امریکی سینیٹر لنزے گراہم نے کہا ہے کہ ایران کے خلاف کارروائی سے پیچھے ہٹنا امریکی تاریخ کی سب سے بڑی غلطیوں میں شمار ہوگا اور یہ افغانستان سے ہنگامی انخلاء سے بھی بڑا بلنڈر ثابت ہوسکتا ہے۔
میونخ سیکیورٹی کانفرنس سے خطاب کرتے ہوئے انہوں نے کہا کہ ایران کے ساتھ مؤثر مذاکرات ممکن نہیں اور یہ مناسب نہیں کہ ایرانی قیادت سے وعدے کیے جائیں مگر بعد میں عملی اقدامات نہ کیے جائیں۔
ان کا کہنا تھا کہ امید ہے سابق امریکی صدر ڈونلڈ ٹرمپ اپنے بیانات اور وعدوں کی پاسداری کریں گے اور ایران کے معاملے پر واضح اور سخت فیصلے کریں گے۔
دوسری جانب میونخ میں ایرانی حکومت کے خلاف سینکڑوں افراد نے احتجاج کیا، جہاں ایران کے سابق ولی عہد رضا پہلوی نے مظاہرین سے خطاب کرتے ہوئے حکومت مخالف مؤقف پیش کیا۔
Blog
-
ایران پر کارروائی سے پیچھے ہٹنا امریکی تاریخ کی بڑی غلطی ہوگی، سینیٹر لنزے گراہم
-
خاران اور گرد و نواح میں زلزلہ
بلوچستان کے ضلع خاران اور گردونواح میں زلزلے کے جھٹکے محسوس کیے گئے ہیں-
زلزلے کے جھٹکے محسوس ہوتے ہی ، جس کے باعث شہریوں میں خوف و ہراس پھیل گیالوگ کلمہ طیبہ کا ورد کرتے ہوئے گھروں سے باہر نکل آئے تاہم کسی جانی یا مالی نقصان کی اطلاع موصول نہیں ہوئی زلزلہ پیما مرکز کے مطابق ریکٹر اسکیل پر زلزلے کی شدت 3.6 ریکارڈ کی گئی ،زلزلے کا مرکز خاران شہر سے 43 کلومیٹر دور جنوب مغرب میں تھا، جبکہ اس کی گہرائی 12 کلومیٹر ریکارڈ کی گئی۔
واضح رہے گزشتہ روز بھی خضدار اور گرد و نواح میں زلزلے کے جھٹکے محسوس کئے گئے تھے۔
-
محسن نقوی کے اعزاز میں سری لنکا کرکٹ کی جانب سے خصوصی تقریب کا انعقاد
چئیرمین پاکستان کرکٹ بورڈ محسن نقوی کے اعزاز میں سری لنکا کرکٹ کی جانب سے خصوصی تقریب کا انعقاد کیا گیا۔
چئیرمین پی سی بی محسن نقوی سے سری لنکا کرکٹ کے صدر شامئے سلوا اور دیگر اعلیٰ عہدیداران نے ملاقات کی، سری لنکن حکام نے محسن نقوی کو کھیل کے فروغ کیلئے گراں قدر خدمات پر خراج تحسین پیش کیا،سری لنکن وزیر کھیل سنیل سناوی، سیکرٹری دفاع سمپاتھ تویا کونتھسے، چیف ایگزیکٹو آفیسر سری لنکا کرکٹ ایشلے ڈی سلوا، سجیوا گوڈالیاڈا اور متعلقہ حکام بھی اس موقع پر موجود تھے۔
وفاقی وزیر اوورسیز پاکستانیز چوہدری سالک حسین، چیف آپریٹنگ آفیسر پی سی بی سمیر احمد اور چیف ایگزیکٹو آفیسر پی ایس ایل سلمان نصیر بھی ملاقات میں شریک ہوئےدونوں کرکٹ بورڈز نے کرکٹ کے فروغ کیلئے باہمی تعاون بڑھانے کے عزم کا اعادہ کیا، سری لنکا کرکٹ نے کولمبو آمد پر معزز مہمان محسن نقوی کا شکریہ ادا کیا۔
محسن نقوی نے کہا کہ کرکٹ جنٹلمین کھیل کے ساتھ محبت اور قربتیں بڑھانے کا ذریعہ ہے، کولمبو آکر بہت خوشی ہوئی چئیرمین پی سی بی نے کولمبو میں شاندار مہمان نوازی پر سری لنکا کرکٹ بورڈ کا شکریہ ادا کیا۔
-
علامہ محمد اقبال اسکالرشپس کے تحت بنگلہ دیشی طلبہ کا پہلا گروپ پاکستان پہنچ گیا
پاکستان بنگلہ دیش نالج کوریڈور کے تحت علامہ محمد اقبال اسکالرشپس پر منتخب بنگلہ دیشی طلبہ کا پہلا گروپ اعلیٰ تعلیم کے لیے پاکستان پہنچ گیا اس اقدام کا مقصد دونوں ممالک کے درمیان تعلیمی تعاون اور عوامی روابط کو مزید مضبوط بنانا ہے۔
پاکستان بنگلہ دیش نالج کوریڈور کے تحت علامہ محمد اقبال اسکالرشپس پر منتخب ہونے والے بنگلہ دیشی طلبہ پاکستان پہنچ گئے ہیں، جہاں وہ ملک کی معروف جامعات میں اعلیٰ تعلیم حاصل کریں گے ہوائی اڈے پر ہائر ایجوکیشن کمیشن اور متعلقہ جامعات کے نمائندگان نے طلبہ کا پرتپاک استقبال کیا اور انہیں تعلیمی و رہائشی امور سے متعلق بریفنگ دی۔
حکام کے مطابق اس اسکالرشپ پروگرام کا مقصد پاکستان اور بنگلہ دیش کے درمیان علمی روابط کو فروغ دینا، نوجوانوں کو معیاری تعلیم کے مواقع فراہم کرنا اور دونوں ممالک کے عوام کے درمیان باہمی اعتماد کو مضبوط بنانا ہے۔
ذرائع کے مطابق اگلے بیچ کے لیے انتخابی عمل جلد شروع کیا جائے گا تاکہ مزید طلبہ اس تعلیمی پروگرام سے مستفید ہو سکیں،وزارتِ خارجہ پاکستان اور ہائر ایجوکیشن کمیشن کی جانب سے پاکستان آنے والے طلبہ کے روشن مستقبل کے لیے نیک تمناؤں کا اظہار کیا گیا ہے۔
-
ٹی20 ورلڈ کپ، پاک بھارت ٹاکرا: قومی ٹیم اسٹیڈیم پہنچ گئی
پاکستان اور بھارت کے درمیان ٹی20 ورلڈ کپ کے اہم میچ سے قبل شائقین کرکٹ پرجوش ہیں، اور اب قومی ٹیم اسٹیڈیم پہنچ چکی ہے۔
میچ کے لیے ٹاس پاکستانی وقت کے مطابق شام 6 بجے ہوگا، جبکہ میچ کا آغاز ساڑھے 6 بجے ہوگا، شہر میں اب بارش کے امکانات کم ہوگئے ہیں،پریماداسا اسٹیڈیم کے باہر شائقینِ کرکٹ کی بڑی تعداد جمع ہے، جس کے باعث فضا میں غیر معمولی جوش و خروش پایا جاتا ہے۔
پاکستانی شائقین کے ساتھ ساتھ کئی سری لنکن کرکٹ مداح بھی کھل کر پاکستان کی حمایت کرتے نظر آئے، متعدد مقامی افراد گرین شرٹس پہنے اور پاکستان کے پرچم اٹھائے اسٹیڈیم کے گردونواح میں موجود تھے،مداحوں کا کہنا تھا کہ پاک بھارت مقابلہ محض ایک میچ نہیں بلکہ عالمی کرکٹ کا سب سے بڑا مقابلہ اور ایک عالمی اسپورٹس ایونٹ ہے، جس کی گونج دونوں ممالک سے کہیں آگے تک سنائی دیتی ہے۔
-
ترقیاتی منصوبوں میں تاخیر اور سستی اب قبول نہیں ،مراد علی شاہ
وزیراعلیٰ سندھ مراد علی شاہ نے کراچی میں ایک تقریب سے خطاب کرتے ہوئے واضح کیا ہے کہ ترقیاتی منصوبوں میں تاخیر اور سستی اب قبول نہیں کی جائے گی۔
وزیراعلیٰ سندھ مراد علی شاہ نے کہا کہ کراچی میں تعمیر ہونے والا نیا برج مقررہ مدت یعنی 100 دن میں مکمل کیا جائے اور اضافی 5-4 دن کا بہانہ اب نہیں چلے گا جس دن سے کام شروع ہوگا، اسی دن سے گنتی ہوگی اور انہیں یقین ہے کہ میئر کراچی مرتضیٰ وہاب اور ان کی ٹیم دن رات اس منصوبے کی نگرانی کریں گے تاکہ کسی قسم کی تاخیر نہ ہو۔
انہوں نے کہا کہ اس برج سے مقامی آبادی کو خاص فائدہ ہوگا، خصوصاً کیٹل کالونی اور ایکسپورٹ پراسیسنگ زون کے لوگوں کو سہولت ملے گی۔ وزیراعلیٰ نے بتایا کہ حال ہی میں کورنگی کاز وے کا تقریباً ساڑھے چھ ارب روپے کا منصوبہ مکمل کیا گیا، جبکہ اس سے پہلے پرانا پل خستہ حال ہونے کے باعث گرایا گیا تھا۔
مراد علی شاہ نے کہا کہ شارع بھٹو کا منصوبہ بھی تیزی سے مکمل کیا جا رہا ہے اور آئندہ چار سے چھ ہفتوں میں اسے کیماڑی سے کاٹھور تک مکمل کر لیا جائے گا انہوں نے دوبارہ ہنستے ہوئے کہا کہ وہ تاریخ اس لیے نہیں دیتے کیونکہ کبھی کبھار مرتضیٰ وہاب کی جانب سے سستی ہو جاتی ہے، تاہم کام ہر صورت مکمل ہوگا۔
انہوں نے مزید بتایا کہ شارع بھٹو کو قیوم آباد سے کراچی پورٹ تک توسیع دینے کے منصوبے کی بنیاد بھی جلد رکھی جائے گی، صرف چند این او سی باقی ہیں دو سے تین سال میں یہ منصوبہ مکمل کر لیا جائے گا جس سے بھاری ٹریفک شہر سے باہر منتقل ہوگی اور ٹریفک جام اور حادثات میں کمی آئے گی۔
وزیراعلیٰ سندھ نے اعلان کیا کہ رواں سال کراچی میں تقریباً 300 ارب روپے کے ترقیاتی منصوبے شروع کیے جائیں گے۔ انہوں نے بتایا کہ لوکل گورنمنٹ، کے ایم سی، کے ڈی اے، ٹرانسپورٹ، واٹر کارپوریشن اور سالڈ ویسٹ مینجمنٹ سمیت مختلف ادارے ان منصوبوں پر کام کریں گے۔
انہوں نے کہا کہ بلدیہ کو سڑکوں کی مرمت کے لیے اضافی فنڈز فراہم کیے جا رہے ہیں کابینہ نے آٹھ ارب روپے اور تیرہ ارب روپے کے دو بڑے منصوبوں کی منظوری دے دی ہے تاکہ شہر کی بڑی اور چھوٹی سڑکوں کی حالت بہتر بنائی جا سکے کراچی کی ترقی حکومت کی اولین ترجیح ہے اور کسی بھی منصوبے میں غیر ضروری تاخیر یا سستی برداشت نہیں کی جائے گی۔
-
لاہور جمخانہ کلب انتخابات: ڈاکٹر علی رزاق نے مسلسل چوتھی بار سب سے زیادہ ووٹ حاصل کر کے ریکارڈ قائم کر دیا
لاہور جمخانہ کلب کے سالانہ انتخابات میں ڈاکٹر علی رزاق نے تاریخی کامیابی حاصل کی اور مسلسل چوتھی بار سب سے زیادہ ووٹ حاصل کرنے والے امیدوار بن گئے، جو کلب کی انتخابی تاریخ میں ایک قابل ذکر سنگ میل ہے۔ اگرچہ 2026 کے حتمی نتائج ابھی سرکاری طور پر جاری نہیں کیے گئے، پچھلے انتخابات کے ریکارڈ سے علی رزاق کی کلب ممبران میں مضبوط مقبولیت کا اندازہ ہوتا ہے۔
گزشتہ سال 2025 کے انتخابات میں علی رزاق نے 1,923 ووٹ حاصل کیے تھے، جس میں انہوں نے سلمان صدیق اور واجد عزیز خان جیسے دیگر معروف امیدواروں کو پیچھے چھوڑا۔ اس مقابلے میں کل 3,015 بیلٹ ڈالے گئے اور 41 ووٹ ناقابل قبول قرار پائے۔
اگرچہ علی رزاق نے سب سے زیادہ ووٹ حاصل کیے، ان کے آزاد گروپ نے 12 رکن پر مشتمل ایگزیکٹو بورڈ میں سے صرف دو نشستیں حاصل کیں، جبکہ سلمان-مصباح پینل نے اکثریت حاصل کی۔
کلب کے اندرونی ذرائع کے مطابق، علی رزاق کی مسلسل کامیابی ممبران کے اعتماد اور ذاتی مقبولیت کی عکاسی کرتی ہے۔ گزشتہ انتخابات میں ان کے مضبوط ووٹ ٹالیز نے ان کی کلب کمیونٹی میں اثر و رسوخ اور پہچان کو واضح طور پر ظاہر کیا۔
14 فروری 2026 کو منعقد ہونے والے انتخابات میں متعدد پینلز حصہ لے رہے تھے، جن میں ریفارمرز گروپ، روایتی سلمان-مصباح پینل اور علی رزاق کا گروپ شامل تھے۔ امیدواروں نے شفافیت، گورننس اصلاحات، تفریحی سہولیات اور خاندانوں کے لیے بہتر انتظامات کے وعدوں پر مبنی مہم چلائی۔
جمخانہ کی روایت کے مطابق، علی رزاق کی مسلسل سب سے زیادہ ووٹ حاصل کرنے کی کارکردگی ممبران کی شمولیت اور کلب میں مقابلہ جاتی سیاست کو اجاگر کرتی ہے۔ کلب انتخابی کمیشن کی جانب سے 2026 کے حتمی نتائج آنے والے دنوں میں جاری کیے جائیں گے، جو اگلے مدت کے لیے نشستوں کی تقسیم اور قیادت کی تفصیلات واضح کریں گے۔ -
اسلام آباد میں رمضان دسترخوان کے لیے اجازت نامہ لازمی قرار
رمضان المبارک کے دوران وفاقی دارالحکومت میں عوامی دسترخوان لگانے کے لیے باقاعدہ رجسٹریشن اور اجازت نامہ حاصل کرنا لازمی ہوگا۔
ترجمان ضلعی انتظامیہ کے مطابق اسلام آباد میں رمضان المبارک کے دوران دسترخوان لگانے کے خواہشمند افراد کو پیشگی رجسٹریشن کروانا ہوگی اس سلسلے میں مکمل تفصیلات کے ساتھ درخواست جمع کروانا لازمی قرار دیا گیا ہے،درخواست گزار اپنے شناختی کوائف، مقام کی تفصیلات اور دیگر ضروری معلومات ضلعی انتظامیہ کو فراہم کریں گے، جس کے بعد متعلقہ اسسٹنٹ کمشنر جگہ کا معائنہ کریں گے معائنے کے بعد ہی باقاعدہ اجازت نامہ جاری کیا جائے گا-
ضلعی انتظامیہ کے مطابق شہر بھر سے اب تک مجموعی طور پر 18 درخواستیں موصول ہو چکی ہیں۔ انتظامیہ کی جانب سے دسترخوان کے لیے موزوں مقامات کی نشاندہی، سیکیورٹی اور دیگر سہولیات کی فراہمی بھی یقینی بنائی جائے گی،بغیر رجسٹریشن اور اجازت نامے کے کسی بھی شاہراہ یا عوامی مقام پر دسترخوان لگانے کی اجازت نہیں ہوگی، خلاف ورزی کی صورت میں قانونی کارروائی عمل میں لائی جائے گی۔
-
ڈی ایس پی سی ٹی ڈی ہنگو، اسلام الدین خان دل کا دورہ پڑنے سے انتقال کر گئے
ترجمان پولیس کے مطابق ہنگو کے ڈسٹرکٹ پولیس آفیسر سی ٹی ڈی، اسلام الدین خان دل کا دورہ پڑنے سے انتقال کر گئے۔
ڈی ایس پی اسلام الدین خان کی نماز جنازہ پولیس لائن ہنگو میں آج بعد نماز ظہر ادا کی جائے گی۔ پولیس افسران اور اہلِ خانہ نماز جنازہ میں شریک ہوں گے اور مرحوم کے درجات کی بلندی کے لیے دعا کی جائے گی۔ -
عمران خان کے جیل میں علاج کی تفصیلی رپورٹ ہوم ڈپارٹمنٹ پنجاب کو ارسال
بانی و چیئرمین پاکستان تحریک انصاف عمران خان کے جیل میں علاج اور صحت سے متعلق ابتدائی رپورٹ ہوم ڈپارٹمنٹ پنجاب کو بھیج دی گئی ہے۔
جیل ذرائع کے مطابق بھیجی گئی رپورٹ میں عمران خان کے بلڈ پریشر، شوگر لیول اور کولیسٹرول کا مکمل چارٹ شامل ہے جبکہ بانی پی ٹی آئی کی آنکھوں سے متعلق رپورٹ بھی وزارت داخلہ پنجاب کو بھجوائی گئی ہے۔
ذرائع نے بتایا کہ عمران خان کی کنسلٹنسی رپورٹس اور میڈیکل اسٹاف کی تفصیلات بھی ہوم ڈپارٹمنٹ کو فراہم کی گئی ہیں۔ اس کے علاوہ بانی پی ٹی آئی کو کس ڈاکٹر نے چیک کیا، اس سے متعلق تمام تفصیلات پورٹ میں درج ہیں۔
جیل ذرائع کے مطابق آن ڈیوٹی ڈاکٹرز روزانہ تین مرتبہ عمران خان کا طبی معائنہ کرتے ہیں اور اس کا ریکارڈ باقاعدگی سے مرتب کیا جاتا ہے۔
واضح رہے کہ ہوم ڈپارٹمنٹ پنجاب نے اڈیالہ جیل حکام سے عمران خان کے میڈیکل چیک اپ سے متعلق مفصل رپورٹ طلب کی تھی۔