Blog


مصنوعی ذہانت (AI) کی بڑھتی ہوئی مقبولیت کے باوجود بھارت میں حالیہ سروے نے یہ ظاہر کیا ہے کہ آئی ٹی شعبے میں ملازمین کو نوکریوں کے خطرے کی زیادہ فکر کرنے کی ضرورت نہیں ہے۔ رپورٹ کے مطابق، اے آئی نے ملازمین کی جگہ لینے کے بجائے کام کے طریقوں اور مہارتوں کی نوعیت بدل دی ہے۔
یہ تحقیق انڈین کونسل آف ریسرچ آن انٹرنیشنل اکنامک ریلیشنز (ICRIER) نے اوپن اے آئی کے تعاون سے تیار کی ہے، جس کا عنوان ہے: ’’اے آئی اور نوکریاں: یہ وقت مختلف نہیں ہے‘‘۔ رپورٹ میں کہا گیا ہے کہ حالیہ برطرفیوں کو براہِ راست اے آئی سے جوڑنا درست نہیں۔
‎سروے نومبر 2025 سے جنوری 2026 کے درمیان ہوا، جس میں بھارت کے 10 شہروں کی 650 آئی ٹی کمپنیوں کا جائزہ لیا گیا۔ محققین نے بھرتیوں، کاروباری طلب، پیداواری صلاحیت اور مہارتوں کے تقاضوں کا تجزیہ کیا۔
‎رپورٹ کے مطابق، اے آئی نے کام کو زیادہ منظم اور تیز بنایا ہے، پیداواری صلاحیت میں اضافہ ہوا ہے اور انسانی ملازمین کی بڑی تعداد بے روزگار نہیں ہوئی۔ البتہ انٹری لیول کی بھرتیوں میں کچھ کمی دیکھی گئی ہے، جبکہ درمیانی اور سینئر سطح کی بھرتیاں معمول کے مطابق جاری ہیں۔
‎تحقیق میں یہ بھی بتایا گیا کہ زیادہ آٹومیشن والے عہدے نسبتاً زیادہ خطرے میں ہیں، لیکن سافٹ ویئر ڈویلپرز، ڈیٹا انجینئرز اور ڈیٹا بیس ایڈمنسٹریٹرز کی مانگ میں اضافہ ہوا ہے۔ محققین کے مطابق مجموعی رجحانات کووڈ سے پہلے کے دور کے مترادف ہیں اور اے آئی نے شعبے کا بنیادی ڈھانچہ تبدیل نہیں کیا۔


بُکر انعام یافتہ بھارتی مصنفہ اروندھتی رائے نے برلن انٹرنیشنل فلم فیسٹیول سے اپنی شرکت واپس لے لی ہے۔ یہ فیصلہ انہوں نے اس وقت کیا جب جیوری کے صدر وِم وینڈرز نے اسرائیل کی غزہ میں کارروائی پر سوال کے جواب میں کہا کہ فلم سازوں کو ’سیاست سے دور رہنا چاہیے۔‘
اروندھتی رائے، جو اپنی 1989 کی فلم ’ان وچ اینی گیوز اٹ دوز ونز‘ کے بحال شدہ ورژن کی سکریننگ میں شرکت کرنے والی تھیں، نے کہا کہ فیسٹیول کے افتتاحی موقع پر پریس کانفرنس میں کیے گئے تبصروں کی وجہ سے وہ ’صدمے اور بیزاری‘ محسوس کر رہی ہیں۔
‎جب صحافی نے جیوری سے جرمن حکومت کی غزہ میں مبینہ نسل کشی کی حمایت اور دیگر انسانی حقوق کے مسائل کے حوالے سے سوال کیا تو جیوری کے سربراہ وینڈرز نے جواب دیا کہ فلم سازوں کو ’سیاست سے دور رہنا ہوگا۔‘
‎اروندھتی رائے نے ایک بیان میں اس رائے کو ’ناقابل قبول‘ قرار دیتے ہوئے کہا کہ انہوں نے ’انتہائی افسوس کے ساتھ‘ فیسٹیول سے الگ ہونے کا فیصلہ کیا ہے۔
‎انہوں نے مزید کہا: ’یہ سن کر حیرانی ہوئی کہ فن کو سیاسی نہیں ہونا چاہیے۔ یہ انسانیت کے خلاف جرائم پر بات کرنے کو روکنے کا ایک طریقہ ہے، حالانکہ یہ جرائم ہمارے سامنے حقیقی وقت میں ہو رہے ہیں۔ فنکاروں، مصنفین اور فلم سازوں کی ذمہ داری ہے کہ وہ اس کے خلاف آواز بلند کریں۔‘

ایرانی نائب وزیر خارجہ مجید تخت روانچی نے اتوار کو ایک انٹرویو میں کہا کہ ایران امریکہ کے ساتھ جوہری معاہدے تک پہنچنے کے لیے سمجھوتوں پر غور کرنے کو تیار ہے، بشرطیکہ واشنگٹن پابندیاں اٹھانے پر بات کرنے کے لیے رضامند ہو۔
بی بی سی کو دیے گئے انٹرویو میں تخت روانچی نے کہا کہ ایران پابندیوں کے بدلے اپنے جوہری پروگرام پر بعض اقدامات کرنے پر بات کرنے کے لیے تیار ہے، لیکن اس نے اس مسئلے کو میزائل پروگرام اور دیگر حساس امور سے جوڑنے کو بارہا مسترد کیا ہے۔
‎انہوں نے تصدیق کی کہ جوہری مذاکرات کا دوسرا دور منگل کو جنیوا میں ہوگا۔
‎تہران اور واشنگٹن کے درمیان عمان میں بات چیت کا عمل رواں ماہ ہی دوبارہ بحال ہوا ہے۔ تخت روانچی نے کہا: ’ابتدائی بات چیت کم و بیش مثبت سمت میں رہی، لیکن ابھی کوئی حتمی فیصلہ کرنا بہت جلدی ہوگا۔‘
‎ایک ذرائع نے جمعے کو روئٹرز کو بتایا تھا کہ امریکی وفد، جس میں سٹیو وٹکوف اور جیرڈ کشنر شامل ہیں، منگل کی صبح ایرانی وفد سے ملاقات کرے گا، اور عمانی نمائندے اس عمل میں ثالثی کر رہے ہیں۔


شمالی بھارت کی ریاست اتراکھنڈ میں ایک 42 سالہ جم مالک دیپک کمار نے مبینہ طور پر ہراساں کیے جانے والے 70 سالہ مسلمان دکان دار کے دفاع میں آگے آ کر نفرت انگیز رویے کے خلاف کھڑے ہو کر ملک میں مذہبی اتحاد کی ایک علامت قائم کر دی۔
26 جنوری کو دیپک کمار نے دیکھا کہ کچھ مردوں کا ایک گروہ دکان دار پر دباؤ ڈال رہا تھا کہ وہ اپنی مذہبی شناخت کی وجہ سے اپنی دکان کا نام بدل دے۔ دیپک کمار نے ہجوم سے کہا کہ بھارت میں ہر شہری کو مذہب سے قطع نظر مساوی سلوک حاصل ہونا چاہیے اور یہ حق ملک کے آئین میں محفوظ ہے۔
‎اس موقع پر جب ہجوم نے ان سے ان کا نام پوچھا، تو انہوں نے جواب دیا: ’میرا نام محمد دیپک ہے۔‘ یہ لمحہ سوشل میڈیا پر وائرل ہو گیا کیونکہ ان کے نام میں ہندو اور مسلم دونوں عناصر شامل ہیں؛ ’دیپک‘ سنسکرت سے ماخوذ ہے اور ’روشنی‘ کے معنی رکھتا ہے، جبکہ ’محمد‘ مسلم نام ہے۔
‎دیپک کمار کی مداخلت کے بعد مقامی سطح پر شدید ردعمل سامنے آیا اور مبینہ طور پر تقریباً ڈیڑھ سو افراد نے ان کے خلاف نعرے لگانے کے لیے جمع ہونا شروع کر دیا۔
‎دیپک کمار نے بی بی سی کو بتایا کہ انہوں نے بزرگ دکان دار کو دھمکانے والے نوجوانوں کو روکا اور کہا: ’میرا مقصد یہ تھا کہ میں ایک انڈین ہوں اور قانون کے تحت سب برابر ہیں۔‘
‎انہوں نے مزید بتایا کہ دکان دار کے نام ’بابا کلاتھس‘ کے لفظ ’بابا‘ پر تنازع پیدا ہوا، جو عام طور پر روحانی یا معزز افراد کے لیے استعمال ہوتا ہے اور ہندو یا مسلمان دونوں ہی اس لفظ کو استعمال کرتے ہیں۔ نوجوانوں کا دعویٰ تھا کہ یہ لفظ صرف ہندو دیوتا ہنومان کے لیے مختص ہونا چاہیے۔
‎دیپک کمار نے کہا کہ اس واقعے کے بعد انہیں دھمکیاں موصول ہوئیں اور ان کے جم ’ہلک جم‘ کے کلائنٹس کی تعداد تقریباً 150 سے گھٹ کر 15 رہ گئی، جس سے ان کی آمدنی متاثر ہوئی۔ انہوں نے مقامی میڈیا کو بتایا: ’آدھا شہر میری حمایت کرتا ہے، لیکن جب آپ اچھا کام کرتے ہیں تو ہر کوئی داد نہیں دیتا۔ ایمانداری کی قیمت چکانی پڑتی ہے۔‘