پاکستان شوگر ملز ایسوسی ایشن پنجاب زون نے نگراں وزیر تجارت کو خط لکھ کرچینی کی برآمد کیلئےمدد مانگ لی خط کے متن میں کہا گیا ہے کہ نگراں وزیر تجارت اضافی چینی کی برآمد کا معاملہ وفاقی حکومت سے اٹھائیں، شوگرملز مالکان نے مزید ڈھائی لاکھ میٹرک ٹن چینی برآمد کرنے کی اجازت مانگ لی، خط میں مزید کہا گیا ہے کہ شوگر انڈسٹری سے 5 لاکھ میٹرک ٹن چینی کی برآمد کا وعدہ کیا گیا تھا۔ اس سال جنوری میں ڈھائی لاکھ ٹن چینی برآمد کی اجازت دی گئی تھی۔خط میں کہا گیا ہے کہ اضافی چینی کی برآمد سے 40 کروڑ ڈالر زرمبادلہ حاصل ہوگا۔پاکستان شوگر ملز ایسوسی ایشن نے اپنے خط میں کہا کہ شوگر ملز کے پاس31 اکتوبر 2023 تک11 لاکھ 30 ہزار ٹن چینی کا ذخیرہ تھا، چینی کا اضافی اسٹاک 2 ماہ سے زائد عرصے تک چلے گا۔
Author: صدف ابرار
-
یہ الیکشن نہیں نامزدگی ہو رہی ہے جو سلیکشن پلس ہے،سابق سپیکر اسد قیصر
کرپشن کے الزام کے کیس میں اینٹی کرپشن صوابی نے پی ٹی آئی رہنما اسد قیصر کو آج جوڈیشل مجسٹریٹ محمد خلیل خان کی عدالت پیشی کے موقع پر کارکنوں کی بڑی تعداد موجود تھی جس کے پیش نظر سکیورٹی کے سخت انتظامات کئے گئے تھے۔ دوران سماعت اسد قیصر کے وکیل ارشد ایڈوکیٹ نے کہا کہ اسد قیصر کو جوڈیشل کرنے کے بعد اب ہم اینٹی کرپشن کورٹ میں ضمانت کے لئے درخواست دینگے۔بعدازاں عدالت نے اسد قیصر کو گجوخان میڈیکل کالج صوابی کے لئے طبی آلات کی خریداری میں کرپشن کے الزام میں جوڈیشل ریمانڈ پر جیل بھیج دیا گیا۔
سابق اسپیکر قومی اسمبلی کا کہنا تھا ک ہمیں لیول پلیئنگ فیلڈ چاہئے اور جو ہمارے اوپر کیسز ہیں ہم ان کا قانونی طور پر مقابلہ کریں گے لیکن جس طرح ہماری پارٹی کو ہراساں کیا جا رہا ہے، ہمارے ساتھ ظلم ہو رہا ہے یہ قابل مذمت ہے،سابق اسپیکر قومی اسمبلی اسد قیصر کا کہنا ہے کہ نواز شریف اپنے آپ کو وزیرِاعظم ڈکلیئر کر رہے ہیں،اس طرح کے الیکشن کی کیا ساکھ ہو گی اور اگر نواز شریف وزیر اعظم بنتا ہے تو اسے کون مانے گا۔ضرورت اس بات کی ہے کہ ملک میں آزاد اور منصفانہ الیکشن ہو اور عوام فیصلہ کریں اور اگر عوام نے فیصلہ نہیں کرنا تو پھر الیکشن کی کیا ضرورت ہے۔اسد قیصر نے کہا کہ اس وقت جو نگران حکومت ہے کیا وہ اس ملک میں آزاد اور منصفانہ الیکشن چاہتے ہیں،کیا وہ تمام پارٹیوں کو لیول پلیئنگ فیلڈ دینا چاہتے ہیں، پوری دنیا دیکھ رہی ہے۔یہ الیکشن نہیں بلکہ نامزدگی ہو رہی ہے، یہ سلیکشن پلس ہے، اگر اس قسم کا الیکشن ہو جائے تو کون مانے گا، نہ دنیا مانے گی اور نہ ہی اس ملک کے عوام مانے گے۔ا
-
پنجاب :لاہور ہائی کورٹ کا سموگ ایمرجنسی نافذ کرنے کا حکم
لاہور ہائیکورٹ نے صوبائی دارالحکومت میں بڑھتی ہوئی سموگ کے خاتمے کیلئے فوری اسموگ ایمرجنسی نافذ کرنے کا حکم دے دیا۔ لاہور ہائیکورٹ کے جسٹس شاہد کریم نے اسموگ کے تدارک کیلئے دائر درخواستوں پر سماعت کی۔ کمشنر لاہور محمد علی رندھاوا سمیت دیگر افسران عدالت کے روبرو پیش ہوئے۔ جسٹس شاہد کریم نے سموگ کی موجودہ صورتحال پر ناراضگی کا اظہار کرتے ہوئے کہا کہ اسموگ کا جو احوال ہے اس کی ذمہ دار حکومت ہے، شہر کی جو حالت ہے وہ آپ دیکھ لیں، آپ شہر کے مالک ہو آپ سب کچھ کرسکتے ہو، پہلے یہ سموگ نومبر کے آخر اور دسمبر میں آتی تھی، اب یہ سموگ اکتوبر میں شروع ہوچکی ہےسموگ کی خطرناک صورت حال کے پیش نظرپنجاب حکومت نے بڑا فیصلہ کرتے ہوئے 10 اضلاع کے تعلیمی ادارے کرنے کا فیصلہ کیا گیا،جسکی باقائدہ نوٹینفکشن جاری کار دی گئی نوٹیفکیشن کے مطابق 18 نومبر کو لاہور، ننکانہ صاحب، شیخوپورہ، قصور، گوجرانوالہ، گجرات، سیالکوٹ، نارروال، حافظہ آباد، اور منڈی بہاؤالدین میں تعلیمی ادارے بند رہیں گے جبکہ مارکیٹیں، دکانیں، جم اور سینماء ہالز دوپہر 3 بجے کھلیں گے۔
لاہور ہائیکورٹ نے تمام سکولز، کالجز کے بچوں کو کالا دھواں چھوڑنے والے کارخانوں کی اطلاع دینے کی ہدایت کرتے ہوئے کہا کہ سکول کالجز کے بچے اپنے علاقوں میں اگر کالا دھواں چھوڑنے والا کوئی کارخانہ ہے تو اطلاع دیں، کمشنر لاہور سمیت دیگر افسران کل سے سکولز کالجز میں جاکر بچوں کو آگاہ کریں، کالا دھواں چھوڑنے والی فیکٹریوں کو سیل کر کے ڈی سیل نہ کیا جائے۔ -
قوم نے فیض آباد دھرنا کیس میں ناانصافی کا خمیازہ 9 مئی کے واقعات کی صورت بھگتا، سپریم کورٹ
9 مئی کے پر تشدد واقعات فیض آباد دھرنے کیس پر عملدارمد نہ کرنے کی وجہ سے سامنے آیا ، سپریم کورٹ نے فیض آباد دھرنا عمل درآمدکیس کی گزشتہ روز (15 نومبر) کی سماعت کا حکم نامہ جاری کردیا ہے جس میں عدالت نے 9 مئی کے واقعات کا حوالہ بھی دیا ہے۔ فیض آباد دھرنا کیس کے فیصلے کو مختلف حکومتوں نے 5 سال تک نظر انداز کیا، حکم نامے میں چیف جسٹس پاکستان جسٹس قاضی فائز عیسٰی نے آبزرویشنز دیں کہ ماضی کے پرتشدد واقعات کے لیے نہ کسی کو ذمہ دار ٹھہرایا گیا اور نہ ہی کوئی کارروائی ہو سکی،کوئی حیرت کی بات نہیں کہ فیصلے پر عمل نہ ہونے سے ذاتی مقاصد کے لیے پرتشدد واقعات کرنا معمول بنا، اس سے آزاد عدلیہ اور بہتر پاکستان کے لیے جد و جہد کرنے والے متاثرین کے ساتھ بھی ناانصافی ہوئی، قوم نے ناانصافی کا خمیازہ 9 مئی کے واقعات کی صورت بھگتا۔ حکمنامے میں کہا گیا کہ فیض آباد دھرنے کے فیصلے کیخلاف نظرثانی درخواستیں دائر ہوئیں جنہیں سماعت کیلئے مقرر نہ کیا گیا جس کے سبب عدالتی فیصلے پر عمل درآمد نہ ہوا۔
سپریم کورٹ نے حکم نامے میں کہا کہ شیخ رشید کے وکیل نے کہا میں نظرثانی درخواست واپس لینا چاہتا ہوں۔ عدالت نے بار بار پوچھا درخواست دائر کیوں کی، شیخ رشید کے وکیل نے جواب دیا غلطی فہمی کے سبب نظرثانی دائر کی۔ حکم نامے میں کہا گیا کہ تعجب ہے ایسا سیاست دان جو طویل عرصہ تک رکن پارلیمنٹ رہا اور وفاقی وزیر جیسے اعلیٰ منصب پر فائز رہا اسے غلط فہمی ہوگئی، جس کے سبب نظرثانی درخواست دائر کی، عدالت نے یہ بھی پوچھا کیا شیخ رشید نے نظرثانی درخواست کسی کے کہنے پر دائر کی، جواب دہرایا گیا نظرثانی درخواست غلطی فہمی کی بنا پر دائر کی۔عدالتی حکمنامے میں نیا انکشاف سامنے آگیا جس کے مطابق 25 اپریل 2019کو سابق چیف جسٹس آصف سعید کھوسہ کی ہدایت پر درخواستیں کاز لسٹ سے نکال دی گئیں۔
حکم نامے میں سپریم کورٹ نے 4 سال 8 ماہ تک کیس مقرر نہ کرنے پر ذمہ داری قبول کرتے ہوئے قرار دیا کہ سپریم کورٹ اپنے اوپر عوام کا اعتماد بحال کرنے کے لیے اتنے سال کیس مقرر نہ ہونے اور ہیر پھیر کرنے کی ذمہ داری تسلیم کرتی ہے، سپریم کورٹ قرار دیتی ہےکہ ماضی کی غلطیاں نہیں دہرائی جائیں گی، سچ آزاد کرتا ہے اور اداروں کو مضبوط بناتا ہے، پاکستانی عوام کا حق ہے کہ ان تک سچ پہنچایا جائے۔
عدالت نے کہا ہے کہ ہر ادارے کا فرض ہے کہ وہ ذمہ داری اور شفافیت کا مظاہرہ کرے، اداروں سے غلطی ہو تو اس کو تسلیم کرنا چاہیے، عوام کا اداروں پر عدم اعتماد آمریت کو فروغ اور جمہوریت کی نفی کرتا ہے، اپنے اداروں کو داغدار کرنے والے اداروں کو ناقابل تلافی نقصان پہنچانے کے ساتھ اپنی انا کی تسکین کرتے ہیں۔حکمنامے میں کہا گیا کہ نظرثانی درخواستیں سماعت کیلئے مقرر نہ ہونے پر متعلقہ عدالتی حکام سے پوچھا گیا، ایڈیشنل رجسٹرار فیکچر اور ایڈیشنل رجسٹرار جوڈیشل نے اپنی رپورٹس دیں، جن کے مطابق 25 اپریل 2019کو نظرثانی درخواستیں فائنل کاز لسٹ کے ڈرافٹ میں دن ایک بج کر بارہ منٹ پر شامل ہوئیں، اسی دن محض پانچ گھنٹے بعد اس وقت کے چیف جسٹس آصف سعید کھوسہ کی ہدایت پر شام پانچ بج کر چھ منٹ پر یہ درخواستیں فائنل کاز لسٹ سے نکال دی گئیں۔حکم نامے میں مزید کہا گیا ہےکہ یہ یاد دلانا ضروری نہیں ہےکہ سپریم کورٹ کے ہر حکم پر عمل درآمد کرانا ضروری ہے، فیض آباد دھرنا فیصلے پر تمام نظرثانی درخواستیں واپس لینے کی بنیاد پر نمٹائی جاچکی ہیں، اب یہ دیکھنا ہوگا کہ فیض آباد دھرنا فیصلے پر عمل درآمد نہ کرنے والوں کے خلاف کیوں نہ توہین عدالت کی کارروائی کی جائے۔عدالت نے ہدایت کی ہے کہ الیکشن کمیشن ٹی ایل پی کی فارن فنڈنگ کے متعلق ایک ماہ میں رپورٹ جمع کروائے، شیخ رشید کی نظر ثانی درخواست اور ابصار عالم کی متفرق درخواست واپس لینے کی بنیاد پر خارج کی جاتی ہے۔فیض آباد دھرنا فیصلے پر عمل درآمد کیس کی مزید سماعت 22 جنوری 2024 کو ہوگی۔
-
ایون فیلڈ اور العزیزیہ ریفرنس میں نواز شریف کی اپیلیں سماعت کے لئے مقرر
نواز شریف کی اپیلوں کے حوالے سے بڑی پیش رفت ہوئی ،ایون فیلڈ ریفرنس اور العزیزیہ ریفرنس میں نواز شریف کی اپیلیں سماعت کے لئے مقرر کر دئے گئے،
اسلام آباد ہائیکورٹ نے 21 نومبر کو نواز شریف کی اپیلیں سماعت کے لیے مقرر کر دیں،چیف جسٹس عامر فاروق اور جسٹس میاں گل حسن اورنگزیب سماعت کریں گے.عدالت نے نواز شریف کی بیرون ملک سے واپسی پر اپیلیں بحال کیں تھیں
واضح رہے کہ نواز شریف کو احتساب عدالت نے العزیزیہ اور ایون فیلڈ ریفرنسز میں سزا سنائی تھی، نواز شریف نے احتساب عدالت کے فیصلوں کو 2018 سے چیلنج کر رکھا ہے، -
پی سی بی چئیر مین بھارت پہنچ گئے
پاکستان کرکٹ بورڈ (پی سی بی) مینجمنٹ کمیٹی کے چئیرمین ذکا اشرف اور انکے ہمراہ چیف ایگزیکٹیو آفیسر (سی ای او) سلمان نصیر آئی سی سی اجلاس میں شرکت کیلئے بھارت پہنچ گئے۔انٹرنیشنل کرکٹ کونسل (آئی سی سی) بورڈ اجلاس 18 نومبر کو بھارت میں ہوگا۔
ذکا اشرف اور سلمان نصیر آئی سی سی اجلاس میں شرکت کے بعد احمد آباد میں 19 نومبر کو کھیلا جانے والا ورلڈ کپ فائنل بھی دیکھیں گے۔ -
فلسطین کی لفظی حمایت بند کر کے عملی مظاہر ہ کرے،مولانا فضل الرحمن
نوشہرہ : جمعیت علمائے اسلام کا طوفان اقصیٰ کانفرنس سے خطاب میں فضل الرحمان نے کہا کہ غزہ میں مظلوم شہریوں پر بمباری کی جا رہی ہے، بیت المقدس ہمارا ہے مسجد الاقصیٰ ہماری ہے اسے حاصل کرنا ہمارا حق ہے، آج ایک مسلمان بھائی کے شانہ بشانہ کھڑا ہونا ہر مسلمان پر فرض ہے۔فضل الرحمان نے کہا کہ بچوں اور خواتین سمیت 12 ہزار فلسطینی شہید کر دیے گئے، کیا اسرائیل جنگی جرائم نہیں کر رہا؟ عالمی عدالت انصاف یا بین الاقوامی انسانی حقوق کی تنظیمیں حق کی بات کب کریں گی؟
نوشہرہ : قائد جمعیت مولانا فضل الرحمان جلسے سے خطاب کر رہے ہیں#طوفان_الاقصٰی_کانفرنس_نوشہرہ pic.twitter.com/0a1xeqC1iI
— Jamiat Ulama-e-Islam Pakistan (@juipakofficial) November 16, 2023
انہوں نے کہا کہ پاکستان واحد اسلامی ملک ہے جس کے پاس ایٹم بم ہے لیکن اس کے باوجود ہم خوفزدہ ہیں، ایٹم بم ہماری حفاظت کیلیے ہے اور ہم ایٹم بم کی حفاظت میں لگے رہتے ہیں۔ ان کا کہنا تھا کہ پوری دنیا کا دباؤ ہم پر ہے، میں نے قطر جا کر مجاہدین کی قیادت سے ملاقات کی تو انہوں نے کہا کہ ہمیں سب سے زیادہ توقع پاکستان سے ہے۔
سربراہ جے یو آئی (ف) نے کہا کہ ہم نے اپنے ملک کی آزادی اور حریت کو امریکا کی بھینٹ چڑھا دیا، انگریزوں سے نجات کے باوجود آج بھی ہم ان کی پیری کو تیار بیٹھے ہوتے ہیں، آزادی تب ہوگی جب ہم اپنے رب کی غلامی کریں گے۔ -
نسیم شاہ کا کوئٹہ گلیڈی ایٹرز کو الوداع کہنے ارادہ
دائیں ہاتھ کے فاسٹ باؤلر نسیم شاہ جنہوں نے 2019 میں کوئٹہ گلیڈی ایٹرز میں شمولیت اختیار کی تھی، پاکستان سپر لیگ (پی ایس ایل) کے آئندہ نویں ایڈیشن کے لیے فرنچائز کے ساتھ اپنی وابستگی ختم کرنے کے لیے تیار ہیں۔میڈیا رپورٹ کے مطابق شاہ نے ٹیم سے علیحدگی کے اپنے فیصلے کی ذاتی وجوہات بتائی ہیں۔
رپورٹ میں مزید کہا گیا ہے کہ پی ایس ایل کے آئندہ ایڈیشن کے لیے شاہ کی خدمات حاصل کرنے میں اسلام آباد یونائیٹڈ اور پشاور زلمی دونوں کی جانب سے قابل ذکر دلچسپی ہے۔ ان میں سے کسی ایک ٹیم میں نسیم شاہ کے ممکنہ اقدام کے بارے میں بحث زور پکڑ رہی ہیں، اس قیاس کے ساتھ کہ وہ مسودہ تیار کرنے کے عمل میں داخل ہو سکتا ہے یا تجارتی معاہدے کا حصہ بن سکتا ہے۔
واضح رہے کہ اس سال کے شروع میں کوئٹہ گلیڈی ایٹرز اور لاہور قلندرز کے درمیان پی ایس ایل 8 کے میچ کے دوران نسیم شاہ بظاہر مایوس نظر آئے تھے، جس سے مداحوں نے اپنے عدم اطمینان کا اظہار کیا اور اگلے سیزن میں اپنی فرنچائز کی تبدیلی کی وکالت کی۔
نسیم ایشیا کپ کے دوران زخمی ہو گئے تھے جس کی وجہ سے وہ آئی سی سی ورلڈ کپ 2023 سے باہر ہو گئے تھے۔ انجری کے بعد فاسٹ باؤلر کے اکتوبر میں کندھے کی سرجری ہوئی تھی اور وہ اس وقت بحالی کے عمل سے گزر رہے ہیں۔ -
لاہور : میگا پراجیکٹ شاہدرہ فلائی اوور کا افتتاح
صوبائی دارالحکومت لاہور کا ایک اور میگا پراجیکٹ شاہدرہ فلائی اوور مکمل ہونے کے نگران وزیراعلیٰ پنجاب سید محسن رضا نقوی نے اافتتاح کر کے ٹریفک کے لئے کھول دیا . شاہدرہ چوک فلائی اوور منصوبے کا 10 ماہ کا کام ریکارڈ 6 ماہ سے بھی کم مدت میں مکمل کیا گیا ہے جہاں جی ٹی روڈ اور این فائیو سے منسلک تین، تین لینز پر مشتمل 850 میٹر طویل دو رویہ فلائی اوورز تعمیر کیے گئے ہیں۔
نگران وزیراعلیٰ پنجاب محسن نقوی کی مانیٹرنگ کی بدولت شاہدرہ چوک فلائی اوور 6 ماہ سے بھی کم مدت میں ٹریفک کیلئے کھولا جا رہا ہے جس کی بدولت شہر کے اہم داخلی و خارجی راستے پر ٹریفک کا دیرینہ مسئلہ حل ہوگا۔ اس حوالے سے نگران وزیراعلیٰ کا کہنا تھا کہ شاہدرہ فلائی اوورز سے یومیہ تین لاکھ سے زائد گاڑیاں مستعفید ہوں گی اور شہریوں کے قیمتی وقت اور ایندھن کی مد میں کروڑوں روپے کی بچت ہوگی۔
-
خصوصی سرمایہ کاری سہولت کونسل کی ایپکس کمیٹی کا اجلاس،مختلف امورکا جائزہ
نگران وزیرِ اعظم انوار الحق کاکڑ کے زیر صدارت خصوصی سرمایہ کاری سہولت کونسل کی ایپکس کمیٹی کا اجلاس ہوا، اجلاس میں نجکاری کے عمل کو مزید تیز کرنے کی ہدایت کی گئی۔ ایپکس کمیٹی کے اجلاس جس میں آرمی چیف، نگراں کابینہ، نگران وزراء اعلیٰ اور متعلقہ اعلیٰ حکومتی اہلکاروں نے بھی شرکت کی۔ اعلامیہ کے مطابق اجلاس میں کونسل کے تحت ملک میں سرمایہ کاری کے فروغ کیلئے اٹھائے جانے والے اقدامات کا جائزہ لیا گیا.
اجلاس کو مختلف وزارتوں نے ملک میں سرمایہ کاری کے فروغ اور مقرر شدہ اہداف کے بروقت حصول میں سہولت کیلئے اقدامات پر بریفنگ دی، کمیٹی نے کونسل کے تحت سرمایہ کاری کے فروغ کیلئے اٹھائے گئے مختلف اقدامات پر پیش رفت کو انتہائی اطمینان بخش قرار دیا۔
کمیٹی نے کونسل کے تحت ملک میں بیرونی سرمایہ کاری کیلئے دوست ممالک سے روابط میں تیزی، سرکاری و نجی اداروں سے تعاون کے اقدامات کی تعریف کی، کمیٹی نے سرمایہ کار براداری کے ساتھ مختلف اقدامات کے حوالے سے مؤثر طریقے سے روابط بڑھانے کی بھی تعریف کی جس کی بدولت ملکی و غیر ملکی سطح پر منصوبوں کے حوالے سے پیش رفت میں تیزی واقع ہوئی ہے۔
کمیٹی نے ملک میں تیل اور گیس کے شعبے میں سرمایہ کاری کر کے اس مسئلے کے پائیدار حل کیلئے جامع لائحہ عمل بنا کر پیش کرنے کی ہدایت کی، کمیٹی نے خسارے کے شکار سرکاری اداروں کی نجکاری کے عمل کا جائزہ لیا اور اس کی کارکردگی پر اطمینان کا اظہار کیا، کمیٹی نے نجکاری کے اس عمل کو مزید تیز کرنے کی ہدایت کی۔
اجلاس میں کمیٹی نے ملک میں سرمایہ کاری کے فروغ کے اقدامات کے ساتھ ساتھ سرمایہ کاروں کے اعتماد کو بڑھانے کے پالیسی اقدامات کا بھی جائزہ لیا، ان پالیسی اقدامات میں غیر ملکی سرمایہ کاروں کے منافع کی منتقلی، ملک میں کاروباری تنازعات کے حل کے عمل، مواصلاتی بنیادی ڈھانچے اور افرادی قوت کی بین الاقوامی معیار کے مطابق ترقی، ایگزم بینک کو ترجیحی بنیادوں پر فعال بنانا شامل ہیں۔
وزیرِ اعظم نے تمام متعلقہ اداروں و اہلکاروں کو ہدایت کی کہ کونسل کے تحت اقدامات پر بھرپور تعاون و محنت سے عمل کیا جائے تاکہ پاکستان نہ صرف قلیل و وسط مدتی ثمرات سے فائدہ اٹھا سکے بلکہ ملک کے وسیع تر مفاد میں طویل مدتی اقدامات کی راہ بھی ہموار ہو۔
اس موقع پر آرمی چیف جنرل سید عاصم منیر نے پاکستان کی پائیدار معاشی بحالی میں پاک فوج کے حکومت کے ساتھ مکمل تعاون کے عزم کا یقین دلایا۔