Blog

‎پاکستان کے کئی حصوں میں سردی کی شدید ترین لہر نے کئی سالوں کے ریکارڈ توڑ دیے ہیں، جبکہ برف باری اور بارش برسانے والا طاقتور موسمی سسٹم آج ملک میں داخل ہونے کا امکان ہے۔
‎بالائی علاقوں میں درجہ حرارت نقطۂ انجماد سے کئی درجے نیچے گر چکا ہے اور شدید برف باری کے باعث معمولاتِ زندگی بری طرح متاثر ہو گئے ہیں۔ بٹگرام، دیربالا اور چترال میں برف باری سے رابطہ سڑکیں بند جبکہ بجلی کی فراہمی معطل ہو گئی ہے۔
‎سوات اور مانسہرہ کے سیاحتی مقامات مکمل طور پر برف کی لپیٹ میں ہیں۔ مالم جبہ میں پانچ فٹ، کالام میں تین فٹ، شوگراں میں ایک فٹ اور کاغان میں ڈیڑھ فٹ تک برف پڑ چکی ہے۔ بٹگرام کی تحصیل الائی میں کئی فٹ برف جمع ہونے سے گاڑیاں پھنس گئی ہیں جبکہ شانگلہ میں بھی سڑکیں بند ہیں، مریضوں کو چارپائیوں پر اسپتال منتقل کیا جا رہا ہے۔
‎دیر بالا اور چترال میں شدید برف باری کے باعث تمام بڑی رابطہ سڑکیں بند ہیں، ایک فٹ سے زائد برف پڑنے سے نظامِ زندگی مفلوج ہو گیا ہے اور بجلی کی ترسیل بھی متاثر ہوئی ہے۔
‎دوسری جانب شمالی اور بالائی بلوچستان میں برف باری کے بعد وادی کوئٹہ میں سردی نے کئی سال کے ریکارڈ توڑ دیے ہیں، جہاں سورج نکلنے کے باوجود درجہ حرارت نقطۂ انجماد سے اوپر نہ آ سکا۔

‎امریکی صدر ڈونلڈ ٹرمپ نے نیویارک پوسٹ کو دیے گئے ایک انٹرویو میں دعویٰ کیا ہے کہ وینزویلا کے صدر نکولس مادورو کی گرفتاری کے دوران ایک خفیہ امریکی ہتھیار Discombobulator استعمال کیا گیا، جس نے وینزویلا کے دفاعی نظام کو مکمل طور پر ناکارہ بنا دیا۔ صدر ٹرمپ کے مطابق یہ ہتھیار کاراکاس میں امریکی فوج کی کارروائی کے دوران فعال ہوا اور وینزویلا کے راکٹ اور دیگر دفاعی آلات کام نہ کر سکے، جس کے نتیجے میں مادورو اور ان کی اہلیہ کو گرفتار کر کے امریکہ منتقل کیا گیا۔
‎صدر ٹرمپ نے کہا کہ وینزویلا کے حکام کے پاس جدید روسی اور چینی راکٹ موجود تھے اور وہ مکمل طور پر تیار تھے، مگر Discombobulator کے استعمال سے یہ تمام ہتھیار غیر فعال ہو گئے اور کسی بھی قسم کی مزاحمت ممکن نہ رہی۔ انہوں نے مزید کہا کہ امریکی فوج نے اس ہتھیار کی مدد سے کارروائی میں نہ صرف اپنے فوجی اہلکاروں کی حفاظت کو یقینی بنایا بلکہ کسی بھی جانی نقصان کے خطرے کو بھی کم کر دیا۔
‎واضح رہے کہ 3 جنوری کو وینزویلا میں امریکی فوج کی یہ خفیہ کارروائی بڑے پیمانے پر کی گئی تھی، جس میں مادورو کے رہائشی علاقے اور سیکیورٹی زون کو نشانہ بنایا گیا۔ اس کارروائی کے بعد وینزویلا میں ہنگامی کیفیت جاری رہی اور بین الاقوامی سطح پر اس اقدام نے تہلکہ مچایا۔ امریکی صدر کے اس بیان کے بعد Discombobulator ہتھیار اور اس کی صلاحیتوں کے بارے میں عالمی میڈیا اور تجزیہ کار بھی متحرک ہو گئے ہیں۔

‎پاکستان علما کونسل نے افغان حکومت کے نئے فوجداری ضابطے پر شدید تشویش کا اظہار کیا ہے اور کہا ہے کہ شریعت کے نام پر معاشرے کو غلام اور آزاد میں تقسیم کرنا ناقابل قبول ہے۔ کونسل نے نشاندہی کی کہ افغان حکومت کے یہ احکامات قرآن و سنت کے مطابق نہیں بلکہ ہندواتہ تعلیمات سے متاثر نظر آتے ہیں۔
‎اعلامیہ میں مزید کہا گیا کہ طالبان حکومت اگر خود کو شرعی اسلامی حکومت قرار دیتی ہے تو اسے ایسے فیصلوں پر اپنا موقف فوری طور پر دنیا کے سامنے واضح کرنا چاہیے۔ کونسل نے خبردار کیا کہ عہد جاہلیت کے قوانین اور رسومات کو اسلام کے نام پر دوبارہ نافذ کرنا انسانی وقار اور حقوق کی توہین کے مترادف ہے۔
‎پاکستان علما کونسل نے اعلان کیا کہ اس طرح کے احکامات نہ تو شرعی ہیں اور نہ ہی انسانی، بلکہ یہ جدید جاہلیت کے دور کے مترادف ہیں اور عالمی برادری کے لیے تشویش کا باعث ہیں۔

‎آسٹریلیا کے سڈنی ہاربر کے ساحل پر 12 سالہ نیکو اینٹک شارک کے حملے کے بعد شدید زخمی ہوا اور ہسپتال میں دوران علاج دم توڑ گیا۔ واقعہ اتوار کی سہ پہر پیش آیا جب لڑکا چٹان سے پانی میں چھلانگ لگا رہا تھا۔ دوستوں نے اسے فوری طور پر باہر نکال کر سڈنی چلڈرن ہسپتال منتقل کیا، جہاں وہ زخموں کی تاب نہ لاتے ہوئے جانبر نہ ہو سکا۔ یہ حملہ 48 گھنٹوں کے دوران این ایس ڈبلیو کے ساحلوں پر ہونے والے چار شارک حملوں میں پہلا تھا۔

‎ترک میڈیا کے مطابق مشرقی اناطولیہ کے علاقوں میں شدید برف باری کے بعد سردی کے پچھلے تمام ریکارڈ توڑ دیے گئے ہیں۔ محکمہ موسمیات نے شہریوں کو وارننگ جاری کرتے ہوئے گھروں تک محدود رہنے کی ہدایت کی ہے۔
‎اعداد و شمار کے مطابق صوبہ ھکاری کا قصبہ یوکسیکووا ملک کے سرد ترین رہائشی علاقوں میں سرفہرست رہا۔ صلاح الدین ایوبی ایئرپورٹ کے نواح میں درجہ حرارت منفی 32.7 ڈگری تک گر گیا۔
‎سطح سمندر سے 1950 میٹر کی بلندی پر واقع اس قصبے کو بھاری برف نے ڈھانپ دیا، گاڑیاں منجمد ہو گئیں اور عمارتوں کی چھتوں سے بڑی برف کی لٹکیں بن گئیں۔ اس صورتحال کی تصاویر اور ویڈیوز سوشل میڈیا پر وائرل ہو چکی ہیں، اور لوگ اس خطے کو روسی شہر یاکوتسک سے مشابہ قرار دے رہے ہیں جو دنیا کا سرد ترین شہر مانا جاتا ہے۔