Category: سیاست

عالمی افق میں بدلتی صورت حال کے پیش نظر وطن عزیز میں استحکام اور ترقی کے اہداف حاصل کرنے کے لئے سیاسی اکابرین اور مقتدرہ کو جرات مندانہ فیصلوں کے ساتھ آگے بڑھنا ہوگا ، قومی مفادات کو ترجیح دینا ہوگی ۔ تخلیقی سوچ ایماندار اور ترقی پسند و مخلص کردار کی لیڈر شپ مہیا کرنا ہوگی۔ صوبائی تعصب ، اقربا پروری اور کرپشن کسی بھی ملک اور قوم کے لئے زہر قاتل ہیں اور بابائے قوم نے بھی اپنے خطابات میں ان قباحتوں سے بچنے کی تلقین کی تھی۔ اور انہی سے نجات میں ملک کا استحکام پوشیدہ ہے آج وطن عزیز کو اندرونی اور بیرونی سازشوں کا سامنا ہے۔ بلاشبہ نواز شریف نے اپنے سابقہ ادوار میں ملک میں موٹرویز ، لوڈ شیڈنگ کے خاتمے ، بیروزگاری میں کمی ،روزگار کے لئے آسان قرضوں کی فراہمی ،ایٹمی دھماکوں بیرونی قرضوں سے نجات اور خود انحصاری کی جانب کئی اقدامات اٹھائے اور پھر سی پیک جیسے منصوبے کو لاکر پاکستان کوبین الاقوامی معاشی ترقی میں خطے کی اُبھرتی ہوئی معیشت کی صفوں میں لاکھڑا کیا۔ آج بھی ضرورت اس امر کی ہے کہ ترقی او ر معاشی استحکام کا سفر اُسی جذبے اور بصیرت سے جاری رکھا جائے ۔ آج بھی ماضی کی طرح نواز شریف آج بھی بلوچستان کی دکھتی رگ پراپنا ہاتھ رکھ کر علیحدگی پسند سوچوں کی چنگاریں کو بجھا سکتے ہیں۔ آج بھی نواز شریف اور اُنکی ٹیم مستقبل کے چیلنجوں کا مقابلہ کرنے کی صلاحیت رکھتے ہیں۔ استحکام پاکستان خطے میں پائیدار امن اورترقی کا ضامن ہے۔بین الاقوامی طاقتوں اور خطے کے علاقائی طاقتوں کے ساتھ آگے بڑھنا ہوگا۔ ملک کی سیاست اور مقتدرہ کو درست وقت اور درست سمت کا تعین کرنا ہوگا۔ مشرق وسطیٰ کا مستقبل کیا ہے ، کیا ہونے جا رہاہے۔ روس یوکرین جنگ کا خاتمہ ہو گا یا نہیں مشرق وسطی اور کشمیر کی گونج دہائیوں سے عالمی دنیا کے کونے کونے میں سنائی دے رہی ہے ۔ خون ریزی اور تباہی کی کہانیاں کون نہیں جانتا۔دنیا مسلسل غرق ہور ہی ہے امریکہ اور عالمی قوتوں کے سامنے مسلسل تباہی ہو رہی ہے ۔ آخر کب تک ؟

وزیراعلیٰ پنجاب، محترمہ مریم نواز شریف نے عوامی فلاح و بہبود کی نئی تاریخ رقم کرنا شروع کر دی ہے۔ اُن کی قیادت میں پنجاب حکومت ایک ایسے راستے پر گامزن ہے جہاں ہر طبقہ فکر، خاص طور پر پسماندہ اور نظر انداز کیے گئے افراد، کو ترقی کے عمل میں شامل کیا جا رہا ہے۔ حالیہ اعلانات اور اقدامات اس بات کا ثبوت ہیں کہ وزیراعلیٰ کی توجہ صرف اعلانات پر نہیں بلکہ عملی اقدامات پر ہے۔

وزیراعلیٰ مریم نواز شریف نے تمام سرکاری عمارتوں میں خصوصی افراد کے لیے ریمپ بنانے کا حکم دیا ہے۔ یہ اقدام اس بات کی علامت ہے کہ حکومت اُن افراد کو بھی معاشرے کا فعال حصہ بنانے کے لیے پرعزم ہے جو جسمانی معذوری کے باعث محدود ہیں۔یہ سہولت نہ صرف سرکاری دفاتر تک ان کی رسائی کو آسان بنائے گی بلکہ انہیں احساسِ شمولیت بھی دے گی۔

مریم نواز شریف نے اعلان کیا ہے کہ اللہ تعالیٰ کے فضل و کرم سے پہلے پانچ ماہ میں 30 ہزار گھر تعمیر کیے جا رہے ہیں، جو کہ "اپنی چھت، اپنا گھر” پراجیکٹ کا حصہ ہیں۔ یہ کارنامہ پاکستان کی تاریخ میں ایک مثال بن چکا ہے، کیونکہ اس سے پہلے کوئی بھی حکومت عوام کے لیے تین ہزار گھر بھی نہ بنا سکی۔ان کا ہدف ہے کہ سال کے آخر تک 1 لاکھ گھر مکمل کیے جائیں تاکہ ہر بے گھر کو چھت فراہم کی جا سکے۔ وزیراعلیٰ نے کہا”میں ہر اس شخص تک پہنچنا چاہتی ہوں جو ریاست کا انتظار کر رہا ہے۔”یہ جملہ نہ صرف ان کے وژن کا عکاس ہے بلکہ اُن کی فلاحی سوچ کی گہرائی کو بھی ظاہر کرتا ہے۔ حکومت اب صرف دفتر کے دروازے کھول کر انتظار نہیں کرے گی بلکہ خود عوام کے دروازے تک پہنچے گی۔

معذور اور جسمانی طور پر کمزور افراد کے لیے ایک اور خوشخبری یہ ہے کہ سوشل ویلفیئر ڈیپارٹمنٹ کا پورٹل فعال کر دیا گیا ہے۔جو افراد جسمانی کمزوری کا شکار ہیں وہ اس پورٹل پر رجسٹریشن کروا سکتے ہیں۔حکومت ضرورت کے مطابق معاون آلات ان کے گھروں تک پہنچائے گی۔یہ اقدام ان افراد کو زندگی میں مزید آزادی اور خود مختاری دے گا۔

وزیراعلیٰ پنجاب مریم نواز کی جانب سے یکم مئی کو ایک اور تاریخی قدم اٹھایا جا رہا ہے،پاکستان کا سب سے بڑا راشن کارڈ پروگرام لانچ کیا جائے گا۔اس پروگرام کے تحت 12.5 لاکھ خاندانوں کو 10 ہزار روپے نقد رقم فراہم کی جائے گی۔یہ اسکیم مہنگائی کے مارے افراد کے لیے ایک بہت بڑا ریلیف بن کر سامنے آئے گی۔وزیراعلیٰ مریم نواز شریف کی جانب سے کیے گئے یہ اقدامات اس بات کا ثبوت ہیں کہ اگر نیت صاف ہو اور وژن مضبوط ہو تو تبدیلی ممکن ہے۔ معذور افراد کی سہولت، بے گھر افراد کو چھت، اور غریب طبقے کیلئے معاشی امداد ، یہ سب ایک ہمہ گیر فلاحی وژن کا حصہ ہیں۔اب یہ عوام کی بھی ذمہ داری ہے کہ وہ ان سہولیات سے فائدہ اٹھائیں، خود بھی رجسٹریشن کریں اور اپنے آس پاس کے لوگوں کو بھی آگاہ کریں۔

اوورسیز پاکستانیز کنونشن سے خطاب میں رواں مالی سال کے ابتدائی 9ماہ میں 28 بلین ڈالر جبکہ مارچ میں ریکارڈ4.1بلین ڈالر ترسیلات زر پر شکریہ ادا کرتے ہوئے وزیراعظم شہباز شریف کا کہنا تھاکہ معاشی استحکام کا کریڈٹ چیف آف آرمی سٹاف اور حکومتی ٹیم کے ساتھ ساتھ اورسیز پاکستانیوں کو جاتا ہے جنہوں نے پاکستان کو درپیش فارن ایکسچینج کے چیلنج کے گیپ کو پورا کیا۔ وزیراعظم کا کہنا تھا کہ اوورسیز پاکستانیوں کے مقدمات کی جلد پروسیڈنگ کیلئے اسلام آباد میں خصوصی عدالتیں قائم کردی گئی ہیں جبکہ پنجاب میں بھی ایسی عدالتوں کے قیام کا عمل جاری ہے، پنجاب میں قانون سازی ہوچکی ہے اور دیگر صوبوں میں بھی بہت جلد یہ کام ہوگا۔ ویڈیو لنک کے ذریعے شواہد کی ای ریکارڈنگ کی سہولت بہت جلد دی جائے گی تاکہ آپ کو پاکستان نہ آنا پڑے اور مقدمات کی بھی ای فائلنگ کی سہولت فراہم کی جارہی ہے، یہ کام انشااللہ 90 دن کے اندر مکمل ہوجائے گا۔ وزیراعظم شہباز شریف نے وفاقی چارٹر یونیورسٹیز میں اوورسیز پاکستانیوں کیلئے 5 فیصد جبکہ میڈکل کالجز میں 15 فیصد کوٹہ دینے کی خوشخبری بھی سنائی۔ ٹیکس ادائیگی میں بڑا ریلیف دیتے ہوئے اوورسیز پاکستانیوں کو فائلرز کے طور پر ٹریٹ کرنے کا اعلان کیا جبکہ سرکاری نوکری کی حد عمر میں 10 سال کی خصوصی رعائیت کا اعلان کیا۔ زیادہ ترسیلات زر بھیجنے اور بیرون ممالک پاکستان کا نام روشن کرنے والوں کیلئے سول ایوارڈ کی خوشخبری بھی سنائی گئی۔

ماضی میں بھی اوورسیز پاکستانیوں کی تکلیف کو سب سے پہلے شہباز شریف نے محسوس کیا تھا اور بطور وزیراعلیٰ پنجاب شہباز شریف نے 2014ء میں اوورسیز پاکستانیز کمیشن پنجاب قائم کیا۔ آن لائن کمپلینٹ پورٹل بنایا گیا جہاں اوورسیز پاکستانی دنیا بھر سے اپنی شکایات کا اندرج کراسکتے ہیں۔ شہباز شریف خود ہر ماہ اس کمیشن کی کارکردگی کا جائزہ لیتے تھے جس کی بدولت او پی سی پنجاب کے ذریعے ہزاروں اوورسیزپاکستانیوں کے مسائل حل ہوئے۔ آرمی چیف جنرل عاصم منیر کنوشن سے خطاب کیلئے آئے تو حال عاصم منیر زندہ آباد پاک آرمی زندہ باد کے نعروں سے گونج اٹھا۔اوورسیز پاکستانیز کنونشن سے خطاب میں جنرل عاصم منیر کا کہنا تھا آپ کے جذبات دیکھ کر بہت متاثر ہوا ہوں اور یقین دلاتا ہوں کہ آپ کیلئے ہمارے جذبات اس سے بھی زیادہ مضبوط ہیں، آپ پاکستان کی وہ روشنی ہیں جو پورے اقوام عالم پر پڑتی ہے۔ آرمی چیف جنرل عاصم منیر کا کہنا تھا کہ اوورسیز پاکستانی ہمیشہ اپنا سرفخر سے بلند رکھیں کیونکہ آپ ایک عظیم اور طاقتور ملک کے نمائندے ہیں۔ آرمی چیف جنرل عاصم منیر کا کہنا تھاکہ دشمن کو غلط فہمی ہے کہ مٹھی بھر دہشت گرد بلوچستان یا پاکستان کی تقدیرکا فیصلہ کرسکتے ہیں؟بلوچستان پاکستان کی تقدیر اور ہمارے ماتھے کا جھومر ہے، غیور عوام پاک فوج کے ساتھ کھڑے ہیں اور آپ کی فوج ہر مشکل سے نبرد آزما ہونے کیلئے تیار ہے۔ کسی کو بھی پاکستان کی ترقی میں رکاوٹ نہیں ڈالنے دیں گے۔

مختلف ممالک سے آئے اوورسیز سے ملاقات ہوئی تو انہوں نے درخواست کی کہ وزیراعظم تک یہ بات بھی ضرور پہنچایئے گا کہ اوورسیز پاکستانی بیرون ملک کسی تکلیف یا مسئلے کیلئے پاکستانی سفارت خانے جائیں تو کوئی بھی سرکاری بابو ان کی بات سننا تو درکنارملنا گوارا نہیں کرتا۔ فارن آفس کے سفارتی افسران کمیونٹی کی خدمت اور پاکستان کے مثبت ایمج کیلئے سفارتی کوششیں کرنے کی بجائے تحائف اکٹھے کرنے اور اپنے خاندان کے افراد کیلئے وہاں کی نیشنیلٹی لینے کیلئے جان لڑا رہے ہوتے ہیں۔ سفارتی افسران کا ایک ہی طریقہ واردات ہے رشتے داروں کے نام پر ویزہ انویٹیشن لیٹر مانگتے ہیں۔ گفٹ اور ویزہ انویٹیشن دینے کی سکت نہ رکھنے والے عام پاکستانیوں کو حقیر سمجھ کر ملنا بھی گواراہ نہیں کرتے جبکہ بڑے کاروباری افراد کے آگے پیچھے دم ہلاتے ہیں۔ ویزہ پالیسی میں سختی اور پاکستانیوں کی بے قدری کی سب سے بڑی وجہ سفارت خانے کا عدم تعاون ہے۔ بیرون ملک مقیم پاکستانیوں کی اکثریت کا کہنا تھا کہ جب بھی کوئی آرمی افسر بطور سفیر تعینات کیا جاتا ہے تو ناصرف تحفے تحائف والا سلسلہ رک جاتا ہے بلکہ پاکستانیوں کے لیے بلا روک ٹوک سفارت خانے کے دروازے بھی کھل جاتے ہیں اس لیے سفارتی سطح پر آرمی افسران کی تقرری سے نہ صرف کرپشن اور عام پاکستانیوں کی تذلیل رکتی ہے بلکہ وہ سفارتی سطح پر بھی پاکستان کی عزت و وقار میں اضافے کو پہلی ترجیح دیتے ہیں۔ اس لیے تمام اہم ممالک میں آرمی افسران کو سفیر مقرر کرکے دنیا بھر میں پاکستان اور بیرون ملک مقیم پاکستانیوں کی عزت میں اضافہ کیا جاسکتا ہے۔ اوورسیز پاکستانیوں کا کہنا تھا کہ وہ پاکستان میں کسی ہائوسنگ سوسائٹی میں پلاٹ لیتے ہیں تو انکو دکھایا کچھ جاتا ہے اور دیا کچھ ۔قیمت سب سے قیمتی پلاٹ کی لی جاتی ہے اور دیا سب سے ارزاں والا جاتا ہے ۔ لینڈ مافیااور سرکاری افسران کی ملی بھگت سے جعلی کاغذات کے ذریعے اوورسیز کے گھر اور پلاٹوں پر قبضے ہونامعمول بن چکا۔ اوورسیز اسی کو قسمت کا فیصلہ سمجھ کر دوبارہ پاکستان میں انویسٹمنٹ نہ کرنے کا تہیہ کرکے نکل جاتے تھے لیکن ابھی وزیراعظم کی طرف سے خصوصی عدالتوں کے قیام سے انصاف کی امید پیدا ہوئی ہے۔ پاکستان کے تمام ائیرپورٹس پر ایف آئی اے اہلکاروں کا سخت رویہ اور کسٹم والوں کا قیمتی تحائف رکھنا معمول ہے، اتنے کی چیز نہیں ہوتی جتنا کسٹم ٹیکس ڈال کر قبضے میں رکھ لیتے ہیں ۔وزیراعظم شہباز شریف سے گزارش ہے کہ ایئرپورٹ سے کرپٹ اور بدتمیز افسران اور اہلکاروں کو فوری ہٹایا جائے اور تمام ایئرپورٹس پر اوورسیز فیسلیٹیشن ڈیسک بنائے جائیں۔

دنیا کو کسی اور پھر بے اختیار ادارے کی ضرورت نہیں ،جو خالی بیانات جاری کرے۔ دنیا کو بین الاقوامی سطح پر ایسے اداروں کی ضرورت ہے جو دنیا کا دفاع کر سکے ۔خلق خدا کو جنگوں سے محفوظ رکھنے میں اپنا کردار ادا کرے۔ میری مراد اقوام متحدہ ، سلامتی کونسل ، او آئی سی ،عرب لیگ وغیرہ وغیرہ ۔ اسی طرح دنیا کو کسی ایسی عدالت کی ضرورت نہیں جس کے حکم پر عمل نہ کیا جائے۔ وطن عزیز کی ہنگامہ خیز سیاست ، سیاسی جماعتوں اور مذہبی جماعتوں کو خلق خدا کے لئے اور پاکستان کے وقار سلامتی کے لئے ہنگامی سیاست سے باہر نکلنا ہوگا۔ پاکستان کو اس وقت گیم چینجر سیاسی جماعت اور سیاستدانوں کی ضرورت ہے۔ امریکہ اور دیگر ممالک کی داخلی اورخارجہ پالیسیاں تبدیلیا ں ہو رہی ہیں۔ اس تبدیلی کے اثرات بلاشبہ پاکستان پر بھی پڑے گی ۔

دنیا میں معاشی جنگ کا آغاز ہو چکا ہے ۔ دنیا کی دو بڑی معیشتوں کے درمیان یعنی امریکہ اور چین کے درمیان تجارتی جنگ شروع ہو چکی ہے۔ پاکستان کی قومتی سلامتی کے اداروں نے بھارت اور افغانستان کے ذریعے پاکستان میں دہشت گردی کا ہماری دفاعی طاقتوں کا کردار قابل ستائش ہے ۔ ملک وقوم کی حفاظت پر مامور دفاعی ادارے جو انمردی سے ان موت کے سوداگروں کو شکست سے دوچار کررہے ہیں۔ ماضی میں دفاعی اداروں نے دہشت گردوں اور ملک سے انتہا پسندی کے خاتمے کے لیے کردار ادا کیا ، ایک عالم گواہ ہے۔ وطن عزیز کا دفاع مضبوط ہاتھوں میں ہے۔ بھارت کا ناپاک خواب ہمارے دفاعی ادارے کبھی پورے نہیں ہونے دیں گے۔ موجودہ عالمی تجارتی جنگ میں امریکہ سمیت عالمی دنیامیں تعینات سفیروں کواپنا کردار ادا کرنا ہوگا۔ غیر ملکی سرمایہ کاروں کویقین دلانا ہوگا کہ پاکستان ایک پُرامن ملک ہے ،اپنی بیگمات کی این جی اوز سے توجہ ہٹا کر وطن عزیز کی معیشت پر توجہ دینی ہوگی۔ دنیا بھر میں تعینات کمرشل قونصلر اپنے آپ کو کمرشل کرنے کی بجائے وطن عزیز کی معیشت اور تجارت پر توجہ دیں۔ سیاسی جماعتیں اور سیاستدان ہنگامی سیاست سے نکل کر وطن عزیز کی سلامتی اوروقار کو مد نظر رکھتے ہوئے سرجوڑ کر بیٹھیں ۔ ملکی مفاد کو اپنے ذاتی مفادات کو ترجیح دینا کون سی قومی خدمت ہے۔

ووٹ بینک خراب ہونے کے ڈر سے جتنی بھی حکومتیں آئیں کسی نے بھی تجاوزات کے خلاف ایکشن لینے کی زحمت نہیں کی جس کے نتیجے میں تجاوزات بلین ڈالرز کی اندسڑی بن گئی تھی اور یہی لگتا تھا کہ تجاوزات کا خاتمہ مشن امپاسبل ہوچکا، جتنے بھی حکمران آئے وہ تجاوزات کے اصل بینیفشریز پارلیمنٹیرین اور بیوروکریسی کے سامنے بے بس ہوکر ہار مان جاتے تھے۔ تجاوزات پورے پاکستان کا مسئلہ ہے لیکن سوائے وزیراعلیٰ پنجاب مریم نواز شریف کے کسی نے بھی تجاوزات کے خاتمے کیلئے کوشش نہیں کی تھی۔ وزیراعلیٰ پنجاب مریم نواز شریف نے تجاوزات مافیا کے خلاف بلا امتیاز کاروائی کا حکم دیا تو عارضی اور پختہ تجاوزات کو ہٹایا گیا، کئی ہزار ارب کے زمینیں واگزار ہوئیں۔ مختلف یونیورسٹیز میں ہونے والے سروے اور ریفرنڈم میں مریم نواز نوجوانوں کی مقبول ترین لیڈر بن کرسامنے آئی ہیں۔ نوجوانوں کا کہنا تھا کہ وزیراعلیٰ پنجاب کی تجاوزات اور لاقانونیت کے خلاف زیروٹالریشن اور نوجوانوں کے لیے تعلیمی وظائف ، خواتین کیلئے سکوٹی سمیت درجنوں منصوبوں کی وجہ سے ان کی مقبولیت میں اضافہ ہوا ہے اور پڑھے لکھے طبقے کا اچھا خاصا ووٹ بینک ان کی طرف آیا ہے۔ تجاوزات کے خاتمے کی مقبولیت کو دیکھتے ہوئے سندھ اور بلوچستان کے وزراء اعلیٰ نے بھی تجاوزات کے خلاف کاروائی کا حکم دیا۔ تجاوزات کا خاتمہ وزیراعلیٰ پنجاب کی جرات اور حب الوطنی کی پہچان بن چکا ہے۔سٹیٹ لینڈ کی حفاظت کا جو بیڑا مریم نواز نے اٹھایا ہے اس کیلئے پنجاب کا ہر فرد وزیراعلیٰ کے ساتھ ہے۔ انتظامی افسران نے خودساختہ فیصلے کے تحت رمضان اور ’’عید لگانے دو ‘‘ کے نام پر تجاوزات کے خلاف کاروائی روک دی جس کے نتیجے میں صورت حال ایک دفعہ پھر سے زیرو پر آچکی ہے۔ میڈم وزیراعلیٰ کو چاہئے کہ تجاوزات کے خلاف آپریشن کو بلا تعطل جاری رہنا چاہئے اور ایسے افسران کا بھی احتساب ضروری ہے جو تجاوزات کے خاتمے میں تاخیری حربے استعمال کرتے ہوئے اس مافیا کا ساتھ دے رہے ہیں۔ تجاوزات قائم کرنے والوں کیلئے تو سزا ہے لیکن تجاوزات کو ہٹانے میں ناکام ہونے والے انتظامی افسران کیلئے بھی عہدوں سے معطلیاں اور نوکری سے برخاستگی کی کاروائی کیے بن یہ مشن ادھورا ہی رہ جائے گا۔ باعزت روزگار کیلئے حکومت پنجاب نے بہترین ریڑھی بازار قائم کیے ہیں۔ ان کے علاوہ تمام ریڑھیاں اور رکشے قبضے میں لے لینے چاہئیں۔ مریم نواز حکومت کو چاہئے کہ جدید پنجاب کو عملی شکل دینے کیلئے سختی اور آہنی ہاتھوں سے ہر طرح کی غیرقانونی پارکنگ اور تجاوزات کا خاتمہ کروائیں۔ چھوٹی بڑی شاہرائیں ریڑھی اور رکشہ شاپ بن چکی ہیں۔ تجاوزات کا سامان ہرگز واپس نہیں ہونا چاہئے، کیونکہ ایسا ہوتا ہے کہ دن میں کریک ڈاؤن ہوتا ہے تو شام کو وہی تجاوزات واپس آجاتی ہیں۔ حکومت کو اپنی رٹ بحال کرنا ہوگی دکانداروں کو بتانا ہوگا کہ صرف دکان تمہاری ہے نہ کہ سامنے والا فٹ پاتھ اورسڑک۔ تجاوزات کے خاتمے کے لیے ضروری ہے کہ صرف ایک دفعہ کے فوٹو سیشن تک محدود نہ رہا جائے بلکہ اس کا فالو اپ بھی لیں۔ فیصل آباد، ڈی جی خان، جہلم، مری، حافظ آباد، جھنگ اور ساہیوال کے اضلاع کے علاوہ کہیں بھی تجاوزات کے خلاف قابل ذکر کاروائی نہیں کی گئی۔ اس مشن کی کامیابی اور عوامی شکایات کیلئے وزیراعلیٰ پورٹل بنایا جائے جہاں تجاوزات کی نشان دہی کی ویڈیوز اور تصاویر بھیجی جاسکیں، وزیراعلیٰ آفس ہفتہ وار رپورٹ لے۔ ایڈیشل چیف سیکرٹری کی سپرویژن میں تجاوزات فری پنجاب کے نام سے تمام اضلاع کے ڈپٹی کمشنرز اور اسسٹنٹ کمشنرز کا گروپ بنایا جائے تاکہ کام کرنے والوں کو شاباش اور نہ کرنے والوں کر شرم دلائی جاسکے۔ ہائی ویز اور جی ٹی روڈ پر ابھی تک تجاوزات کی بھرمار ہے جس کی وجہ سے ٹریفک جام اور حادثات معمول بن چکا ہے۔ سڑکوں اور سرکاری زمینوں پر قبضہ کرنے والی نجی ہاؤسنگ سوسائٹیوں کے خلاف کاروائی بھی ناگزیر ہے ۔ سڑک سے تجاوزات ہٹانا صرف ڈی سی کا کام نہیں بلکہ ناجائز پارکنگ اور مختلف کاروباری بورڈ لگا کر سڑکوں اور گلیوں کو بند کرنے پر ٹریفک پولیس کو بھی کاروائی کرنی چاہئے۔ گھروں کے باہر سڑک کی زمین پر قبضہ کرکے بنائی گئی نرسریاں، ایکسٹرا ریمپ اور نوپارکنگ کے نام پر مین شاہراہ اور گلیوں بازاروں میں پتھر رکھ کر ڈیرے اور کاروباری بورڈ لگا کر سڑک پر قبضہ کرنے والوں کے خلاف بھی سخت کاروائی ہونی چاہئے۔ لاہور سمیت پنجاب میں سرکاری زمینوں پر بنائی گئی پختہ اور عارضی تجاوزات کا ماہانہ کرایہ لینے والے سنئیر افسران اور سیاستدان بہت ساری اہم جگہوں سے تجاوزات کے خاتمے میں رکاوٹ بن رہے ہیں۔ وزیراعلیٰ پنجاب کو چاہئے کہ ایک دفعہ پھر سے واضح احکامات جاری کیے جائیں کہ کسی بھی سیاسی اور انتظامی افسران کے پریشر کو خاطر میں لائے بن تجاوزات مافیا کا قلع قمع کیا جائے تاکہ تجاوزات مافیا کے زیر قبضہ چالیس ہزار ارب کی سرکاری زمینوں کو حکومت کی تحویل میں لیا جاسکے۔ لاہور کا ذکر کرنا اس لیے ضروری ہے کہ صوبائی دارالحکومت کو رول ماڈل ہونا چاہئے لیکن لاہور کی خوبصورتی کو تجاوزات مافیا کی سرپرستی کرنے والے چیف ٹریفک آفیسر ، اسسٹنٹ کمشنرز، میونسپل کارپوریشن اور ایل ڈی اے نے بدصورتی میں بدل دیا ہے۔ تجاوزات کی کمائی کھانے کیلئے پنجاب کو لاقانونیت کی بدترین تصویر بنانے والے تجاوزات مافیا اور ان کو سپورٹ کرنے والے انتظامی افسران کو جیل بھیجا جائے تاکہ قانون کا ڈر اور سٹیٹ کی رٹ بحال ہو۔

بلوچستان، پاکستان کا وہ خطہ ہے جو قدرتی وسائل، ثقافت اور حب الوطنی میں بے مثال ہے۔ بلوچ قوم نے ہمیشہ پاکستان کے ساتھ وفاداری کا ثبوت دیا ہے، چاہے وہ دفاع وطن ہو، ترقیاتی منصوبے ہوں یا قومی یکجہتی کی بات۔ لیکن بدقسمتی سے کچھ شرپسند عناصر اور بیرونی ایجنڈوں پر کام کرنے والی تنظیمیں، خصوصاً بی ایل اے (بلوچ لبریشن آرمی)، اس خطے کی خوبصورتی کو بدنام کرنے کی کوششوں میں مصروف ہیں۔بی ایل اے ایک شدت پسند تنظیم ہے جو خود کو بلوچوں کی نمائندہ ظاہر کرتی ہے، مگر درحقیقت یہ بھارتی خفیہ ایجنسی "را” اور دیگر غیر ملکی طاقتوں کی آلہ کار بن چکی ہے۔ ان کا ایجنڈا صرف اور صرف پاکستان دشمنی پر مبنی ہے۔ یہ تنظیم بلوچستان میں بدامنی، تخریب کاری اور معصوم شہریوں کے قتل جیسے جرائم میں ملوث ہے۔

بی ایل اے اور ان کے حمایتی "مسنگ پرسن” کے نام پر اداروں کے خلاف ایک منظم پروپیگنڈہ چلا رہے ہیں۔ یہ ایک پرانی چال ہے جس کا مقصد عوام کو گمراہ کرنا، ریاستی اداروں پر بداعتمادی پھیلانا اور دنیا میں پاکستان کو بدنام کرنا ہے۔ حقیقت یہ ہے کہ بہت سے نام نہاد "لاپتہ افراد” خود دہشت گرد تنظیموں کا حصہ ہوتے ہیں یا غیر ملکی خفیہ ایجنسیوں کے ساتھ رابطے میں ہوتے ہیں۔اب وقت آ چکا ہے کہ ریاست ان اندرونی اور بیرونی دشمنوں کے خلاف بھرپور اور فیصلہ کن کارروائی کرے۔ بی ایل اے جیسے عناصر اور ان کے بیرونی آقا، چاہے وہ بھارت ہو یا کوئی اور ملک، پاکستان کی سالمیت کے خلاف کھلواڑ کر رہے ہیں۔ ان کے ناپاک عزائم کو روکنے کے لیے ہر سطح پر قومی اتحاد اور مضبوط پالیسی کی ضرورت ہے۔

ملک کے اندر ہر محب وطن شہری، چاہے وہ بلوچ ہو، پنجابی، سندھی، پٹھان یا کشمیری، سب کی یہی خواہش ہے کہ پاکستان امن و ترقی کی راہ پر گامزن ہو۔ پاکستان دشمن عناصر کے خلاف ایک مضبوط اور منظم ردعمل ہی ہمیں اس منزل تک پہنچا سکتا ہے۔ بلوچستان کی ترقی، امن اور خوشحالی صرف اسی صورت ممکن ہے جب وہاں سے دہشتگرد عناصر کا مکمل صفایا کیا جائے۔بلوچ قوم پاکستان کی ایک غیرت مند اور باوقار قوم ہے۔ بی ایل اے جیسے شدت پسند گروہ اس قوم کی نمائندگی نہیں کرتے، بلکہ یہ پاکستان دشمن طاقتوں کے ہاتھوں کا کھلونا بن چکے ہیں۔ اب وقت ہے کہ ریاست اور عوام مل کر ان سازشوں کو ناکام بنائیں اور بلوچستان کو امن، خوشحالی اور ترقی کا گہوارہ بنائیں۔حکومت کو چاہیے کہ وہ بلوچستان میں امن و امان قائم کرنے کے لیے فوری اقدامات کرے۔ غیر ملکی مداخلت کو روکا جائے اور بی ایل اے جیسے دہشت گرد گروہوں کا خاتمہ کیا جائے۔بلوچ عوام کو بھی چاہیے کہ وہ ان دہشت گرد گروہوں سے دور رہیں۔ انہیں پاکستان کی ترقی اور خوشحالی کے لیے مل کر کام کرنا چاہیے۔بلوچستان پاکستان کا حصہ ہے، اور یہاں کے لوگ محب وطن پاکستانی ہیں۔ ہمیں مل کر ان عناصر کا مقابلہ کرنا ہوگا جو پاکستان کو نقصان پہنچانا چاہتے ہیں۔

نوازشریف نے 1985ء میں ترقی کے سفر کی بنیاد رکھی ،آج تک جاری ہے
پاکستان میں کئی لیڈرآئے اور گئے،قوم کو نواز شریف جیسا کوئی نہ مل سکا
ٹرمپ غیر مسلم،اللہ پر یقین پختہ،ہم مسلمان ہوکر اللہ کی جانب راغب کیوں نہیں ہوتے
تجزیہ،شہزا د قریشی

قوموں کے عروج و زوال ترقی و تنزلی میں قائدین کا اہم کرادر ہوتا ہے،قوموں کی ترقی میں قائدین کی بصیرت اور حکمت عملی کو فراموش نہیں کیا جا سکتا،جو قائدین اپنی قوم اور ملک کے لئے فکر مند ہوں وہاں یہ بھی ضروری ہے کہ قوم بھی اپنے قائدین کی قدر اور ان پر اعتماد کرے،بلاشبہ وطن عزیز میں ایسے قائدین رہے ہیں جنہیں ملک وقوم کی فکر تھی، جمہوریت کو مستحکم دیکھنا چاہتے تھے،وطن عزیز میں قانون کی حکمرانی دیکھنا چاہتے تھے، آج کی سیاست میں اقتدار ،اختیارات ،غرور وتکبر ،ہوس زر کے پیچھے بھاگتی نظر آتی ہے،ماضی میں سابق وزیراعظم میاں محمد نواز شریف نے ملک و قوم کی تعمیر وترقی میں اہم کردار ادا کیا،1985 ء سے شروع ہونے والا تعمیر وترقی کا یہ سلسلہ تین بار وزارت عظمیٰ تک جاری رہا ،نواز شریف کابطور وزیراعظم تعمیر و ترقی میں بلوچستان اور گلگت بلتستان تک جاری رہا، گلگت بلتستان کو شناخت دی ، تعمیر وترقی کے لئے بجٹ مختص کیا،بجٹ میں اضافہ کیا ، جس سے گلگت بلتستان کی عوام کی زندگیوں میں خوشحالی آئی، جب سے امریکی صدر ٹرمپ نے عالمی سطح کے فیصلے کرنا شروع کئے ہیں،دنیا میں افراتفری کا سماں ہے تاہم امریکی عوام ٹرمپ کو اپنا ہیرو سمجھتے ہیں،ٹرمپ کی زندگی کی کہانی اور ان کی جدوجہد کئی عشروں سے لوگوں کے سامنے ہے، ٹرمپ ونڈر فل سیاستدان ہونے کے ساتھ ونڈر فل کرسچین بھی ہیں ، ان کے کان کے نزدیک گولی گزری تو کہا اللہ تعالیٰ نے مجھے بچایا ،ہر فیصلے کے بعد ٹرمپ کی زبان پرGOD HELP ME ہوتا ہے،روس اور یوکرین کے درمیان معاملات طے ہونے والے ہیں بلکہ بہت ہی قریب ہیں، ایران کو امریکہ نے دھمکی ضرور دی ہے تاہم ایران کے تین یورپی ممالک کے ساتھ مذاکرات جنیوا میں جاری ہیں، اندازہ ہے کہ امریکہ اور ایران بات چیت سے اپنے مسائل حل کرلیں گے