کوہ سلیمان سیلاب ،راجن پورڈوبنے کاخطرہ، شہریوں کومحفوظ مقام پرمنتقل ہونے کاحکم۔
بین الصوبائی شاہراہیں بند، 72 گھنٹے کی مسلسل بارش اور لینڈ سلائیڈنگ سے ایک مرتبہ پھر قومی شاہراہ N-70 راکھی گاج کے مقام پر مکمل بند،سینکڑوں گاڑیاں مسافر پھنس گئے
باغی ٹی وی رپورٹ ۔راجن پور کی ضلعی انتظامیہ کی طرف اعلانات کئے جارہے ہیں کہ رودکوہی درہ چھاچھڑاورکاہاسلطان کاسیلابی ریلاکسی بھی وقت راجن پورشہرمیں مغربی طرف سے کسی بھی وقت داخل ہوسکتاہے ،جس کی وجہ راجن پورشہرکوشدیدخطرہ ہے اس لئے شہری فوراََمحفوظ مقامات پرمنتقل ہوجائیں،راجن پور مساجد میں اعلانات شروع، شہر خالی کرنے کا حکم شہری محفوظ مقامات پر منتقل ہونے لگے ،
<
ڈیری غازی خان جام پور، فاضل پور اور راجنپور سمیت ملک بھر میں بارشیں اور سیلابی ریلوں کی تباہ کاریاں جاری،متاثرین بے یارومددگار کھلے آسمان تلے زندگی گزارنے پر مجبور،ڈیرہ غازی خان کوہ سلیمان فورٹ منرو میں 72 گھنٹے کی مسلسل بارش اور لینڈ سلائیڈنگ سے ایک مرتبہ پھر قومی شاہراہ N-70 راکھی گاج کے مقام پر مکمل بند،سینکڑوں گاڑیاں مسافر پھنس گئے۔اس وقت کوہ سلیمان کی تقریبا تمام رودکوہیوں میں پانی کی آمد کا سلسلہ شروع ہو چکا ہے باٹھی رود کوہی کا پانی اس وقت جھوک بودو کراس کر رہا ہے اور لتڑا رودکوہی کا پانی لعلانی کراس کر رہا ہے ،شمتالہ سے بھی پانی آ رہا ہے جو باٹھی رودکوہی میں شامل ہو گامٹھوان لہڑ کا پانی بھی پہلے سے زیادہ بتایا جا رہا ہے اور کنوہاں رودکوہی اس وقت کوہر کراس کر رہی ہے،درہ وڈور سے بہت بڑا سیلابی ریلا اس وقت موضع بیلہ سے گزر رہا ہے
گدپور، لوہار والا، پائگاہ، معموری،چوٹی سیفن کے نزدیکی آبادیاں اور ٹریکٹر فیکٹری ایریا کے نشیبی علاقے سیلاب کی زدمیں آسکتے ہیں،سخی سرور کوہ سلمان کے پہاڑی علاقوں میں بارشوں کا نہ تھمنے والا سلسلہ تا حال جاری ہے سخی سرور ندی سے سیلابی ریلہ گزر رہا ہے، تھانہ سخی سرور پولیس اور بارڈر ملٹری پولیس تھانہ سخی سرور کی طرف سے سیلابی ریلے ندی میں نہانے پر پابندی عائد کر دی گئی ہے ایس ایچ اوز کی جانب سے اہلکار تعینات کر دئیے گئے ہیں جبکہ کچھ پوائنٹ پر خار دار تاریں بھی لگا دی گئی ہیں۔
Category: موسمیات
کوہ سلیمان سیلاب ،راجن پور ڈوبنے کا خطرہ، شہریوں کومحفوظ مقام پرمنتقل ہونے کاحکم۔
ڈیرہ ریجن میں سیلاب زدہ علاقوں میں ایمر جنسی نافذ ،آر پی او کے حکم پرپولیس کی تمام ٹرانسپورٹ زیر استعمال، پولیس بسیں فراہم .
ڈیرہ ریجن میں سیلاب زدہ علاقوں میں ایمر جنسی نافذ ،پولیس کی تمام ٹرانسپورٹ زیر استعمال، پولیس بسیں فراہم ، آر پی او کی حکم پر ریزروہائے سمیت پولیس کی اضافی نفری تعینات،آر پی او محمد سلیم کا سیلاب زدہ علاقوں کا دورہ،پولیٹیکل اسسٹنٹ کوہ سلیمان محمد اکرام ملک کا قبائلی علاقوں کے سیلابی علاقوں کا دورہ،بی ایم پی اور پولیس کے جوان رات بھر سے سیلابی پانی میں پھنسے لوگوں کو محفوظ مقامات پر منتقل کرنے میں مصروف۔
باغی ٹی وی رپورٹ۔ریجنل پولیس آفیسر ڈیرہ غازی خان محمد سلیم نے ڈیرہ غازی خان کے سیلاب زدہ علاقوں کا دورہ کیا ۔آر پی او نے پولیس کی جانب سے کی جانے والی امدادی سرگرمیوں اور لوگوں کے جان و مال کے تحفظ کے لیے کیے گئے اقدامات کا جائزہ لیا ۔ایس پی انویسٹی گیشن ڈیرہ غازی خان غیور احمد نے سیلاب متاثرین کے لیے کی جانے والی امدادی سرگرمیوں اورمتاثرہ علاقو ں سے لوگوں کے انخلا کے لیے کیے گئے اقدامات سے آگاہ کیا ۔
آر پی او نے شدید بارشوں سے سیلاب کے با عث چاروں اضلاع میں ایمر جنسی نافذ کرنے کے احکامات جاری کرتے ہوئے ضلعی پولیس افسران کو ہنگامی بنیادوں پر اقدامات کرنے کی ہدایات جاری کردیں ۔سیلاب سے متاثرہ علاقوں کے دورہ کے دوران آر پی او نے حفاظتی بندوں کا معائنہ کر کے پولیس کو حفاظتی بندوں کی نگرانی اور حفاظت کو یقینی بنانے کی ہدایت کی اور حکم جاری کیا کہ غیر قانونی اقدامات کرنے والوں کے خلاف سخت کارروائی عمل میں لائی جائے ۔آر پی او نے سیلاب زدہ علاقوں میں سیلاب متاثرین کیلئے قائم ریلیف کیمپس کا دورہ کر کے متاثرین کو فراہم کردہ سہولیات اور سیکیورٹی اقداما ت کا جائزہ لیا ۔ دورہ کے دوران آر پی او نے سیلاب متاثرین سے گفتگو کر کے انکے مسائل سنے اور انہیں مسائل کے مکمل حل اور ریلیف کی فراہمی کی یقین دہائی کرائی۔ آر پی او کے احکامات کی روشنی میں ریجن بھر کے سیلاب سے متاثرہ علاقوں میں پولیس کی امدادی و ریلیف کی کارروائیاں جاری ہیں ۔ پولیس ٹیمیں رات بھر سے سیلابی پانی میں گھرے لوگوں کو محفوظ مقامات پر منتقل کرنے میں مصروف ہیں جبکہ آر پی او کے حکم سے متاثرہ علاقوں سے لوگوں اور ان کی املاک کی منتقلی کے لیے پولیس کی تمام ٹرانسپورٹ استعمال کی جا رہی ہے ۔
لوگوں کی منتقلی ایس ایچ اوز کی گا ڑیوں میں بھی جاری ہے اور اس کے علاوہ ٹرانسپورٹ کے لیے پولیس بسیں بھی فراہم کی گئی ہیں ۔امدادی سر گرمیوں میں تیزی لانے کیلئے پولیس کی تمام ریزرو ہائے اور اضافی نفری متاثرہ علاقوں میں تعینات کر دی گئی ہیں ۔پولیس انتظامیہ ،ریسکیو اور دیگر اداروں کے ہمراہ فرنٹ لائن پر امدادی سرگرمیوں کے ساتھ ساتھ شگافوں کو پر کرنے اور شاہراہوں اور راستوں کی بحالی کر رہی ہے۔
اس کے علاوہ متاثرین کی فوری مدد اور جان ومال کے تحفظ کیلئے تمام تھانہ جات اورسرکل دفاتر میں قائم ریلیف کیمپس میں متاثرین کو منتقل کرنے کا سلسلہ بھی جاری ہے ۔دوسری طرف پولیٹیکل اسسٹنٹ کوہ سلیمان محمد اکرام ملک قبائلی لوگوں کو محفوظ مقامات پر منتقل اور امداد کی فراہمی کے لیے متحرک ہوگئے ہیں،پولیٹیکل اسسٹنٹ کوہ سلیمان محمد اکرام ملک نے قبائلی علاقوں کے سیلابی علاقوں کا دورہ کیا،
بارڈر ملٹری پولیس کے تمام تھانے، سکولز مراکز صحت قبائلی لوگوں کے لیے کھول دیا ہے، قبائلی علاقوں میں راستے نہ ہونے پر اونٹوں کے ذریعے امدادی سامان کی فراہمی یقینی بنائی جا رہی ہے۔ پولیٹیکل اسسٹنٹ کوہ سلیمان محمد اکرام ملک نے کہا بارڈر ملٹری پولیس قبائلی لوگوں کو تنہا نہیں چھوڑے گی۔
وزیراعلیٰ پرویز الٰہی کا سیلاب سے متاثرہ علاقوں کا دورہ ، سیلاب سے متاثرہ تمام علاقے آفت زدہ قرار
وزیراعلیٰ پرویز الٰہی کا سیلاب سے متاثرہ علاقوں کا دورہ ، سیلاب سے متاثرہ تمام علاقے آفت زدہ قرار
باغی ٹی وی رپورٹ – ڈیرہ غازیخان وزیراعلیٰ پنجاب چودھری پرویز الٰہی نے آج جنوبی پنجاب کے سیلاب متاثرہ علاقوں راجن پور او رڈی جی خان کا دورہ کیا-وزیر اعلیٰ چودھری پرویزالٰہی نے سیلاب او ربارشوں جاں بحق ہونے والے افراد کے لواحقین میں 8،8لاکھ روپے کی مالی امداد کے چیک تقسیم کئے۔وزیراعلیٰ چودھری پرویز الہٰی نے امدادی سرگرمیوں کا جائزہ لیااور متعلقہ حکام کو سیلاب متاثرین کی ہرممکن مدد کی ہدایت کی-وزیراعلیٰ چودھری پرویز الہٰی نے سیلاب اور بارشوں سے جاں بحق ہونے والے افراد کے ایصال ثواب کے لئے فاتحہ خوانی بھی کی-وزیراعلیٰ چودھری پرویز الہٰی نے سیلاب سے متاثرہ تمام علاقوں کو آفت زدہ قرار دینے کا اعلان کیا-
وزیراعلیٰ چودھری پرویز الہٰی نے رود کوہیوں کے راستوں کو چینلائزڈ کرنے کا اعلان بھی کیا۔وزیراعلیٰ چودھری پرویز الہٰی راجن پور کے سیلاب سے ملنے کے بعد ڈیرہ غازیخان کی تحصیل تونسہ میں سیلاب سے متاثرہ علاقے بستی چھٹانی کا دورہ کیا اور سیلاب متاثرین سے ملاقات کی- وزیراعلی چودھری پرویز الٰہی نے سیلاب متاثرین سے ہمدردی کا اظہار کیااور ان کی دلجوئی کی۔وزیراعلیٰ چودھری پرویز الہٰی نے میڈیا سے گفتگو کرتے ہوئے کہاکہ کسی بھی سیلاب زدہ کی حق تلفی نہیں ہونے دینگے۔ فصل اور گھروں کے نقصانات کا جلد ازالہ کریں گے۔ میں نے آج راجن پور او رڈیرہ غازی خان کے سیلاب سے متاثرہ تمام علاقوں کا جائزہ لیا ہے۔انہوں نے کہاکہ شارٹ ٹرم اور لانگ ٹرم کی منصوبہ بندی کیلئے پی ڈی ایم اے اور دیگر محکمے فوری کام شروع کریں گے-
2004 میں جب سیلاب آیاتو اس وقت خواجہ صاحب مجھے یہاں لے کے آئے،میں نے اس وقت رودکوہیوں کے راستوں کو چینلائزڈ کرنے کا منصوبہ بنایا اور اس مقصد کے لئے اڑھائی ارب رکھے گئے-اس وقت ڈالر60روپے کا تھا لیکن شہباز شریف نے آکر کوئی کام نہیں کیااور15سال ضائع کئے،جس سے پراجیکٹ کی لاگت میں بے پناہ اضافہ ہوا،شہبازشریف صرف باتیں کرتے رہے، غریبوں کیلئے کچھ نہیں کیا۔وزیراعلیٰ چودھری پرویز الہٰی نے کہاکہ ہم بغیر کسی سیاسی وابستگی سیلاب متاثرین کی خدمت کریں گے اورلوگوں کے دل جیتیں گے اور سروے کے عمل کو شفاف بنایا جائے گا۔انہوں نے کہاکہ یہاں پر جتنے بھی ایم این ایز اور ایم پی ایز ہیں،یہ میرے ساتھی ہیں اورسیلاب متاثرہ علاقوں میں یہ مصیبت میں گھرے بہن بھائیوں کی مدد میں پیش پیش ہیں۔وزیراعلیٰ چودھری پرویز الہٰی نے مختص 20 ارب روپے سے متاثرہ علاقوں میں فوری کام شروع کرنے کا حکم دیا۔ انہوں نے کہاکہ شادن لنڈ فوڈ سنٹر اور گندم زیر آب والے واقعہ کی تحقیقات کرائی جائے گی۔اراکین اسمبلی سردار محمد خان لغاری،خواجہ شیراز محمود، محمد حنیف پتافی،خواجہ داؤد سلیمانی، سردار سیف الدین خان کھوسہ،جاوید اختر لنڈ، سردار محی الدین خان کھوسہ، سردار محمد سیف الدین خان کھوسہ،کمشنر ڈیرہ غازی خان اور متعلقہ حکام بھی اس موقع پر موجود تھے۔ڈیرہ غازی خان ۔ ڈپٹی کمشنر محمد انور بریار سیلاب زدگان سے بات کرتے ہوئے آبدیدہ ہو گئے
ڈیرہ غازی خان ۔ ڈپٹی کمشنر محمد انور بریار سیلاب زدگان سے بات کرتے ہوئے آبدیدہ ہو گئے ،انہوں نے کہا کہ ہم ہرممکن کوشش کررہے ہیں کہ آپ کے نقصان اور مشکلات کا ازالہ کرسکیں ،آپ کی فصلات اور مکانات کے نقصان کاجائزہ لے رہے ہیں وہ بھی ہم آپ کو دیں گے لیکن جن کے پیارے جن میں کسی کی بہن فوت ہوئی کسی کابیٹا،بھائی ،باپ یا خاوند دنیاکی کوئی طاقت انہیں واپس نہیں لاسکتی ،ان کیلئے ہم سب دعاکرسکتے ہیں ،یہ الفاظ کہتے ہوئے دکھ سے ڈی سی ڈیرہ غازیخان محمد انور بریارکی آوازبھراگئی،ڈیرہ غازیخان سے باغی ٹی وی کی رپورٹ ڈپٹی کمشنر ڈیرہ نے کیا کہا
ڈیرہ ۔کوہ سلیمان، سیلاب سے ہونے والے نقصان کے سرکاری اعداد وشمارجاری
ڈیرہ۔کوہ سلیمان سیلاب سے ہونے والے نقصان کے سرکاری اعداد وشمارجاری،50 ہزار ایکڑ رقبہ پر کھڑی فصلیں تباہ ،150مواضعات کی تین سو کے قریب بستیاں متاثر، سینکڑوں مال مویشی ہلاک،سیلابی پانی سے 10 افراد جاں بحق جن میں چار بچے دو خواتین بھی شامل ہیں جبکہ ذرائع کاکہنا ہے کہ اموات اس سے کہیں زیادہ ہیں۔وزیراعلی پنجاب چودھری پرویز الہی کی راجن پور، روجھان اور تونسہ میں سیلاب متاثرین کیلئے امدادی سرگرمیاں مزید تیز کرنے کی ہدایت۔
باغی ٹی وی رپورٹ۔ ڈیرہ غازی خان میں کوہ سلیمان کی رود کوہیوں کے سیلاب کی اب تک کی رپورٹ کے مطابق کوہ سلیمان کے پہاڑی سلسلے میں معمول سے زیادہ بارشوں کی وجہ سے پہاڑی ندی نالوں میں شدید طغیانی آئی ہے ۔25جولائی سے اب تک 400فیصدزیادہ بارش ہوچکی ہے رود کوہی سنگھڑ ،تونسہ، درہ ٹرائیبل ایریا ، مٹھاون، وڈور ، سخی سرور، رونگھن، سوڑا ٹرائبل ایریا(ڈیرہ غازی خان)کاہا سلطان راجن پور و دیگر ندی نالوں میں شدید طغیانی آئی ہے۔پہاڑی ندی نالوں کے پانی نے ڈیرہ غازیخان کی تحصیل تونسہ کی یونین کونسل وہوا ، احمدانی، سوکڑ، منگڑوٹھہ اور تحصیل ڈیرہ غازیخان کی یونین کونسل شادن لنڈ ،کالا، چھابری زیریں ، وڈور ، پائیگاں،لوہار والا،چٹ سرکانی، گدائی غربی اور تحصیل کوٹ چھٹہ کی یونین کونسل درخواست جمال خان جنوبی ،شمالی پہاڑی ندی نالوں کے پانی متاثر ہوئیں ۔ ڈپٹی کمشنر آفس سے فراہم کی گئیں سرکاری معلومات کے مطابق ڈیرہ غازی خان کی ایک لاکھ ایکڑ اراضی زیر آب آچکی ہے ۔
شدید طغیانی کی وجہ سے ڈیرہ غازی خان کے 150مواضعات کی تین سو کے قریب بستیاں متاثر ہوئی ہیں۔ ایمرجنسی سروس ریسکیو 1122 کے مطابق سیلابی پانی سے 10 افراد جاں بحق ہوئے ہیں جن میں چار بچے دو خواتین بھی شامل ہیں جبکہ ذرائع کاکہنا ہے کہ اموات اس سے کہیں زیادہ ہیں،سینکڑوں کی تعداد میں مال مویشی بھی ہلاک ہوئے ہیں۔ ابتدائی رپورٹ کے مطابق ایک لاکھ ایکڑ رقبہ سیلابی پانی سے زیر آب آگیا جبکہ 50 ہزار ایکڑ رقبہ پر کھڑی فصلیں تباہ ہونے کا اندیشہ ہے۔ سرکاری جاری کئے گئے اعداد و شمار کے مطابق ڈسٹرکٹ ڈیرہ غازی خان کی ایک لاکھ آبادی متاثر ہوئی جبکہ مقامی ذرائع سے اکٹھی کی گئی معلومات کے مطابق سرکاری اعداد وشمار سے بہت زیادہ آبادی رود کوہی سیلاب سے متاثر ہوئی ہے۔
ضلع ڈیرہ غازی خان کی تحصیل تونسہ ، کوٹ چھٹہ اور ڈیرہ غازی خان میںپانچ ہزار کے قریب گھروںکو نقصان پہنچنے کی اطلاعات ہیں ان میں کچے مکانات 90 فیصد ہیں جو مکمل طورتباہ ہوچکے جو اب رہائش کے قابل نہیں رہے جبکہ مکانات سے متعلق سرکاری طور پر اعداد و شمار دستیاب نہیں ہیں ۔ ڈپٹی کمشنر محمد عثمان انور بریار کے مطابق متاثرین کیلئے 14ریلیف کیمپس قائم کئے گئے ہیں، رودکوہیوں کے متاثرہ علاقوں میں اب تک 500خیمے پہنچائے گئے ہیں جبکہ مزید 500خیمے بھی بھجوا دیئے گئے ہیں ۔انہوں نے بتایا ہے کہ متاثرین میں اب تک 400 ٹینٹ،500چٹائیاں،200مچھر دانیاں بھی تقسیم کی جاچکی ہیں۔
ریسکیو 1122 کے مطابق اب تک متاثرہ علاقوں میں 1500سیلاب زدگان کو ریسکیو کیا گیاہے۔دوسری طرف وزیراعلی پنجاب چودھری پرویز الہی نے راجن پور، روجھان اور تونسہ میں سیلاب متاثرین کیلئے امدادی سرگرمیاں مزید تیز کرنے کی ہدایت جاری کی ہے انہوں نے کہاکہ سیلاب متاثرین کو ریلیف کی فراہمی میں کوئی کسر اٹھا نہ رکھی جائے،متاثرہ افراد کے کھانے پینے اور دیگر ضروریات کا مکمل خیال رکھا جائے،متاثرہ دیہات میں امدادی کیمپوں میں تمام ضروری اشیا وافر تعداد میں موجود ہونی چاہئیں،وزیرااعلیٰ چوہدری پرویزالٰہی نے مزیدکہاکہ متاثرہ علاقوں میں میڈیکل کیمپس لگائیں ،آفیسران اور متعلقہ ادارے متاثرہ علاقوں میں امدادی سرگرمیوں کیلئے کمربستہ ہو جائیں،انہوں نے کہا کہ متاثرہونے والے دیہات کے لوگوں کو تنہا نہیں چھوڑیں گے،متاثرہ افراد کو ریلیف کی فراہمی اولین ترجیح ہے۔
ڈیرہ : بستی عطا محمد تالپور میں مسلسل بارش سے فلڈ کا سماں،بارش کے پانی سے گھر،فصلات متاثر،کئی گھراورچاردیواریاں زمین بوس
ڈیرہ : بستی عطا محمدتالپورمیں مسلسل بارش سے فلڈ کاسماں،بارش کے پانی سے گھر،فصلات متاثر،کئی گھراورچاردیواریاں زمین بوس،سرکاری سطح پر کوئی اقدام نہیں کئے جارہے لوگ اپنی مددآپ کے تحت پانی نکا لنے کی کوشش میں مصروف،اہل علاقہ سراپا احتجاج۔
باغی ٹی وی رپورٹ۔ ڈیرہ غازیخان کی تحصیل کوٹ چھٹہ کے علاقہ بستی عطا محمدتالپورمیں تین دن سے ہونیوالی باران رحمت لوگوں کیلئے زحمت بن گئی ہے،بارش کے پانی نے سیلابی ریلے کی شکل اختیارکرلی اورپانی کی سطح اس وقت چھ سے سات فٹ ریکارڈ کی جارہی ہے جوانتہائی خطرناک ہے بستی عطا محمدخان تالپورشدیدمتاثرہوچکی ہے اورپانی گھروں میں داخل ہوچکاہےعلاقہ مکینوں کاکہناہے کہ ضلعی وتحصیل انتظامیہ کی مکمل چشم پوشی سے غریب عوام کا لاکھوں روپے کا نقصان ہو رہا ہے جن کے گھر فصلات سب کچھ ڈوب گیا ہے مال مویشی اب روڈپرنکالناشروع کردیاگیاہے مگرسرکاری مشینری صرف دفتروں تک محدودہے ، ایسی مشینری سے بہترہے کہ حکومت اتنی بڑی رقم کسی ایسی جگہ خرچ کرلے جہاں کم از کم عوام کو فائدہ ہو۔ایسے میں لوگ شدیدپریشانی کے عالم میں ہیں بارشی پانی نے علاقہ کوچاروں طرف سے گھیررکھاہے اور اوپر سے بارش مزیدبرس رہی ہے جوزیادہ خطرناک ثابت ہورہی ہے اس لیے حکومت پاکستان کو چاہئے کہ فوری طور پر پانی کی نکاسی کیلئے بستی عطا محمدتالپورمیںاقدامات کرے اورلوگوں کے گھروں اورفصلات کومزیدتباہ ہونے سے بچایا جاسکے۔
کوہ سلیمان اور میدانی علاقوں میں مزید بارش، جاں بحق افراد کی تعداد ایک درجن سے زائد ہوگئی
ڈیرہ غازی خان کوہ سلیمان اور میدانی علاقوں میں مزید بارش، جاں بحق افراد کی تعداد ایک درجن سے تجاوزکرگئی ہے ،سینکڑوں جانورہلاک،کئی ہزار ایکڑ اراضی پر کھڑی فصلات مکمل تباہ ، 30ہزارسے لوگ بے گھرہوگئے ہیں۔
باغی ٹی وی رپورٹ۔ڈیرہ غازیخان میں رات گئے کوہ سلیمان میں بارش مقامی ذرائع کے مطابق زندہ پیر سوری لنڈ ندی میں ایک بار پھر طغیانی آگئی ،اب تک سوری لنڈ رود کوہی سیلابی ریلے سے درجن سے افراد جاںبحق ہوچکے ہیں جبکہ سینکڑوں جانورہلاک اور کئی ہزار ایکڑ اراضی پر کھڑی فصلات مکمل تباہ ہوگئیں، 30ہزارسے لوگ بے گھر، خیموں ،خوراک اور ادویات کی قلت ،حکومتی اقدامات ناکافی ہیں.
،ریسکیو1122کے علاوہ باقی تمام محکموں آفیسران فوٹو شوٹ میں مصروف دکھائی دیتے ہیںاور مصیبت کی اس گھڑی میں متاثرین آسمان کی طرف ہاتھ اورجھولیاں اٹھائے ہوئے ہیں،تازہ آنے والی بارش سے تونسہ شریف میں بیچھرہ گیپ میں ایک بار پھر پانی آ گیا جس کے باعث راستہ پھر سے بند ہو گیا ہے،تونسہ کی بستی غلامانی موضع پڑدان غربی کوٹ کھوئی بند کے ٹوٹنے سے سے مویشی پانی لے گیا اور مکانات گر گئے ہیں ، بستی احمدانی، پل قمبر ، مکول کلاں، چوکیوالا ، بودو ،مناں ،کوٹلہ میرانی ،بستی حبیب،بیٹ اشرف، جڑھ لغاری اور درجنوں علاقے سیلاب کی زد میں آ چکے ہیں،سیلابی ریلے سے ایک ہی خاندان کے مزید تین افراد جان کی بازی ہار گئے ہیں جبکہ اسی گھر کے تین افراد ابھی تک لاپتہ ہیں ، جاں بحق افراد کی تعداد ایک درجن سے تجاوزکرچکی ہے۔تونسہ شریف میںبستی مندرانی کے ساتھ سنگھڑ بند ٹوٹنے کا خدشہ ہے جس سے سوکڑ، بغلانی اورکھیوے والی کی آبادی کو شدید خطرہ لاحق ہوچکا ہے جبکہ انتظامیہ نے اس بند کوبچانے کیلئے کوئی عملی اقدامات نہیں کئے ۔
اس وقت تحصیل ڈیرہ غازیخان کے علاقے یارو کھوسہ ،وڈور،لوہار والا سیلابی پانی میں ڈوبے ہوئے ہیں ،ڈیرہ غازیخان کی تحصیل کوٹ چھٹہ کے علاقہ چو ٹی زیرین میں واقع سیم نالہ کپر ڈرین بستی قاضی والہ پرسیلابی ریلے میں11سالہ لڑکا الیاس صادق ولد صادق حسین برمانی بستی دورٹہ کا رہائشی پانی میں گر گیاجسے ریسکیو1122 نے بے ہوشی کی حالت میں تلاش کر لیا ہے لیکن وہ جانبرنہ ہوسکا۔اسی طرح بستی تالپور ودیگرعلاقے پانی میں ڈوبے ہوئے ہیں ،مقامی لوگوں کاکہنا ہے کہ آفیسران پکے روڈوں پر گشت کررہے ہیں لیکن عملی طور کوئی خاطرخواہ ریلیف یاامدادی سرگرمی دیکھے کونہیں ملی۔
دوسری طرف وزیر اعلیٰ پنجاب چوہدری پرویز الٰہی کی ہدایت پر ڈی جی خان ڈویژن کے سیلاب زدہ علاقوں میں امدادی کارروائیاں جاری ہیں۔سیلاب زدہ علاقوں کی سرکاری عمارتیں فلڈ ریلیف کیمپس میں تبدیل کردی گئیں۔کمشنر عثمان انور نے سیلاب زدہ علاقوں کے دورے کئے اور ڈی جی خان اور راجنپور میں رود کوہیوں کے سیلاب کے نقصانات کا جائزہ لیا۔کمشنر محمد عثمان انور نے کہا کہ سیلاب زدہ علاقوں میں بروقت انتظامی مشینری متحرک کی۔انتظامیہ اور امدادی ٹیمیں 24 گھنٹے سیلاب زدہ علاقوں میں موجود رہیں۔پی ڈی ایم اے ،پولیس اور دیگر محکموں کی مکمل سپورٹ رہی۔
بروقت اقدامات سے کم سے کم نقصان رپورٹ ہوا۔ڈی جی خان اور راجنپور میں رود کوہیوں کے سیلاب کا اب کوئی مسئلہ نہیں۔کمشنر عثمان انور نے کہا کہ سیلاب زدگان امدادی کارروائیوں سے مطمئن ہیں۔تخمینہ شروع کردیا ہے،نقصانات کا ازالہ کرایا جائے گا۔کمشنر عثمان انور نے کہا کہ رود کوہیوں کے سیلاب زدہ علاقوں سے ریسکیو آپریشن مکمل کرلیا گیا ہے۔فلڈ ریلیف کیمپس میں میڈیکل اور وٹرنری کیمپس بھی فعال ہیں۔انسانوں کے علاج معالجہ اور مویشیوں کی ویکسی نیشن کی جارہی ہے۔علاوہ ازیں کمشنر عثمان انور نے رات گئے پل قمبر کے نزدیک فلڈ ریلیف کیمپس کا دورہ کیا اور سہولیات کا جائزہ لیا۔
فلڈ ریلیف کیمپس میں مقیم سیلاب زدگان سے معلومات لیں۔اسسٹنٹ کمشنر تونسہ محمد اسد چانڈیہ اور دیگر نے بریفنگ دی۔کمشنر نے کہا کہ مصیبت میں گھرے سیلاب زدگان کی ہرممکن معاونت کی جائے۔فلڈ ریلیف کیمپس میں سہولیات کا خیال رکھا جائے۔فلڈ ریلیف کیمپس میں مقیم سیلاب زدگان کو معیاری کھانا دیا جائے۔فلڈ ریلیف کیمپس کے نزدیک میڈیکل،وٹرنری کیمپ یقینی بنائے جائیں۔فلڈ ریلیف کیمپس میں مقیم خاندانوں کی سکیورٹی بھی بہتر ہونی چائیے۔
کوہ سلیمان برساتی نالوں نے تباہی مچادی ، انڈس ہائی وے پانی میں بہہ گئی،3جاں بحق،متعدد زخمی ولاپتہ
کوہ سلیمان برساتی نالے بے قابو، انڈس ہائی وے پانی میں بہہ گیا،3جاں بحق،متعدد افراد زخمی ولاپتہ ہیں
باغی ٹی وی رپورٹ۔ڈیرہ غازیخان میں کوہ سلیمان پربارش برسنے سے پہاڑی ندی نالے بے قابوہوگئے،چوکی والہ کے قریب انڈس ہائی وے پانی میں بہہ گیابین الصوبائی ٹریفک کی روانی معطل،3جاں بحق،متعدد زخمی ولاپتہ گھر،مال مویشی فصلات سب سیلاب کی نظر ہوگئے ہیں جبکہ تین جاں بحق افراد میں آمنہ بی بی زوجہ خادم حسین بعمر40سال سکنہ زندہ پیرموڑ تونسہ شریف،خلیل احمدولدغلام رسول بعمر50سال بستی چھٹانی تونسہ شریف اور پروین بی بی دخترحسین بعمر7سال بستی لاشاری تونسہ شریف سیلابی ریلے میں ڈوب کرجاں بحق ہوگئے۔ابتک موصولہ رپورٹ کے مطابق سیلابی ریلے سے بستی چھٹانی موضع سنجر حیدروالی کے آٹھ افراد آمنہ بی بی ، حسینہ بی بی ، رشیدہ بی بی ، منیر ، تگو بی بی ، سلمی بی بی ، بشری بی بی ، عیسی خان کے لاپتہ ہونے کاخدشہ ظاہر کیاگیاہے
.ڈسٹرکٹ ایمرجنسی آفیسر ریسکیو 1122ڈیرہ غازیخان ڈاکٹر نیئر عالم نے کہا ہے کہ کوہ سلیمان پر حالیہ شدید بارشوں کی وجہ سے مختلف علاقے زیر آب آ گئے ہیں اور پل قمبر ، بستی احمدانی ، بستی لاشاری ، زندہ پیر موڑ ، چوکی والا ، مکول اور انڈس ہائی وے کے علاقوں میں112 ریسکیورز چودہ کشتیوں کے ساتھ ریلیف آپریشن کر رہے ہیں. انہوںنے بتایاکہ اب تک سیلاب میں گھرے 421افراد کو ریسکیو کیاگیا 720افراد کو محفوظ مقام پر منتقل کیاگیا اسی طرح بیس مویشیوں کو بھی ریسکیو کیاگیا . تین افراد کو موقع پر ابتدائی طبی امداد دی گئی . انہوںنے بتایاکہ ریسکیو ریلیف آپریشن جاری ہے اور ریجنل ایمرجنسی آفیسر ڈاکٹر ناطق حیات براہ راست نگرانی کر رہے ہیں .
رکن صوبائی اسمبلی ڈیر ہ غازیخان محمد حنیف پتافی نے کہاہے کہ سیلاب قدرتی آفت اور اللہ تعالی کی طرف سے آزمائش ہے پاکستان تحریک انصاف کی حکومت سیلاب زدگان کے مشکل وقت میں ان کے ساتھ کھڑی ہے . انتظامیہ کے ساتھ مل کرریسکیو آپریشن مکمل کرنے کے بعد سروے کر کے نقصانات کا ازالہ کرایا جائے گا. انہوںنے اپنے پیغام میں کہا کہ ڈپٹی کمشنر ڈیرہ غازیخان سیلاب زدہ علاقوں بستی ملنگا ، بستی گل محمد ، بستی احمدانی ، پل قمبر، بستی لاشاری ، زندہ پیر موڑ ، چوکی والا ، مکول، لوہار والا، انڈس ہائی وے ، چٹ سرکانی اورد یگر علاقوں کے سیلاب زدگان کو تنہا نہ چھوڑا جائے . فلڈ ریلیف کیمپس میں ہر ممکن سہولیات کے ساتھ سکیورٹی کے ہرممکن اقدامات کیے جائیں ۔
سول ڈیفنس آفیسر ڈیرہ غازیخان خالد کریم نے کہا ہے کہ ڈپٹی کمشنر و کنٹرولرسول ڈیفنس کی ہدایت پر افسران ، سٹاف اور رضا کاران پل قمبر ، بستی احمدانی، وڈور اور دیگر علاقوں میں قائم فلڈ ریلیف کیمپ میں فرائض انجام دے رہے ہیں. سول ڈیفنس ضلعی انتظامیہ کے ساتھ مل کر سیلاب زدگان میں چٹائیاں ، ترپال ،د ریاں ، مویشیوں کیلئے چارہ تقسیم کرنے کے ساتھ دیگر امدادی کام میں مصروف ہیں . سول ڈیفنس ہر مشکل گھڑی میں سیلاب زدگان کی ہر ممکن معاونت کیلئے موجودہے . اسی طرح ڈیرہ غازیخان میں بارشوں اور رودکوہیوں کے سیلابی پانی کی تباہ کاریوں کے بعد امدادی کام جاری ہے متاثرہ علاقوں سے پانی کی نکاسی کا عمل بھی جاری ہے . ڈپٹی کمشنر محمد انور بریار سمیت ایڈیشنل ڈپٹی کمشنرز ،اسسٹنٹ کمشنرز اورتمام محکموں کے افسران متاثرین کی مدد کیلئے سرگرم ہیں .ریلیف کیمپوں میں سہولیات کی فراہمی کے بعدسڑکوں اور اونچی جگہوں پر پناہ لینے والے متاثرین اور ان کے مال مویشیوں کیلئے ترپالوں کی فراہمی اور ویکسی نیشن کا عمل بھی جاری ہے .
جبکہ پنجاب ڈیزاسٹر مینجمنٹ اتھارٹی کے زیر اہتمام متاثرہ علاقوں میں خیمے بھی لگا دیئے گئے ہیں اسی طرح گزشتہ رات بھی خدمت خلق کا مشن جاری رہا ڈی جی خان کے مصیبت زدہ بے گھر خاندان پنجاب حکومت کے مہمان بنے اورڈپٹی کمشنر ڈیرہ غازی خان محمد انور بریار نے خلوص دل سے سیلاب زدگان کی میزبانی کی . تونسہ تحصیل کے سیلاب زدگان کیلئے ریلیف کیمپس میں ہر ممکن سہولیات فراہم کی گئیں اورفلڈ ریلیف کیمپس میں بجلی کے متبادل انتظام کیلئے جنریٹرز اور وافر مقدار ایندھن فراہم کیا گیا .ریلیف کیمپس میں مقیم خاندانوں کیلئے پنکھے اور تیار خوراک فراہم کی گئی ڈپٹی کمشنر محمد انور بریار نے خود سیلاب زدگان میں کھانا تقسیم کیا . سول ڈیفنس،ہیلتھ،ریونیو اور دیگر محکموں کے ملازمین فلڈ ریلیف کیمپس میں تعینات تھے . ڈپٹی کمشنر کا کہنا ہے کہ مصیبت میں گھرے سیلاب زدگان کی خدمت میں کوئی کسر اٹھا نہ رکھی جائے،فلڈ ریلیف کیمپس میں گھر جیسی سہولیات کی فراہمی کیلئے ہرممکن اقدامات کریں گے، پہلے دن کی خامیوں کو اگلے دن نہیں دہرایا جائے گا،کم وقت میں زیادہ وسائل اور سہولیات کی فراہمی کی کوشش کر رہے ہیں .
اُدھرریجنل پولیس آفیسر ڈیرہ غازی خان محمد سلیم کے احکامات پر ڈیرہ غازی خان اور راجن پور کے سیلاب زدہ علاقوں میں امدادی کاروائیوں کا سلسلہ جاری ہے ۔سیلاب زدہ علاقوں میں پولیس لوگوں کی مدد کرنے اورانہیں محفوظ مقامات پر منتقل کرنے میں مصروف عمل ہے ۔آر پی او کی ہدایات کی روشنی میں ضلعی سربراہان کی زیرنگرانی سیلاب سے متاثرہ علاقوں میں پولیس کی جانب سے امدادی سرگرمیوں کے ساتھ ساتھ لوگوں کی جان ومال اور املاک کے تحفظ کو یقینی بنایا جارہا ہے ۔متاثرہ علاقوں میں پولیس لوگوں کو بروقت آگاہ کرنے اور ان کی محفوظ مقامات پر منتقلی کیلیے دیگر اداروں کے ساتھ مل کر دن رات کام کررہی ہے۔ فلڈریلیف کمیپ میں موجود متاثرین اور ان کی املاک کے تحفظ کے لیے پولیس کی جانب سے موثراقدامات کیے گئے ہیں ۔سیلاب زدہ علاقوں میں سٹرکوں کی بندش کے پیش نظر گاڑیوں کو متبادل راستہ سے گزارنے کیلیے پولیس کی جانب سے مسافروں ٹرانسپورٹر حضرات کو بروقت آگاہ کیاجارہا ہے ۔آر پی او کا کہنا تھا کہ پولیس کو سیلاب زدہ علاقوں میں ہمہ وقت الرٹ رہنے کی سخت ہدایت جاری کردی ہیں۔امدادی سرگرمیوں اور سیکورٹی کا جائزہ لینے کیلیے آر پی او آفس میں ایمر جنسی کنٹرول روم قائم ہے۔کسی بھی ایمرجنسی میں 15یا کنٹرول روم 0649260479 پر رابطہ کرسکتے ہیں ۔پولیس کسی بھی ایمرجنسی یا ہنگامی صورت حال سے نمٹنے کیلیئے ہمہ وقت تیار ہے ۔ سیلاب سے متاثرین کی امداد میں تمام وسائل بروئے کارلائے جارہیے ہیں
کوہ سلیمان کے رودکوہی نالے بپھرنے لگے، ریلیف کیمپس قائم
کوہ سلیمان کے رودکوہی نالے بپھرنے لگے، ریلیف کیمپس قائم
اس وقت 24000کیوسک پانی کاریلاگذررہاہے ۔سنگھڑ10394کیوسک ،سخی سرور10903کیوسک،مٹھاون ندی میں 19175کیوسک پانی بہہ رہاہے جبکہ رود کوہی وڈورمیں بھی بڑاسیلابی ریلاآنے کی اطلاع ہے ۔
باغی ٹی وی رپورٹ۔ڈیرہ غازی خان کے قبائلی علاقوں کوہ سلیمان میں موسلا دھار بارشوں کی وجہ سے برساتی ندی نالوں کے آنے کے پیشِ نظر رات گئے پولیٹیکل اسسٹنٹ کوہ سلیمان محمد اکرام ملک کوہ سلیمان نے رونگھن مٹھاون وڈور سخی سرور سمیت دیگر برساتی ندی نالوں کا دورہ کیا ہے۔ پی اے اکرام ملک برساتی ندی نالوں کے پیش نظر رات گئے خود حفاظتی اقدامات کی نگرانی ہر ممکن امداد کے لیے ریلیف کیمپس قائم کرکے قبائلی لوگوں کو ہر ممکن سہولیات کی فراہمی کے لیے کوشاں ہیں۔
برساتی ندی نالوں میں بی ایم پی کو تعینات کیا گیا ہے۔ پی اے اکرام ملک نے قبائلی لوگوں کو حفاظتی مقامات میں منتقل کیا گیا ہے ،کوہ سلیمان میں برساتی ندی نالوں کے پانی کی مقدار حفاظتی اقدامات ریلیف قائم کا بارڈر ملٹری پولیس کے سربراہ کمانڈنٹ محمد اکرام ملک نے صبح سویرے وزٹ کیا۔ کمانڈنٹ محمد اکرام ملک صبح سویرے بارش تمام برساتی ندی نالوں کے روٹس لینڈ سلائیڈنگ ایریا کا تفصیلی معائنہ کیا ہے۔ وڈور مٹھاون سخی سرور سانگھڑ سمیت دیگر برساتی ندی نالوں کے وزٹ کے بعد کمانڈنٹ محمد اکرام ملک میڈیا سے گفتگو کر رہے ہیں۔ آئیے آپ کو لیے چلتے ہیں۔اس وقت کوہ سلیمان سے بہنے والے ندی نالوں اور رودکوہیوں میں بہنے والی پانی تازہ پوزیشن کچھ اس طرح ہے درہ وہوا سے اس وقت 24000کیوسک پانی کاریلاگذررہاہے ۔سنگھڑ10394کیوسک ،سخی سرور10903کیوسک،مٹھاون ندی میں 19175کیوسک پانی بہہ رہاہے جبکہ رود کوہی وڈورمیں بھی بھی بڑاسیلابی ریلاآنے کی اطلاع ہے ۔ جہاں نشیبی علاقوں میں رہنے والے لوگوں کو وارننگ جاری کردی ہے۔راجن پور میںکوہ سلیمان کے پہاڑی علاقوں میں بارش سے راجن پور برساتی نالوں میں طغیانی آگئی۔فلڈ کنٹرول روم کے مطابق نالہ کاہا سلطان اور نالہ چھاچھڑ سے سیلابی ریلا میدانی اور پچھاد کے علاقوں میں پہنچ گیا جبکہ چک شہید کا حفاظتی بند ٹوٹنے سے سیلابی پانی گھروں میں داخل ہوگیا۔قطب پل کا بھی بند ٹوٹنے سے بستی پنجابی ،بستی منجھو سمیت دیگر علاقوں میں پانی داخل ہوگیا۔ضلعی انتظامیہ اور مقامی افراد حفاظتی بند مضبوط کرنے میں مصروف ہیں۔
ادھرضلعی انتظامیہ ڈیرہ غازی خان نے رود کوہیوں کے سیلاب زدہ علاقوں کے تمام سکولوں کو فلڈ ریلیف کیمپس میں تبدیل کرنے کا اعلان کردیا ہے۔تعلیم،ریونیو اور دیگر محکموں کو ہنگامی بنیادوں پر انتظامات مکمل کرنے کے احکامات جاری کرتے ہوئے سیلاب متاثرین کو ریلیف کیمپس میں منتقل ہونے کی ہدایت کی گئی ہیں۔ڈپٹی کمشنر محمد انور بریار نے آبادیوں کو بچانے اور سیلابی ریلہ کے محفوظ انخلا کیلئے بستی ملنگا اور بستی گل محمد چانڈیہ کے نزدیک مانکا کینال کو اپنی نگرانی میں کٹ لگا کر نکاسی کو بھی یقینی بنایا انہوں نے ضلع کے مختلف سیلاب زدہ علاقوں کا دورہ کیا اور متاثرین سے ملاقاتیں کرتے ہوئے ہرممکن تعاون اور امداد کی یقین دہانی کرائی۔ڈپٹی کمشنر محمد عثمان انور نے وڈور اور سوری لنڈ کے سیلاب زدہ آبادی کیلئے نزدیکی سکولوں کی عمارتوں کو فلڈ ریلیف کیمپس میں تبدیل کرنے کا اعلان کردیا۔انہوں سیلابی ریلے سے آبادی نے اور قیمتی املاک کو بچانے کیلئے اپنی نگرانی میں بستی گل محمد چانڈیہ کے نزدیک مانکا کینال کو کٹ لگا کر نکاسی یقینی بنادی۔
ڈپٹی کمشنر نے اہل علاقہ سے بھی ملاقاتیں کیں اور کسی بھی نقصان سے بچنے کیلئے آبادی، مویشی اور قیمتی سامان کو محفوظ مقام پر منتقل ہونے کی ہدایت کی اور سیلاب زدہ بھائیوں کے ویڈیو پیغام بھی جاری کردیا۔ڈپٹی کمشنر محمد انور بریار نے وڈور رود کوہی کے سیلاب سے متاثرہ علاقے بستی گل محمد اور بستی ملنگا کا دورہ کیا انہوں نے پل وڈور کے پانی سے متاثرہ علاقوں میں سیلابی پانی کی صورتحال کا جائزہ لیا۔ مقامی لوگوں سے بھی ملاقات کی۔ڈپٹی کمشنر نے ماہرین کی تجویز اور آبادی کو بچانے کیلئے اپنی نگرانی میں بھاری مشینری کے ذریعے مانکا کینال کو کٹ لگا کر رود کوہی کے محفوظ انخلا کو یقینی بنایا ہے۔بستی ملنگا اور بستی گل محمد چانڈیہ کے نزدیک مانیکا کینال کو کٹ لگا کر نکاسی آب کو ممکن بنایا گیا ہے۔
کوہ سلیمان کے علاقے بغل چر میں بارشوں سے لینڈ سلائیڈنگ اور آمد و رفت کا راستہ بند
کوہ سلیمان کے علاقے بغل چر میں بارشوں سے لینڈ سلائیڈنگ اور آمد و رفت کا راستہ بند ،ڈپٹی کمشنر محمد انور بریار نے راستہ صاف کرنے کیلئے بھاری مشینری بھجوا دی ۔
باغی ٹی وی رپورٹ۔کمشنر ڈیرہ غازی خان ڈویژن محمد عثمان انور اور ڈپٹی کمشنر محمد انور بریار کی ہدایت پر پولیٹیکل اسسٹنٹ کوہ سلیمان محمد اکرام ملک نے لینڈ سلائیڈنگ سے بند سخی سرور بغل چر روڈ صاف کرنے کیلئے بھاری مشینری لگادی ہے۔لودھی کے مقام پر ہیوی مشینری لینڈ سلائیڈنگ کا ملبہ ہٹا رہی ہے۔بارڈر ملٹری پولیس کے سرکل آفیسر حاجی زمان لغاری نے بتایا کہ بغل چر روڈ لودھی کے مقام تمام لینڈ سلائیڈنگ ایریا کا ملبہ ہٹایا جا رہا ہے۔ سلائیڈنگ کا ملبہ ہٹانے کے لیے مشینری موقع پر پہنچ گئی ہے۔بغل چر، ٹالیاں، رونگھن روڈ پر مختلف جگہوں پر لینڈ سلائیڈنگ ہوئی ہے.کوہ سلیمان کے علاوہ ڈیرہ غازیخان شہر اور گردونواح کے میدانی علاقوں میں گذشتہ دو روز سے وقفے وقفے سے بارش جاری ہے،جس سے کئی نشیبی علاقوں میں پانی جمع ہوچکاہے.
اس کے علاوہ کوہ سلیمان کے پہاڑی علاقوں میں بارش سے راجن پور کے برساتی نالوں میں طغیانی آگئی۔رپورٹس کے مطابق حفاظتی بند ٹوٹنے سے سیلابی پانی گھروں میں داخل ہوگیا جبکہ فصلوں کو بھی نقصان پہنچا ہے_فلڈ کنٹرول روم کے مطابق نالہ کاہا سلطان اور نالہ چھاچھڑ سے سیلابی ریلا میدانی اور پچھاد کے علاقوں میں پہنچ گیا جبکہ چک شہید کا حفاظتی بند ٹوٹنے سے سیلابی پانی گھروں میں داخل ہوگیا۔قطب پل کا بھی بند ٹوٹنے سے بستی پنجابی ،بستی منجھو سمیت دیگر علاقوں میں پانی داخل ہوگیا۔ضلعی انتظامیہ اور مقامی افراد حفاظتی بند مضبوط کرنے میں مصروف ہیں۔ادھر چترال میں طوفانی بارش سے فصلیں تباہ ہوگئیں جبکہ وادی کوئٹہ اور گرد و نواح میں بھی بادل برسے جبکہ بولان اور نصیر آباد سمیت بلوچستان کے متعدد علاقوں میں بھی موسلا دھار بارش ہوئی۔محکمہ موسمیات نے آج سے منگل تک بلوچستان کے 15 اضلاع میں شدید بارشوں کی پیشگوئی کی ہے جبکہ توبہ اچکزئی کے ڈیم کے حفاظتی بند میں دراڑ پڑگئی ہے۔پی ڈی ایم اے کے مطابق بلوچستان میں بارشوں کے باعث جاں بحق افراد کی تعداد 100 ہو گئی ہے جبکہ 6 ہزارسے زائد مکانات اور املاک کونقصان پہنچا ہے۔
