پاکستان ٹیلی ویژن (پی ٹی وی) کے مقبول ڈراما سیریل گیسٹ ہاؤس کے معروف اداکار خالد حفیظ خان، جو ڈرامے میں ’شمیم صاحب‘ کے کردار سے جانے جاتے تھے وفات پا گئے۔
’گیسٹ ہاؤس‘ اپنے دور میں نہ صرف بے پناہ مقبول ہوا بلکہ اس نے ٹی وی ڈراما نگاری میں نئے معیار قائم کیے یہ ڈرامہ مسافروں کے روزمرہ مسائل کو ہلکے پھلکے انداز میں پیش کرنے کے لیے یاد کیا جاتا ہے اور اس کے تمام کردار آج بھی ناظرین کی یادداشت میں زندہ ہیں،مرحوم خالد حفیظ خان کی نماز جنازہ عصر کی نماز کے بعد ایچ الیون قبرستان میں ادا کی جائے گی۔
الجزیرہ کی رپورٹر روزیلینڈ جورڈن نے اپنی رپورٹ میں امریکی اہلکار کے حوالے سے بتایا کہ حماس کے کئی افراد ہتھیار ڈالنے کی باتیں کر رہے ہیں اور اگر وہ ہتھیار نہ ڈالیں تو یہ معاہدے کی خلاف ورزی ہوگی، امریکی انتظامیہ کے پاس حماس کو ہتھیار ڈالنے کے لیے ایک مضبوط پروگرام موجود ہے-
الجزیرہ کے مطابق امریکی اہلکار نے کہا ہے کہ غزہ میں حماس کے ہتھیار ڈالنے کے عمل کے دوران فلسطینی گروپ کے لیے ‘کسی قسم کی معافی’ دی جا سکتی ہے۔ یہ بیان اس وقت سامنے آیا جب غزہ میں آخری اسرائیلی قیدی کی لاش بازیاب ہوئی، جو اکتوبر میں طے پانے والے غزہ جنگ بندی معاہدے کے اگلے مرحلے کی راہ ہموار کرتی ہے۔
اہلکار نے بتایا کہ حماس کے کئی افراد ہتھیار ڈالنے کی باتیں کر رہے ہیں اور اگر وہ ہتھیار نہ ڈالیں تو یہ معاہدے کی خلاف ورزی ہوگی،ہتھیار ڈالنے کے ساتھ ساتھ کچھ قسم کی معافی بھی زیر غور ہے، اور امریکی انتظامیہ کے پاس حماس کو ہتھیار ڈالنے کے لیے ایک مضبوط پروگرام موجود ہے، اہلکار نے اس بات کا بھی اشارہ دیا کہ معاہدے کے تحت حماس کے سیاسی حیثیت کے اعتراف اور معافی پر بات ہو رہی ہے۔
حماس نے کہا کہ قیدیوں کی لاشیں واپس کرنے سے اس کی جنگ بندی میں پابندی ظاہر ہوتی ہے اور اس نے اپنی ذمہ داریاں پوری کر دی ہیں۔ اس نے اسرائیل پر زور دیا کہ وہ بھی معاہدے پر مکمل عمل کرے، جس میں رفح کراسنگ کھولنا، ضروری اشیا کی فراہمی، پابندیاں ختم کرنا اور نیشنل کمیٹی کے کام کو آسان بنانا شامل ہے۔
ٹرمپ کے 20 نکاتی غزہ منصوبے کے مطابق، قیدیوں کی واپسی کے بعد وہ حماس کے ارکان جو ہتھیار جمع کروائیں گے انہیں معافی دی جائے گی اور جو غزہ چھوڑنا چاہیں گے انہیں محفوظ راستہ فراہم کیا جائے گا منصوبے میں امداد کے آزادانہ بہاؤ اور رفح سرحدی کراسنگ کے دوبارہ کھلنے کی وضاحت بھی شامل ہے۔
اسٹیٹ بینک آف پاکستان نے اعلان کیا ہے کہ وفاقی کابینہ کی منظوری کے بعد دو سے تین مختلف مالیت کے نئے ڈیزائن کے کرنسی نوٹس کی چھپائی کا عمل شروع کر دیا جائے گا۔
اسٹیٹ بینک کے گورنر جمیل احمد نے پیر کو مانیٹری پالیسی کے اعلان کے بعد پریس کانفرنس سے خطاب کرتے ہوئے کہا کہ نئے کرنسی نوٹس کی تیاری کا عمل آخری مراحل میں ہے اور کابینہ کی منظوری ملتے ہی چھپائی شروع کر دی جائے گی “نئے ڈیزائن کے بینک نوٹس کی چھپائی کا عمل کافی آگے بڑھ چکا ہے، کابینہ کی منظوری کے بعد جلد چھپائی شروع کر دی جائے گی، اور دو سے تین مختلف مالیت کے نوٹس بیک وقت چھاپے جائیں گے۔”
جمیل احمد نے کہا کہ نئے ڈیزائن کے کرنسی نوٹس فوری طور پر مارکیٹ میں نہیں آئیں گے بلکہ مرحلہ وار گردش میں لائے جائیں گے نئے نوٹس اس وقت گردش میں لائے جائیں گے جب مرکزی بینک موجودہ کرنسی نوٹس کو مرحلہ وار تبدیل کرنے کے لیے مناسب اسٹاک حاصل کر لے گا۔
تاہم گورنر اسٹیٹ بینک نے یہ واضح نہیں کیا کہ سب سے پہلے کن مالیت کے نوٹس متعارف کرائے جائیں گے۔ اس وقت ملک میں 10، 20، 50، 75، 100، 500، 1000 اور 5000 روپے کے نوٹس زیر گردش ہیں، نئے ڈیزائن کے کرنسی نوٹس حکومت کو منظوری کے لیے بھجوا دیے گئے تھے، جنہیں بعد ازاں وفاقی کابینہ کے سامنے پیش کر دیا گیا ہے۔
کراچی: وزیراعلیٰ سندھ سید مراد علی شاہ کی زیر صدارت سندھ کابینہ کا اہم اجلاس منعقد ہوا، جس میں صوبائی وزراء، مشیران، معاونین خصوصی، چیف سیکریٹری سندھ اور مختلف محکموں کے متعلقہ سیکریٹریز نے شرکت کی۔
ترجمان وزیراعلیٰ سندھ کے مطابق کابینہ اجلاس کا باقاعدہ آغاز تلاوتِ قرآنِ پاک سے کیا گیا۔ اجلاس کے آغاز میں سانحہ گل پلازہ کے شہداء کے ایصالِ ثواب کے لیے دعا کی گئی۔ اس موقع پر وزیراعلیٰ سندھ سید مراد علی شاہ نے کہا کہ سانحہ گل پلازہ نے پورے صوبے کو شدید دکھ اور صدمے سے دوچار کیا ہے۔ انہوں نے واضح کیا کہ پاکستان پیپلز پارٹی کی حکومت متاثرین کے ساتھ کھڑی ہے اور سندھ حکومت ہر صورت سانحہ گل پلازہ کے متاثرین کی بحالی کو یقینی بنائے گی۔وزیراعلیٰ سندھ کا کہنا تھا کہ انسانی جانوں کے ضیاع کا کوئی نعم البدل نہیں، تاہم حکومت اپنی ذمہ داری نبھاتے ہوئے متاثرہ خاندانوں کو ریلیف فراہم کرے گی۔ ترجمان کے مطابق سندھ کابینہ نے اجلاس میں کل 19 نکات پر غور کیا اور مختلف اہم فیصلے کیے۔ کابینہ نے گزشتہ اجلاس کے منٹس کی بھی منظوری دے دی۔
اجلاس کے دوران سندھ رینیوایبل انرجی کمپنی پر تفصیلی بریفنگ دی گئی۔ بتایا گیا کہ یہ کمپنی 2012ء میں قائم کی گئی تھی اور اس میں اب تک 101.622 ملین روپے کی سرمایہ کاری کی جا چکی ہے۔ بریفنگ میں یہ بھی بتایا گیا کہ کمپنی کے تمام عملی اور انتظامی امور پہلے ہی محکمہ توانائی (انرجی ڈپارٹمنٹ) انجام دے رہا ہے، جس کے باعث کمپنی کی علیحدہ حیثیت کی عملی ضرورت باقی نہیں رہی۔کابینہ نے تمام پہلوؤں کا جائزہ لینے کے بعد سندھ رینیوایبل انرجی کمپنی کو بند کرنے کی منظوری دے دی۔
محکمہ جنگلات سے متعلق ایجنڈا آئٹم پر بریفنگ دیتے ہوئے بتایا گیا کہ ڈپٹی کمشنر حیدرآباد نے درخواست کی ہے کہ دیھ بیلو میانو میں 6 ایم جی ڈی واٹر فلٹریشن پلانٹ کے قیام کے لیے 400 ایکڑ اراضی مختص کی جائے۔ اجلاس کو آگاہ کیا گیا کہ میئر حیدرآباد اس منصوبے کے تحت فلٹریشن پلانٹ لگانا چاہتے ہیں، جس سے شہر میں پانی کے دیرینہ مسئلے کے حل میں مدد ملے گی۔کابینہ نے تفصیلی غور و خوض کے بعد فیصلہ کیا کہ 400 ایکڑ کے بجائے 100 ایکڑ جنگلاتی اراضی حیدرآباد میونسپل کارپوریشن کو دی جائے گی۔ مزید یہ بھی فیصلہ کیا گیا کہ محکمہ بلدیات اس کے عوض محکمہ جنگلات کو شجرکاری کے لیے 100 ایکڑ متبادل زمین فراہم کرے گا، تاکہ ماحولیاتی توازن برقرار رکھا جا سکے۔اجلاس کے اختتام پر وزیراعلیٰ سندھ نے ہدایت دی کہ کابینہ کے تمام فیصلوں پر بروقت عملدرآمد کو یقینی بنایا جائے اور عوامی فلاح و بہبود سے متعلق منصوبوں میں کسی قسم کی تاخیر نہ کی جائے
یونان کشتی حادثہ کیس کے مدعیان نے ثاقب ججا کو مرکزی ملزم ماننے سے انکار کردیا۔ چیف جسٹس لاہور ہائیکورٹ عالیہ نیلم نے کہا کہ آپ ایک ظالم کو بچانے کی کوشش کررہے ہیں۔
لاہور ہائیکورٹ میں یونان کشی حادثے کے مرکزی ملزم ثاقب ججا کی عبوری ضمانت پر سماعت ہوئی، دوران سماعت چیف جسٹس لاہور ہائیکورٹ جسٹس عالیہ نیلم نے اہم ریمارکس دیے۔وکیل مدعی نے بتایا کہ مدعیوں نے بیان دیا ہے کہ ثاقب ججا ہمارا ملزم نہیں ہے۔ وفاقی حکومت کے وکیل نے کہا کہ ان مدعیوں کی درخواست پر ایف آئی اے نے کارروائی کی تھی۔چیف جسٹس لاہور ہائیکورٹ نے کہا کہ آپ ایک ظالم کو بچانے کی کوشش کررہے ہیں، آپ نے خود درخواست دی اب کہہ رہے ہیں یہ ہمارا ملزم نہیں۔ان کا کہنا تھا کہ ظالم کو بچانے کی کوشش مت کریں، انسانی زندگی کی کوئی قیمت ہے یا نہیں، میڈیا شور مچاتا ہے کہ ادارے کام نہیں کرتے، اگر ثابت ہوگیا مدعیوں نے درخواست دی تھی تو پھر جھوٹا بیان دینے پر کارروائی کریں گے۔
عدالت نے ملزم ثاقب ججا کی عبوری ضمانت میں 12 فروری تک توسیع کردی۔
بنگلا دیش کی عبوری حکومت نے بھارت کی طرف سے مفرور سابقہ وزیراعظم شیخ حسینہ واجد کو 23 جنوری کو نئی دہلی میں ایک عوامی تقریب سے خطاب کی اجازت دینے پر شدید غم و غصے اور تشویش کا اظہار کیاہے۔
بنگلا دیشی کی وزارتِ خارجہ نے ایک بیان میں کہا ہے کہ شیخ حسینہ نے بھارتی سرزمین سے اپنے خطاب میں تشدد بڑھکانے اور عوام کو موجودہ عبوری حکومت کیخلاف بغاوت پر اکسانے کی کوشش کی ہے۔ شیخ حسینہ نے بھارت کی جانب سے فراہم کردہ پلیٹ فارم کو استعمال کرتے ہوئے اپنی جماعت عوامی لیگ کے حامیوں کو ملک کے آئندہ عام انتخابات سبوتاژ کرنے کیلئے دہشتگردی کی کارروائیوں پر اکسانے کی کوشش کی۔بیان میں اس بات پر گہری تشویش کا اظہار کیا گیا کہ بھارت نے دوطرفہ حوالگی معاہدے کے باوجود شیخ حسینہ کی حوالگی کیلئے بنگلا دیش کی بارہا درخواستوں پر کوئی عملی اقدام نہیں کیا۔ اس طرزِعمل سے دونوں ممالک کے درمیان اعتماد کو شدید نقصان پہنچاہے۔وزارت خارجہ نے کہا کہ بھارتی دارالحکومت میں شیخ حسینہ کو اشتعال انگیز بیانات دینے کی اجازت دینا نہ صرف بنگلا دیش کی جمہوری طورپر اقتدار کی منتقلی کے عمل بلکہ خطے کے امن و سلامتی کیلئے بھی ایک سنگین خطرہ ہے۔
ڈھاکہ نے اس پیشرفت کو بنگلا دیشی عوام اور حکومت دونوں کے لیے واضح توہین قرار دیتے ہوئے خبردار کیاکہ اس کے علاقائی سطح پر بھی منفی اثرات مرتب ہو سکتے ہیں۔یہ واقعہ بنگلا دیش اور بھارت کے تعلقات کے مستقبل کیلئے ایک خطرناک مثال ہے اور ڈھاکہ میں کسی بھی آئندہ منتخب حکومت کی نئی دہلی کے ساتھ باہمی مفاد پر مبنی تعلقات برقرار رکھنے اور مضبوط بنانے کی صلاحیت کو کمزور کر سکتا ہے۔بیان میں مزید کہا گیا کہ عوامی لیگ کی قیادت کی جانب سے حالیہ اشتعال انگیز بیانات نے عبوری حکومت کے اس فیصلے کو مزید تقویت دی ہے جس کے تحت پارٹی کی سرگرمیوں پر پابندی عائد کی گئی۔ وزارتِ خارجہ نے واضح الفاظ میں خبردار کیا ہے کہ انتخابات سے قبل یا ان کے دوران کسی بھی قسم کے تشدد یا دہشتگردی کے واقعات کی مکمل ذمہ داری عوامی لیگ پر عائد کی جائے گی جبکہ انتخابی عمل کو نقصان پہنچانے کی کسی بھی سازش کو ناکام بنانے کے لیے تمام ضروری اقدامات کیے جائیں گے۔
کراچی: ایم کیو ایم پاکستان کے رہنما اور وفاقی وزیر برائے صحت مصطفیٰ کمال نے ایک بار پھر کراچی کو فوری طور پر وفاق کے کنٹرول میں لینے کا مطالبہ کرتے ہوئے کہا ہے کہ کراچی جیسے ملک کے سب سے بڑے اور معاشی حب شہر کو ایک نااہل صوبائی حکومت کے رحم و کرم پر نہیں چھوڑا جا سکتا۔
نجی ٹی وی جیو نیوز سے گفتگو کرتے ہوئے مصطفیٰ کمال کا کہنا تھا کہ وفاق کے پاس آئینی اختیار موجود ہے اور وہ آرٹیکل 148 کے تحت ایک نوٹیفکیشن کے ذریعے کراچی کو اپنے کنٹرول میں لے سکتا ہے۔ انہوں نے کہا کہ کراچی پاکستان کی معیشت کی شہ رگ ہے، یہاں کی بدانتظامی کا خمیازہ پورا ملک بھگت رہا ہے، اس لیے فوری اور ٹھوس فیصلے ناگزیر ہو چکے ہیں۔انہوں نے گل پلازا سانحے کا حوالہ دیتے ہوئے کہا کہ اس افسوسناک واقعے میں قیمتی جانیں ضائع ہوئیں، لوگ شہید ہوئے، اور یہ محض حادثہ نہیں بلکہ سندھ حکومت کی مجرمانہ غفلت کا نتیجہ ہے۔ مصطفیٰ کمال کا کہنا تھا کہ ہم نے گل پلازا کی کارکردگی اور ذمہ داران کی غفلت کو ظلم کہا اور آئندہ بھی ظلم کو ظلم کہتے رہیں گے۔ اگر سچ بولنے پر یہی رویہ اختیار کیا جائے گا تو وہ ایک بار پھر واضح کرتے ہیں کہ کراچی کو سندھ حکومت کے چنگل سے آزاد کرایا جائے۔انہوں نے کہا کہ سندھ حکومت کے حالیہ اقدامات نے خود ایم کیو ایم کے موقف کی تائید کر دی ہے کہ یہ حکومت نہ صرف ناکام ہوچکی ہے بلکہ شہریوں کے جان و مال کے تحفظ میں بھی بری طرح ناکام نظر آتی ہے۔
ایم کیو ایم پاکستان کے رہنماؤں سے سیکیورٹی واپس لینے کے معاملے پر گفتگو کرتے ہوئے وفاقی وزیر نے کہا کہ ان سے خود بھی سیکیورٹی واپس لے لی گئی ہے، تاہم انہیں اس سے کوئی فرق نہیں پڑتا۔ ان کا کہنا تھا کہ سندھ حکومت یہ سمجھتی ہے کہ سیکیورٹی واپس لے کر ہمیں ڈرایا جا سکتا ہے، لیکن وہ اس طرح کے ہتھکنڈوں سے مرعوب ہونے والے نہیں۔ انہوں نے واضح کیا کہ سندھ حکومت کو یہ حق حاصل نہیں کہ وہ کراچی پر حکمرانی کرے اور ایسے اقدامات کے ذریعے ایم کیو ایم کی آواز دبائی نہیں جا سکتی۔مصطفیٰ کمال نے سندھ حکومت پر دوہرا معیار اپنانے کا الزام لگاتے ہوئے کہا کہ جئے سندھ کے عناصر کھلے عام شاہراہوں پر کھڑے ہو کر پاکستان توڑنے کے نعرے لگاتے ہیں، اور سندھ حکومت انہیں سیکیورٹی فراہم کرتی ہے۔ ان کے مطابق یہ طرزِ عمل نہ صرف افسوسناک بلکہ ریاست کے لیے خطرناک ہے اور ایسے اقدامات سے ملک کو تباہی کی طرف دھکیلا جا رہا ہے۔انہوں نے کہا کہ اس معاملے پر وفاقی حکومت کو باقاعدہ خط بھی لکھا جا چکا ہے اور وفاقی کابینہ کے اجلاسوں میں بھی یہ مؤقف مسلسل پیش کیا جا رہا ہے۔ مصطفیٰ کمال کا کہنا تھا کہ پوری وفاقی حکومت اور ریاستی ادارے ان کے مؤقف کو سن رہے ہیں اور حالات کی سنگینی کو سمجھتے ہیں۔
سندھ میں آوارہ کتوں کے کاٹنے کے واقعات پر قابو نہ پایا جا سکا، جہاں ریبیز کے باعث ایک اور معصوم جان ضائع ہو گئی۔
سانگھڑ کے علاقے جھول میں 8 سالہ بچی آوارہ کتے کے کاٹنے کے بعد ریبیز میں مبتلا ہو کر دم توڑ گئی۔ طبی ذرائع کے مطابق یہ واقعہ سال 2026ء میں کتے کے کاٹنے سے ہلاکت کا پہلا کیس ہے، جس نے صوبے بھر میں صحت عامہ کے حوالے سے شدید خدشات کو جنم دے دیا ہے۔رپورٹ کے مطابق ڈیڑھ ماہ قبل جھول میں بچی کو آوارہ کتے نے کاٹا تھا۔ ابتدائی طور پر زخموں کا علاج کیا گیا تاہم بروقت اور مکمل اینٹی ریبیز ویکسین نہ ملنے کے باعث بچی میں ریبیز کی تصدیق ہو گئی۔ حالت بگڑنے پر اسے اسپتال منتقل کیا گیا مگر جانبر نہ ہو سکی۔ ماہرین کے مطابق ریبیز ایک مہلک مرض ہے جس میں علامات ظاہر ہونے کے بعد مریض کی جان بچانا انتہائی مشکل ہو جاتا ہے۔
اعداد و شمار صورتحال کی سنگینی کو مزید واضح کرتے ہیں۔ محکمہ صحت کی رپورٹ کے مطابق صرف ایک ماہ کے دوران سندھ بھر میں کتے کے کاٹنے کے 3 ہزار سے زائد کیسز رپورٹ ہو چکے ہیں۔ گزشتہ سال 2025ء میں صوبے میں ریبیز کے باعث 21 افراد جان کی بازی ہار گئے تھے، جبکہ اسی سال 60 ہزار سے زائد سگ گزیدگی کے واقعات ریکارڈ کیے گئے، جو اس مسئلے کے پھیلاؤ کی واضح علامت ہیں۔
طبی ماہرین کا کہنا ہے کہ آوارہ کتوں کی بڑھتی ہوئی تعداد، ویکسین کی قلت، بروقت علاج تک رسائی میں رکاوٹیں اور آگاہی کی کمی اس بحران کی بنیادی وجوہات ہیں۔ ان کے مطابق کتے کے کاٹنے کی صورت میں فوری طور پر زخم کو صاف پانی اور صابن سے دھونا، اور جلد از جلد اینٹی ریبیز ویکسین اور امیونوگلوبلین کا کورس مکمل کرنا جان بچانے کے لیے ناگزیر ہے۔
ہالی ووڈ اداکارہ کرسٹن اسٹیورٹ نے امریکی صدر ڈونلڈ ٹرمپ کی پالیسیوں پر شدید تنقید کرتے ہوئے اعلان کیا ہے کہ وہ امریکا میں آزادی سے کام نہیں کر سکتیں اس لیے وہ اپنی ہدایتکاری کے کیریئر کے لیے یورپ منتقل ہونے کا ارادہ رکھتی ہیں۔
چند ماہ قبل ڈونلڈ ٹرمپ نے امریکا سے باہر بننے والی فلموں پر 100 فیصد ٹیکس عائد کرنے کی تجویز دی تھی جس کا مقصد فلم سازی کو امریکا تک محدود کرنا تھا اداکارہ نے برطانوی اخبار دی ٹائمز کو انٹرویو میں اس پالیسی پر ردعمل دیتے ہوئے کہا کہ وہ صدر کے احکامات کی اندھی تقلید پر یقین نہیں رکھتیں خواہ وہ درست ہوں یا غلط۔
کرسٹن اسٹیورٹ کا کہنا تھا کہ ٹرمپ کی پالیسیوں کے باعث وہ امریکا میں آزادانہ طور پر کام کرنے کے قابل نہیں رہیں جس کی وجہ سے انہوں نے یورپ میں فلمیں بنانے کا فیصلہ کیا ہے،انہوں نے امریکا سے باہر بننے والی فلموں پر 100 فیصد ٹیکس کے تصور کو فلم انڈسٹری کے لیے خوفناک قرار دیا۔
اپنی ہدایتکاری میں بننے والی پہلی فلم ’دا کرنولوجی آف واٹر‘ کے حوالے سے کرسٹن اسٹیورٹ نے بتایا کہ یہ فلم لاتویا میں شوٹ کی گئی کیونکہ امریکا میں اس منصوبے پر کام کرنا ممکن نہیں تھاٹرمپ کے دور میں حقیقت بکھرتی جا رہی ہے مگر ہمیں اپنی مرضی کی دنیا تخلیق کرنی چاہیے، میں وہاں آزادی سے کام نہیں کر سکتی لیکن مکمل طور پر ہار بھی نہیں ماننا چاہتی۔
ڈونلڈ ٹرمپ کو سخت پیغام دیتے ہوئے اداکارہ نے کہ میں یورپ میں فلمیں بنانا چاہتی ہوں اور پھر انہیں امریکی عوام کے گلے اتارنا چاہتی ہوں،
وزیراعلیٰ پنجاب مریم نواز نے صوبے کے ہر ضلع میں اسٹروک مینجمنٹ سینٹر قائم کرنے کی منظوری دیدی، ہر ڈی ایچ کیو میں نیورالوجسٹ اور پیڈز نیورالوجسٹ تعینات کرنے کا اصولی فیصلہ بھی ہوگیا، کہا کہ چاہتے ہیں کسی مریض کو علاج کیلئے بڑے شہر نہ جانا پڑے۔
وزیراعلیٰ پنجاب مریم نواز کی زیر صدارت فالج کے علاج کیلئے اقدامات سے متعلق اجلاس ہوا، وزیراعلیٰ نے ہدایت کی کہ ہر ضلع میں ایک ڈاکٹر اور نرس کو فوری طور پر 3 ماہ کی اسٹروک مینجمنٹ ٹریننگ کرائی جائے۔انہوں نے فالج کے مریضوں کیلئے فوری طور پر ٹیلی میڈسن پراجیکٹ شروع کرنے کا حکم بھی دیا، ضلعی اسپتالوں کے ڈاکٹر فوری علاج کیلئے اسپیشلسٹ اور کنسلٹنٹ سے ٹیلیفونک رابطہ کرسکیں گے۔مریم نواز کا کہنا تھا کہ فالج کے علاج کیلئے گولڈن آورز کی اہمیت مسلمہ ہے، پنجاب کے ہر چلڈرن اسپتال میں اسٹروک مینجمنٹ سینٹر بنائیں گے۔پمز کے نیورالوجسٹ ڈاکٹر قاسم بشیر نے اجلاس کو اسٹروک مینجمنٹ پروگرام پر بریفنگ دی۔