Category: جرائم و حادثات

ڈیرہ غازی خان(باغی ٹی وی ،سٹی رپورٹر)ڈیرہ غازی خان کے ڈسٹرکٹ پولیس آفیسر (ڈی پی او) سردار صادق خان بلوچ نے حالیہ پریس کانفرنس میں سوشل میڈیا پر گردش کرنے والے من گھڑت، بے بنیاد اور گمراہ کن مواد کے حوالے سے اپنا واضح اور دوٹوک مؤقف پیش کیا۔

ڈی پی او سردار صادق خان بلوچ نے کہا کہ ان کا تعلق ایک معزز بلوچ خاندان سے ہے، جہاں خواتین کی عزت و احترام کو ہمیشہ اولین ترجیح دی گئی ہے۔ ایک حساس اور ذمہ دار سرکاری عہدے پر فائز ہونے کے ناطے ان کی بنیادی ذمہ داریاں عوامی خدمت، قانون کی بالادستی اور انصاف کی فراہمی ہیں۔

انہوں نے شدید تشویش کا اظہار کرتے ہوئے بتایا کہ سوشل میڈیا پر “عائشہ” نامی آئی ڈی سے مسلسل جھوٹ پر مبنی اور گمراہ کن ویڈیوز اپلوڈ کی جا رہی ہیں، جن کا مقصد ان کی ذاتی، خاندانی اور پیشہ ورانہ ساکھ کو نقصان پہنچانا ہے۔ ڈی پی او کے مطابق ان کے خلاف پھیلایا جانے والا تمام مواد بے بنیاد اور حقائق کے منافی ہے۔

انہوں نے وضاحت کرتے ہوئے بتایا کہ وہ جون 2023 سے جون 2024 تک اپنی دوسری اہلیہ کے ساتھ ازدواجی رشتے میں منسلک رہے، تاہم باہمی اختلافات کے باعث جون 2024 میں باقاعدہ طور پر طلاق ہو گئی۔ اس شادی سے ان کا ایک بیٹا ہے، جس کی کفالت اور پرورش وہ پوری ذمہ داری اور دیانتداری کے ساتھ کر رہے ہیں۔ انہوں نے کہا کہ ان کی شادی اور طلاق سے متعلق تمام حقائق ان کے سینئر افسران اور قریبی ساتھیوں کے علم میں پہلے ہی موجود تھے۔

ڈی پی او نے بتایا کہ اس معاملے پر قانونی راستہ اختیار کرتے ہوئے فیڈرل انویسٹی گیشن ایجنسی (ایف آئی اے) میں باضابطہ درخواست دائر کی گئی، جس پر قانون کے مطابق کارروائی عمل میں لائی گئی اور انکوائری اپنے منطقی انجام تک پہنچ چکی ہے۔ ان کے مطابق انکوائری میں ان کے خلاف عائد کیے گئے الزامات ثابت نہیں ہو سکے۔

انہوں نے مزید کہا کہ عدالتوں سے بھی رجوع کیا گیا، جہاں انصاف کے تقاضوں کے مطابق ان الزامات کو درست قرار نہیں دیا گیا۔ اس موقع پر انہوں نے قانون، عدالتی نظام اور ریاستی اداروں پر مکمل اعتماد کا اظہار کیا۔

آخر میں ڈی پی او سردار صادق خان بلوچ نے میڈیا اور عوام سے اپیل کی کہ وہ غیر مصدقہ، جھوٹی اور گمراہ کن معلومات پر یقین کرنے کے بجائے حقائق اور ذمہ دارانہ صحافت کو ترجیح دیں۔ انہوں نے کہا کہ وہ اپنی تمام تر توجہ ضلع میں امن و امان کے قیام، عوامی خدمت اور اپنی پیشہ ورانہ ذمہ داریوں کی ادائیگی پر مرکوز رکھے ہوئے ہیں۔

ڈیرہ غازیخان (نیوز رپورٹر)ڈیرہ غازی خان کے علاقے دستی پل پر 10 جنوری 2026 کو پیش آنے والے المناک ٹریفک حادثے میں ایک مسافر بس کی موٹر سائیکل اور چنگچی رکشہ سے ٹکر کے نتیجے میں تین افراد موقع پر ہی جاں بحق ہو گئے۔ حادثے کی اطلاع ریسکیو 1122 کے کنٹرول روم کو دن 11 بج کر 32 منٹ پر موصول ہوئی۔

ریسکیو ذرائع کے مطابق کراچی سے ڈیرہ غازی خان آنے والی بس کے ڈرائیور نے غلط موڑ لینے والی موٹر سائیکل کو بچانے کی کوشش میں اچانک لین تبدیل کی، جس کے باعث سامنے سے آنے والے چنگچی رکشہ سے تصادم ہو گیا، جبکہ موٹر سائیکل سوار بھی بس کی زد میں آ گئے۔

حادثے کے بعد امدادی ٹیمیں موقع پر پہنچیں اور بس کے نیچے پھنسے دو موٹر سائیکل سواروں کو نکالنے کی کوشش کی گئی، تاہم وہ جانبر نہ ہو سکے۔ اسی حادثے میں چنگچی رکشہ ڈرائیور بھی موقع پر ہی جاں بحق ہو گیا۔ تینوں لاشوں کو ضروری قانونی کارروائی کے لیے علامہ اقبال ٹیچنگ ہسپتال، ڈیرہ غازی خان منتقل کر دیا گیا، جبکہ پولیس نے واقعے کی تحقیقات شروع کر دی ہیں۔

جاں بحق ہونے والوں میں حاجی محمد نواز ولد حافظ شیر محمد، عمر 55 سال، چنگچی رکشہ ڈرائیور، سکنہ رشید آباد نزد خدا بخش چوک شامل ہیں۔
دوسرا جاں بحق شخص اللہ ڈیوایا ولد غلام یاسین، عمر 19 سال، موٹر سائیکل سوار، سکنہ لوہار والا ڈیرہ غازی خان تھا، جس کا سر کچلنے کے باعث موقع پر ہی انتقال ہو گیا۔
تیسرا جاں بحق شخص ابراہیم ولد حافظ حنیف، عمر 17 سال، موٹر سائیکل سوار، سکنہ رشید آباد نزد خدا بخش چوک تھا، جو شدید زخموں کی تاب نہ لاتے ہوئے دم توڑ گیا۔

دوسری جانب شہریوں نے ریسکیو آپریشن پر شدید تحفظات کا اظہار کیا ہے۔ شہریوں کا کہنا ہے کہ زخمیوں کو بس کے نیچے سے نکالنے کے لیے ریسکیو 1122 نے موقع پر نہ تو کرین یا ایکسیویٹر منگوایا اور نہ ہی کوئی بھاری مشینری استعمال کی گئی، جس کے باعث امدادی کارروائی مؤثر ثابت نہ ہو سکی۔ شہریوں کے مطابق صرف لفٹر کے ذریعے زخمیوں کو نکالنے کی کوشش کی گئی، جبکہ اگر بروقت کرین یا ایکسیویٹر طلب کیا جاتا تو ممکن تھا کہ کوئی قیمتی جان بچائی جا سکتی۔

شہریوں نے اعلیٰ حکام سے مطالبہ کیا ہے کہ اس واقعے میں ممکنہ غفلت کا تفصیلی جائزہ لے کر ریسکیو 1122 یا ضلعی انتظامیہ کی سطح پر ذمہ دار افراد کے خلاف شفاف تحقیقات کی جائیں اور قانون کے مطابق کارروائی عمل میں لائی جائے، تاکہ مستقبل میں ایسے حادثات کے دوران بروقت اور مؤثر امدادی کارروائی کو یقینی بنایا جا سکے۔