لبنان نے اسرائیل کے ساتھ ممکنہ مذاکرات کے لیے ایک اہم پیش رفت کرتے ہوئے اپنے خصوصی مندوب کا تقرر کر دیا ہے۔ غیر ملکی خبر ایجنسی کے مطابق لبنانی قیادت نے اس حساس معاملے پر باضابطہ طور پر پیش قدمی کرتے ہوئے سابق سفیر سائمن کرم کو مذاکراتی عمل کی قیادت سونپنے کا فیصلہ کیا ہے۔
لبنانی صدر کی جانب سے جاری بیان میں کہا گیا ہے کہ اسرائیل کے ساتھ بات چیت کے لیے سائمن کرم کو مرکزی کردار دیا گیا ہے، جو اس پورے سفارتی عمل کو آگے بڑھائیں گے۔ یہ فیصلہ ایسے وقت میں سامنے آیا ہے جب خطے میں کشیدگی بدستور موجود ہے اور عالمی برادری دونوں ممالک کے درمیان کسی ممکنہ پیش رفت کی خواہاں ہے۔
سائمن کرم ایک تجربہ کار سفارتکار سمجھے جاتے ہیں اور وہ ماضی میں امریکا میں لبنان کے سفیر کے طور پر خدمات انجام دے چکے ہیں۔ ان کی سفارتی مہارت اور بین الاقوامی تعلقات میں تجربہ اس اہم ذمہ داری کے لیے کلیدی حیثیت رکھتا ہے۔ ماہرین کے مطابق ان کی تقرری اس بات کی نشاندہی کرتی ہے کہ لبنان سنجیدگی کے ساتھ مذاکراتی عمل کو آگے بڑھانا چاہتا ہے۔
اگرچہ لبنان اور اسرائیل کے درمیان براہ راست تعلقات ہمیشہ کشیدہ رہے ہیں، تاہم حالیہ حالات میں بات چیت کا آغاز ایک مثبت اشارہ سمجھا جا رہا ہے۔ تجزیہ کاروں کا کہنا ہے کہ اگر یہ مذاکرات کامیاب ہوتے ہیں تو اس سے نہ صرف دونوں ممالک بلکہ پورے مشرق وسطیٰ میں استحکام کے امکانات روشن ہو سکتے ہیں۔
Blog
-
لبنان نے اسرائیل سے مذاکرات کیلئے مندوب مقرر کردیا
-
ملک ناز کی جرات کو سلام، بیٹیاں بھی دفاع وطن کیلیے جانیں نچھاور کر رہی ،ڈاکٹر مزمل اقبال ہاشمی
مرکزی مسلم لیگ کے ترجمان ڈاکٹر مزمل اقبال ہاشمی نے بلوچستان میں دہشتگردانہ حملے میں لیڈی کانسٹیبل ملک ناز کی شہادت پر کہا ہے کہ پاکستان کی محب وطن بیٹیاں بھی وطن کے دفاع کے لئے جانیں نچھاور کر رہی ہیں ،بزدل دشمن دہشتگردی و تخریب کاری کے ذریعے پاکستانیوں کے حوصلے پست نہیں کر سکتا،دہشتگردی کی لعنت کے خلاف قوم متحد اور سیکورٹی اداروں کے ساتھ کھڑی ہے
ڈاکٹر مزمل اقبال ہاشمی کا کہنا تھا کہ خضدار میں دہشت گردوں کے بزدلانہ حملے میں شہید لیڈی کانسٹیبل ملک ناز نے وطن عزیز کے دفاع کے لئے اپنی جان نچھاور کر کے سب کا سر فخر سے بلند کر دیا ،ملک ناز نے بہادری، فرض شناسی اور حب الوطنی کی عظیم مثال قائم کی ہے،بلوچستان کی پہلی خاتون شہید ملک ناز ایک ایسی بہادر خاتون جنہوں نے پہلے اپنے شوہر کی شہادت کے بعد بھی حوصلہ نہیں ہارا اور خود وطن کی خدمت کا راستہ اختیار کیا،ملک ناز کی جرات،قربانی پوری قوم کے لیے فخر کا باعث ہے، ملک ناز جیسی بہادر خواتین اس بات کا ثبوت ہیں کہ پاکستان کی بیٹیاں بھی دفاعِ وطن میں کسی سے پیچھے نہیں، دہشت گردی کے بزدلانہ واقعات قوم کے حوصلے پست نہیں کر سکتے،مرکزی مسلم لیگ قیام امن کے لئے سیکورٹی اداروں کے شانہ بشانہ کھڑی ہے.
-
بجلی کے اسمارٹ میٹرز کی تنصیب لازمی قرار
وزارتِ توانائی اور انٹرنیشنل فنانس کارپوریشن (آئی ایف سی) کے درمیان ٹرانزیکشن ایڈوائزری سروسز کا معاہدہ طے پا گیا، جس کا مقصد بجلی کی تقسیم کے نظام کو جدید خطوط پر استوار کرنا ہے۔
سرکاری میڈیا رپورٹ کے مطابق اس منصوبے کے تحت ملک بھر میں قریباً ایک کروڑ بجلی صارفین کو اسمارٹ میٹرز فراہم کیے جائیں گے،حکام کے مطابق اس اقدام سے مقامی اور غیر ملکی سرمایہ کاری کو فروغ ملنے کی توقع ہے جبکہ توانائی کے شعبے کو ڈیجیٹل نظام کی طرف منتقل کرنے میں مدد ملے گی۔
اعلامیے میں کہا گیا ہے کہ وزیراعظم کے وژن کے تحت بجلی کی ترسیل اور تقسیم کے نظام کی ڈیجیٹلائزیشن کو تیزی سے آگے بڑھایا جا رہا ہے، جو پاور سیکٹر اصلاحات کا حصہ ہے، ان اصلاحات کا مقصد کارکردگی بہتر بنانا، بجلی چوری میں کمی لانا اور بلنگ میں شفافیت کو یقینی بنانا ہے۔
مزید بتایا گیا ہے کہ بین الاقوامی مسابقتی عمل کے ذریعے اسمارٹ میٹرز کی لاگت میں قریباً 40 فیصد کمی حاصل کی گئی ہے نئے بجلی کنکشنز کے لیے اسمارٹ میٹرز کی تنصیب لازمی قرار دی گئی ہے جبکہ روایتی میٹرز کو مرحلہ وار ختم کیا جا رہا ہے۔
حکام کے مطابق موجودہ تھری فیز، کمرشل اور صنعتی کنکشنز کو بھی مرحلہ وار اسمارٹ میٹرز میں تبدیل کیا جائے گا نیشنل الیکٹرک پاور ریگولیٹری اتھارٹی (نیپرا) کی منظوری کے بعد خراب میٹروں کے مسائل کے حل کے لیے اقدامات کو مزید تیز کردیا گیا ہےاسمارٹ میٹرز کے اجرا سےریکوری میں بہتری، لائن لا سز میں کمی اور مجموعی کارکردگی میں اضافہ متوقع ہے،یہ اقدام پاور سیکٹر کی مالی صورتحال کو مستحکم کرنے اور شفافیت بڑھانے میں اہم کردار ادا کرے گا۔
-
امریکا ایران مذاکرات: اسلام آباد میں ہونے والا تبلیغی جماعت کا اجتماع موخر
ایران اور امریکا کے درمیان مجوزہ مذاکرات کے پیش نظر وفاقی دارالحکومت اسلام آباد میں سیکیورٹی کو مزید سخت کر دیا گیا ہے۔
میڈیا رپورٹس کے مطابق موجودہ صورتحال کے باعث اسلام آباد میں ہونے والا تبلیغی جماعت کا اجتماع ایک ہفتے کے لیے مؤخر کر دیا گیا ہے،اس حوالے سے رائیونڈ کی شوریٰ کے اراکین اور بزرگوں نے ملکی حالات کو مدنظر رکھتے ہوئے مشاورت کی،مشاورت کے بعد یہ فیصلہ کیا گیا کہ اجتماع کو ایک ہفتے کے لیے ملتوی کیا جائے،اب یہ اجتماع یکم، 2 اور 3 مئی کو جمعہ، ہفتہ اور اتوار کے روز مسجد ابو القاسم، اسلام آباد میں منعقد ہوگا،اس سے قبل یہ اجتماع 24،25 اور 26 اپریل کو منعقد ہونا تھا۔
-
شی جن پنگ اور محمد بن سلمان کا اہم رابطہ، آبنائے ہرمز میں کشیدگی پر تشویش
چین کے صدر شی جن پنگ اور سعودی عرب کے ولی عہد شہزادہ محمد بن سلمان کے درمیان ایک اہم ٹیلی فونک رابطہ ہوا جس میں مشرق وسطیٰ کی موجودہ صورتحال، بالخصوص آبنائے ہرمز میں کشیدگی اور عالمی تجارت پر اس کے اثرات پر تفصیلی گفتگو کی گئی۔
چینی سرکاری خبر رساں ادارے کے مطابق صدر شی جن پنگ نے اس بات پر زور دیا کہ آبنائے ہرمز سے جہازوں کی آمدورفت کو ہر صورت معمول کے مطابق جاری رہنا چاہیے کیونکہ یہ عالمی معیشت اور توانائی کی سپلائی کے لیے نہایت اہم گزرگاہ ہے۔ انہوں نے کہا کہ اس اہم بحری راستے میں کسی بھی قسم کی رکاوٹ نہ صرف خطے بلکہ پوری دنیا کے لیے سنگین نتائج کا باعث بن سکتی ہے۔
صدر شی جن پنگ نے اپنے موقف میں واضح کیا کہ چین فوری اور جامع جنگ بندی کا حامی ہے اور مشرق وسطیٰ میں جاری تنازعات کو طاقت کے بجائے سیاسی اور سفارتی ذرائع سے حل کیا جانا چاہیے۔ انہوں نے اس بات پر بھی زور دیا کہ تمام فریقین تحمل کا مظاہرہ کریں اور ایسے اقدامات سے گریز کریں جو صورتحال کو مزید بگاڑ سکتے ہیں۔
سعودی ولی عہد محمد بن سلمان نے بھی خطے میں امن و استحکام کی اہمیت پر زور دیتے ہوئے کہا کہ سعودی عرب ہمیشہ کشیدگی کم کرنے اور مسائل کے پرامن حل کے لیے کردار ادا کرتا رہا ہے۔ دونوں رہنماؤں نے اس بات پر اتفاق کیا کہ بین الاقوامی برادری کو مل کر ایسے اقدامات کرنے چاہئیں جو خطے میں پائیدار امن کو یقینی بنا سکیں۔ -
وزیراعلیٰ سندھ کا مستحق ٹرانسپورٹرز کو فوری ریلیف فراہم کرنے کا حکم
وزیراعلیٰ سندھ کا مستحق ٹرانسپورٹرز کو فوری ریلیف فراہم کرنے کا حکم دیا ہے-
وزیراعلیٰ سندھ سید مراد علی شاہ کی زیر صدارت سبسڈی عمل درآمد کا جائزہ اجلاس ہوا اجلاس میں صوبائی وزراء، شرجیل میمن، مکیش چاولہ، چیف سیکریٹری آصف حیدر شاہ، پرنسپل سیکریٹری آغا واصف، سیکریٹری بین الصوبائی رابطہ آصف اکرام، سیکریٹری خزانہ فیاض جتوئی، سیکریٹری ٹرانسپورٹ اسدا ضامن ،سیکر یٹر ی ایکسائیز سلیم راجپوت اور دیگر حکام شریک ہوئے۔
بریفنگ میں بتایا گیا کہ سندھ میں فیول سبسڈی اسکیم کے تحت 3ہزار 976 گاڑیوں کو ادائیگی کی گئی، جس کی رقم 14 کروڑ 67 لاکھ روپے بنتے ہیں جبکہ پانچ ہزار سے زائد کیسز کی ڈیٹا میں غلطیوں کے باعث تصحیح کا عمل جاری ہے وزیراعلیٰ سندھ نے تصدیقی عمل تیز کرنے کی ہدایت کی کہ 11ہزار 980 اہل گاڑیوں کا ڈیٹا جمع کیا جائے۔ انہوں نے ٹرانسپورٹ اور ایکسائز محکموں کو وفاق سے قریبی رابطے کی ہدایت کی، وزیراعلیٰ نے حکم دیا کہ شناختی کارڈ، آئی بی این اور دیگر ڈیٹا غلطیوں کو فوری درست کیا جائےوزیراعلیٰ سندھ نے ٹرانسپورٹ نظام کی ڈیجیٹلائزیشن پر اطمینان کا اظہار کیا۔
وزیراعلیٰ کی ہدایت پر ایکسائیز ڈپارٹمنٹ کی موٹر رجسٹریشن، پی ٹی اے اور آر ٹی اے نظام کی خودکاری کا عمل جاری ہے مراد علی شاہ نے ٹریفک اور موٹرو ے پولیس کے ساتھ نظام کے انضمام کی ہدایت دی کہا کہ ٹیکنالوجی کے ذریعے شفافیت اور کارکردگی بہتر بنائی جائے۔
وزیراعلیٰ سندھ نے بغیر روٹ پرمٹ یا فٹنس سرٹیفکیٹ گاڑیوں کے خلاف سخت کارروائی کا حکم دیتے ہوئے گاڑیوں کی رجسٹریشن اور ٹرانسفر کے لیے رو ٹ پرمٹ لازمی قرار دے دیا انہوں نے فیلڈ چیکنگ اور جرمانوں کا نظام مزید سخت کرنے کی ہدایت کی کہا کہ قانون کی خلاف ورزی ہرگز برداشت نہیں کی جائے گی، وزیراعلیٰ سندھ نے محکمہ ٹرانسپورٹ، ایکسائز اور قانون نافذ کرنے والے اداروں میں مؤثر رابطے جبکہ سبسڈی شفاف، بروقت اور مستحق افراد تک پہنچانے کی ہدایت کی۔
-
مودی کے ہاتھوں افتتاح سے ایک روز قبل راجھستان ریفائنری میں آگ
مودی کے ہاتھوں افتتاح سے ایک دن قبل راجھستان میں 13 برس سے زیر تعمیر ریفائنری میں آگ لگ گئی
بھارت کی ریاست راجستھان کے ضلع بالوترا کے علاقے میں قائم ایچ پی سی ایل راجستھان ریفائنری (HRRL) میں بھارتی وزیرِاعظم نریندر مودی کے مجوزہ افتتاح سے صرف ایک روز قبل خوفناک اور پراسرار آگ بھڑک اٹھی، جس نے پورے علاقے میں تشویش کی لہر دوڑا دی۔رپورٹس کے مطابق یہ واقعہ 80 ہزار کروڑ بھارتی روپے مالیت کے بڑے منصوبے پچپدرا ریفائنری کمپلیکس میں پیش آیا، جو 9 ایم ایم ٹی پی اے صلاحیت کی ریفائنری اور پیٹروکیمیکل منصوبہ ہے۔ سوشل میڈیا پر سامنے آنے والی ویڈیوز میں جائے وقوعہ پر دھویں کے بادل اور آگ کے شعلے واضح طور پر دیکھے جا سکتے ہیں، جبکہ ایک مقام پر مودی کا اسٹینڈی بورڈ بھی نظر آیا۔ذرائع کے مطابق ریفائنری تاحال زیرِ تعمیر تھی اور منصوبے کا باقاعدہ افتتاح اگلے روز بھارتی وزیرِاعظم نریندر مودی نے کرنا تھا۔ تاہم افتتاح سے عین پہلے آتشزدگی کے اس واقعے نے کئی سوالات کھڑے کر دیے ہیں۔تاحال آگ لگنے کی اصل وجہ سامنے نہیں آ سکی، جبکہ حکام نے واقعے کی تحقیقات شروع کر دی ہیں۔
امدادی ٹیمیں فوری طور پر موقع پر پہنچ گئیں اور آگ بجھانے کی کارروائی شروع کر دی گئی۔حکام کی جانب سے کسی جانی نقصان یا زخمیوں کے بارے میں فوری طور پر کوئی تصدیق نہیں کی گئی،
-
چھوٹی عمر سے بالغوں کے درمیان کام، وقت سے پہلے بالغ ہو گئی تھی،اداکارہ کا انکشاف
بالی وڈ کی ابھرتی ہوئی اداکارہ اور اجے دیوگن کی فلم “سن آف سردار 2” میں کام کرنے والی روشنی والیا ایک حالیہ انٹرویو میں اپنی ذاتی زندگی اور والدہ کی کھلی سوچ کے باعث خبروں کی زینت بن گئی ہیں۔
انٹرویو کے دوران روشنی والیا نے بتایا کہ ان کی والدہ نہ صرف انہیں زندگی سے بھرپور لطف اٹھانے اور دوستوں کے ساتھ گھلنے ملنے کی ترغیب دیتی ہیں بلکہ وہ انہیں ہر معاملے میں کھل کر رہنمائی بھی فراہم کرتی ہیں۔اداکارہ کے مطابق ان کی والدہ کا انداز روایتی نہیں بلکہ کافی جدید ہے، جو انہیں آزادی کے ساتھ زندگی گزارنے کی حوصلہ افزائی کرتی ہیں۔روشنی والیا نے ایک حیران کن انکشاف کرتے ہوئے بتایا کہ ان کی والدہ ان سے گفتگو کھل کر کرتی ہیں اور انہیں ذمہ داری کے ساتھ زندگی گزارنے کا مشورہ دیتی ہیں، جس میں ذاتی حفاظت اور احتیاط سے متعلق باتیں بھی شامل ہوتی ہیں،میری والدہ مجھ سے پہلے میری بہن کو بھی یہی سمجھاتی تھیں اور اب وہ مجھے بتاتی ہیں،جب ان کی ماں اسے گھر میں بیکار بیٹھی دیکھتی ہیں تو وہ اکثر اسے روکتی ہیں،وہ اکثر اس سے کہتی ہیں، آج تم گھر پر کیوں بیٹھی ہو، باہر جاؤ، اپنے دوستوں کے ساتھ پارٹی کرو، اور زندگی کا لطف اٹھاؤ، کبھی کبھی، وہ مذاق میں پوچھتی ہے، کیا آج تم نے شراب نہیں پی؟
اداکارہ نے بتایا کہ چھوٹی عمر میں بالغوں کے درمیان کام کرنے سے وہ اپنے وقت سے پہلے بالغ ہو گئی تھیں، انھوں نے نہ صرف کام کی پیچیدگیوں کو سیکھا بلکہ فلمی صنعت کے پیچھے کی سیاست کو بھی سمجھا،انہوں نے مختلف ڈراموں اور پروجیکٹس میں کام کیا جبکہ بالی وڈ میں بھی اپنی موجودگی کا آغاز کیا۔روشنی کے مطابق ان کی کامیابی کے پیچھے سب سے بڑی وجہ ان کی والدہ کی قربانی اور سپورٹ ہے، جنہوں نے اپنا آبائی شہر چھوڑ کر ممبئی میں ان کے خوابوں کو حقیقت بنانے کے لیے ساتھ دیا۔
-
وزیراعلیٰ سندھ مراد علی شاہ نےگندم فروخت کی حد ختم کر دی
وزیراعلیٰ سندھ سید مراد علی شاہ نے بڑا فیصلہ کرتے ہوئے گندم فروخت کی حد ختم کر دی جبکہ گندم خریداری مہم تیز کرنے کی ہدایت بھی دے دی۔
وزیراعلیٰ سندھ سید مراد علی شاہ کی زیر صدارت گندم کی خریداری کا جائزہ اجلاس ہوا،اجلاس میں صوبائی وزرا ، شرجیل میمن، مخدوم محبوب الزمان، چیف سیکر یٹری آصف حیدر شاہ، پرنسپل سیکریٹری آغا واصف، سیکریٹری زراعت زمان ناریجو، سیکریٹری خوراک عباس نائچ، سندھ بینک کے نمائندے اور دیگر افسرا ن شریک ہوئے۔
وزیراعلیٰ سندھ نے کہا کہ چھوٹے آبادگار اب بغیر کسی پابندی کے گندم فروخت کر سکیں گے، فی ایکڑ پانچ بوری کی شرط ختم کرنے سے ہاریوں کو بڑا ریلیف ملے گا، انہوں نے محکمہ خوراک کو ہدایت کی کہ آبادگاروں کو فوری ادائیگیاں یقینی بنائی جائیں،وزیر خوراک محبوب الزمان نے وزیراعلیٰ سندھ کو گندم کی خریدی سے متعلق بریفنگ دی، انہوں نے بتایا کہ گندم خریداری مہم یکم اپریل سے شروع کی گئی ہے، سندھ حکومت کا ہدف 10 لاکھ میٹرک ٹن گندم حاصل کرنا ہے، اس سال امدادی قیمت ساڑھے 3ہزار روپے فی 40 کلو مقرر کی گئی ہے، تقریباً 19 لاکھ 40 ہزار ایکڑ رقبے پر گندم کاشتکار 3 لاکھ 32 ہزار سے زائد ہیں، اب تک تقریباً 8ہزار 958 میٹرک ٹن گندم خریدی جا چکی ہے۔
وزیر خوراک نے مزید بتایا کہ ہدف پورا نہ ہونے کی بڑی وجہ چھوٹے آبادگاروں پر فی ایکڑ پانچ بوری نافذ کرنا ہے، وزیراعلیٰ سندھ نے ہدف مکمل کرنے کے لیے فوری طور پر یہ حد ختم کر دی، چھوٹے آبادگار بغیر کسی مقدار کی پابندی حکومت کو گندم فروخت کر سکتے ہیں۔
اجلاس میں آگاہی دی گئی کہ آبادکاروں کی ادائیگیوں کے نظام کو نمایاں طور پر تیز کر دیا گیا ہے، آبادگاروں کو رقم ایک دن کے اندر سندھ بینک کے ذریعے منتقل کی جا رہی ہے اور اب تک 198.3 ملین روپے آبادگاروں میں تقسیم کیے جا چکے ہیں، وزیراعلیٰ سندھ نے آبادگاروں کو بہتر ادائیگی کے نظام پر ا طمینان کا اظہار کرتے ہوئے کہا کہ بروقت ادائیگی ہاریوں کے اعتماد کے لیے نہایت اہم ہے انہوں نے ہاریوں کو فوری اور شفاف ادائیگی یقینی بنانے کی ہدایت کی۔
مراد علی شاہ کا کہنا تھا کہ تمام اہل آبادگار اپنی گندم سرکاری خریداری مراکز پر فروخت کریں، یہ نہ صرف غذائی تحفظ بلکہ ہاریوں کی مدد کے لیے بھی ضروری ہے، حکومت کو گندم فروخت کرنے والے آبادگار مستقبل کی سبسڈی کے اہل ہوں گے،وزیراعلیٰ سندھ نے کم خریداری والے اضلاع میں اقدامات مزید سخت کرنے کا حکم دیتے ہوئے ضلعی انتظامیہ کو گندم کی خریدای مہم تیز کرنے کی ہدایت کر دی، انہوں نے کہا کہ اسسٹنٹ کمشنرز اور مختیارکار باقاعدگی سے خریداری مراکز کا دورہ کریں۔
وزیراعلیٰ سندھ کو آگاہ کیا گیا کہ اسسٹنٹ کمشنرز، مختیارکار اور محکمہ زراعت کے افسران کسانوں سے رابطے میں ہیں، شکایات کے ازالے کے لیے کنٹرول روم بھی قائم کیا گیا ہے، انہوں نے ہدایت کی کہ غیر فعال خریداری مراکز کو فوری طور پر فعال کریں،بریفنگ میں بتایا گیا کہ آبادگاروں کی سہولت کے لیے مزید 12 خریداری مراکز کھولے گئے ہیں، بے ضابطگیوں پر زیرو ٹالرنس ہے، پورا عمل ہاری دوست اور مؤثر ہونا چاہیے، ہاریوں کی مکمل حمایت جاری رہے گی، گندم خریداری مہم ہاریوں کی مدد اور غذائی تحفظ کو یقینی بنانے کے لیے اہم اقدام ہے۔
-
باتیں کرنا بڑا آسان ہے لیکن قوم کیلئے 24 گھنٹے جاگنا الگ لیول ہے،حنیف عباسی
وفاقی وزیر ریلوے حنیف عباسی نے کہا ہے کہ پاکستان سے ایران جلد ریلوے ٹریک کا آغاز کرنے جارہے ہیں۔
حنیف عباسی نے کراچی میں پاکستان ریلوے کے تحت دی انٹرنیشنل اسکول کی افتتاحی تقریب سے خطاب کرتے ہوئے کہا کہ ریلوے ٹریک جلد یورپ کی طرف بڑھے گا، کراچی سرکلر ریلوے بنانا سندھ حکومت کی ذمہ داری ہے وزیراعظم شہبازشریف کا شاگرد ہوں اور 25 برس سے ان کے ساتھ کام کررہا ہوں، ریلوے کے 14 اسکولوں، رائل پام اور 7 اسپتالوں کو آؤٹ سورس کررہے ہیں 28 مئی تک ریلوے کو ڈیجیٹلائز کررہے تھے لیکن عالمی حالات کی وجہ سے اب وہ ایک ماہ بعد آپریشنل ہوجائے گا۔
وزیر ریلوے نے کہا کہ روہڑی کراچی سب سے مشکل ٹریک ہے جو 1861 سے 1868 کا ٹریک ہے وزیراعظم نے فیصلہ کیا ہے کہ اس 480 کلو میٹر ٹریک کو 2 ارب ڈالر سے بنانے جارہے ہیں تقریباً 700ارب روپے میں یہ ٹریک مکمل ہوجا ئے گا،دنیا میں پاکستان کی بڑی اہمیت ہے، جو لوگ باہر رہ کر اپنی شناخت چھپاتے تھے آج وہ اپنی شناخت چھپاتے نہیں 78 سالہ تاریخ میں کبھی پاکستان کےلیے ایسے مناظر نہیں دیکھے اس وقت روس چین ایرا ن امریکہ خلیجی ممالک سب ہمیں دیکھ رہے ہیں ہم نے ایران اور سعودی عرب کو آپس میں لڑنے نہیں دیا،پاکستان نے کامیاب سفار ت کار ی سے دو بھائیوں سعودی عرب اور ایران کو لڑنے نہیں دیا باتیں کرنا بڑا آسان ہے لیکن قوم کیلئے 24 گھنٹے جاگنا الگ لیول ہے۔
قبل ازیں میڈیا سے گفتگو میں وفاقی وزیر ریلوے نے کہا کہ کراچی سرکلر ریلوے بنانا سندھ حکومت کی ذمہ داری ہے، 25 دسمبر کو ریلوے ٹریک کو تھرکول سے ملانے جا رہے ہیں۔ روہٹری نوکھنڈی 900 کلومیٹر اور نوکھنڈی سے تافتان 87 کلومیٹر کا ٹریک دوبارہ بحال کیا جارہا ہے، ریلوے نہیں چلے گی تو پاکستان نہیں چلے گا۔