Blog


عالمی توانائی بحران کے پیش نظر انٹرنیشنل انرجی ایجنسی نے اسٹریٹجک ذخائر سے 40 کروڑ بیرل خام تیل جاری کرنے کا فیصلہ کر لیا ہے تاکہ عالمی منڈی میں تیل کی بڑھتی قیمتوں کو قابو میں رکھا جا سکے۔
خبر رساں ادارے روئٹرز کے مطابق یہ فیصلہ امریکا اور اسرائیل کی ایران کے ساتھ جنگ کے بعد تیل کی قیمتوں میں تیزی سے اضافے کے باعث کیا گیا۔ اس اقدام کے تحت زیادہ تر خام تیل امریکا فراہم کرے گا۔
‎ایجنسی کے مطابق اس فیصلے کی اس کے تمام 32 رکن ممالک نے حمایت کی ہے۔ یہ 1970 کی دہائی میں ادارے کے قیام کے بعد چھٹی مرتبہ ہے کہ رکن ممالک مشترکہ طور پر اسٹریٹجک ذخائر سے تیل جاری کر رہے ہیں۔
‎امریکی وزیر توانائی کرس رائٹ نے بتایا کہ امریکا اس اقدام میں نمایاں کردار ادا کرے گا اور تقریباً 172 ملین بیرل خام تیل فراہم کرے گا۔
‎آئی ای اے کا کہنا ہے کہ جنگ کے آغاز کے بعد آبنائے ہرمز میں عالمی تیل اور گیس کی تقریباً پانچویں حصے کی سپلائی متاثر ہونے سے قیمتوں میں تیزی آئی ہے، اسی صورتحال کو قابو کرنے کے لیے یہ فیصلہ کیا گیا ہے۔
‎اس اعلان کے باوجود عالمی منڈی میں تیل کی قیمتیں 100 ڈالر فی بیرل سے اوپر رہیں اور بدھ کے روز قیمتوں میں تقریباً 5 فیصد اضافہ بھی دیکھا گیا۔ تجزیہ کاروں کے مطابق آبنائے ہرمز میں جہازوں پر حملوں کے باعث سپلائی میں مزید رکاوٹ کے خدشات برقرار ہیں۔
‎ماہرین کا کہنا ہے کہ 40 کروڑ بیرل تیل کی مقدار اگرچہ بڑی ہے لیکن یہ آبنائے ہرمز میں ممکنہ رکاوٹوں سے متاثر ہونے والی عالمی سپلائی کے صرف تقریباً 20 دن کے برابر ہے، جبکہ اسے مارکیٹ تک پہنچنے میں کئی ہفتے یا مہینے لگ سکتے ہیں۔
‎یاد رہے کہ 2022 میں یوکرین جنگ کے بعد بھی آئی ای اے کے رکن ممالک نے مشترکہ طور پر 18 کروڑ بیرل تیل جاری کیا تھا۔ امریکی حکام کے مطابق اس بار فراہم کیے جانے والے امریکی حصے کی ترسیل میں تقریباً 120 دن لگیں گے اور بعد میں اسٹریٹجک ذخائر کو دوبارہ بھرنے کا منصوبہ بھی بنایا جائے گا۔


بھارت میں ایک انوکھا واقعہ سامنے آیا ہے جہاں سڑک پر انسان کے بجائے ایک روبوٹ لوگوں سے بھیک مانگتا نظر آیا جس کی ویڈیو سوشل میڈیا پر تیزی سے وائرل ہو رہی ہے۔
بھارتی میڈیا رپورٹس کے مطابق چند نوجوانوں نے تجرباتی طور پر ایک روبوٹ تیار کیا اور اسے پروگرامنگ کے ذریعے بھیک مانگنے کا ٹاسک دیا۔ روبوٹ کو اس طرح ڈیزائن کیا گیا کہ وہ لوگوں کے قریب جا کر مخصوص انداز میں بات کرے اور ہاتھ پھیلا کر مدد طلب کرے۔
‎نوجوانوں نے روبوٹ کو ایک مصروف سڑک پر چھوڑ دیا جبکہ وہ خود دور کھڑے ہو کر اس کا ردعمل دیکھتے رہے۔ روبوٹ راہگیروں کے پاس جا کر گفتگو کرتا اور بھیک مانگنے کی اداکاری کرتا رہا۔
‎سڑک پر روبوٹ کو اس انداز میں دیکھ کر لوگ حیران رہ گئے۔ بہت سے افراد نے اس دلچسپ منظر کو اپنے موبائل فون میں ریکارڈ کیا اور بعد میں یہ ویڈیو سوشل میڈیا پر تیزی سے پھیل گئی۔
‎یہ تجربہ مصنوعی ذہانت اور روبوٹکس کی دلچسپ مثال کے طور پر دیکھا جا رہا ہے جس نے لوگوں کو حیران بھی کیا اور محظوظ بھی۔

‎
ایرانی پاسداران انقلاب نے خلیج فارس کے شمالی حصے میں ایک مبینہ امریکی آئل ٹینکر کو نشانہ بنانے کی ویڈیو جاری کر دی ہے۔
‎پاسداران انقلاب کی جانب سے جاری بیان میں کہا گیا ہے کہ آج صبح سیف سیا نامی جہاز کو نشانہ بنایا گیا۔ بیان کے مطابق یہ جہاز امریکا کی ملکیت ہے اور مارشل آئی لینڈز کے پرچم کے تحت چل رہا تھا۔
‎ایرانی حکام کے مطابق پاسداران انقلاب کی بحریہ نے جہاز کو متعدد بار انتباہ اور وارننگ جاری کی تھی، تاہم جہاز نے ان ہدایات کو نظر انداز کیا جس کے بعد کارروائی کی گئی۔
‎بیان میں مزید کہا گیا کہ مذکورہ آئل ٹینکر کو امریکی فوج کے اثاثوں میں شمار کیا جاتا ہے، اسی بنیاد پر اسے ہدف بنایا گیا۔


ایرانی پاسداران انقلاب نے اعلان کیا ہے کہ آپریشن وعدہ صادق 4 کی اکتالیسویں لہر کے دوران اسرائیل اور خطے میں موجود امریکی اہداف کو نشانہ بنایا گیا ہے۔
ایرانی خبر رساں ایجنسی کے مطابق پاسداران انقلاب کی جانب سے جاری بیان میں کہا گیا ہے کہ یہ حملے یوم القدس کی آمد سے قبل کیے گئے۔
‎بیان میں کہا گیا کہ یہ کارروائیاں رمضان کی جنگ میں جان دینے والے شہدا کی یاد میں کی گئیں، جن میں پاسداران انقلاب کے کمانڈر شہید محمد پاکپور بھی شامل ہیں۔
‎پاسداران انقلاب کے مطابق اس کارروائی کا مقصد دشمن کو واضح پیغام دینا ہے کہ ایران اپنے شہدا کے خون کا بدلہ لینے اور اپنے مؤقف کے دفاع کے لیے کارروائیاں جاری رکھے گا۔

‎ایران کے سپریم لیڈر آیت اللہ مجتبیٰ خامنہ ای نے اپنے پہلے بیان میں کہا ہے کہ ملک کو تقسیم کرنے کی سازشیں ناکام بنا دی گئی ہیں اور ایران اپنی خودمختاری اور سلامتی کے دفاع کے لیے ہر قدم اٹھائے گا۔
‎انہوں نے کہا کہ آبنائے ہرمز کو بند رکھنے کا فیصلہ جاری رہنا چاہیے کیونکہ یہ دشمن پر دباؤ ڈالنے کا ایک مؤثر ذریعہ ہے۔ ان کے مطابق خطے میں قائم دشمن کے فوجی اڈوں کا مقصد وہاں کے ممالک کو کنٹرول کرنا ہے۔
‎مجتبیٰ خامنہ ای نے کہا کہ ایران پڑوسی ممالک کے ساتھ دوستانہ تعلقات کا خواہاں ہے، تاہم ان ممالک میں موجود امریکی فوجی اڈوں کو نشانہ بنانے پر مجبور ہیں کیونکہ ایران پر حملے انہی اڈوں سے کیے گئے۔ انہوں نے واضح کیا کہ ایران نے صرف فوجی اڈوں کو نشانہ بنایا ہے، متعلقہ ممالک کو نہیں۔
‎ان کا کہنا تھا کہ ایران دشمن کے جرائم کا بدلہ لینے سے پیچھے نہیں ہٹے گا، خصوصاً مناب اسکول کے واقعے کا بدلہ ضرور لیا جائے گا۔ انہوں نے خطے کے ممالک کو مشورہ دیا کہ وہ اپنی سرزمین سے امریکی فوجی اڈے بند کریں۔
‎ایرانی سپریم لیڈر نے کہا کہ اگر جنگ جاری رہی تو مزید محاذ بھی کھل سکتے ہیں جہاں دشمن کو کوئی تجربہ نہیں۔ ان کے مطابق ایران کی 15 ممالک کے ساتھ سرحدیں ملتی ہیں اور ایران ہمیشہ ان کے ساتھ تعمیری تعلقات قائم کرنا چاہتا ہے۔
‎انہوں نے کہا کہ خطے کے ممالک کو اب فیصلہ کرنا ہوگا کہ وہ جارحیت کرنے والوں کے ساتھ کھڑے ہیں یا مظلوموں کے ساتھ۔ ان کے مطابق اگر دشمن نقصان کا ازالہ نہ کرے تو ایران اسی قدر اس کی املاک کو تباہ کر دے گا۔
‎مجتبیٰ خامنہ ای نے مزاحمتی محاذ کے جنگجوؤں کا شکریہ ادا کرتے ہوئے یمن، حزب اللہ اور عراق کی مزاحمتی قوتوں کی حمایت کو سراہا اور کہا کہ ان کی مشترکہ کوششیں صہیونی فتنہ کے خاتمے کی راہ ہموار کر رہی ہیں۔
‎آخر میں انہوں نے شہداء کے خاندانوں سے ہمدردی کا اظہار کرتے ہوئے کہا کہ وہ خود بھی ذاتی طور پر بڑے صدمات سے گزر چکے ہیں، تاہم اللہ پر یقین اور صبر ہی مشکلات کا مقابلہ کرنے کی طاقت دیتا ہے۔ انہوں نے یقین دہانی کرائی کہ شہداء کے خون کا بدلہ ضرور لیا جائے گا۔


مشرق وسطیٰ میں بڑھتی ہوئی کشیدگی کے باعث چین نے اپنے ملک کی بڑی آئل ریفائنریوں کو پیٹرول اور ڈیزل کی برآمدات روکنے کی ہدایت جاری کر دی ہے۔
بین الاقوامی خبر رساں ادارے بلومبرگ کے مطابق چین نے ممکنہ عالمی بحران کے پیش نظر ایندھن کی بیرون ملک فراہمی عارضی طور پر معطل کر دی ہے تاکہ ملک کے اندر پیٹرول اور ڈیزل کی سپلائی محفوظ رکھی جا سکے۔
‎ادھر عالمی منڈی میں خام تیل کی قیمتوں میں اچانک بڑا اضافہ دیکھنے میں آیا ہے۔ خام تیل کی قیمت تقریباً 9.11 فیصد اضافے کے بعد 100.36 ڈالر فی بیرل تک پہنچ گئی ہے۔
‎خلیجی خطے میں تجارتی جہازوں پر حملوں اور اہم آئل ٹرمینلز کی بندش کے باعث توانائی کی عالمی سپلائی متاثر ہونے کا خدشہ پیدا ہو گیا ہے، جس کے باعث تیل کی قیمتیں تیزی سے اوپر جا رہی ہیں۔
‎ایندھن کی فراہمی میں ممکنہ رکاوٹ کے خدشے کے باعث برینٹ کروڈ کی قیمت بھی 100 ڈالر فی بیرل کی سطح عبور کر گئی۔ عالمی منڈی میں برینٹ کروڈ تقریباً 9 فیصد اضافے کے بعد 100.22 ڈالر فی بیرل جبکہ امریکی خام تیل 9 فیصد اضافے کے ساتھ 95.41 ڈالر فی بیرل تک پہنچ گیا۔
‎عراقی سیکیورٹی حکام کے مطابق عراقی سمندری حدود میں تیل بردار دو بحری جہازوں کو بارود سے بھری ایرانی کشتیوں نے نشانہ بنایا، جس کے بعد عراق کی تیل کی بندرگاہوں پر آپریشنز عارضی طور پر روک دیے گئے ہیں۔
‎دوسری جانب عمان نے حفاظتی اقدامات کے تحت اپنے اہم مینا الفحل آئل ایکسپورٹ ٹرمینل سے جہازوں کو ہٹا لیا ہے تاکہ کسی بھی ممکنہ حملے سے بچا جا سکے۔