سوشل میڈیا کا جادو اس وقت سر چڑھ کر بول رہا اور اس وقت لڑکیاں ہوں یا لڑکے اور کسی بھی شعبہ ہائے زندگی سے تعلق رکھنے والے لوگ سب اسی بخار میں مبتلا نظر آتے ہیں. بھارتی اریاست اڈیشہ میں ایک ہسپتال میں نوزائیدہ بچوں کی دیکھ بھال میں مصروف نرسوں کی ایک ویڈیو سوشل میڈیا پر وائرل ہوئی ہے جس میں نرسیں نوزائیدہ بچوں اور مریضوں کی دیکھ بھال چھوڑ کر ٹک ٹاک پر ویڈیو بناتی نظر آتی ہیں.
باغی ٹی وی کی رپورٹ کے مطابق اڈیشہ میں ضلع صدر ہسپتال کے سی ڈی ایم او نے اپنی ڈیوٹی سےغفلت اور لاپرواہی برتنے پر بعض نرسوں کو وجہ بتاؤ نوٹس جاری کئے ہیں. سی ڈی ایم او اجیت کمار موہنتی نے سوشل میڈیا میں کچھ نرسوں کے ٹک ٹاک ویڈیو کے وائرل ہونے کے بعد وجہ بتاو نوٹس جاری کیا ہے ۔ ویڈیو میں نرسیں اپنی آفیشیل ڈریس میں ایس این سی یو کے اندر گاتے ، ناچتے اور مستی کرتے نظر آرہی ہیں جبکہ افسوسناک صورتحال یہ ہے کہ ویڈیو میں ہسپتال کے بیڈ پر لیٹے ہوئے مریض بھی یہ سب دیکھ رہے ہیں ۔
ہسپتال کے انچارج تپن کمار ڈنڈا کا کہنا ہے کہ اس معاملہ کی تحقیقات کی جارہی ہیں ۔ سی ڈی ایم او نے واقعہ کو بدقسمتی قرار دیا اور کہا ہے کہ اس معاملہ میں سخت کارروائی کی جائے گی ۔ واضح رہے کہ یہ ویڈیو وائرل ہونے کے بعد سوشل میڈیا پر سخت تنقید کی جارہی ہے اور بھارتی عوام نے مطالبہ کیا ہے کہ ذمہ داران کو سخت سزا دی جائے.
