Category: جرائم و حادثات

ڈیرہ غازی خان،باغی ٹی وی (سٹی رپورٹرجواداکبر)سیلاب کی جعلی خبریں پھیلانے والوں کے خلاف سخت کارروائی ہوگی،

ضلعی انتظامیہ ڈیرہ غازی خان نے سیلاب کے حوالے سے پھیلنے والی جعلی خبریں پر سخت پابندی عائد کرتے ہوئے عوام کو ہدایت کی ہے کہ کسی بھی قسم کی غیر مصدقہ خبر کو سوشل میڈیا یا کسی اور ذریعے سے شیئر کرنے سے پہلے ضلعی کنٹرول روم کے نمبر 0649260346 یا 0649260337 پر رابطہ کرکے اس کی تصدیق کرلیں۔

انتظامیہ کے مطابق، جعلی خبریں پھیلانے والوں کے خلاف پیمرا قوانین، سوشل میڈیا کنٹرول آرڈیننس، سائبر کرائم ایکٹ، الیکٹرونکس کنٹرول ایکٹ اور تعزیرات پاکستان کے تحت سخت کارروائی عمل میں لائی جائے گی۔

ضلعی انتظامیہ نے عوام سے اپیل کی ہے کہ وہ سیلاب کی صورتحال کے بارے میں صرف تصدیق شدہ ذرائع سے معلومات حاصل کریں اور جعلی خبریں پھیلانے سے گریز کریں۔ جعلی خبریں نہ صرف تشویش پھیلاتی ہیں بلکہ امدادی کاموں میں بھی رکاوٹ بنتی ہیں۔

دوسری جانب ضلعی انتظامیہ سیلاب سے نمٹنے کے لیے مکمل طور پر تیار ہے۔

ڈیرہ غازی خان،باغی ٹی وی (سٹی رپورٹرجواد اکبر) دریائے سندھ میں پانی کا سطح بڑھنے سے متعدد دیہاتوں میں سیلاب کی صورتحال پیدا ہو گئی ہے۔ ریسکیو 1122 کو موصول ہونے والی کال پر ریسکیو ٹیمیں فوری طور پر متاثرہ علاقوں میں پہنچ گئیں ہیں۔

ایک ایمرجنسی کال میں بتایا گیا کہ دریا کا پانی بڑھنے سے متعدد دیہاتوں کے بھانے اور ڈیرے پانی میں ڈوب گئے ہیں اور ان میں پھنسے ہوئے لوگوں اور جانوروں کو فوری امداد کی ضرورت ہے۔ ریسکیو کنٹرول روم نے فوری طور پر قریبی ایمبولینس اور ایک واٹر اینڈ سرچ ریسکیو وہیکل کو موقع پر روانہ کر دیا۔

ڈسٹرکٹ ایمرجنسی آفیسر کی ہدایت پر ایک اور ریسکیو وہیکل بھی موقع پر پہنچ گیا۔ ریسکیو سٹاف نے متاثرہ علاقوں میں پہنچ کر پانی میں پھنسے ہوئے لوگوں اور جانوروں کو نکالنے کا کام شروع کر دیا ہے۔

آن لوکیشن سٹاف کے مطابق تقریباً 3 کلومیٹر کے فاصلے پر مختلف جگہوں پر بھانے اور ڈیرے بنے ہوئے ہیں۔ ریسکیو کا عمل جاری ہے۔

ایڈیشنل کمشنر ڈیرہ غازی خان تیمور عثمان بھی موقع پر موجود ہیں اور ریسکیو آپریشن کی نگرانی کر رہے ہیں۔

ڈیرہ غازی خان(باغی ٹی وی رپورٹ) ڈیرہ غازی خان کے علاقے میں ایک شادی شدہ خاتون سے اسلحہ کے زور پر مبینہ زیادتی کا واقعہ سامنے آیا ہے۔ متاثرہ خاتون کے خاوند محمد فیاض نے تھانہ دراہمہ پولیس میں ملزم عامر منظور کے خلاف مقدمہ درج کرایا ہے۔

محمد فیاض کے مطابق، جب وہ محنت مزدوری کے لیے سرور والی منڈی میں کام کر رہا تھا تو اسے اطلاع ملی کہ علاقے کے اوباش عامر منظور نے اس کی بیوی سے اسلحہ کے زور پر زیادتی کی ہے۔ جب وہ گھر پہنچا تو اس کی بیوی نے بتایا کہ وہ کھیتی باڑی کرنے جا رہی تھی کہ اچانک عامر نے اسے اسلحہ کے زور پر اپنی بیٹھک میں لے جا کر اس کے ساتھ زیادتی کی۔

واقعے کی اطلاع ملتے ہی تھانہ دراہمہ پولیس موقع پر پہنچی اور متاثرہ خاتون کے خاوند کی مدعیت میں مقدمہ درج کر لیا۔ تاہم، تین دن گزر جانے کے باوجود پولیس ابھی تک ملزم کو گرفتار نہیں کر سکی ہے۔

محمد فیاض نے صحافیوں سے بات کرتے ہوئے کہا کہ تھانہ دراہمہ پولیس اس معاملے میں لیت و لعل کر رہی ہے۔ اس نے آر پی او سجاد حسن خان اور ڈی پی او سید علی سے اپیل کی ہے کہ وہ اس واقعے کا فوری نوٹس لے کر ملزم کو جلد از جلد گرفتار کر کے اسے قرار واقعی سزا دیں۔

یاد رہے کہ کمزور پولیسنگ کی وجہ سے حدود تھانہ دراہمہ قتل وغارت گری اور بدامنی عروج پر ہے ،شہری راتیں جاگ کر گذارنے پر مجبور ہیں .

ڈیرہ غازی خان،باغی ٹی وی (سٹی رپورٹرجواداکبر)ڈیرہ غازی خان کے علاقے میں کسانوں نے محکمہ انہار کی ملی بھگت سے پانی کی چوری کے خلاف شدید احتجاج کیا ہے۔ مظاہرین کا کہنا ہے کہ سلطان مائنر ڈسٹری پر سرعام پانی چوری کی جا رہی ہے جس کی وجہ سے کروڑوں روپے کی فصلیں تباہ ہو چکی ہیں اور رقبہ جات بنجر ہو رہے ہیں۔

تفصیلات کے مطابق درخواست جمال خان غربی نمبر 2 کے متاثرہ کسانوں نے چیف ایریگیشن آفس کے سامنے جمع ہو کر مظاہرہ کیا۔ جماعت اسلامی یوتھ کے صدر واحد بخش کورائی نے مظاہرین سے خطاب کرتے ہوئے کہا کہ سلطان مائنر ڈسٹری جو داجل کینال سے علیحدہ ہو کر زرعی رقبہ جات سیراب کرتی ہے، ہم ٹیل کے زمیندار ہیں اور گذشتہ کافی عرصے سے سلطان مائنر کے ٹاپ کے زمینداروں نے محکمہ انہار کے عملہ سے ساز باز ہو کر موگہ جات کو غیر قانونی طور پر توڑ کر کھلا کر رکھا ہے۔ مائنر کے پشتے توڑ کر سر عام پانی چوری کیا جا رہا ہے اور پیٹر پمپ بھی لگائے ہوئے ہیں جس کی وجہ سے پانی ٹیل تک نہیں پہنچ رہا ہے۔ انہوں نے کہا کہ ہماری کروڑوں روپے کی فصلیں تباہ ہو چکی ہیں اور ذمہ داروں کے خلاف قانونی کاروائی کی جائے۔

مظاہرین کا مطالبہ ہے کہ گورنمنٹ ریکارڈ کے مطابق منظور شدہ ڈسٹری سلطان مائنر کے موگہ جات بنائے جائیں۔ انہوں نے دھمکی دی ہے کہ اگر ان کے مطالبات پورے نہ ہوئے تو وہ کمشنر آفس کا گھیراؤ کریں گے۔

مظاہرین میں حاجی رحیم بخش، محمد اشفاق، فیاض احمد، محمد ظفر، حاجی اللہ بخش، محمد شملہ، ریاض احمد اور محمد قیصر شامل تھے۔