Baaghi TV

Blog

  • اوکاڑہ: یومِ یکجہتی کشمیر پر ضلعی انتظامیہ اور گورنمنٹ گریجویٹ کالج کی پُرامن ریلی

    اوکاڑہ: یومِ یکجہتی کشمیر پر ضلعی انتظامیہ اور گورنمنٹ گریجویٹ کالج کی پُرامن ریلی

    اوکاڑہ (باغی ٹی وی/نامہ نگار ملک ظفر)یومِ یکجہتی کشمیر کے موقع پر اوکاڑہ میں ضلعی انتظامیہ کے زیرِ اہتمام ایک پُرامن اور باوقار یکجہتی ریلی کا انعقاد کیا گیا، جس میں کشمیری عوام کے ساتھ بھرپور اظہارِ یکجہتی کیا گیا۔

    تفصیلات کے مطابق ریلی کی قیادت ایڈیشنل ڈپٹی کمشنر ریونیو محمد شعجین وسطرو نے کی۔ اس موقع پر ایڈیشنل ڈپٹی کمشنر فنانس اینڈ پلاننگ چوہدری عبدالجبار گجر، ایڈیشنل ڈپٹی کمشنر جنرل احمد سلیم چشتی، دیگر سرکاری افسران، سول سوسائٹی کے نمائندے، اساتذہ، طلبہ اور شہریوں کی بڑی تعداد نے شرکت کی۔

    ریلی کے شرکاء نے کشمیر کی آزادی اور مقبوضہ وادی میں جاری انسانی حقوق کی سنگین خلاف ورزیوں کے خلاف بینرز اور پلے کارڈز اٹھا رکھے تھے، جبکہ فضا ’’کشمیر بنے گا پاکستان‘‘ اور ’’ہم کشمیریوں کے ساتھ ہیں‘‘ جیسے فلک شگاف نعروں سے گونجتی رہی۔

    اس موقع پر خطاب کرتے ہوئے ایڈیشنل ڈپٹی کمشنر فنانس اینڈ پلاننگ چوہدری عبدالجبار گجر نے کہا کہ کشمیری عوام سے اظہارِ یکجہتی کا مقصد دنیا کو یہ باور کروانا ہے کہ پاکستانی قوم مظلوم کشمیریوں کے ساتھ کھڑی ہے۔ انہوں نے کہا کہ مقبوضہ کشمیر کے غاصبانہ قبضے کے خاتمے تک پاکستان ہر فورم پر اپنی آواز بلند کرتا رہے گا، کیونکہ پاکستان کی آزادی کشمیر کی آزادی کے بغیر نامکمل ہے۔

    ایڈیشنل ڈپٹی کمشنر جنرل احمد سلیم چشتی نے اپنے خطاب میں کہا کہ کشمیری عوام اپنی جدوجہدِ آزادی میں تنہا نہیں ہیں، پاکستان کی پوری قوم ان کے شانہ بشانہ کھڑی ہے۔ انہوں نے عالمی برادری اور عالمِ اسلام پر زور دیا کہ وہ اقوامِ متحدہ کی قراردادوں کے مطابق کشمیری عوام کو ان کا حقِ خودارادیت دلوانے کے لیے مؤثر کردار ادا کریں۔

    ریلی کے اختتام پر مقبوضہ کشمیر کے شہداء کے درجات کی بلندی اور وادیٔ کشمیر کی جلد آزادی کے لیے خصوصی دعا بھی کی گئی۔

    دوسری طرف گورنمنٹ گریجویٹ کالج اوکاڑہ میں یومِ یکجہتی کشمیر کے حوالے سے ایک پروقار سیمینار اور ریلی کا انعقاد کیا گیا جس میں کشمیری عوام کی جدوجہدِ آزادی اور ان پر ہونے والے مظالم کو بھرپور طریقے سے اجاگر کیا گیا۔ سیمینار کی نظامت ڈاکٹر حسن رضا اقبالی نے نہایت خوش اسلوبی سے انجام دی جبکہ پروفیسر عثمان غنی اور پروفیسر حسیب افتخار نے اپنے خطاب میں کشمیریوں کی لازوال قربانیوں پر روشنی ڈالی۔ پرنسپل کالج پروفیسر علی حیدر ڈوگر نے اپنے صدارتی خطاب میں کشمیری مسلمانوں کے ساتھ مکمل یکجہتی کا اظہار کرتے ہوئے اس عزم کا اعادہ کیا کہ پاکستان ان کی جائز جدوجہد کی حمایت جاری رکھے گا

  • ڈاکو ایک لاکھ ڈالر اور 200 تولے سونا لوٹ کر فرار

    ڈاکو ایک لاکھ ڈالر اور 200 تولے سونا لوٹ کر فرار

    
کراچی کے علاقے بہادر آباد میں ایک شہری سے بڑی ڈکیتی کی واردات سامنے آئی ہے، جس میں ڈاکوؤں نے 200 تولے سونا اور ایک لاکھ امریکی ڈالر اپنے قبضے میں لے لیے۔ واقعہ ایسے وقت پیش آیا جب شہری بینک سے رقم نکلوا کر واپس اپنے گھر کی جانب جا رہا تھا۔
    پولیس کے مطابق ڈاکو بائیک پر سوار تھے اور شہری کی جانب سے بینک سے رقم لینے کے فوراً بعدڈاکوؤں نے شہری کو گھیر لیا، چوری کرنے کے بعد کچھ دور جا کر ان کا توازن بگڑا۔ جس کے نتیجے میں ڈاکوؤں کے ہاتھ سے بیگ گر گیا اور کچھ سونا سڑک پر بکھر گیا، جسے مقامی شہریوں نے فوراً اٹھا لیا۔
    ملزمان فرار ہونے میں کامیاب ہوئے تاہم پولیس نے علاقے میں سرچ آپریشن اور شواہد جمع کرنے کا کام شروع کر دیا ہے۔ پولیس کا کہنا ہے کہ واقعے کے تمام پہلوؤں کی تحقیقات کی جا رہی ہیں اور شہریوں سے اپیل کی گئی ہے کہ اگر کسی نے ڈکیتی کے دوران رقم یا سونا دیکھا یا پکڑا ہو تو فوری اطلاع فراہم کریں تاکہ ملزمان کی گرفتاری ممکن بنائی جا سکے۔
    ‎واقعہ کے بعد علاقے میں سکیورٹی کے انتظامات سخت کر دیے گئے ہیں اور پولیس نے مقامی دکانداروں اور رہائشیوں کو ہوشیار رہنے کی ہدایت بھی کی ہے۔

  • میئر مرتضیٰ وہاب کا جلد کراچی میں بھی بسنت منانے کا اعلان

    میئر مرتضیٰ وہاب کا جلد کراچی میں بھی بسنت منانے کا اعلان

    
میئر کراچی مرتضیٰ وہاب نے شہر میں بسنت منانے کا اعلان کرتے ہوئے کہا ہے کہ جلد کراچی میں پتنگ بازی کا باقاعدہ فیسٹیول منعقد کیا جائے گا۔ ان کا کہنا تھا کہ بچپن میں انہیں خود بھی پتنگ بازی کا بے حد شوق رہا ہے اور وہ چاہتے ہیں کہ کراچی کے شہری ایک مثبت اور ثقافتی سرگرمی سے لطف اندوز ہوں۔
    ‎مرتضیٰ وہاب نے اپنے حالیہ بیان میں کہا کہ بسنت کے فیسٹیول کے لیے باغِ جناح اور بے نظیر بھٹو پارک کو منتخب کیا گیا ہے، جہاں شہریوں کے لیے محفوظ اور منظم ماحول فراہم کیا جائے گا۔ ان کا کہنا تھا کہ فیسٹیول کے انعقاد کا مقصد شہر میں خوشیوں کو فروغ دینا اور عوام کو تفریح کے مواقع فراہم کرنا ہے۔
    ‎میئر کراچی نے مزید کہا کہ بسنت کے انعقاد کے دوران سکیورٹی اور حفاظتی اقدامات کو ترجیح دی جائے گی تاکہ کسی قسم کے ناخوشگوار واقعے سے بچا جا سکے۔ انتظامیہ اس بات کو یقینی بنائے گی کہ پتنگ بازی مقررہ ضابطوں کے تحت ہو اور شہریوں کی جان و مال کو کوئی خطرہ لاحق نہ ہو۔
    ‎ان کے مطابق کراچی ایک زندہ دل شہر ہے اور ایسے ثقافتی میلوں سے نہ صرف شہریوں کا مورال بلند ہوتا ہے بلکہ شہر کی مثبت شناخت بھی اجاگر ہوتی ہے۔

  • ڈیرہ غازی خان: ڈائیوو ویسٹ مینجمنٹ کمپنی کی یومِ کشمیر پر یکجہتی ریلی

    ڈیرہ غازی خان: ڈائیوو ویسٹ مینجمنٹ کمپنی کی یومِ کشمیر پر یکجہتی ریلی

    ڈیرہ غازی خان (باغی ٹی وی/سٹی رپورٹر)ڈیرہ غازی خان میں ڈائیوو ویسٹ مینجمنٹ کمپنی کی جانب سے یومِ کشمیر کے موقع پر کشمیری عوام سے اظہارِ یکجہتی کے لیے ایک بھرپور ریلی کا انعقاد کیا گیا۔ ریلی کی قیادت ریجنل منیجر شاہزیب خان اور کوآرڈینیٹر عبداللہ عباسی نے کی، جبکہ ڈسٹرکٹ منیجر توفیق عادل اور تحصیل منیجر عمر مجتبیٰ لغاری نے خصوصی شرکت کی۔

    ریلی کا مقصد مظلوم کشمیری عوام کے ساتھ بھرپور یکجہتی کا اظہار اور بھارتی مظالم کے خلاف آواز بلند کرنا تھا۔ ریلی ڈی سی آفس سے شروع ہو کر کچہری چوک پر اختتام پذیر ہوئی، جہاں شرکاء نے کشمیر کی آزادی کے حق میں نعرے لگائے اور بھارت کے مظالم کی شدید مذمت کی۔

    اس موقع پر خطاب کرتے ہوئے ریجنل منیجر ڈائیوو ویسٹ مینجمنٹ شاہزیب خان نے کہا کہ کشمیر پاکستان کی شہ رگ ہے اور کوئی بھی دشمن اگر اس کی طرف میلی آنکھ سے دیکھے گا تو پوری قوم اسے ہرگز برداشت نہیں کرے گی۔ انہوں نے کہا کہ کشمیری عوام کی جدوجہدِ آزادی میں پوری پاکستانی قوم ان کے شانہ بشانہ کھڑی ہے۔

    کوآرڈینیٹر عبداللہ عباسی نے اپنے خطاب میں کہا کہ ہم قربانیاں تو دے سکتے ہیں مگر کشمیر پر کوئی سمجھوتہ ممکن نہیں۔ انہوں نے بھارت کو خبردار کرتے ہوئے مطالبہ کیا کہ وہ اپنے ناپاک عزائم ترک کرے اور کشمیری عوام کو ان کا بنیادی حقِ خودارادیت فراہم کرے۔

    ریلی کے اختتام پر شرکاء نے اس عزم کا اعادہ کیا کہ کشمیر کی مکمل آزادی تک جدوجہد جاری رکھی جائے گی اور کشمیری عوام کو کبھی تنہا نہیں چھوڑا جائے گا۔

  • 
روی چندرن ایشون نے ٹی ٹوئنٹی ورلڈکپ میں پاکستان کے جیتنے کے امکانات روشن قرار دے دیے

    
روی چندرن ایشون نے ٹی ٹوئنٹی ورلڈکپ میں پاکستان کے جیتنے کے امکانات روشن قرار دے دیے

    
سابق بھارتی اسپنر روی چندرن ایشون نے آئی سی سی مینز ٹی ٹوئنٹی ورلڈکپ میں پاکستان کے جیتنے کے امکانات کو مضبوط قرار دیتے ہوئے کہا ہے کہ اس ایونٹ میں پاکستان واقعی ایک خطرناک ٹیم ثابت ہو سکتی ہے۔
    اپنے یوٹیوب چینل پر پاکستان اسکواڈ کا تجزیہ کرتے ہوئے ایشون نے کہا کہ شاید کچھ لوگوں کو یہ بات پسند نہ آئے، لیکن وہ صرف کرکٹ کے حوالے سے بات کر رہے ہیں، اور ان کے خیال میں پاکستان کے ورلڈکپ جیتنے کے امکانات خاصے اچھے ہیں۔
    ‎ایشون کے مطابق پاکستان کی سب سے بڑی طاقت اس کی اوپننگ جوڑی اور بولنگ لائن اپ ہے۔ انہوں نے کہا کہ اس بار بابر اعظم اوپن نہیں کریں گے بلکہ صاحبزادہ فرحان اور صائم ایوب اننگز کا آغاز کریں گے، اور صائم ایوب پاور پلے میں جارحانہ بیٹنگ کے باعث مؤثر ثابت ہوئے ہیں۔
    ‎بولنگ کے حوالے سے ایشون نے کہا کہ شاہین شاہ آفریدی کا پاور پلے میں اکانومی ریٹ 6.5 ہے، جو ایک بڑا پلس پوائنٹ ہے، جبکہ ابرار احمد اور محمد نواز بھی اہم بولرز ہیں۔ ان کے مطابق نواز کنٹرول کے ساتھ بولنگ کرتے ہیں اور ابرار اپنی انفرادیت کی وجہ سے خطرناک ثابت ہو سکتے ہیں۔
    ‎39 سالہ ایشون نے پاکستان ٹیم کی کمزوریوں کی نشاندہی بھی کی، جن میں بعض کھلاڑیوں کی غیر مستقل کارکردگی اور ٹیم کمبی نیشن کے فیصلے شامل ہیں۔ انہوں نے کہا کہ بابر اعظم کا مڈل آرڈر میں آنا ایک چیلنج ہو سکتا ہے، جبکہ نسیم شاہ اور شاہین شاہ آفریدی کی ڈیتھ اوورز میں بولنگ زیادہ مؤثر نہیں رہی، اور شاداب خان کی بیٹنگ اور بولنگ فارم میں بھی کمی آئی ہے۔
    ‎ایشون کا کہنا تھا کہ مجموعی طور پر پاکستان ایک مضبوط ٹیم ہے، کمزوریاں ضرور ہیں، لیکن سلمان علی آغا جیسے کھلاڑی بھی موجود ہیں جن کا اکثر ذکر نہیں کیا جاتا اور وہ میچ کا پانسہ پلٹنے کی صلاحیت رکھتے ہیں۔
    ‎واضح رہے کہ آئی سی سی ٹی ٹوئنٹی ورلڈکپ 7 فروری سے 8 مارچ تک بھارت اور سری لنکا میں منعقد ہوگا، جبکہ پاکستان ایونٹ میں اپنا پہلا میچ نیدرلینڈز کے خلاف کھیلے گا۔

  • 
سندھ میں امتحانی فیس وصولی پر وزیر تعلیم کا نوٹس، بورڈز کو رقم لینے سے روکنے کی ہدایت

    
سندھ میں امتحانی فیس وصولی پر وزیر تعلیم کا نوٹس، بورڈز کو رقم لینے سے روکنے کی ہدایت

    ‎وزیر تعلیم سندھ سردار علی شاہ نے صوبے کے بعض تعلیمی بورڈز کی جانب سے امتحانی فیس اور آئی ٹی چارجز کے نام پر رقم وصول کرنے کی شکایات پر نوٹس لے لیا ہے۔ انہوں نے واضح کیا کہ سندھ میں تعلیم ایک بنیادی حق ہے اور صوبائی حکومت کی پالیسی کے مطابق داخلے سے لے کر امتحانات تک تمام مراحل میں تعلیم مکمل طور پر مفت ہے، اس لیے کسی بھی طالب علم سے کسی بھی قسم کی فیس وصول نہیں کی جا سکتی۔
    ‎سردار علی شاہ نے کہا کہ حکومت سندھ پہلے ہی میٹرک اور انٹر کے طلبہ کی امتحانی فیس ادا کر رہی ہے، اس کے باوجود بعض بورڈز کی جانب سے اضافی چارجز کی شکایات تشویشناک ہیں۔ انہوں نے اس عمل کو ناقابل قبول قرار دیتے ہوئے کہا کہ فیس یا آئی ٹی چارجز کے نام پر رقم لینا سرکاری پالیسی کی خلاف ورزی ہے۔
    ‎اس معاملے پر وزیر تعلیم نے سیکرٹری کالجز کو ہدایت کی ہے کہ وہ فوری طور پر سیکرٹری یونیورسٹیز اینڈ بورڈ سے رابطہ کریں اور تمام تعلیمی بورڈز کو واضح احکامات جاری کیے جائیں کہ کسی بھی سطح پر طلبہ سے فیس وصول نہ کی جائے۔ انہوں نے زور دیا کہ ان احکامات پر ہر صورت عمل درآمد یقینی بنایا جائے۔
    ‎وزیر تعلیم سندھ کا کہنا تھا کہ حکومت تعلیم کے فروغ کے لیے عملی اقدامات کر رہی ہے اور کسی بھی ایسے اقدام کو برداشت نہیں کیا جائے گا جو طلبہ اور والدین پر مالی بوجھ کا سبب بنے۔ انہوں نے عندیہ دیا کہ اگر کسی بورڈ نے ہدایات کے باوجود فیس وصول کی تو اس کے خلاف سخت کارروائی کی جائے گی۔

  • ‎لاہور میں بسنت کا رنگا رنگ میلہ، چند گھنٹوں بعد پتنگیں آسمان پر ہوں گی

    ‎لاہور میں بسنت کا رنگا رنگ میلہ، چند گھنٹوں بعد پتنگیں آسمان پر ہوں گی

    ‎لاہور میں بسنت کا تہوار پوری آب و تاب کے ساتھ منانے کی تیاریاں مکمل کر لی گئی ہیں۔ شہر بھر میں بسنت کا رنگ نمایاں ہو چکا ہے اور شہری رات بارہ بجے کے بعد پتنگ بازی، پیچ لڑانے اور روایتی نعروں کے ساتھ تہوار کا آغاز کریں گے۔
    ‎اندرون لاہور میں گھروں کی چھتیں سجا دی گئی ہیں جبکہ مختلف علاقوں میں میلے کا سماں ہے۔ گلی محلوں میں پتنگوں اور ڈور کی خریداری عروج پر ہے اور بازاروں میں غیر معمولی رش دیکھا جا رہا ہے۔
    ‎بچے، نوجوان اور بزرگ سب ہی بسنت کے جوش میں مبتلا ہیں۔ شہر بھر میں خوشی، رنگ اور رونق کا ماحول ہے اور شہری بہار کے اس روایتی تہوار کو منانے کے لیے بے تاب نظر آ رہے ہیں۔

  • 
بلوچستان میں حالات معمول پر، کوئٹہ میں سیکورٹی آپریشن جاری

    
بلوچستان میں حالات معمول پر، کوئٹہ میں سیکورٹی آپریشن جاری

    
حکومت بلوچستان نے صوبے بھر میں حالات کے معمول پر آنے کا اعلان کیا ہے، تاہم کوئٹہ کے بعض علاقوں میں خفیہ اطلاعات کی بنیاد پر سرچ اینڈ کومبنگ آپریشن جاری ہے۔ ترجمان بلوچستان حکومت شاہد رند کے مطابق کوئٹہ میں آپریشن کے دوران تقریباً 100 مشتبہ افراد کو گرفتار کیا گیا اور اسلحہ بھی برآمد ہوا۔
    انہوں نے بتایا کہ شہر میں انٹرنیٹ سروس آج بحال کر دی جائے گی، تاہم جہاں آپریشن جاری ہے وہاں عارضی طور پر انٹرنیٹ سروس متاثر ہو سکتی ہے۔ دوسری جانب نوشکی اور مستونگ میں جیل پر حملوں کے بعد تقریباً 60 قیدی فرار ہو گئے ہیں، جن کی تلاش کا کام تاحال جاری ہے۔
    ‎پاک فوج کے شعبہ تعلقات عامہ (آئی ایس پی آر) کے مطابق پنجگور اور ہرنائی میں کیے گئے انٹیلی جنس بیسڈ آپریشنز میں 216 دہشتگرد ہلاک ہوئے، جس سے بھارتی پراکسی نیٹ ورک کو شدید دھچکا پہنچا اور ان کی قیادت و کمانڈ سسٹم مکمل طور پر تباہ ہو گیا۔
    ‎صوبائی حکومت نے نوشکی میں نقصان زدہ سڑکوں کی بحالی کا کام بھی شروع کر دیا ہے تاکہ عام شہریوں کی نقل و حمل پر اثر کم سے کم ہو۔ بلوچستان حکومت نے اس بات پر زور دیا ہے کہ شہری کسی بھی مشکوک سرگرمی کی اطلاع فوراً متعلقہ حکام کو دیں تاکہ امن و امان قائم رکھا جا سکے۔

  • 
کشمیر جلد آزادی کی نئی صبح دیکھے گا، فیلڈ مارشل سید عاصم منیر

    
کشمیر جلد آزادی کی نئی صبح دیکھے گا، فیلڈ مارشل سید عاصم منیر

    
سربراہ پاک فوج فیلڈ مارشل سید عاصم منیر نے کہا ہے کہ کشمیر جلد آزادی کی نئی صبح دیکھے گا جو اہلِ کشمیر کی اجتماعی خواہش اور ان کا مقدر ہے۔ پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل سید عاصم منیر نے مظفرآباد کا دورہ کیا جہاں انہوں نے جموں و کشمیر یادگارِ شہدا پر حاضری دی، پھول رکھے اور کشمیر تحریک کے شہدا کی بہادری اور بے لوث قربانیوں کو خراجِ تحسین پیش کیا۔
    آئی ایس پی آر کے مطابق ممتاز شخصیات اور سابق فوجیوں سے گفتگو کرتے ہوئے فیلڈ مارشل سید عاصم منیر نے کہا کہ بھارت کی ریاستی جارحیت اور انسانی حقوق کی سنگین خلاف ورزیاں کشمیری عوام کے حوصلے پست نہیں کر سکیں۔ ان کا کہنا تھا کہ ہندوتوا پر مبنی پالیسیوں کے باوجود کشمیری عوام کی جدوجہد مزید مضبوط ہوئی ہے۔
    ‎فیلڈ مارشل نے واضح کیا کہ پاکستان کشمیریوں کی سیاسی، اخلاقی اور سفارتی حمایت جاری رکھے گا اور عالمی فورمز پر مسئلہ کشمیر کو بھرپور انداز میں اجاگر کرتا رہے گا۔ انہوں نے مسئلہ کشمیر کے اقوام متحدہ کی قراردادوں کے مطابق حل کی حمایت کا اعادہ بھی کیا۔
    ‎آئی ایس پی آر کے مطابق چیف آف ڈیفنس فورسز نے اگلی صفوں کا دورہ بھی کیا اور وہاں تعینات افسران اور جوانوں سے ملاقات کی۔ انہوں نے جوانوں کے بلند حوصلے، پیشہ ورانہ مہارت اور فرض شناسی کو سراہتے ہوئے آپریشنل تیاریوں اور ہر سطح پر ہم آہنگی برقرار رکھنے پر زور دیا۔
    ‎فیلڈ مارشل سید عاصم منیر نے کہا کہ مشکل آپریشنل حالات کے باوجود افسران اور جوانوں کا جذبہ قابلِ تحسین ہے، کسی بھی دشمنانہ اقدام کا فوری، مؤثر اور بھرپور جواب دیا جائے گا، اور پاکستان کی مسلح افواج روایتی اور ہائبرڈ دونوں طرح کے خطرات سے نمٹنے کے لیے مکمل طور پر تیار ہیں۔

  • 
فیلڈ مارشل عاصم منیر سے ازبکستان کے صدر کی ملاقات

    
فیلڈ مارشل عاصم منیر سے ازبکستان کے صدر کی ملاقات

    ‎فیلڈ مارشل سید عاصم منیر سے ازبکستان کے صدر شوکت مرزائیوف کی ملاقات ہوئی ہے۔ پاک فوج کے شعبہ تعلقات عامہ (آئی ایس پی آر) کے مطابق آرمی چیف نے مہمان صدر اور ان کے وفد کا پرتپاک استقبال کیا۔ چیف آف ڈیفنس فورسز نے دورے کے دوران خود معزز صدر کی رہنمائی کی اور انہیں گلوبل انڈسٹریل اینڈ ڈیفنس سلوشنز پر بریفنگ دی گئی۔
    ‎آئی ایس پی آر کے مطابق ملاقات میں پاکستان کی مقامی دفاعی پیداوار اور صنعتی ترقی پر بھی تفصیلی بریفنگ دی گئی۔ اس دوران دونوں ممالک نے دفاعی اور صنعتی تعاون بڑھانے پر اتفاق کیا۔ فریقین نے شراکت داری، علم کے تبادلے اور مشترکہ منصوبوں کو وسعت دینے کی اہمیت پر زور دیا۔