسپتال آمد پر بھرپور استقبال کیا، پھولوں کی گلدستے پیش کئے ایم ایس بی ایم سی ہسپتال ڈاکٹر فہیم کا کہنا تھا کہ جس طرح ہسپتال کے عملے نے مجھ پر دوبار اعتماد کا اظہار کرکے استقبال کیا اس پر میں تمام پروفیسرز، ڈاکٹرزفارماسٹ،پیرامیڈیکل اسٹاف،نرسنگ اسٹاف سمیت دیگر عملے کا مشکور ہوں، انہوں نے کہا کہ پہلے بھی ہسپتال کے بہتر ی کیلئے ٹیم کو ساتھ لیکر چلتا ہوں اور آئندہ بھی ہسپتال میں موجود اپنی ٹیم کے ہمراہ ادویات کی کمی،ہسپتال میں سہولیات، مریضوں کی مشکلات اور ہسپتال عملے کی مشکلات کوختم کرنے کے لئے اپنا بھر پو ر کردار ادا کریں گے، انہوں نے کہا کہ پوسٹنگ ٹرانسفر حکومت کا اختیار ہے اگر حکومت کی جانب سے کوئی تبادلہ کیا جاتا ہے تو اسے قبول کریں گے اور جو بھی ذمے داری حکومت کی جانب سے دی جاتی ہے اسے احسن طریقے سے نبھانے کی کوشش کرتے ر ہیں گے۔ اس موقع پر ہسپتال عملے نے ڈاکٹرفہیم کو یقین دلایا کہ ہسپتال میں بہتری کے لئے وہ ان کا بھر پور ساتھ دیں گے۔
Author: Regional News
عادی نادہندگان کے کنکشن مستقل طور پر منقطع کرنے کا اعلان
فیصل آباد۔ (اے پی پی) واٹر اینڈ سینیٹیشن ایجنسی فیصل آباد نے واسا کے عادی نادہندگان کے کنکشن مستقل طور پر منقطع کرنے کا اعلان کر دیا ہے اور کہا ہے کہ جن نادہندگان نے ابھی تک اپنے ذمہ واجب الادا بل جمع نہیں کروائے وہ فوری طور پر اپنے بقایا جات ادا کردیں بصورت دیگر ان کے خلاف سخت قانونی کاروائی عمل میں لائی جائے گی اور بعد ازاں کوئی عذر قابل قبول نہ ہو گا۔واسا کے ترجمان نے بتایا کہ محکمہ کا ریونیو کا شارٹ فال کم سے کم کرنے کی کوششوں کو نتیجہ خیز بنایا جا رہا ہے۔ انہوں نے ریکوری کی صورتحال پر عدم اطمینان کا اظہار کرتے ہوئے بتایا کہ متعلقہ حکام کی جانب سے ذمہ دار سٹاف کو سختی سے ہدائت کی گئی ہے کہ وہ اپنی کارکردگی بڑھانے اور محکمانہ واجبات کی سنجیدگی سے بھر پور وصولی کیلئے تمام وسائل بروئے کار لائیں تاکہ زیادہ سے زیادہ تعمیراتی و ترقیاتی منصوبوں پر عملدرآمد کیلئے اقدامات کئے جا سکیں۔ انہوں نے بتایا کہ واسا کے صرف 45سے 50فیصد صارف بل ادا کرتے ہیں جو کہ افسوسناک صورتحال ہے نیز گزشتہ ایام کے دوران سینکڑوں غیر قانونی کنکشنز کا سراغ بھی لگایا گیا ہے۔ انہوں نے بتایا کہ گزشتہ ایک ماہ میں سینکڑوں غیر قانونی کنکشنز کو بلنگ دائرے میں شامل کیا گیا ہے۔انہوں نے ایسے تمام افراد جنہوں نے غیر قانونی طور پر واسا کے کنکشن حاصل کر رکھے ہیں کو خبردار کیا ہے کہ وہ اپنے کنکشن فوری ریگولر کروا لیں ورنہ سخت قانونی کاروائی کے لئے تیار رہیں۔
موٹر سائیکل سوار بھاری جرمانے اور چالان کے لیے تیار ہوجائیں
فیصل آباد۔ (اے پی پی) انسپکٹر جنرل پولیس پنجاب عارف نواز خان کی خصوصی ہدایات کی روشنی میں سٹی ٹریفک پولیس فیصل آبا دنے ہیلمٹ پہننے اور عقبی شیشے لگانے کیلئے عوام میں شعوری آگاہی کی غرض سے ہزاروں پمفلٹس تقسیم کئے ہیں جبکہ ہیلمٹ نہ پہننے اور پیچھے دیکھنے والے شیشے نہ لگانے والے موٹر سائیکل، سکوٹر مالکان کے خلاف کاروائی کا آغا زکر دیا گیا ہے اور گذشتہ روزکئی افراد کے چالان بھی کئے گئے ہیں۔ سٹی ٹریفک پولیس کے ترجمان نے بتا یا کہ قبل ازیں آگاہی مہم شروع کی گئی تھی اور ہزاروں افراد کو ہیلمٹ نہ پہننے اور بیک ویو مرر نہ لگانے پر تحریری وارننگ سلپیں بھی جاری کی گئی تھیں۔ انہوں نے بتا یا کہ بیک ویو مر ر نہ ہونے کے باعث پیچھے سے آنے والی ٹریفک کو دیکھنا ممکن نہیں رہتا جس کے باعث حادثات کی شرح میں اضافہ ہو رہا ہے اور اس طرح کئی قیمتی جانیں بھی ضائع ہو جاتی ہیں۔ا نہوں نے کہا کہ آئندہ ہیلمٹ نہ پہننے اور بیک ویو مرر کے بغیر چلنے والی موٹر سائیکلوں کے ساتھ کوئی رعائت نہیں برتی جائے گی اور ان کے چالان کر کے بھاری جرمانہ بھی عائد کیا جائے گا۔
جنگلی پرندوں کا تحفظ اب ایسے ہوگا
فیصل آباد۔ (اے پی پی) حکومتی ہدایات کی روشنی میں محکمہ تحفظ جنگلی حیات نے عقاب،تنور، باز و دیگر پرندوں کے غیر قانونی شکار اور سمگلنگ کو روکنے کیلئے خصوصی اقدامات کا آغاز کر دیا ہے جبکہ اس ضمن میں وائلڈ لائف ڈیپارٹمنٹ کے افسران کو خصوصی مانیٹرنگ کی بھی ہدایت کی گئی ہے جو شکاریوں اور پرندے پکڑنے، فروخت کرنے اور ان کی سمگلنگ میں ملوث افراد پر کڑی نظر رکھیں گے۔ محکمہ تحفظ جنگلی حیات کے ذرائع نے بتایاکہ جو افراد یا شکاری عقاب،تنور، باز و دیگر پرندوں کے غیر قانونی شکار یا سمگلنگ میں ملوث پائے گئے ان کے خلاف نہ صرف سخت کارروائی عمل میں لائی جائے گی بلکہ انہیں گرفتاری کے بعد بھاری جرمانے اور پانچ سال تک قید کی سزا بھی دی جا سکتی ہے۔
کسی بھی جگہ پر فش فارم بنانے سے قبل یہ کام لازمی کروانا پڑے گا
فیصل آباد۔ (اے پی پی) محکمہ ماہی پروری نے کسی بھی جگہ پر فش فارم بنانے سے قبل زمینی مٹی اور پانی کا تجزیہ کروانے کی ہدایت کی ہے اورفیصل آباد کے اکثریتی علاقے پانی میں نمکیات کی مقدار زیادہ ہونے کے باعث مچھلی فارمز بنانے کیلئے غیر موزوں قرار دے دیئے ہیں جبکہ مختلف مقامات پر مچھلی فارمز قائم کرنے کیلئے حاصل کردہ مٹی و پانی کے اکثرسیمپلز میں سے کئی کو نمکیات انتہائی زیادہ ہونے کے باعث غیر موزوں قرار دے دیا گیا ہے تاہم فیصل آباد میں جھنگ برانچ سے ملحقہ علاقہ جات، سمندری، تاندلیانوالہ، جڑانوالہ کے علاقوں کو مچھلی فارم بنانے کیلئے موزوں قرار دیاگیاہے۔ محکمہ ماہی پروری فیصل آباد ریجن کے ذرائع نے بتایاکہ پانی میں نمکیات کی مقدار زیادہ ہونے کی وجہ سے جہاں مچھلیاں بہتر طریقے سے اپنی افزائش نسل جاری نہ رکھ سکتی ہیں وہیں بڑی تعداد میں مچھلیوں کے مرنے کے خدشات بھی موجود رہتے ہیں جس سے فش فارمرز کو بھاری مالی نقصان کا سامنا کرناپڑتاہے۔ انہوں نے عوام الناس سے اپیل کی کہ وہ کسی بھی جگہ پر فش فارم بنانے سے قبل زمینی مٹی اور پانی کا تجزیہ ضرور کروا لیں تاکہ بعد ازاں انہیں کسی پریشانی کا سامنا نہ کرنا پڑے۔
سرکاری و پرائیویٹ ہسپتالوں‘ سکولز‘ کالجز میں اچانک چھاپے مارنے کا انوکھا حکم کیوں دیا گیا
سرگودھا۔(اے پی پی)حکومت پنجاب نے سرگودھا سمیت صوبہ بھر میں قائم تمام سرکاری و پرائیویٹ ہسپتالوں‘ سکولز‘ کالجز کی کینٹینز پر اچانک چھاپے مارنے اور وہاں پر فروخت ہونیوالی اشیاء کا جائزہ لینے کیلئے پنجاب فوڈ اتھارٹی کے تمام افسران کو ایک مراسلہ جاری کیا ہے جس میں کہا گیا وہ جن مشروبات وغیرہ پر حکومت نے پابندی لگائی ہے۔کوئی بھی کینٹین کا مالک اس پابندی کی خلاف ورزی کرتا پایا جائے اس کیخلاف فوری کاروائی کی جائے۔ذرائع کے مطابق مریضوں اور ان کے لواحقین اور سکولز‘ کالجز کے بچوں کو معیاری اور اچھی اشیاء فراہم کی جاسکے حکومت کے نوٹس میں یہ بات لائی گئی ہے کہ بعض کینٹین مالکان غیر معیاری اشیاء فروخت کررہے ہیں جس کی وجہ سے بچے مختلف بیماریوں میں مبتلا ہورہے ہیں۔
ملک کسی دھرنے اور احتجاج کا متحمل نہیں ہوسکتا، سلیم نواز ملک
سرگودھا۔(اے پی پی) قومی امن کمیٹی برائے بین المذاہب ہم آہنگی ملک میں امن کے قیام اور مذہبی رواداری کے فروغ اور انسانی حقوق کے تحفظ کیلئے اقدامات کررہی ہے موجودہ حکومت تمام صوبوں کے درمیان باہمی روابط کیلئے بھی کوشاں ہے۔ ان خیالات کا اظہار ضلعی چیئرمین لاء اینڈ جسٹس سلیم نواز ملک نے اپنے ایک بیان میں کیا انہوں نے کہا کہ موجودہ صورتحال میں ملک کسی بھی دھرنے اور احتجاج کا متحمل نہیں ہوسکتا ضرورت اس امر کی ہے کہ ہم آپس میں محبت‘ بھائی چارے، باہمی روابط کے علاوہ مذہبی رواداری کو فروغ دیں سلیم نواز ملک نے کہا کہ کسی بھی ملک کی ترقی کیلئے امن کا ہونا ضروری ہے اور ہم سب کو ملکر قیام امن کیلئے جدوجہد کرنا ہوگی۔
پلاسٹک کے بیگز پر پابندی کے بعد مارکیٹ میں آئے ایسی چیز سے بنے بیگ کہ دل خوش ہوجائے
سرگودھا۔(اے پی پی)ملک بھر میں مرحلہ وار شاپنگ بیگ پر پابندی کے بعد کپڑے‘ کاغذ‘ کھجور کے پتوں کے علاوہ بان سے تیار کردہ دلکش‘ دیدہ زیب بیگ مارکیٹوں میں آنا شروع ہوگئے ہیں جنہیں لوگوں نے بے حد پسند کیا ہے شاپنگ بیگ کی وجہ سے جہاں سیوریج کے نظام میں خلل پڑ رہا ہے وہاں پر شاپنگ بیگ انسانی صحت کیلئے انتہائی مضر قرار دیئے گئے ہیں جن پر ملک بھر میں مرحلہ وار پابندی لگائی جارہی ہے ان کی جگہ کاغذ‘ کپڑے‘ کھجور اور بان سے تیار کردہ دلکش اور دیدہ زیب بیگ مارکیٹوں میں آرہے ہیں۔
ہمیں چین سے یہ سیکھنے کی ضرورت ہے کہ انہوں نے قوم کو کیسے غربت سے نکالا۔ تحریک انصاف کے اندر سے آواز اٹھ گئی
لاہور۔(اے پی پی)چیئر پرسن سٹینڈنگ کمیٹی فار چیف منسٹر انسپیکشن ٹیم مومنہ وحید نے کہا ہے کہ چین میں وزیرا عظم عمران خان کا تاریخی استقبال ہوا، عمران خان کا دورہ چین انتہائی کامیاب ہے اور اس دورے کے دور رس اثرات مرتب ہوں گے، انہوں نے کہاکہ پاکستان سرمایہ کاری کے لئے محفوظ ترین ملک ہے، معاشی اصلاحات کی وجہ سے سرمایہ کار پاکستان میں دلچسپی لے رہے ہیں، چین کے ساتھ آزادانہ تجارت کا معاہدہ کرنے جا رہے ہیں، چین پاکستان اقتصادی راہداری کے مسائل کے حل کے لئے سی پیک اتھارٹی قائم کی گئی ہے، گوادر بندرگاہ سی پیک منصوبے کی بنیاد ہے، پاکستان میں سیاحت کے شعبہ میں ترقی کے وسیع مواقع موجود ہیں، ہمیں گھروں کی قلت کا سامنا ہے،5 سال میں 50 لاکھ گھروں کے منصوبے پر کام کر رہے ہیں، حکومت نے غیر ملکی سرمایہ کاروں کو آزاد ویزے کی سہولت دی ہے، چاہتے ہیں کہ سرمایہ کار پاکستان آئیں اور منافع کمائیں۔پہلے چین نے پاکستان سے سیکھا اب پاکستان چین سے سیکھ رہا ہے۔ ہمیں چین سے یہ سیکھنے کی ضرورت ہے کہ انہوں نے قوم کو کیسے غربت سے نکالا۔ انہوں نے کہا کہ چین دنیا میں تیز ترین ترقی کرنے والا ملک ہے اور چین نے گزشتہ پانچ سال میں کرپشن کے خاتمہ کے لئے وزارتی سطح کے400 افراد کو سزائیں دے کر جیلوں میں ڈالا، ہم بھی بدعنوان افراد کے خلاف ایسی کارروائی کر نا چاہتے ہیں لیکن ہمارا نظام سست ہے، سرخ فیتے کی رکاوٹ بھی کرپشن کی وجہ سے ہوتی ہے آہستہ آہستہ صورتحال بہتر ہو جائے گی۔ غربت کے خاتمے کے لئے چین کے اقدامات سے پوری دنیا سیکھ سکتی ہے۔
عوام کی سہولت کے لیے سستابازار لگانے کا فیصلہ
پشاور۔(اے پی پی)اسسٹنٹ کمشنر مردان گل بانو نے کہا ہے کہ صوبائی حکومت کی ہدایت پر مردان میں عوام کی سہولت کے لیے سستابازار لگانے کا فیصلہ کیا ہے، سستا بازار میں عوام کو اشیاء خوردونوش سستے دام ملیں گی۔ان خیالات کا اظہار انہوں نے ایک اجلاس کی صدارت کرتے ہوئے کیا۔ اجلاس میں ایڈیشنل اسسٹنٹ کمشنر ڈاکٹر سہیل الرحمان، مختلف سرکاری محکموں کے افسران، تاجر تنظیموں کے عہدیداروں نے شرکت کی۔ اجلاس کی صدارت کرتے ہوئے اسسٹنٹ کمشنر مردان نے کہا کہ صوبائی حکومت نے مردان میں سستا بازار کے قیام کا فیصلہ کیا ہے جو جلد ہی چارسدہ چوک کے قریب کینال روڈ پر لگایا جائے گا،سستا بازار میں لوگوں کو گوشت، سبزی،دالیں،مرغی،پھل،گھی، مچھلی، چاول اور دیگر اشیا خوردنی کے علاوہ کاسمیٹکس کا سامان بھی سست داموں ملے گا، جس کا مقصد عوام کو عام مارکیٹ کے مقابلے میں سستے داموں پر اشیائے خوردونوش کی سہولیات بہم پہنچانا ہے۔ اسسٹنٹ کمشنر نے متعلقہ حکام کو ہدایت کی کہ سستا بازار کے لیے مختص جگہ پر تمام سہولیات کی فراہمی کے لیے فوری اقدامات کیے جائیں۔
