Category: جرائم و حادثات

ٹھٹھہ (باغی ٹی وی ،نامہ نگار بلاول سموں)کراچی کے اسٹیل ٹاؤن تھانے کی حدود میں سب انسپکٹر حبیب اللہ شاہانی کو اغوا کے بعد شدید تشدد کا نشانہ بنایا گیا۔ واقعہ اس وقت پیش آیا جب نیشنل ہائی وے سے ولی ٹاؤن کی طرف جاتے ہوئے ویگو گاڑی میں اغوا کیا گیا۔ کئی گھنٹوں تک جسمانی اذیت دینے کے بعد انہیں حب چوکی کے قریب زخمی حالت میں چھوڑ دیا گیا۔

عینی شاہدین کے مطابق سب انسپکٹر کے چہرے اور جسم پر تشدد کے واضح نشانات موجود تھے، جو اس بات کی گواہی دیتے ہیں کہ ان پر بدترین تشدد کیا گیا۔ ابتدائی اطلاعات کے مطابق اغوا کاروں میں مبینہ طور پر بااثر منشیات فروش شامل تھے جو کسی ذاتی یا پیشہ ورانہ تنازع کے باعث شاہانی سے ناراض تھے۔ اغوا کے دوران انہیں نہ صرف جسمانی اذیت دی گئی بلکہ دھمکیاں بھی دی گئیں۔

اسٹیل ٹاؤن کے ایس ایچ او محمد خان بوہر نے واقعے کے بعد کچھ مشتبہ افراد کی گرفتاری کی تصدیق کی اور کہا کہ واقعے کی مزید تحقیقات کی جا رہی ہیں۔ انہوں نے کہا کہ پولیس تمام پہلوؤں سے معاملے کی چھان بین کر رہی ہے تاکہ جلد از جلد ملزمان کو گرفتار کیا جا سکے۔

یہ واقعہ علاقے میں خوف و ہراس کا باعث بن گیا ہے اور عوامی حلقوں میں پولیس کی کارکردگی پر سوالات اٹھائے جا رہے ہیں۔ شہریوں نے مطالبہ کیا ہے کہ قانون نافذ کرنے والے ادارے فوری کارروائی کریں اور ملوث افراد کو سخت سزا دی جائے تاکہ آئندہ ایسے واقعات کی روک تھام ممکن ہو سکے۔

پولیس کا کہنا ہے کہ تمام شواہد اکٹھے کیے جا رہے ہیں اور اگر منشیات فروشوں کے ملوث ہونے کی تصدیق ہوئی تو ان کے خلاف سخت کارروائی کی جائے گی۔ واقعے نے پولیس اور جرائم پیشہ عناصر کے درمیان جاری کشمکش کو بھی نمایاں کر دیا ہے۔

کراچی (نامہ نگار بلاول سموں کی رپورٹ)میمن گوٹھ پولیس کا 27 ٹن چھالیہ اسکینڈل،3 کروڑ کی ڈیل میں اعلیٰ افسران کے ملوث ہونے کا انکشاف

تفصیلات کے مطابق کراچی میں میمن گوٹھ پولیس کے اہلکاروں کی جانب سے مبینہ طور پر 3 کروڑ روپے مالیت کی چھالیہ گٹکا ماوا مافیا کو فروخت کرنے کا انکشاف ہوا ہے۔ ذرائع کے مطابق 27 ٹن چھالیہ جو پولیس چھاپے کے دوران برآمد کیا گیا تھا، اسے منصوبہ بندی کے تحت غائب کرکے مافیا کو فروخت کیا گیا۔ اس معاملے میں ایس ایچ او میمن گوٹھ طاہر قادری، ڈی ایس پی غلام شبیر جمالی اور دیگر افسران کے ملوث ہونے کی اطلاعات سامنے آئی ہیں۔

ذرائع کے مطابق بین الصوبائی ڈیلروں نے ڈیری فارم کی آڑ میں 40 ٹن کے قریب چھالیہ چھپایاہواتھا۔ ایس ایچ او طاہر قادری کو مخبری ملی کہ واٹر پارک کے قریب ڈیری فارم میں بھاری مقدار میں چھالیہ موجود ہے۔ 15 اور 16 اکتوبر کی شب پولیس نے چھاپہ مارا اور موقع پر موجود ملزمان کو گرفتار کرکے چھالیہ برآمد کیا۔ تاہم چھاپے کے دوران 27 ٹن چھالیہ کو پولیس اہلکاروں نے پرائیویٹ گاڑیوں کے ذریعے غائب کر دیا۔

مصدقہ ذرائع کے مطابق کرائم منشی سعید بھنگر نے برآمد شدہ چھالیہ گٹکا ماوا مافیا کو فی کلو 800 روپے کے حساب سے فروخت کیا۔ ڈیل کی رقم جو تقریباً 3 کروڑ روپے بنتی ہے چار حصوں میں تقسیم کی گئی۔ ان میں ایک حصہ ڈی آئی بی انچارج پیر سبور، دوسرا حصہ ایس ایچ او طاہر قادری، تیسرا ڈی ایس پی غلام شبیر جمالی اور چوتھا حصہ پولیس پارٹی کے دیگر اہلکاروں کو دیا گیا۔

ذرائع کا کہنا ہے کہ ایس ایچ او اور دیگر افسران نے چھاپے کی کارروائی کو اصلی رنگ دینے کے لیے 13 ٹن چھالیہ برآمدگی ظاہر کرکے مقدمہ درج کیا۔ ایک ٹرک کو پولیس تھانے منتقل کیا گیا تاکہ بالا افسران کو کارروائی کا تاثر دیا جا سکے، جب کہ باقی مال خاصخیلی مارکیٹ کے عقب میں واقع ایک گودام میں منتقل کر دیا گیا۔

اندرونی ذرائع نے دعویٰ کیا ہے کہ اگر تھانہ میمن گوٹھ کے سی سی ٹی وی کیمروں کی فوٹیج کا جائزہ لیا جائے تو تمام گاڑیوں کی نقل و حرکت واضح ہو جائے گی۔ ذرائع نے مطالبہ کیا ہے کہ ایس ایس پی ملیر کاشف آفتاب عباسی اس معاملے کی شفاف تحقیقات کریں کیونکہ اس چھاپے میں بڑے پیمانے پر غبن اور اختیارات کے غلط استعمال کے شواہد موجود ہیں۔

میمن گوٹھ پولیس کی اس کارروائی نے قانون نافذ کرنے والے اداروں کی شفافیت پر سوالات اٹھا دیے ہیں۔ ذرائع کے مطابق اگر اعلیٰ سطح پر تحقیقات کی جائیں تو مزید انکشافات متوقع ہیں جو اس بات کو ثابت کریں گے کہ کس طرح سرکاری اہلکاروں نے قانون کے دائرے میں رہتے ہوئے بدعنوانی کی۔