Blog

‎دنیا بھر میں مقبول ہونے والے جنریٹیو آرٹی فیشل انٹیلی جنس چیٹ بوٹس میں چیٹ جی پی ٹی سرفہرست شمار ہوتا ہے۔ اوپن اے آئی کی جانب سے تیار کیا گیا یہ پلیٹ فارم سوالات کے جواب دینے، کوڈنگ میں مدد فراہم کرنے، تحریری مواد تیار کرنے اور مختلف موضوعات پر رہنمائی دینے کی صلاحیت رکھتا ہے۔
‎ٹیکنالوجی کی بڑی کمپنیاں اب اسی طرز کی اے آئی کو مزید بہتر بنانے پر کام کر رہی ہیں۔ مگر اکثر صارفین یہ نہیں جانتے کہ جی پی ٹی دراصل کن الفاظ کا مخفف ہے۔
‎جی سے کیا مراد ہے؟
جی کا مطلب ہے "جنریٹیو”۔ اس کا مطلب یہ ہے کہ یہ سسٹم نیا متن تخلیق کر سکتا ہے۔ یہ صرف موجودہ معلومات کا تجزیہ نہیں کرتا بلکہ سیکھے گئے پیٹرنز کی بنیاد پر نیا جواب تیار کرتا ہے۔ جنریٹیو اے آئی ڈیپ لرننگ پر مبنی ہوتی ہے، جو انسانی دماغ کے کام کرنے کے انداز سے متاثر ایک طریقہ ہے۔
‎پی کس چیز کی نمائندگی کرتا ہے؟
پی سے مراد "پری ٹرینڈ” ہے۔ یعنی اس ماڈل کو پہلے ہی وسیع ڈیٹا پر تربیت دی جا چکی ہوتی ہے۔ چیٹ جی پی ٹی کو اربوں الفاظ پر مشتمل ڈیٹا سیٹس سے تربیت دی گئی، جن میں ویب پیجز، کتابیں اور دیگر تحریری مواد شامل تھا۔ تربیت کے بعد ماڈل کو عوام کے لیے پیش کیا گیا۔ بعد ازاں انسانی فیڈ بیک کے ذریعے اس کی کارکردگی مزید بہتر کی جاتی ہے۔
‎ٹی کا مطلب کیا ہے؟
ٹی سے مراد "ٹرانسفارمر” ہے۔ یہ ایک نیورل نیٹ ورک آرکیٹیکچر ہے جو متن کو چھوٹے حصوں یا ٹوکنز میں تقسیم کرکے سیاق و سباق کو سمجھتا ہے اور پھر جواب تیار کرتا ہے۔ یہی ٹیکنالوجی اسے لمبی گفتگو کو سمجھنے اور مربوط جواب دینے کے قابل بناتی ہے۔
‎مجموعی طور پر جی پی ٹی ایک لارج لینگوئج ماڈل ہے جو ڈیپ لرننگ اور نیورل نیٹ ورکس کی مدد سے زبان کو سمجھنے اور تخلیق کرنے کی صلاحیت رکھتا ہے۔
‎نام کیسے رکھا گیا؟
اوپن اے آئی کے عہدیداروں کے مطابق ابتدا میں اسے "چیٹ ود جی پی ٹی 3.5” کہا جا رہا تھا، تاہم متعارف کرانے سے قبل ایک میٹنگ میں نام کو مختصر اور سادہ بنانے کا فیصلہ کیا گیا۔ یوں "چیٹ جی پی ٹی” کا نام سامنے آیا، جو بعد میں دنیا بھر میں پہچان بن گیا۔

آئی سی سی ٹی ٹوئنٹی ورلڈکپ کے گروپ ڈی کے سنسنی خیز میچ میں جنوبی افریقا نے افغانستان کو دوسرے سپر اوور میں 4 رنز سے شکست دے دی۔
‎احمد آباد میں کھیلے گئے اس مقابلے میں افغانستان کے کپتان راشد خان نے ٹاس جیت کر پہلے جنوبی افریقا کو بیٹنگ کی دعوت دی۔ مقررہ 20 اوورز کے اختتام پر دونوں ٹیمیں 187، 187 رنز پر برابر رہیں، جس کے بعد فیصلہ سپر اوورز پر چلا گیا۔
‎پہلے سپر اوور میں افغانستان نے بیٹنگ کرتے ہوئے 17 رنز بنائے۔ جواب میں جنوبی افریقا بھی 17 رنز ہی اسکور کر سکا، یوں مقابلہ مزید سنسنی اختیار کر گیا اور نتیجہ دوسرے سپر اوور پر جا پہنچا۔
‎دوسرے سپر اوور میں پروٹیز نے پہلے کھیلتے ہوئے 23 رنز جوڑے۔ افغان ٹیم ہدف کے تعاقب میں 19 رنز بنا سکی اور اس طرح جنوبی افریقا نے 4 رنز سے کامیابی اپنے نام کی۔
‎اس سے قبل جنوبی افریقا کی اننگز کا آغاز ایڈم مارکرم اور کوئنٹن ڈی کوک نے کیا، تاہم مارکرم 12 کے مجموعے پر فضل حق فاروقی کی گیند پر کیچ آؤٹ ہوگئے۔ ایک وکٹ گرنے کے بعد ڈی کوک اور ریان رکلٹن نے ذمہ داری سے بیٹنگ کی اور اسکور کو مستحکم کیا۔ دونوں نے اسی اوور میں اپنی نصف سنچریاں مکمل کیں۔ رکلٹن 61 اور ڈی کوک 59 رنز بنا کر آؤٹ ہوئے۔
‎ڈیوالڈ بریوس نے 23 جبکہ ڈیوڈ ملر نے 20 رنز اسکور کیے۔ افغانستان کی جانب سے عظمت اللہ عمرزئی نے 3 اور راشد خان نے 2 وکٹیں حاصل کیں۔

بین الاقوامی سیاحتی حلقوں میں حالیہ دنوں بھارتی سیاحوں کے مبینہ نامناسب رویّے سے متعلق خبروں نے خاصی توجہ حاصل کی ہے۔

تھائی لینڈ کے مشہور سیاحتی مقام “یونا بیچ کلب” میں بھارتی سیاحوں کو داخلے کی اجازت نہیں دی گئی، میڈیا رپورٹس کے مطابق یہ فیصلہ ماضی میں پیش آنے والے چند ناخوشگوار واقعات کے بعد کیا گیا۔یونا بیچ کلب، جو اپنی پرتعیش سہولیات اور بین الاقوامی سیاحوں کی بڑی تعداد کے باعث معروف ہے، کی انتظامیہ کے مطابق بعض مواقع پربھارتی سیاحوں کا رویّہ غیر مہذب اور کلب کے ضابطہ اخلاق کے خلاف تھا، اس فیصلے کا مقصد تمام مہمانوں کے لیے محفوظ اور پُرسکون ماحول کو یقینی بنانا ہے۔واضح رہے کہ تھائی لینڈ کی سیاحتی صنعت بھارتی سیاحوں پر کافی حد تک انحصار کرتی ہے اور ہر سال بڑی تعداد میں بھارتی شہری وہاں کا رخ کرتے ہیں۔

تھائی لینڈ کے معروف اور سیاحوں میں مقبول یونا بیچ کلب (Yona Beach Club) میں بھارتی سیاحوں کے داخلے سے مبینہ انکار کی ویڈیو سوشل میڈیا پر وائرل ہو گئی ہے۔ بھارتی سیاحوں کے ایک گروپ نے کلب انتظامیہ پر نسلی امتیاز برتنے کا الزام عائد کیا ہے، جبکہ بعض اطلاعات کے مطابق ماضی میں پیش آنے والے ناخوشگوار واقعات کے باعث بھارتی شہریوں کے داخلے پر غیر اعلانیہ پابندی عائد کی گئی ہے۔ گوا سے تعلق رکھنے والے موسیقار جوناس مونٹیرو (Jonas Monteiro) نے انسٹاگرام پر ایک تفصیلی پوسٹ کے ذریعے دعویٰ کیا کہ انہیں اور ان کے ساتھیوں کو تصدیق شدہ بکنگ اور درست ٹکٹ ہونے کے باوجود کلب میں داخل ہونے سے روک دیا گیا۔جوناس مونٹیرو کے مطابق وہ اپنے دوستوں کے ہمراہ مقررہ وقت پر کلب پہنچے اور ان کے پاس باقاعدہ تصدیق شدہ ٹکٹ موجود تھے، تاہم داخلی دروازے پر موجود سیکیورٹی اہلکاروں نے انہیں روک دیا۔

سب سے سنگین الزام یہ سامنے آیا کہ گروپ کے ارکان نے مبینہ طور پر کلب کے عملے کو یہ کہتے ہوئے سنا،“کسی بھارتی کو اندر مت آنے دو۔”

ماضی میں چند بھارتی سیاحوں کے ہنگامہ آرائی اور غیر مہذب رویے کے واقعات کے بعد کلب انتظامیہ نے سخت اقدامات کیے،تجزیہ کاروں کا کہنا ہے کہ عالمی سیاحتی مقامات پر نظم و ضبط برقرار رکھنے کے لیے بعض اوقات سخت فیصلے کیے جاتے ہیں ،

‎برطانیہ میں مسلسل ہونے والی موسلا دھار بارشوں کے باعث تقریباً 100 علاقوں میں سیلاب کا خطرہ پیدا ہو گیا ہے۔
‎غیر ملکی ذرائع ابلاغ کے مطابق نیشنل انوائرمنٹ ایجنسی نے 98 سیلاب وارننگز اور 158 فلڈ الرٹس جاری کیے ہیں۔ حالیہ بارشوں کے نتیجے میں کم از کم 300 گھر متاثر ہوئے ہیں، جبکہ اسکاٹ لینڈ اور ویلز میں بھی سیلاب کے خطرات موجود ہیں۔
‎رپورٹس کے مطابق مختلف شہروں میں ندی نالوں کے کنارے پانی کی سطح بلند ہو گئی ہے، جس کے پیش نظر مقامی انتظامیہ نے شہریوں کو محتاط رہنے کی ہدایت جاری کی ہے۔
‎سیلاب کے باعث ٹرانسپورٹ کے نظام پر بھی اثرات مرتب ہونے کا امکان ہے، اور کئی سڑکیں اور پل بند کیے جا سکتے ہیں۔ نیشنل انوائرمنٹ ایجنسی نے عوام سے کہا ہے کہ غیر ضروری سفر سے گریز کریں اور خطرے کی صورت میں فوری طور پر محفوظ مقامات پر منتقل ہوں۔

بھارتی پنجاب کے علاقےامرتسر میں بسنت کے تہوار کے دوران خالصتان تحریک کے حامیوں کی جانب سے پاکستانی قومی پرچم والی پتنگیں اُڑانے کا معاملہ سوشل میڈیا پر موضوعِ بحث بن گیا۔

مختلف سوشل میڈیا پلیٹ فارمز پر گردش کرنے والی ویڈیوز اور تصاویر میں دیکھا جا سکتا ہے کہ شہریوں نے بسنت کے موقع پر ایسی پتنگیں اڑائیں جن پر پاکستان کا قومی پرچم بنا ہوا تھا،باخبر ذرائع کے مطابق یہ اقدام روایتی بسنت منانے کے بجائے ایک علامتی احتجاج کے طور پر کیا گیا۔ خالصتان حامیوں نے اس عمل کو بھارتی پنجاب میں سکھوں کے حقوق سے متعلق مبینہ مسائل اور شکایات کو اجاگر کرنے کی کوشش قرار دیا ہے۔

یاد رہے کہ خالصتان تحریک سکھوں کے لیے علیحدہ ریاست کے قیام سے متعلق ایک نظریہ ہے، جو ماضی میں شدت اختیار کر چکا ہے اور آج بھی وقفے وقفے سے اس کے حامی اپنی آواز بلند کرتے رہتے ہیں۔

‎ایران میں اسلامی انقلاب کی 47ویں سالگرہ کے موقع پر دارالحکومت تہران کی سڑکوں پر ہزاروں افراد نے مارچ کیا۔
‎مارچ کے دوران ایران کے صدر مسعود پزشکیان نے خطاب کرتے ہوئے کہا کہ ایران اپنے جوہری پروگرام کی جانچ پڑتال کے لیے تیار ہے تاکہ یہ ثابت کیا جا سکے کہ ایران ایٹم بم بنانے کا ارادہ نہیں رکھتا۔
‎تہران کے آزادی اسکوائر پر صدر پزشکیان نے مزید کہا کہ ایران امریکا کے ساتھ جاری مذاکرات کے دوران مغربی ممالک کے ’ضرورت سے زیادہ‘ مطالبات کے سامنے نہیں جھکے گا۔ انہوں نے واضح کیا کہ ایران اپنے قومی مفادات پر کوئی سمجھوتہ نہیں کرے گا اور جوہری تنازع کے حل کے لیے مذاکرات جاری رکھے گا۔