Blog

‎سعودی عرب نے پہلی بار ایران کو خبردار کیا ہے کہ اگر حملے جاری رہے تو ریاض جوابی کارروائی کرنے پر مجبور ہو سکتا ہے۔
‎برطانوی خبر ایجنسی کے مطابق ذرائع کا کہنا ہے کہ سعودی عرب نے تہران کو پیغام دیا ہے کہ اگر ایران کے حملے جاری رہے تو سعودی حکومت امریکا کو اپنے فوجی اڈے ایران کے خلاف استعمال کرنے کی اجازت دے سکتی ہے۔
‎رپورٹ کے مطابق خلیجی ممالک نے اب تک ایران پر حملوں کے لیے امریکا کو اپنی فضائی حدود استعمال کرنے کی اجازت نہیں دی۔
‎ادھر قطر کے امیر نے بھی امریکی صدر سے رابطہ کیا اور واضح کیا کہ قطر اپنی قومی سلامتی کے تحفظ کے لیے ضروری اقدامات کرنے سے نہیں ہچکچائے گا۔
‎متحدہ عرب امارات کے صدر محمد بن زاید النہیان نے بھی سخت بیان دیتے ہوئے کہا کہ یو اے ای آسان ہدف نہیں اور اپنے ملک کے دفاع میں کسی قسم کی کوتاہی نہیں کی جائے گی۔
‎دوسری جانب ایران کا مؤقف ہے کہ اس کے حملوں کا ہدف خلیجی ممالک نہیں بلکہ خطے میں موجود امریکی مفادات ہیں اور اس نے مطالبہ کیا ہے کہ خطے میں امریکی فوجی موجودگی ختم کی جائے۔


انسانی حقوق کی عالمی تنظیم ہیومن رائٹس واچ نے جنوبی ایران میں ایک اسکول پر ہونے والے حملے کو ممکنہ جنگی جرم قرار دیتے ہوئے اس کی فوری اور مکمل تحقیقات کا مطالبہ کیا ہے۔
تنظیم کے مطابق 28 فروری 2026 کو صوبہ ہرمزگان کے شہر مناب میں واقع شجرہ طیبہ پرائمری اسکول کو نشانہ بنایا گیا جس کے نتیجے میں تقریباً ڈیڑھ سو بچوں سمیت مجموعی طور پر 160 افراد جان سے گئے۔
‎یہ حملہ اس وقت ہوا جب ایران کے مختلف علاقوں میں امریکا اور اسرائیل کی جانب سے فضائی حملوں کی لہر جاری تھی۔ تاہم امریکا اور اسرائیل نے اس حملے کی ذمہ داری قبول نہیں کی جبکہ اسرائیلی فوج کے ترجمان نے کہا کہ انہیں اس علاقے میں کسی کارروائی کا علم نہیں۔
‎ہیومن رائٹس واچ کے مطابق اسکول پاسداران انقلاب کی بحریہ کے ایک کمپاؤنڈ کے قریب واقع ہے لیکن معلومات سے ظاہر ہوتا ہے کہ اسکول اس کمپاؤنڈ سے الگ تھا اور اس کا اپنا داخلی راستہ تھا۔
‎تنظیم کی ڈیجیٹل انویسٹیگیشنز لیب کی محقق صوفیہ جونز نے کہا کہ حملے کے انداز سے ظاہر ہوتا ہے کہ عمارتوں کو درست نشانے والے گائیڈڈ ہتھیاروں سے نشانہ بنایا گیا۔ ان کے مطابق ضروری ہے کہ تحقیقات میں یہ معلوم کیا جائے کہ حملہ کرنے والوں کو کیا اس بات کا علم تھا کہ اس عمارت میں اسکول موجود ہے اور وہاں بچے اور اساتذہ موجود ہوں گے۔
‎ہیومن رائٹس واچ نے مطالبہ کیا ہے کہ اگر حملہ غیر قانونی ثابت ہو تو اس کے ذمہ دار افراد کے خلاف جنگی جرائم کے تحت کارروائی کی جائے۔


ناروے کے دارالحکومت اوسلو میں امریکی سفارت خانے کے قریب ایک زور دار دھماکے کی اطلاع ملی ہے جس کے بعد علاقے میں خوف و ہراس پھیل گیا۔
ناروے پولیس کے مطابق دھماکے کے نتیجے میں قریبی عمارت کے داخلی دروازے کو معمولی نقصان پہنچا ہے تاہم کسی جانی نقصان کی اطلاع نہیں ملی۔
‎رپورٹس کے مطابق واقعے کے فوراً بعد پولیس نے علاقے کو گھیرے میں لے کر بڑے پیمانے پر تفتیش شروع کر دی ہے۔ ملزمان کی تلاش کے لیے ڈرونز اور ہیلی کاپٹروں کی مدد سے سرچ آپریشن جاری ہے۔
‎پولیس حکام کا کہنا ہے کہ وہ امریکی سفارت خانے کے حکام کے ساتھ مسلسل رابطے میں ہیں اور واقعے کے تمام پہلوؤں کا جائزہ لیا جا رہا ہے۔ اب تک کسی گروپ نے دھماکے کی ذمہ داری قبول نہیں کی۔
‎میڈیا رپورٹس کے مطابق دھماکا سفارت خانے کی عمارت کے عوامی داخلی دروازے کے قریب ہوا جس سے معمولی نقصان ہوا۔ پولیس کارروائی کی قیادت کرنے والے افسر مائیکل ڈیلمیر نے ناروے کے سرکاری نشریاتی ادارے کو بتایا کہ تحقیقات جاری ہیں۔
‎واضح رہے کہ امریکی سفارت خانہ اوسلو کے ضلع مورگیڈالس ویگن میں واقع ہے جو شہر کے مرکز سے تقریباً سات کلومیٹر دور ہے۔


ایرانی پاسدارانِ انقلاب نے دعویٰ کیا ہے کہ ایران موجودہ شدت کے ساتھ کم از کم چھ ماہ تک جنگ جاری رکھنے کی صلاحیت رکھتا ہے۔
یہ بیان ایسے وقت میں سامنے آیا ہے جب امریکا اور اسرائیل کی مشترکہ فوجی کارروائیاں ایران کے خلاف جاری ہیں جبکہ ایران خطے میں میزائل اور ڈرون حملوں کے ذریعے جوابی کارروائیاں کر رہا ہے۔
‎ایرانی حکام کے مطابق ملک کی دفاعی حکمت عملی کا بڑا حصہ بیلسٹک میزائل اور ڈرون پروگرام پر مشتمل ہے جس کے ذریعے طویل عرصے تک دباؤ برقرار رکھا جا سکتا ہے۔
‎بین الاقوامی رپورٹس کے مطابق ایران کے پاس ہزاروں بیلسٹک میزائل موجود ہیں اور ملک ہر ماہ بڑی تعداد میں ڈرون تیار کرنے کی صلاحیت بھی رکھتا ہے۔
ماہرین کا کہنا ہے کہ ایران کی جنگی حکمت عملی براہ راست فیصلہ کن جنگ کے بجائے طویل المدتی دباؤ اور مخالفین کو تھکا دینے والی حکمت عملی پر مبنی ہے جس میں میزائل حملے، ڈرونز، سمندری راستوں پر دباؤ اور خطے میں اتحادی گروہوں کا استعمال شامل ہے۔


گوگل کی سرپرست کمپنی الفابیٹ کے چیف ایگزیکٹو آفیسر سندر پچائی کی آمدنی میں نمایاں اضافہ ہونے کا امکان ہے۔
امریکی حکومت کے پاس جمع کرائی گئی ریگولیٹری فائلنگ کے مطابق آئندہ تین برسوں کے دوران الفابیٹ کی جانب سے سندر پچائی کو تقریباً 69 کروڑ 20 لاکھ ڈالر معاوضہ ادا کیا جائے گا جو پاکستانی کرنسی میں ایک کھرب 92 ارب روپے سے زائد بنتا ہے۔
‎امریکی سکیورٹیز اینڈ ایکسچینج کمیشن میں جمع کرائی گئی دستاویزات کے مطابق اس معاوضے کا بڑا حصہ کمپنی کی کارکردگی سے منسلک ہے، یعنی اس کا انحصار اس بات پر ہوگا کہ آئندہ تین برسوں میں الفابیٹ کے مختلف منصوبے کس حد تک کامیاب ہوتے ہیں۔
‎رپورٹ کے مطابق پیکج میں بڑی رقم الفابیٹ کی ذیلی کمپنیوں کی کارکردگی سے جڑی ہوئی ہے۔ اگر خودکار گاڑیوں پر کام کرنے والی کمپنی Waymo کی قدر میں اضافہ ہوا تو سندر پچائی کو حصص کی صورت میں تقریباً 26 کروڑ ڈالر مل سکتے ہیں۔
‎اسی طرح ڈرون ڈیلیوری کمپنی Wing کی بہتر کارکردگی کی صورت میں انہیں مزید 9 کروڑ ڈالر تک ملنے کا امکان ہے۔
‎اس کے علاوہ الفابیٹ کی جانب سے تقریباً 25 کروڑ 20 لاکھ ڈالر کے اسٹاک بھی دیے جائیں گے جبکہ مزید 8 کروڑ 40 لاکھ ڈالر اس شرط پر ملیں گے کہ وہ آئندہ تین برسوں تک کمپنی کے ساتھ وابستہ رہیں۔
‎دلچسپ بات یہ ہے کہ اتنے بڑے پیکج کے باوجود سندر پچائی کی بنیادی سالانہ تنخواہ صرف 20 لاکھ ڈالر ہے جو 2020 سے تبدیل نہیں ہوئی۔
‎سندر پچائی نے 2004 میں گوگل میں شمولیت اختیار کی تھی اور بعد ازاں گوگل کروم اور اینڈرائیڈ جیسے اہم منصوبوں کی قیادت کی۔ 2015 میں انہیں گوگل کا سی ای او بنایا گیا جبکہ 2019 میں وہ الفابیٹ کے سربراہ بن گئے۔


ایران کی مجلس خبرگان کے ایک رکن نے تصدیق کی ہے کہ آیت اللہ سید علی خامنہ ای کے جانشین کے حوالے سے اکثریتی اتفاق رائے ہو چکا ہے۔
مجلس خبرگان کے رکن میر باقری کے مطابق جانشینی کے معاملے میں اب صرف ایک یا دو تکنیکی اور آئینی امور طے ہونا باقی ہیں۔
‎انہوں نے کہا کہ جیسے ہی یہ آئینی معاملات مکمل ہوں گے، ایران کے نئے سپریم لیڈر کے نام کا باضابطہ اعلان کر دیا جائے گا۔
‎میر باقری کا کہنا تھا کہ مجلس خبرگان اس عمل کو آئینی طریقہ کار کے مطابق مکمل کر رہی ہے تاکہ قیادت کی منتقلی کے حوالے سے تمام مراحل قانونی تقاضوں کے تحت انجام پائیں۔


امریکی میڈیا نے دعویٰ کیا ہے کہ امریکا ایران کے افزودہ یورینیم کو قبضے میں لینے کے لیے اسپیشل فورسز بھیجنے کے آپشن پر غور کر رہا ہے۔
رپورٹ کے مطابق ایران کے پاس تقریباً 450 کلوگرام یورینیم موجود ہے جو 60 فیصد تک افزودہ کیا جا چکا ہے۔ تجزیہ کاروں کا کہنا ہے کہ اگر امریکا اس مواد کو حاصل کرنا چاہے تو اسے ایرانی سرزمین کے اندر کارروائی کرنا پڑ سکتی ہے۔
‎رپورٹ میں کہا گیا ہے کہ ابھی یہ واضح نہیں کہ امریکا اور اسرائیل اس مقصد کے لیے مشترکہ آپریشن کریں گے یا نہیں۔
‎امریکی ذرائع کے مطابق اس طرح کی کسی ممکنہ کارروائی پر اس وقت غور کیا جا رہا ہے جب ایران کی جانب سے خطرہ کم ہونے کی صورت میں ایسے مشن کو انجام دینا ممکن ہو۔


مشرق وسطیٰ اور خلیجی خطے میں بڑھتی ہوئی غیر یقینی صورتحال کے باوجود پاکستان کی سپلائی چین بدستور فعال ہے۔
ذرائع کے مطابق عالمی کشیدگی کے باوجود چین کے ساتھ واقع سوست ڈرائی پورٹ کے ذریعے پاکستان کی تجارتی سرگرمیاں جاری ہیں اور یہ راستہ ملک کے لیے قابل اعتماد تجارتی راہداری ثابت ہو رہا ہے۔
‎ذرائع کا کہنا ہے کہ پاک چین سرحد پر قائم سوست پورٹ پاکستان کو اہم تجارتی سہولت فراہم کر رہی ہے اور اس کے ذریعے سامان کی نقل و حمل بلا تعطل جاری ہے۔
‎حکام کے مطابق پاکستان اپنی تجارتی راہداریوں کو مؤثر انداز میں فعال رکھے ہوئے ہے جس کے باعث عالمی حالات کے باوجود درآمدات اور برآمدات کا نظام متاثر نہیں ہوا۔
‎ذرائع کا مزید کہنا ہے کہ پاکستان بہتر حکمت عملی کے ذریعے خود کو ایک مضبوط عالمی تجارتی مرکز کے طور پر منوانے کی کوشش کر رہا ہے۔