خوشحال خان خٹک ایکسپریس کی بحالی ڈیرہ غازی خان ریلوے اسٹیشن کے نئے دور کا آغاز
تحریر:سیدریاض جاذب
ڈیرہ غازی خان: کووڈ 19 کی عالمی وبا اور بڑے سیلابوں کے باعث تقریباً تین سال سے معطل خوشحال خان خٹک ایکسپریس 25 اپریل کو دوبارہ اپنے سفر کا آغاز کرے گی، اس تناظر میں ڈیرہ غازی خان ریلوے اسٹیشن کی رونقیں بحال ہونے کی تیاریاں مکمل کی جارہی ہیں۔ تاہم ڈیرہ غازی خان ریلوے اسٹیشن کی انتظامیہ اور ملتان آفس کے بعض افسران ریلوے اسٹیشن کی بحالی اور تزئین و آرائش کے کام میں ڈنڈی مار رہے ہیں ۔ ان کے انتظامات کو دیکھ کر لگتا ہے کہ جیسے دونوں ٹرینیں شاید مستقل نہیں عارضی آزمائشی سفر پر آرہی ہوں۔ ریلوے اسٹیشن کے معاملات پہلے ہی خراب ہیں ، کرپشن کی بازگشت ماضی میں بھی رہی اور اب بھی سنائی دے رہی ہے جس میں ریلوے کے اثاثوں میں گڑ بڑ اور دیگر فراڈ کی بھی کہانیاں زبان زدعام ہیں۔ بہرحال یہ ایک اور موضوع ہے اس پر بھی قلم اٹھائیں گے ابھی اس نئی ڈویلپمنٹ پر یہ تحریر نظر قارئین ہے
خوشحال خان خٹک ٹرین پشاور سے کراچی تک کے طویل راستے میں واقع اس تاریخی اسٹیشن کو ملک کے بڑے معاشی مراکز سے جوڑنے میں اہم کردار ادا کرے گی۔
تاریخی اہمیت اور بحالی کے اقدامات
1969 میں قائم ہونے والا ڈیرہ غازی خان ریلوے اسٹیشن ماضی میں ملک کے چاروں صوبوں کو ملاتا تھا اور مسافروں کے ساتھ ساتھ مال بردار ٹرینوں کا مصروف جنکشن تھا۔ تاہم، گزشتہ برسوں میں ٹرین سروس کی مسلسل بندش نے اسے غیر فعال بنا دیا تھا۔ اب پاکستان ریلوے کے زیرِ اہتمام اسٹیشن کی بحالی کا کام شروع ہوچکا ہے، جس کے بعد یہ نہ صرف خوشحال خان خٹک ایکسپریس بلکہ لاہور سے آنے والی "موسیٰ پاک ڈیرہ غازی خان، ملتان شٹل ٹرین” (15 اپریل سے بحال) کا بھی مرکز بنے گا۔
ماہرین کے مطابق ٹرین سروسز کی بحالی سے نہ صرف سفری سہولیات بہتر ہوں گی بلکہ خطے کی معیشت کو بھی جِلا ملے گی۔ خصوصاً کراچی کی بندرگاہ اور پشاور کے تجارتی مراکز سے رابطہ بڑھانے سے مقامی تجارت، روزگار اور کارگو کی نقل و حمل میں اضافے کی توقعات ہیں۔ ڈیرہ غازی خان کے تاجروں کا کہنا ہے کہ ریل کے ذریعے سامان کی ترسیل سستے اور محفوظ ہوگی، جس سے کاروباری لاگت کم ہوگی۔
مستقبل کے منصوبے کا اگر جائزہ لیا جائے تو معلوم ہوگا کہ "سنٹرل ڈویلپمنٹ زون” کی جانب حکومت کے "سٹرکچر پلان 2043” کے تحت ڈیرہ غازی خان کو "سنٹرل ڈویلپمنٹ زون” (CDC) قرار دیا جائے گا، جہاں ریلوے اسٹیشن نقل و حمل اور تجارتی سرگرمیوں کا اہم محور ہوگا۔ اس منصوبے کے ساتھ ہی چلتن ایکسپریس اور اباسین ایکسپریس جیسی سروس کی بحالی پر بھی غور کیا جارہا ہے۔
شہریوں نے ٹرین سروسز کی واپسی کو خوش آئند قرار دیتے ہوئے کہا ہے کہ یہ اقدام نہ صرف روزمرہ کے سفر کو آسان بنائے گا بلکہ تعلیم، صحت اور روزگار تک رسائی بھی بہتر ہوگی۔ ایک طالب علم زاہد علی نے کہا، لاہور اور کراچی جانے کے لیے اب ہمیں بس کے ساتھ ساتھ سفر ریلوے کی سہولت بھی میسر ہوگی۔
15 اپریل موسیٰ پاک ٹرین کا آغاز اور 25 اپریل خوشحال خان خٹک ایکسپریس کی بحالی تاریخی فیصلے ہیں۔
ڈیرہ غازی تاریخی اسٹیشن ہے جس کا افتتاح 1969میں ہوا طویل غیر فعالیت کے بعد اس کی بحالی ایک بار پھر رابطے کا مرکز بنے گا ، تجارت، روزگار، اور کارگو میں اضافہ ہوگا۔ سب سے اہم بات یہ کہ مستقبل کے وژن کے طور پر یہ اور بھی زیادہ اہم ہے کہ ڈیرہ غازی خان کو ترقیاتی زون بنانے کی منصوبہ بندی کی جانب ایک قدم ہے ۔
پاکستان ریلوے کے ترجمان کے مطابق "یہ اقدامات عوامی خدمت اور معاشی تعاون کی جانب ایک اہم قدم ہیں۔” وفاقی وزیر ریلوے محمد حنیف عباسی کا کہنا ہے کہ یہ ٹرینوں کی بحالی خطے کی پرانی شان واپس لا پائے گی۔ خوشحال خان خٹک اور موسی پاک شٹل ملتان ٹو ڈیرہ غازی خان کی بحالی میں ڈیرہ غازی خان سے تعلق رکھنے والے ایم این اے وفاقی وزیر توانائی سردار اویس احمد خان لغاری اور مقامی ایم پی اے محمد حنیف خان پتافی کی بھی بھرپور کوششیں شامل ہیں جوکہ ڈیرہ غازی خان کے ریلوے اسٹیشن کی بحالی کے لیے عوام کی آواز بنے ۔
