Author: صدف ابرار

مسلم لیگ ن کے قائد اور سابق وزیراعظم نواز شریف چار سال کے طویل عرصے کے بعد رائے ونڈ میں اپنی رہائش گاہ جاتی عمرا پہنچ گئے۔ نواز شریف کے استقبال کے لیے بڑی تعداد میں لیگی کارکن بھی جاتی عمرا پہنچ گئے ہیں، کارکنوں کی جانب سے آتش بازی بھی کی گئی، سابق وزیر اعظم کی آمد پر صدقےکا بکرا بھی جاتی عمرا پہنچا دیا گیا۔

پاکستان مسلم لیگ (ن) کے قائد محمد نواز شریف رائیونڈ میں گھر پہنچنے پر پہلے آبائی قبرستان گئے .نوازشریف کی والدہ، والد، بھائی عباس شریف کی قبروں پر حاضری، پھول رکھے اور فاتحہ خوانی کی،نواز شریف اپنی اہلیہ بیگم کلثوم نواز کی قبر پر گئے ،نواز شریف نے بیگم کلثوم نواز کی قبر پر پھول رکھے اور فاتحہ خوانی کی ،نوازشریف خاندان کے دیگر مرحومین کی قبروں پر بھی گئے اور فاتحہ خوانی کی.نواز شریف نے خاندان کے مرحومین کے لئے قرآن خوانی کی ،مریم نواز شریف اور دیگر اہل خانہ بھی اس موقع پر موجود تھے

واضح رہے کہ نواز شریف چار سال بعد آج صبح وطن واپس پہنچے تھے، سابق وزیراعظم کے طیارے نے اسلام آباد انٹرنیشنل ائیرپورٹ پر لینڈ کیا جہاں اسحاق ڈار اور اعظم نذیر تارڑ نے پارٹی قائد کا استقبال کیا۔ ائیرپورٹ پر اسٹیٹ لاؤنج میں نواز شریف کی مسلم لیگ (ن) کی قانونی ٹیم سے مشاورت ہوئی جس کے بعد انہوں نے قانونی دستاویزات پر دستخط کیے۔ اسکے بعد نواز شریف لاہور چلے گئے. لاہور ائیرپورٹ سے نواز شریف ہیلی کاپٹر کے ذریعے جلسہ گاہ کے لیے روانہ ہوئے۔ ان کے ہیلی کاپٹر کیلئے شاہی قلعےکے پاس دیوان خاص پر ہیلی پیڈ بنایا گیا تھا، نواز شریف نے ہیلی کاپٹر سے اترنے کے بعد نماز ادا کی۔
بعدازاں مینار پاکستان پر ایک بڑے جلسے سے خطاب کرتے ہوئے نواز شریف کا کہنا تھا کہ میرے دل میں انتقام کی تمنا نہیں، قوم کی خدمت کرنا چاہتاہوں، ہمیں ڈبل اسپیڈ سے دوڑنا ہوگا۔

مسلم لیگ ق کے سربراہ چوہدری شجاعت حسین نے مسلم لیگ ن کے قائد نواز شریف کی وطن واپسی کی مبارکباد دے کر خوش آمدید کہا ہے چوہدری شجاعت حسین کا کہنا ہےکہ اس وقت ملک کو یکجہتی اور مفاہمت کی ضرورت ہے، نواز شریف کو معیشت کی بحالی اور مہنگائی کے خاتمےکے لئے شدید محنت کرنی ہوگی، چوہدری شجاعت حسین کا کہنا ہےکہ عوام کو نواز شریف سے بہت امیدیں ہیں، ملک کو انتقامی سیاست نہیں بلکہ مضبوط معیشت کی ضرورت ہے۔
انہوں نے مزیدکہا کہ لوگوں کو ریلیف فراہم کرنا اور قومی مفادات کا تحفظ سب کی مشترکہ ذمہ داری ہے۔

استحکام پاکستان پارٹی کی مرکزی سیکرٹری اطلاعات ڈاکٹر فردوس عاشق اعوان نے نواز شریف کی آمد کو سیاسی موسم کے تبدیلی کا اشارہ ہے، فردوس عاشق اعوان کا کہنا تھا کہ نواز شریف کی آمد سے انتخابات کے ہونے کے امکانات مزید روشن ہو گئے ہیں استحکام پاکستان پارٹی اپنا پہلا انتخابی مقابلہ بھرپور طریقے سے لڑے گی۔
مسلم لیگ ن کے قائد او رسابق وزیراعظم نواز شریف کی آمد پر ردعمل دیتے ہوئے فردوس عاشق کا کہنا تھا کہ سب ٹھیک کر دے گا والوں نے سات مرتبہ صوبے میں اور تین مرتبہ وفاق میں کچھ نہ کیا ہے،اگر 16 ماہ کی حکومت میں کچھ کیا ہوتا تو عوام کو یہ دن نہ دیکھنا پڑتے۔
فردوس عاشق اعوان کاکہنا تھا کہ سولہ ماہ کی حکومت نے عوام کو جو زخم دئیے کاش نواز شریف اس کیلئے کوئی مرہم ساتھ لے آتے،ساڑھے تین سالہ اور سولہ ماہ کی حکومت والوں نے بیڑہ غرق کر دیا ہے،آج عام آدمی ان لوگوں کی کرتوتوں اور نا اہلیوں کی وجہ سے رو رہا ہے۔
ترجمان استحکام پاکستان پارٹی نے کہاکہ ساڑھے تین سال حکومت کو نا اہل کہنے والوں نے سولہ ماہ بھی نا اہلی کے سوا کچھ نہ دیا ہے،ان میں نہ ویژن نے نہ کام کرنے کی کمٹمنٹ اور نا ہی ایمانداری،کوئی پنکی پیرنی کا مرید ہے تو کوئی لکشمی دیوی کا پجاری۔
فردوس عاشق اعوان نے کہاکہ عوام کو پیشہ ور دیہاڑی بازوں نے مل کر اور جی بھر کر لوٹا ہے،آئی پی پی عوام کو ان کے چنگل سے نکالنے کےلئے بھرپور اقدامات کرے گی ،ملکی معیشت کو مستحکم بنا کر ملک کو تعمیر و ترقی کی راہ پر چلیں گے۔ ان کاکہناتھا کہ ساڑھے تین سال کی حکومت نے ملک کا ستیا ناس کیا،جبکہ سولہ ماہ کی حکومت نے ملک کا سوا ستیاناس کیا۔

مینار پاکستان پر ن لیگ کے جلسے میں موجود خواتین کا بھوک سے برا حال،جلسے میں بلائے جانے والی خواتین کا گلہ، کہ ن لیگ والوں نے جلسے میں یہی کہہ کر بلایا تھا کہ وہاں کھانے پینے کا مکمل انتظام ہو گا لیکن پارٹی کی جانب سے کوئی انتظام نہ ہونے کی وجہ سے خواتین اور بچے شدید بھوک اور پیاس کی وجہ سے رو پڑی .جلسے میں شرکت کرنے والی خواتین نے الزام لگایا کہ ان کو دھوکے سے جلسے میں جمع کیا گیا ہے اور انکے لئے کوئی انتظام نہیں کیا گیا خواتین ایک ویڈیو میں یہ کہتے ہوئے دیکھی جاسکتی ہے کہ وہ بہت غریب ہے اور اپنے لئے کھانے پانی کا انتظام نہیں کر سکتی،
واضح رہے کہ عموما ن لیگ کے جلسوں میں بریانی کا انتظام کیا جاتا ہے لیکن آج نواز شر یف کے وطن واپسی کے موقع پر عوام کی بڑی تعداد جلسے میں شرکت تو کر رہی ہے لیکن ان کے لئے پانی تک کا نتظام موجود نہیں.