Category: بین الاقوامی

سوڈان کی حکمران عبوری فوجی کونسل ، اپوزیشن اتحاد اور مظاہرین گروپوں کے درمیان مصالحت کے لئے سرگرم حلقوں کا کہنا ہے کہ ’’عبوری فوجی کونسل، اپوزیشن جماعتوں کے اتحاد اور مظاہرین کے گروپوں کے درمیان انتخابات سے قبل کی عبوری مدت کے لئے اختیارات کی تقسیم کا ایک معاہدہ طے پا گیا ہے۔‘‘

باغی ٹی وی رپورٹ کے مطابق افریقی یونین کے ثالث محمد حسن نے جمعہ کے روز ایک نیوز کانفرنس کو بتایا کہ’’ دو دنوں سے دارلحکومت خرطوم میں مذاکرات جاری فریقین کے مذاکرات کے بعد ایک خودمختار کونسل تشکیل دینا طے پایا ہے۔ تین برس کی عبوری مدت کے لئے کونسل کی سربراہی باری باری فوج اور سویلین نمائندے کریں گے۔‘‘

انھوں نے آزاد ٹیکنوکریٹ حکومت تشکیل دینے پر بھی اتفاق کیا جو حالیہ دنوںمیں رونما ہونے والے پرتشدد واقعات کی شفاف اور آزادانہ تحقیقات کرے گی۔

فریقین نے فی الوقت قانون ساز کونسل کی تشکیل کو مؤخر کرنے پر اتفاق کیا ہے۔ اس سے پہلے دونوں فریقوں نے اتفاق کیا تھا کہ آزادی اور تبدیلی اتحاد کو قانون ساز کونسل میں دو تہائی نشتیں ملیں گی، تاہم اس پر عمل درآمد سے پہلے قانون نافذ کرنے والے سوڈانی اداروں نے تین جون کو احتجاجی دھرنے کو تتر بتر کرنے کے لئے طاقت کا اندھا دھند استعمال کیا جس میں درجنوں افراد کی ہلاکت کے بعد مذاکرات ناکام ہو گئے۔

رواں ہفتے ایتھوپیا اور افریقی یونین کے نمائندوں کی جانب مصالحت کی کوششوں کے بعد سوڈان میں مذاکرات کا سلسلہ ایک بار پھر شروع ہوا جس میں ڈیڈ لاک کے خاتمے لئے تجاویز کا مسودہ پیش کیا گیا۔

سوڈان کی فوج نے ملک گیر احتجاج کے بعد عمر البشیر کو اقتدار سے معزول کر دیا، تاہم انھوں [فوج] نے اقتدار سول انتظامیہ کے حوالے کرنے سے انکار کر دیا۔

ایران نے برطانیہ کی جانب سے جبرالٹر میں پکڑےگئے آئل ٹینکر کو غیر قانونی عمل قرار دیا ہے اور اسے فوری چھوڑنے کا بھی مطالبہ کیا ہے۔

باغی ٹی وی رپورٹ کے مطابق .میڈیا رپورٹس کے مطابق اس کارروائی پر ایران نے جمعے کے روز برطانوی سفیر کو طلب کرکے باضابطہ احتجاج کیا اور ایرانی وزارت خارجہ کے سینئر حکام نے برطانوی سفیر سے ملاقات کے دوران برطانیہ کی اس کارروائی کو ناقابل قبول قرار دیا۔

ایرانی حکام نے برطانوی سفیر سے آئل ٹینکر کو چھوڑنے کا بھی فوری مطالبہ کیا جب کہ ایرانی حکام کا کہنا ہے کہ موصول شدہ اطلاعات کے مطابق برطانیہ نے یہ کارروائی امریکا کےکہنے پر کی۔

ایران کے سینئر عسکری حکام نے واقعے پر رد عمل دیتے ہوئے کہا کہ اگر آئل ٹینکر کو فوری طور پر نہ چھوڑا گیا تو یہ تہران کا فرض ہے کہ وہ اسی طرح کرے اور برطانوی ٹینکر کو قبضے میں لے۔

یمن کے شہر تعز میں سال رواں کی پہلی شش ماہی کے دوران 63 افراد ہیضے کی وجہ سے ہلاک ہو چکے ہیں۔

باغی ٹی وی رپورٹ کے مطابق محکمہ صحت کے مطابق ، سال رواں کی پہلی شش ماہی کے دوران اب تک شہر میں 22200 افراد کو اسہال اور ہیضے کی بیماری کا سامنا کرنا پڑا ہے جس میں سے 63 افراد ہیضے کی وجہ سے ہلاک ہو چکے ہیں۔

5 سال سے سیاسی عدم استحکام کے شکار ملک یمن میں حوثی باغیوں اور سرکاری فوج کے درمیان جھڑپوں کی وجہ سے ہزاروں افراد ہلاک ہو چکے ہیں۔

دنیا کے غریب ترین ممالک میں شمار یمن میں خانی جنگی کے باعث انسانی المیہ خطرناک حد تک پہنچ چکا ہے۔

فرانس میں ایسا ہی ایک واقعہ حال ہی میں پیش آیا جس میں لوگوں نے مرغے کی بانگ سے تنگ آ کر اس کی مالکن پر مقدمہ درج کرا دیا۔ دعوے میں اس مرغ کو بھی فریق بنایا گیا ہے۔

باغی ٹی وی رپورٹ کے مطابق فرانس کے ایک دیہی علاقے سینٹ پیری ڈی اولیرون میں مورِس نامی مرغے نے راتوں رات شہرت حاصل کر لی ہے، لیکن اس کی وجہ مرغ کی زوردار بانگ ہے جو پڑوسیوں کو بھی متاثر کر رہی تھی۔

سینٹ پیری ڈی اولیرون کے ایک خاندان نے کہا ہے کہ پڑوسن کا مرغ صبح اتنی زوردار بانگ دیتا ہے کہ اس سے بعض پڑوسی شدید پریشان ہیں اور وہ بغیر توقف صبح کے ساڑھے آٹھ بجے تک بانگ دیتا رہتا ہے۔ جبکہ مرغے کی مالکن نے کہا ہے کہ یہ ایک دیہی علاقہ ہے جہاں پرندوں کی آوازیں اور مرغ کی پکار ایک عام بات ہے۔

امریکی اخبار نیویارک ٹائمز کے مطابق حال ہی میں مرغ کی مالکن کورین فیسو عدالت میں پیش ہوئیں تاہم مرغ کو عدالت میں‌ پیش نہیں‌ کیا گیا اور نہ ہی دعویٰ‌ کرنے والے جوڑے نے عدالت میں حاضری دی۔

2017 میں مرغ کی مالکن کورائن فیسیو کو ایک نوٹس ملا جس میں ’ پڑوس میں گڑبڑ پھیلانے‘ کا الزام عائد کرتے ہوئے مرغے کے ڈربے کو ہٹانے کا حکم دیا گیا تھا.

اس کے بعد مرغے کی مالکن نے اسے دیر تک دڑبے میں ہی محصور رکھا لیکن پڑوسیوں کی تسلی نہ ہوئی اور اپریل 2018 میں ایک درخواست گزار اس کے گھر آیا اور مرغ کی بانگ کے ثبوت ریکارڈ کرکے لے گیا اور چند ماہ بعد مرغ کے مالک پر ایک باقاعدہ مقدمہ دائر کردیا گیا۔

لندن میں مسلم پروفیشنل کونسل کا قیام کر دیا گیا جس میں مسلم کمیونٹی کے مسائل حل کیے جائیں گے.مسلم پروفیشنل کونسل کے چیئرمین امجد علی سید چیئرمین نامزد

باغی ٹی وی رپورٹ کے مطابق لندن میں مسلم پروفیشنل کونسل کا قیام کر دیا گیا جس میں مسلم کمیونٹی کے مسائل حل کیے جائیں گے.مسلم پروفیشنل کونسل کے چیئرمین امجد علی سید چیئرمین نامزد ہوئے ،اس موقع پر سید امجد علی نے صحافیوں سے بات کرتے ہوئے کہا کہ سیاسی وابستگی سے بالاتر ہو کر کیمونٹی کے مسائل حل کرنے کا عزم کا اظہار کیا.

علاوہ ازیں انہوں نے کہا کہ کمیونٹی اس وقت مسائل میں الجھی ھے جن کے حل کے لیے ھم سب کو یکجہتی کا مظاھرہ کرنا ھوگا. مسلم پروفیشنل کونسل میں ڈاکٹرز، وکلاء، انجینئرز، میڈیا پرسنز, تاجروں سمیت دیگر شعبوں کی سرکردہ شخصیات شامل ہیں

امریکہ کی ریاست کیلیفورنیا میں زلزلے کے شدید جھٹکے محسوس کیے گئے جس کے باعث سڑکیں، عمارتیں بری طرح متاثر ہیں جب کہ متعدد افراد زخمی ہوگئے۔

باغی ٹی وی رپورٹ کےمطابق امریکی جیولوجیکل سروے کے مطابق ریکٹر اسکیل پر زلزلے کی شدت 6 اعشاریہ 4 ریکارڈ کی گئی جس کا محور شمال مشرقی ریاست لاس اینجلس سے 240 کلو میٹر دور شہر رجکریسٹ تھا۔

زلزلے سے عمارتیں اور سڑکیں بری طرح متاثر ہوئی ہیں جس کے باعث بجلی کا نظام بھی درہم برہم ہے، زلزلے کی شدت اور اس کے بعد آنے والے آفٹر شاکس کے باعث پانی اور گیس پائپ لائنیں بھی پھٹ گئیں جس کے نتیجے میں کچھ مقامات میں آگ لگنے کی بھی اطلاعات ہیں۔

امریکی نشریاتی ادارے سی این این کے مطابق زلزلے کے بعد کم از کم 159 آفٹر شاکس محسوس کیے گئے جن کی شدت 2.5 ریکارڈ کی گئی جب کہ رجکریسٹ کے میئر پیڈی بیڈن نے شہر میں ہنگامی حالت نافذ کردی گئی ہے۔

کیلی فورنیا انسٹی ٹیوٹ آف ٹیکنالوجی میں صحافیوں سے گفتگو کرتے ہوئے ان کا کہنا تھا کہ 6.4 شدت کے زلزلے کا مرکز رجکریسٹ ٹاؤن کے نزدیک صحرائے موجاو تھا۔

انہوں نے بتایا کہ زلزلے کے بعد متعدد آفٹر شاکس بھی محسوس کیے گئے اور مزید آفٹر شاکس کی امید ہے، جن کی شدت 5 بھی ہوسکتی ہے۔

زلزلے سے زخمیوں کے حوالے سے اطلاعات تاحال موصول نہیں ہو سکیں تاہم اب تک رجکریسٹ شہر میں ایک گھر نظر آتش ہونے کی اطلاعات سامنے آئی ہیں۔

جنوبی کیلی فورنیا کے حکام کا کہنا تھا کہ ریسکیو اہلکاروں کو 24 طبی و آتشزدگی کی اطلاعات ملی ہیں، تاہم زخمیوں کا فی الوقت اندازہ نہیں۔

ملائشیاء نے کہا ہے کہ اسرائیل کا مشرقی القدس سے دیوار گریہ تک سرنگ کھولنا یک طرفہ فیصلہ ہے اور ہم اس کے مقابل آنکھیں بند نہیں کر سکتے۔

باغی ٹی وی رپورٹ کے مطابق ملائشیا کے وزیر خارجہ سیف الدین عبداللہ نے وزارت خارجہ میں ظہرانے سے خطاب میں اسرائیل کی طرف سے مقبوضہ مشرقی القدس میں مسجد اقصیٰ کے جنوبی محّلے سیلوان میں واقع دیوار گریہ تک سرنگ کھولے جانے کے خلاف ردعمل کا اظہار کیا ہے۔

سوموار کے دن، اسرائیل کی طرف سے مشرقی القدس میں بنائی گئی ،سرنگ کے افتتاح سے متعلق جاری کردہ بیانات میں سیف الدین عبداللہ نے کہا ہے کہ یہ اسرائیل کا یک طرفہ فیصلہ ہے جسے ملائشیاء کی حکومت ہرگز قبول نہیں کرتی۔ یہ اقدام فلسطینیوں کے ساتھ مشورے کے بعد کیا جانا چاہیے تھا۔

انہوں نے کہا ہے کہ اسرائیل کی اس حرکت پر ہم آنکھیں بند نہیں کر سکتے ۔ اس معاملے میں ہم پورے عزم کے ساتھ فلسطینیوں کا ساتھ دیں گے۔

سیف الدین نے اسرائیل کے علاقے میں امن مرحلے کو نقصان پہنچانے والی کاروائیوں میں مصروف ہونے پر بھی زور دیا ہے۔

واضح رہے کہ اسرائیلی حکام نے سوموار کے دن مسجد اقصی کے جنوبی محلّے سیلوان میں واقع اور یہودی عقیدے کے مطابق مقدس خیال کئے جانے والے سیلوان حوض سے مسجد اقصیٰ کی دیوار براق یعنی ‘دیوار گریہ’ تک جانے والی ایک سرنگ کا افتتاح کیا تھا۔

افتتاحی تقریب سخت حفاظتی تدابیر کے ساتھ انجام پائی اور اس میں امریکہ کے مشرق وسطیٰ کے لئے نمائندہ خصوصی جیسن گرین بلاٹ، اسرائیل کے لئے امریکہ کے سفیر ڈیوڈ فریڈمین اور کثیر تعداد میں اسرائیلی اسمبلی ممبران اور وزراء نے شرکت کی۔

مذکورہ سرنگ اسرائیلی حکومت کے شالم پروجیکٹ کا ایک حصہ ہے۔

اس پروجیکٹ کا مقصد مسجد اقصیٰ کے اطراف سمیت یہودیوں کی طرف سے شہرِ داود کے نام سے پکارے جانے والے محّلے سیلوان اور مشرقی القدس میں سیاحتی منصوبے اور آرکیالوجک کھدائیاں شروع کرنا ہے۔

یہودی مذہب کے مطابق یہ دیوار مقدس معبد کی باقیات میں سے ہے اور اسی لیے یہودیت کے مقدس مقامات میں سے ایک ہے۔ یہ یہودیوں کے لیے زیارت گاہ ہے۔ اس کے قریب ہی یہودیوں کا مقدس ترین کنیسہ ہے، جس کو بنیادی پتھر کہا جاتا ہے۔ زیادہ تر یہودی ربیوں کے مطابق اس مقدس پتھر کے اوپر، کوئی یہودی پیر نہیں رکھ سکتا اور جو ایسا کرتا ہے، عذاب میں مبتلا ہوجاتا ہے بہت سے یہودیوں کے مطابق وہ تاریخی چٹان جس پر قبۃ الصخرۃ واقع ہے، مقدس بنیادی پتھر ہے۔ جبکہ کچھ یہودیوں کے عقیدے کے مطابق یہ مقدس بنیادی پتھر دیوارِ گریہ کے بالکل مخالف سمت میں واقع الکاس آبشار کے نزدیک ہے۔ یہ مقام مقدس ترین مقام تھا، جب مقدس معبد قائم تھا۔ یہودی روایات کے مطابق دیوارِ گریہ کی تعمیر داؤد نے کی تھی اور موجودہ دیوارِ گریہ اُسی دیوار کی بنیادوں پر قائم کی گئی تھی، جس کی تاریخ ہیکلِ سلیمانی سے جاملتی ہے

مصر کی ایک مقامی عدالت نے گلوکارہ سمیت 20 ملزمان کو انسانی تجارت کے جرم میں تین، تین سال قید کی سزا کا حکم دیا ہے۔ ملزمان پر انسانی تجارت کے لیے بین الاقوامی نیٹ ورک قائم کرنے کا بھی الزام عاید کیا گیا ہے۔

باغی ٹی وی رپورٹ کےمطابق مصر العجوزہ کے علاقے میں انسداد جرائم کی عدالت نے گلوکارہ شیما الحاج سمیت دیگر 20 ملزمان کو تین تین سال قید کی سزا سنائی ہے۔

گذشتہ برس 6 دسمبر کو مصری پولیس نے انسانی تجارت اور اسمگلنگ میں ملوث ایک عالمی نیٹ ورک کا پتا چلانے کا دعویٰ‌ کیا تھا۔ اس میں مصری باشندوں‌اور متعدد غیر ملکیوں سمیت 20 افراد شامل تھے۔ ملزمان میں شیما الحاج نامی ایک گلوکارہ بھی شامل تھی جو اس سے قبل فحش مناظر پر مبنی گانے ریکارڈ کرانے کی وجہ سے بھی عوامی تنقید کی زد میں تھی۔

مصری حکام کا کہنا ہے کہ انسانی تجارت میں ملوث گروپ خواتین کو بلیک میل کرکے انہیں غیر مہذب سرگرمیوں میں حصہ لینے، ہیروئن، کریسٹل اور ٹراما ڈول جیسی اشیاء بھارت اور ترکی سے ملک میں لانے اور خواتین اور نوجوانوں کو اسمگلنگ کی سرگرمیوں میں شامل کرنے میں ملوث بتایا جاتا ہے۔

مصر کے اسٹیٹ کنٹرولر نے پہلے اس کیس کی خفیہ طو پر تحقیقات کیں۔ ان تحقیقات میں ملزمان کے خلاف عاید الزامات درست ثابت ہوئے۔ اس دوران ملزمان کے گھروں، دفاتر اور ان کی آمد ورفت کے اہم مقامات کی تلاشی لی گئی۔ پولیس نے المہندسین کے علاقے میں ایک کیفے پر چھاپہ مار کر ملزمان کو گرفتارکیا تھا۔