Blog
-
بھارتی وزیر اعلیٰ کی ہیلی کاپٹر حادثے میں ہلاکت ، ان کی بیوہ عہدے کے لیے نامزد
مہاراشٹر کے نائب وزیر اعلیٰ کی ہیلی کاپٹر حادثے میں ہلاکت کے بعد ان کی بیوہ کو عہدے کے لیے نامزد کیا گیا ہے-
نیشنلسٹ کانگریس پارٹی (این سی پی) کی رکنِ پارلیمنٹ سنیترا پاوار، جو 2 روز قبل ہیلی کاپٹر حادثے میں ہلاک ہونے والے اجیت پاوار کی اہلیہ ہیں، ہفتے کے روز مہاراشٹر کی نائب وزیر اعلیٰ کے عہدے کا حلف اٹھائیں گی، مہاراشٹر کے نائب وزیر اعلیٰ اجیت پاوار 28 جنوری کو ایک طیارہ حادثے میں جان سے گئے تھے، جس کے بعد یہ عہدہ خالی ہو گیا تھا۔
این سی پی ترجمان روپالی پاٹل تھومبرے نے خبر رساں ادارے اے این آئی سے گفتگو کرتے ہوئے کہا کہ پارٹی کے رہنماؤں اور کارکنوں نے سنیترا پاوار کو یہ ذمہ داری سنبھالنے پر آمادہ کیا، کیونکہ سیاست میں وقت کی بہت اہمیت ہوتی ہے، اجیت دادا کی موت ہم سب کے لیے ایک بڑا صدمہ ہےسنیترا واہنی سب سے زیادہ غم میں ہیں کیونکہ انہوں نے اچانک اپنے شوہر کو کھو دیا یہ ان کی وفات کے بعد چوتھا دن ہے پارٹی کارکنوں نے ان سے گزارش کی کہ وہ اجیت دادا کے خوابوں اور کام کے انداز کو آگے بڑھائیں آج انہوں نے یہ فیصلہ کیا ہے، لوگ باتیں کریں گے جو لوگ آج ان کی حمایت کر رہے ہیں، وہی لوگ ان کی زندگی میں ان پر تنقید کرتے تھےسنیترا واہنی آج نائب وزیر اعلیٰ کے طور پر حلف اٹھا رہی ہیں۔
وزیراعظم نے پنجاب ایگریکلچر فوڈ اینڈ ڈرگ اتھارٹی کا افتتاح کردیا
این سی پی کے سربراہ اور اجیت پاوار کے چچا شرد پاوار نے کہا کہ انہیں سنیترا پاوار کو نائب وزیر اعلیٰ بنانے کے فیصلے کے بارے میں پہلے سے کوئی اطلاع نہیں تھی،یہ ان کی پارٹی کا فیصلہ ہوگا میں نے اخبار میں پڑھا کہ پرفل پٹیل اور سنیل تٹکرے نے اس حوالے سے کچھ اقدامات کیے ہیں یہ بات چیت ممبئی میں سینئر رہنماؤں کے درمیان ہو رہی ہے یہ ان کا اندرونی معاملہ ہے۔
-
وزیراعظم نے پنجاب ایگریکلچر فوڈ اینڈ ڈرگ اتھارٹی کا افتتاح کردیا
وزیراعظم شہباز شریف نے پنجاب ایگریکلچر فوڈ اینڈ ڈرگ اتھارٹی کا افتتاح کردیا۔
افتتاحی تقریب سے خطاب کرتے ہوئے وزیراعظم نے امید ظاہر کی کہ پنجاب ایگریکلچر فوڈ اینڈ ڈرگ اتھارٹی خطے میں معیار، شفافیت اور تحقیق کا مرکز بنے گی۔ انہوں نے کہا کہ خوراک اور ادویات کی شفاف نگرانی صارفین، کسانوں اور برآمدکنندگان کے تحفظ کے لیے ناگزیر ہے 20 سال قبل کراچی میں ایک جدید لیبارٹری ایک دوست ملک کی گرانٹ سے قائم کی گئی تھی مگر اسے استعمال میں لانے کے بجائے نظرانداز کیا گیا، بعد ازاں ایک اسکینڈل کے دورا ن یہ معاملہ سامنے آیا جس نے ادارہ جاتی بدانتظامی کو بے نقاب کیا۔
انہوں نے کہا کہ اگر عطیہ دینے والے ممالک کو معلوم ہو کہ پاکستان میں گرانٹس اس طرح ضائع کی جاتی ہیں تو اس کے سنگین نتائج ہوسکتے ہیں 6 سے 8 ماہ قبل وفاقی کابینہ میں چاول کی برآمدات سے متعلق شکایت سامنے آئی جس پر تحقیقات ہوئیں اور مکمل بدعنوانی ثابت ہونے پر ذمہ دار افراد کو جیل بھیجا گیا متعلقہ ادارے کو مکمل طور پر ری اسٹرکچر کیا گیا، پرانا عملہ فارغ کیا گیا اور نئی قیادت کے تحت شفاف نظام قائم کیا گیا جو کئی دہائیوں بعد پہلی بار مؤثر انداز میں کام کر رہا ہے۔
وزیراعظم شہباز شریف نے وزیراعلیٰ پنجاب مریم نواز کے کردار کو سراہتے ہوئے کہا کہ پنجاب ایگریکلچر فوڈ اینڈ ڈرگ اتھارٹی کا قیام ان کی قیادت اور عزم کا نتیجہ ہے، جو ایک بڑی عوامی خدمت ہے۔
تقریب سے خطاب میں وزیراعلیٰ مریم نواز نے کہا کہ ایک زرعی ملک ہونے کے باوجود پاکستان میں عالمی معیار کی ٹیسٹنگ لیبارٹری کا نہ ہونا تشویشناک تھا، جس سے برآمدکنندگان اور صارفین دونوں متاثر ہو رہے تھے، نئی اتھارٹی اور لیبارٹری بین الاقوامی معیار کے مطابق قائم کی گئی ہے، جو فوڈ اور ڈرگ ریگولیشن کے نظام میں ایک اہم خلا کو پُر کرے گی۔
وزیراعلیٰ نے کہا کہ ماضی میں مستند ٹیسٹنگ سہولیات نہ ہونے کے باعث برآمدکنندگان کو بھاری نقصانات کا سامنا تھا جبکہ صارفین غیر معیاری خوراک اور ادویات کے خطرے میں تھے۔ نئی اتھارٹی کے قیام سے پاکستان کی برآمدات پر عالمی اعتماد بحال ہوگا۔ انہوں نے بتایا کہ اب تک 23 ہزار کاروباری اداروں کو بہتر ریگولیٹری نظام کے تحت پنجاب میں کام کرنے کی اجازت دی جاچکی ہے۔
اسی موقع پر خواتین سائنسدانوں کے لیے ایک جدید ہاسٹل کا بھی افتتاح کیا گیا جس پر 2.3 ارب روپے لاگت آئی۔ وزیراعلیٰ نے کہا کہ اس سہولت سے ملک بھر سے آنے والی خواتین سائنسدانوں کو تحقیق اور کام کے بہتر مواقع میسر آئیں گے، جو شمولیت اور میرٹ پر مبنی ترقی کی علامت ہےمریم نواز نے پنجاب میں ڈیجیٹل اصلاحات کا ذکر کرتے ہوئے کہا کہ میرٹ پر کوئی سمجھوتہ نہیں کیا جا رہا،پنجاب ایگریکلچر فوڈ اینڈ ڈرگ اتھارٹی 10 سال کی مسلسل کوششوں کا نتیجہ ہے اور اب یہ ادارہ مکمل طور پر فعال ہوچکا ہے پنجاب ترقی اور خوشحالی کے راستے پر گامزن ہے اور عوامی خدمت حکومت کا بنیادی نصب العین ہے۔
انہوں نے بتایا کہ جرائم کی روک تھام کے لیے ڈرون ٹیکنالوجی استعمال کی جا رہی ہے، سیٹلائٹ کرائم سین یونٹس کو 38 اضلاع تک توسیع دی جا رہی ہے اور خواتین کے تحفظ کے لیے ورچوئل ویمن پولیس اسٹیشنز قائم کیے جاچکے ہیں انہوں نے ای بزنس رجسٹریشن کے آغاز کا بھی اعلان کیا۔
تقریب کے اختتام پر وزیراعظم اور وزیراعلیٰ نے اتھارٹی اور لیبارٹری کے مختلف شعبوں کا دورہ کیا، جہاں انہیں نظام کار سے متعلق بریفنگ دی گئی، جبکہ پاکستان کی پہلی پنجاب ایگریکلچر فوڈ اینڈ ڈرگ اتھارٹی پر ایک دستاویزی فلم بھی پیش کی گئی۔
-
ایران کے شہر بندر عباس میں دھماکا
ایران کے خلیج فارس کے کنارے واقع شہر بندر عباس میں ایک عمارت میں دھماکا ہوا ہے۔
ایرانی میڈیا کے مطابق یہ دھماکا ایک 8 منزلہ عمارت میں ہوا، جس کے نتیجے میں عمارت کی 2 منزلیں، متعدد گاڑیاں اور آس پاس کی دکانیں تباہ ہو گئیں امدادی اور فائر فائٹنگ ٹیمیں موقع پر موجود ہیں تاکہ متاثرین کی مدد کی جا سکے،ایران نے دھماکے میں پاسداران انقلاب کے کمانڈر کو ہدف بنانے کی تردید کی ہے، ریسکیو اور فائر فائٹنگ ٹیمیں موقع پر موجود ہیں اور امدادی کارروائیاں جاری رکھے ہوئے ہیں،دھماکے کی وجہ تاحال معلوم نہیں ہو سکی۔
سرکاری میڈیا کے مطابق دھماکا شہر کے معلم بلیوارڈ کے علاقے میں واقع 8 منزلہ عمارت میں ہوا، جس کے نتیجے میں عمارت کی 2منزلیں تباہ ہو گئیں، جبکہ کئی گاڑیاں اور قریبی دکانیں بھی متاثر ہوئیں۔
-
دوسرا ٹی ٹوئنٹی: پاکستان کی آسٹریلیا کو 90 رنز سے شکست،سیریز اپنے نام کرلی
لاہور: دوسرے ٹی 20 میچ میں پاکستان نے آسٹریلیا کو 90 رنز سے شکست دے کر 3 میچز کی سیریز 0-2 سے اپنے نام کرلی۔
قذافی اسٹیڈیم لاہور میں کھیلے جارہے دوسرے میچ میں پاکستان نے پہلے اوور سے ہی جارحانہ کھیل کا آغاز کیا دوسرے ہی اوور میں صاحبزادہ فرحان کی وکٹ گرنے کے باجود کپتان سلمان علی آغا اور صائم ایوب نے آسٹریلوی بولرز کی دھلائی جاری رکھی،صائم ایوب چھٹے اوور میں 11 گیندوں پر 23 رنز بناکر آؤٹ ہوئے پاکستان نے پاور پلے میں 3 چھکوں اور 10 چوکوں کی مدد سے 2 وکٹوں کے نقصان پر 72 رنز بنائے،صاحبزادہ فرحان5 اور بابر اعظم 2 رنز پر آؤٹ ہوگئے۔
بعد ازاں بابر اعظم 2 رنز بناکر ایڈم زیمپا کا شکار بن گئے تاہم کپتان سلمان علی آغا نے جارحانہ کھیل جاری رکھا اور 25 گیندوں پر نصف سنچری اسکور کی،یہ محمد حفیظ کی 23 گیندوں پر نصف سنچری کے بعد کسی بھی پاکستانی کپتان کی جانب سے ٹی ٹوئنٹی انٹرنیشنل میچز میں دوسری تیز ترین نصف سنچری ہے۔
عثمان خان نے ذمہ دارانہ اور جارحانہ بیٹنگ کرتے ہوئے 35 گیندوں پر 52 رنز بنائے، جن میں 4 چوکے اور 2 چھکے شامل تھے۔ شاداب خان 29 رنز بنا کر ناٹ آؤٹ رہے جبکہ محمد نواز نے صرف 3 گیندوں پر 9 رنز بنا کر اسکور کو مزید مضبوط کیا،آخری 5 اوورز میں پاکستان نے 59 رنز اسکور کیے اور صرف ایک وکٹ گری۔
آسٹریلیا کی جانب سے ایڈم زمپا، میتھیو کوہنیمن، کوپر کونولی، شان ایبٹ اور زیویئر بارٹلیٹ نے ایک ایک وکٹ حاصل کی-
ہدف کے تعاقب میں آسٹریلیا کی پوری ٹیم 15.4 اوورز میں 108 رنز پر ڈھیر ہوگئی،آسٹریلوی اننگز کا آغاز انتہائی مایوس کن رہا۔ کپتان مچل مارش 18 اور ٹریوس ہیڈ 4 رنز بنا کر جلد آؤٹ ہو گئے۔ جوش انگلس 5 اور میٹ رینشا 2 رنز کے مہمان ثابت ہوئے، جس کے باعث آسٹریلیا کی بیٹنگ لائن دباؤ کا شکار رہی۔
کیمیرون گرین نے 20 گیندوں پر 35 رنز بنا کر کچھ مزاحمت کی، جبکہ میتھیو شارٹ نے 27 رنز اسکور کیے، تاہم کوئی بھی بیٹر وکٹ پر جم نہ سکا۔ دیگر کھلاڑیوں میں کوپر کونولی ایک، ژاویر بارٹلیٹ 10 اور ایڈم زمپا 3 رنز بنا سکے۔
ابرار احمد نے 3 اوورز میں صرف 14 رنز دے کر 3 وکٹیں حاصل کیں اور میچ کے بہترین بولر ثابت ہوئے شاداب خان نے بھی 4 اوورز میں 26 رنز دے کر 3 کھلاڑیوں کو آؤٹ کیا۔ عثمان طارق نے 2.4 اوورز میں 16 رنز کے عوض 2 وکٹیں حاصل کیں، جبکہ محمد نواز نے ایک وکٹ اپنے نام کی۔
دوسرے ٹی ٹوٹنٹی میچ کے لیے پاکستان کی پلیئنگ الیون میں تین تبدیلیاں کی گئی ہیں،عثمان طارق، فہیم اشرف اور نسیم شاہ کو پلیئنگ الیون میں شامل کیا گیا ہے جبکہ شاہین شاہ آفریدی، سلمان مرزا اور فخر زمان کو آرام دیا گیا ہےتین ٹی ٹوئنٹی میچوں کی سیریز میں پاکستان کو ایک صفر کی سبقت حاصل ہے، پہلے میچ میں پاکستان نے آسٹریلیا کو 26 رنز سے شکست دی تھی۔
-
بلوچستان میں سیکیورٹی فورسز کا فیصلہ کن آپریشن،48 گھنٹوں میں 108 دہشتگرد ہلاک
بلوچستان میں سیکیورٹی فورسز کا فیصلہ کن آپریشن بی ایل اے کے 61 دہشتگرد ہلاک کردئے ۔ بی ایل اے کا ہیروف 2 مکمل طور پر فیل ہوگیا ۔ جب کہ 10 سیکیورٹی اہلکار شہید اور چند زخمی ہوئے۔ مجموعی طور پر گزشتہ 48 گھنٹوں میں مارے جانے والے عسکریت پسندوں کی تعداد 108 تک پہنچ گئی ہے۔
ابتدائی حملہ کوئٹہ کی سریاب روڈ پر پولیس وین کو نشانہ بنانے سے شروع ہوا۔ چند ہی منٹ بعد نوشکی میں ایف سی ہیڈکوارٹر، دالبندین کے ایف سی کمپاؤنڈ، پسنی میں کوسٹ گارڈ چوکی اور گوادر کی لیبر کالونی سمیت بارہ مقامات پر فائر اور خودکش حملے کیے گئے۔ ہر مقام پر مؤثر جوابی فائر کے باعث دہشت گرد پسپا ہوئے اور کلیئرنس آپریشن بدستور جاری ہے۔سیکیورٹی حکام کا کہنا ہے کہ ’’ہیروف 2‘‘ بی ایل اے کی ایک نئی اصطلاح تھی جس کے ذریعے وہ بیک وقت زیادہ سے زیادہ شہرت حاصل کرنا چاہتے تھے، مگر منصوبہ پہلی ہی جھڑپ میں خاک میں مل گیا۔ حکام کے مطابق ہلاک ہونے والوں میں متعدد عسکریت پسند افغانستان میں قائم محفوظ ٹھکانوں سے براہِ راست ہدایات لے رہے تھے، جب کہ حملوں کی منصوبہ بندی میں بھارتی خفیہ ایجنسی را کا ہاتھ بھی تھا۔
فائر فائٹ ختم ہوتے ہی صوبائی حکومت نے اسپتالوں میں طبی ایمرجنسی نافذ کر دی اور تمام ضلعی ہیڈکوارٹرز میں خون کے مراکز ہائی الرٹ پر ہیں۔ مواصلاتی نگرانی سخت کی جا چکی ہے جبکہ حساس اضلاع میں جزوی موبائل سروس معطل ہے تاکہ دہشت گردوں کی باہمی رابطہ کاری روکی جا سکے۔ حکام نے یقین دلایا ہے کہ شہری علاقوں میں معمولاتِ زندگی بحال ہو چکے ہیں اور قومی شاہراہیں کھولی جا چکی ہیں۔
تجزیہ کاروں کے مطابق 108 عسکریت پسندوں کا نقصان بی ایل اے کے فیلڈ نیٹ ورک، اسلحہ رسد اور مقامی سطح پر بھرتی کے ڈھانچے کے لیے بڑا دھچکا ہے۔ پچھلے سال کے دوران تنظیم کی سرگرمیوں میں افغان سرزمین اور غیر ملکی فنڈنگ کے تذکرے تواتر سے آ رہے ہیں، جنہیں پاکستان سختی سے اجاگر کرتا رہا ہے۔
-
سانحہ بھاٹی کیس،خاتون کے شوہر پر پولیس تشدد کی تصدیق،ابتدائی رپورٹ جاری
لاہور کے علاقے بھاٹی میں مین ہول میں گر کر جاں بحق ہونے والی خاتون کے شوہر پر پولیس تشدد کی تصدیق ہو گئی۔
انکوائری رپورٹ میں ایس پی سٹی اور ایس ایچ او بھاٹی کو تشدد کا ذمے دار قرار دے دیا گیا، دونوں کے خلاف کارروائی کی سفارش بھی کی گئی ہے، رپورٹ میں کہا گیا ہے کہ ایس پی اور ایس ایچ او خاتون کے شوہر غلام مرتضیٰ کو تھانہ بھاٹی لے گئے، پونے 5 گھنٹے غیر قانونی حراست میں رکھا اور تشدد کرتے رہے، رپورٹ آئی جی پنجاب کو پیش کر دی گئی جو وزیرِ اعلیٰ پنجاب مریم نواز کو دیں گے۔
دوسری جانب ضلع کچہری کی عدالت نے نامزد ملزمان کا 4 روزہ جسمانی ریمارنڈ منظور کر لیا،جاں بحق خاتون کے والد کی مدعیت میں درج مقدمے میں دفعہ 322 کے ساتھ 316 بھی لگا دی گئی،ڈی آئی جی انویسٹی گیشن کا کہنا ہے کہ دفعہ 316 کے بعد ملزمان کا چالان پیش کرنے میں مدد ملے گی۔
-
بھارت کی کوشش ہوتی جھوٹ پر مبنی فلمیں بنا کر پاکستان کو بدنام کرے،شرجیل میمن
سندھ کے سینئر صوبائی وزیر شرجیل انعام میمن نے کہا ہے کہ بھارت کی کوشش ہوتی ہے کہ جھوٹ پر مبنی فلمیں بنا کر پاکستان کو بدنام کرے،
میڈیا سے گفتگو کرتے ہوئے شرجیل میمن کا کہنا تھا کہ پاکستان نے معرکہ حق میں بھارت کو عبرت ناک شکست دی، مگر شکست کے بعد بھارت جھوٹی فلمیں بنا کر اپنی عوام کو یہ غلط تاثر دینا چاہتا ہے کہ اس نے جنگ جیتی ہے، ہمارے ملک میں بہت ٹیلنٹ ہے، اسے اجاگر کرنے کی ضرورت ہے، سندھ حکومت نوجوانوں کے بنائے گئے بہترین اسکرپٹ کو فنانس کرے گی، تاکہ ہمارے نوجوان مستقبل کے بہترین فلم ساز بنیں ،فلم اور ڈرامہ کے زریعے ہی اپنا پیغام مثبت انداز دنیا میں پہنچا سکتے ہیں ،ابھی بھی کم بجٹ میں لیاری کا مثبت چہرہ دکھانے کے لیے فلم بنائی ہے،فلم اور ڈرامہ انڈسٹری کو فروغ دیا جارھا ہے
-
ڈی جی آئی ایس پی آر کی یونیورسٹی آف گوادر میں اساتذہ اور طلباء کیساتھ خصوصی نشست
ڈی جی آئی ایس پی آر کی یونیورسٹی آف گوادر میں اساتذہ اور طلباء کیساتھ خصوصی نشست ہوئی ہے
ڈی جی آئی ایس پی آر کی یونیورسٹی آف گوادر آمد پر اساتذہ، فیکلٹی ممبران اور طلباء کی جانب سے شاندار استقبال کیا گیا،ڈی جی آئی ایس پی آر نے قومی اور علاقائی صورتحال کے حوالے سے طلباء اور اساتذہ کے ساتھ مفصل گفتگو کی ،ڈی جی آئی ایس پی آر نے سوشل میڈیا پر ریاست مخالف پروپیگنڈا کے حوالے سے طلباء کو مکمل آگاہی فراہم کی،اس موقع پر یونیورسٹی آف گوادر کے طلباء کا کہنا تھا کہ پاک فوج نے ہمیشہ ریاست، آئین اور قومی وقار کا دفاع کیا ہے،ڈی جی آئی ایس پی آر نے ہمارے ذہنوں میں موجود ابہام کو دور کیا ، ڈی جی آئی ایس پی آر نے شواہد کے ساتھ مس انفارمیشن کا تدارک کیا ہے ، ہماری ڈی جی آئی ایس پی آر کے ساتھ یہ ملاقات کافی معلوماتی رہی، طلباء نے ہر مشکل گھڑی میں قوم کیساتھ کھڑے رہنے پر پاک فوج کے غیر متزلزل عزم کو خراجِ تحسین پیش کیا
-
صدرمملکت،وزیراعظم کا فتنہ الہندوستان کیخلاف کامیاب آپریشنز پر سیکیورٹی فورسز کو خراجِ تحسین
اسلام آباد: وزیراعظم شہباز شریف نے ملک بھر میں فتنہ الہندوستان کے خلاف کامیاب سیکیورٹی آپریشنز پر افواجِ پاکستان اور قانون نافذ کرنے والے اداروں کی پیشہ ورانہ صلاحیتوں اور جرات کو سراہتے ہوئے دہشتگردوں کو ہلاک کرنے پر ارضِ وطن کے محافظوں کو زبردست خراجِ تحسین پیش کیا ہے۔
وزیراعظم نے اپنے بیان میں کہا کہ دہشتگردی کے خلاف جاری کارروائیاں سیکیورٹی فورسز کی بروقت حکمتِ عملی، جدید آپریشنل مہارت اور بے مثال قربانیوں کا مظہر ہیں۔ انہوں نے کہا کہ ان کامیاب آپریشنز کے ذریعے ملک دشمن عناصر کے ناپاک عزائم کو ناکام بنایا گیا اور عوام کے جان و مال کے تحفظ کو یقینی بنایا گیا۔شہباز شریف نے دہشتگردی کے خلاف کارروائیوں کے دوران شہید ہونے والے اہلکاروں کے بلند درجات کے لیے دعا کی اور ان کے اہلِ خانہ سے دلی ہمدردی و تعزیت کا اظہار کیا۔ وزیراعظم کا کہنا تھا کہ شہداء کی قربانیاں قوم کا سرمایہ ہیں اور ان کی بدولت آج ملک میں امن و استحکام کی فضا قائم ہو رہی ہے۔
وزیراعظم نے واضح کیا کہ دہشتگردی کے مکمل خاتمے تک یہ جنگ جاری رہے گی اور ریاست دشمن عناصر کے لیے پاکستان کی سرزمین تنگ کی جائے گی۔ ان کا کہنا تھا کہ مجھ سمیت پوری قوم کو اپنے شہداء پر فخر ہے اور قوم ہر محاذ پر اپنی افواج کے شانہ بشانہ کھڑی ہے۔انہوں نے اس عزم کا اعادہ کیا کہ حکومت سیکیورٹی فورسز کو تمام ضروری وسائل فراہم کرتی رہے گی تاکہ دہشتگردی کے خلاف کارروائیاں مزید مؤثر بنائی جا سکیں اور پاکستان میں پائیدار امن قائم ہو۔
صدرِ مملکت آصف زرداری نے بلوچستان میں سیکیورٹی فورسز کی مؤثر کارروائیوں پر اظہار اطمینان کرتے ہوئے شہید اہلکاروں کو خراج عقیدت پیش کیا ہے۔صدر مملکت نے شہداء کی بلندی درجات اور لواحقین کیلئے صبر کی دعا کی۔آصف زرداری نے کہا کہ بلوچستان کے امن اور قومی وحدت پر کوئی سمجھوتا نہیں ہوگا، ریاست بیرونی سرپرستی میں سرگرم دشمن عناصر کے خلاف کارروائی جاری رکھے گی۔
دوسری جانب وزیراعلیٰ بلوچستان سرفراز بگٹی کا کہنا ہے کہ ریاست دشمن عناصر کو کسی صورت معاف نہیں کیا جائے گا، دہشت گردوں کیخلاف بروقت رسپانس قابل ستائش ہے۔وزیراعلیٰ بلوچستان میر سرفراز بگٹی نے کوئٹہ کا دورہ کیا سیکیورٹی صورتحال کا جائزہ لیا، انہوں نے سیکیورٹی فورسز اور پولیس کے جوانوں سے ملاقات بھی کی۔سرفراز بگٹی نے کہا کہ ریاست دشمن عناصر کو کسی صورت معاف نہیں کیا جائے گا، دہشتگرد عناصر کیخلاف بروقت رسپانس قابل ستائش ہے، بلوچستان میں امن پر کوئی سمجھوتہ نہیں ہوگا۔وزیراعلیٰ بلوچستان کو آئی جی پولیس بلوچستان محمد طاہر خان نے دہشت گردی کے واقعات سے متعلق تفصیلی بریفنگ دی، سرفراز بگٹی نے پولیس اور سی ٹی ڈی کے فوری اور مؤثر ردعمل پر بہادر جوانوں کو شاباش دی۔
