Category: ڈیرہ غازی خان

ڈیرہ غازی خان،باغی ٹی وی(نیوز رپورٹر شاہد خان) ماہِ صیام میں گراں فروشوں کے خلاف کارروائیاں، 1195 کاروباری مراکز سیل

کمشنر ڈیرہ غازی خان ڈویژن اشفاق احمد چوہدری کی زیر صدارت ماہِ صیام سے متعلق اجلاس منعقد ہوا، جس میں غریب عوام کو معاشی ریلیف فراہم کرنے کے اقدامات کا جائزہ لیا گیا۔

کمشنر نے کہا کہ بڑے قصبات میں سستی چینی کے کاونٹرز قائم کر دیے گئے ہیں جبکہ گراں فروشوں کے خلاف کارروائیوں میں مزید شدت لائی جا رہی ہے۔

گزشتہ ایک ماہ کے دوران مارکیٹوں کے 4 لاکھ 56 ہزار معائنے کیے گئے، پرائس کنٹرول ایکٹ کی خلاف ورزی پر 23 مقدمات درج کیے گئے، ناجائز منافع خوروں پر 30 لاکھ روپے جرمانہ عائد کیا گیا اور 1195 کاروباری مراکز سیل کر دیے گئے۔

انہوں نے مزید کہا کہ ڈویژن میں 131 افسران کو پرائس کنٹرول ایکٹ کے اختیارات تفویض کیے گئے ہیں تاکہ مصنوعی مہنگائی پر قابو پایا جا سکے۔

کوٹ چھٹہ،باغی ٹی وی( تحصیل رپورٹر مرید حسین ٹالپور)رمضان کی آمد پر مہنگائی بے قابو، غریب روزہ دار پریشان

ماہِ مقدس کی آمد پر ناجائز منافع خوروں نے مہنگائی کا جن بوتل سے نکال دیا، جس سے غریب روزہ دار شدید مشکلات کا شکار ہو گئے۔ میڈیا کی نشاندہی کے باوجود ضلعی انتظامیہ کوئی عملی اقدامات نہ کر سکی۔

تفصیلات کے مطابق ضلع ڈیرہ غازی خان کی تحصیل کوٹ چھٹہ کے نواحی علاقے بستی تالپور پل 14 میں رمضان المبارک کے آغاز سے ہی اشیائے خوردونوش کی قیمتوں میں ہوشربا اضافہ دیکھنے میں آیا۔ کھجور کی قیمت 300 روپے فی کلو سے بڑھ کر 500 روپے فی کلو ہو گئی، جبکہ چینی کی قیمت 6500 روپے بوری سے بڑھ کر 7500 روپے بوری تک جا پہنچی ہے۔ برائلر گوشت 500 روپے سے 700 روپے فی کلو ہو چکا ہے، جبکہ بڑے گوشت کی قیمت میں بھی 100 روپے فی کلو اضافہ کر دیا گیا ہے۔

پھلوں کی قیمتوں میں بھی غیرمعمولی اضافہ دیکھنے میں آیا ہے۔ سیب 200 روپے سے بڑھ کر 400 روپے فی کلو، امرود 100 روپے سے بڑھ کر 200 روپے فی کلو ہو چکا ہے۔ دیگر پھلوں جیسے مالٹا، اسٹرابیری، گنڈیری اور کیلا کی قیمتیں بھی عام آدمی کی پہنچ سے باہر ہو گئی ہیں۔ اس کے علاوہ، انڈوں کی قیمت 260 روپے درجن سے بڑھ کر 300 روپے درجن ہو گئی ہے، جبکہ کئی جگہوں پر انڈے نایاب ہو گئے ہیں۔

سبزیوں کی قیمتوں میں بھی ہوشربا اضافہ دیکھنے میں آیا ہے۔ آلو کی سرکاری قیمت 200 روپے فی 5 کلو مقرر کی گئی تھی، لیکن بازار میں 100 روپے فی کلو میں فروخت ہو رہا ہے۔ مرچیں 58 روپے کے بجائے 100 روپے فی کلو میں دستیاب ہیں، جبکہ سبز دھنیا 5 روپے کے بجائے 30 روپے گڈی اور پودینہ 6 روپے کے بجائے 15 روپے گڈی میں فروخت کیا جا رہا ہے۔

عوام نے وزیراعلیٰ پنجاب مریم نواز شریف اور ضلعی انتظامیہ سے فوری نوٹس لینے، ناجائز منافع خوروں، ذخیرہ اندوزوں اور کولڈ اسٹوریج مالکان کے خلاف سخت کریک ڈاؤن کرنے اور قیمتوں کو اعتدال میں لانے کا مطالبہ کیا ہے۔

ڈیرہ غازی خان،باغی ٹی وی (سٹی رپورٹرجواد اکبر) ڈیرہ غازی خان ڈویژن میں دو لاکھ 15 ہزار ایکڑ رقبہ پر کپاس کی کاشت کا ہدف مقرر کر دیا گیا ہے۔ کمشنر اشفاق احمد چوہدری نے زیادہ سے زیادہ رقبے پر کپاس کی بروقت کاشت اور فی ایکڑ پیداوار میں اضافے کے لیے متعلقہ محکموں اور کاروباری افراد کو ذمہ داریاں سونپ دی ہیں۔

ڈویژنل کمیٹی کے اجلاس کی صدارت کرتے ہوئے کمشنر اشفاق احمد چوہدری نے کپاس کی کاشت کے معاملات کا تفصیلی جائزہ لیا۔ اس موقع پر ڈائریکٹر زراعت توسیع مہر عابد حسین نے بریفنگ دیتے ہوئے بتایا کہ فی ایکڑ پیداوار میں اضافے کے لیے 31 مارچ تک کپاس کی کاشت مکمل کرنے کا ہدف مقرر کیا گیا ہے۔

کمشنر نے متعلقہ حکام کو ہدایت دی کہ نہری پانی کی فراہمی، معیاری بیج، کھاد اور زرعی ادویات کی دستیابی کو یقینی بنایا جائے۔ انہوں نے خبردار کیا کہ جعلی بیج، کھاد اور پیسٹی سائیڈ کی تیاری، ترسیل اور فروخت میں ملوث عناصر کے خلاف سخت کارروائی کی جائے گی۔

اجلاس میں ڈپٹی کمشنر محمد عثمان خالد، مختلف محکموں کے افسران، کھاد، بیج اور زرعی ادویات کے کاروباری افراد بھی شریک تھے۔

ڈیرہ غازیخان (ڈاکٹرغلام مصطفیٰ بڈانی سے)باغی ٹی وی کی مسلسل چار ماہ کی خصوصی رپورٹس اور سول سوسائٹی کی مہم کے بعد بالآخر وزیرِاعظم پاکستان میاں شہباز شریف نے ڈیرہ غازی خان میں کینسر ہسپتال کے قیام کا باضابطہ اعلان کر دیا۔ باغی ٹی وی نے گزشتہ کئی ماہ سے کینسر کے بڑھتے ہوئے کیسز پر تفصیلی خبریں شائع کیں، عوامی مطالبات کو اجاگر کیا اور حکومت سے فوری اقدامات کی اپیل کی۔ اسی تسلسل میں وفاقی وزیر سردار اویس لغاری نے بھی وزیرِاعظم کی توجہ دلائی، جس پروزیراعظم میاں شہباز شریف نے ڈیرہ غازی خان میں کینسر ہسپتال بنانے کا اعلان کر دیا۔

علامہ اقبال میڈیکل کالج کے تحقیقی مقالے کے مطابق گذشتہ پانچ سالوں میں ڈیرہ غازی خان میں کینسر کے کیسز میں تیزی سے اضافہ ہوا ہے۔ تحقیق کے مطابق ضلع میں 817 کینسر مریضوں میں سے 415 کا تعلق قبائلی علاقے کوہِ سلیمان سے ہے، جبکہ 350 خواتین میں بریسٹ کینسر اور دیگر اقسام کے کینسر کی تصدیق ہوئی ہے۔ ماہرین کے مطابق جنوبی پنجاب، بالخصوص ڈیرہ غازی خان میں چھاتی، جگر، گلے اور معدے کے کینسر کے کیسز خطرناک حد تک بڑھ رہے ہیں، جس کی بنیادی وجوہات میں صحت کی ناکافی سہولیات، ماحولیاتی آلودگی اور ناقص خوراک شامل ہیں۔

یہ خبر بھی پڑھیں
ڈیرہ غازی خان: کینسر کا بڑھتا عفریت، ہسپتال کے قیام کا مطالبہ

ڈیرہ غازی خان میں اس وقت کوئی سرکاری یا نجی سطح پر بڑا کینسر ہسپتال موجود نہیں، جس کی وجہ سے مریضوں کو علاج کے لیے ملتان، لاہور اور دیگر شہروں کا رخ کرنا پڑتا ہے جو کہ زیادہ تر مریضوں کی استطاعت سے باہر ہے۔ عوام طویل عرصے سے پاکستان اٹامک انرجی کمیشن (PAEC) کے تحت جدید کینسر ہسپتال کے قیام کا مطالبہ کر رہے تھے تاکہ خطے میں موجود مریضوں کو بروقت اور معیاری علاج فراہم کیا جا سکے۔

باغی ٹی وی کی مسلسل مہم، سوشل میڈیا پر اٹھنے والی عوامی آواز اور سول سوسائٹی کے دباؤ کے نتیجے میں بالآخر حکومت نے اس مسئلے پر توجہ دی۔ وزیرِاعظم کے اعلان پر مقامی شہریوں، سماجی رہنماؤں اور سول سوسائٹی کے نمائندوں نے خوشی اور اطمینان کا اظہار کیا ہے۔ معروف سماجی شخصیات شیخ امجد ایڈووکیٹ، منظورخان لغاری ،چوہدری شکیل احمد،سیدریاض جاذب، ایاز احمد شاہ اور دیگر نے باغی ٹی وی کی کاوشوں کو سراہتے ہوئے مطالبہ کیا کہ اس منصوبے کو جلد از جلد عملی جامہ پہنایا جائے تاکہ مریضوں کو فوری طبی سہولیات فراہم ہو سکیں۔

ڈیرہ غازی خان میں کینسرہسپتال کا قیام نہ صرف جنوبی پنجاب بلکہ بلوچستان کے عوام کے لیے بھی کسی نعمت سے کم نہیں ہوگا۔ بلوچستان میں اس وقت صرف کوئٹہ میں ایک کینسر ہسپتال موجود ہے جو صوبے بھر کے لیے ناکافی ہے۔ نیا ہسپتال خطے کے ہزاروں مریضوں کے لیے امید کی کرن بن سکتا ہے۔

باغی ٹی وی عوام کی آواز بن کر حکومت کو بار بار باور کرا چکا ہے کہ کینسر ہسپتال کا اعلان کافی نہیں، اس پر فوری عملدرآمد بھی ضروری ہے۔ سول سوسائٹی نے بھی حکومت سے مطالبہ کیا ہے کہ اس منصوبے کو جلد مکمل کر کے جدید ترین سہولیات سے آراستہ ہسپتال فراہم کیا جائے۔
باغی ٹی وی عوامی مسائل کو اجاگر کرتا رہے گا، کیونکہ یہی ہے عوام کی اصل آواز!

ڈیرہ غازی خان،باغی ٹی وی(سٹی رپورٹرجواداکبر) نو منتخب صدر ڈسٹرکٹ بار عبدالغنی خان کھوسہ کو بار الیکشن میں کامیابی پر مبارکبادوں کا سلسلہ تاحال جاری ہے۔ اس سلسلے میں پیپلز پارٹی لیڈیز ونگ کی ضلعی صدر و سابق ممبر میونسپل کارپوریشن محترمہ طیبہ عزیز چوہان نے اپنے صاحبزادے شاہزیب چوہان اور سماجی رہنما صادق کھواوڑ کے ہمراہ ایک دعوت کا اہتمام کیا، جہاں انہوں نے عبدالغنی کھوسہ کو جیت پر مبارکباد پیش کی۔

محترمہ طیبہ عزیز چوہان نے اس موقع پر کہا کہ عبدالغنی کھوسہ نے محنت، لگن اور ساتھیوں کی بھرپور کوششوں سے یہ کامیابی حاصل کی ہے، اور امید ہے کہ وہ وکلاء برادری سے کیے گئے تمام وعدے پورے کریں گے۔

عبدالغنی کھوسہ نے مبارکباد دینے والوں کا شکریہ ادا کرتے ہوئے کہا کہ وہ ڈسٹرکٹ بار ایسوسی ایشن کی پوری ٹیم کے ہمراہ وکلاء برادری کی خدمت اور حصول انصاف کے لیے اقدامات جاری رکھیں گے۔

دعوت کے اختتام پر شرکاء نے یادگاری گروپ فوٹو بنوایا اور میزبانوں کا خصوصی شکریہ ادا کیا۔

ڈیرہ غازی خان (باغی ٹی وی) وزیراعظم کے مشیر برائے سیاسی امور رانا ثناء اللہ نے میڈیا سے گفتگو میں کہا کہ مسلم لیگ (ن) نے ہمیشہ ملک کی ترقی میں اہم کردار ادا کیا ہے۔ ڈیرہ غازی خان ڈویژن میں بڑے ترقیاتی منصوبے، بشمول موٹرویز، کالجز، یونیورسٹیز، ہسپتال اور دانش اسکول، ن لیگ کی قیادت کے ویژن کا نتیجہ ہیں۔

انہوں نے کہا کہ "قاتل روڈ” کے نام سے مشہور سڑک، جو ڈیرہ غازی خان، راجن پور اور ڈیرہ اسماعیل خان کے عوام کے لیے سہولت کا باعث بنے گی، ن لیگ کا ایک اور تحفہ ہے، جس پر 121 ارب روپے لاگت آئے گی۔ علاوہ ازیں، ڈیرہ غازی خان ایئرپورٹ کو فعال بنانے کے لیے 2 ارب روپے مختص کیے گئے ہیں، یوں دونوں منصوبے مجموعی طور پر 123 ارب روپے میں مکمل ہوں گے۔ ان منصوبوں کا افتتاح وزیراعظم میاں شہباز شریف 22 فروری کو خود کریں گے۔

رانا ثناء اللہ نے سابق حکومت پر تنقید کرتے ہوئے کہا کہ یہ منصوبے عوام کی دیرینہ ضرورت تھے، مگر گزشتہ چار سالہ دورِ حکومت میں انہیں نظر انداز کیا گیا۔ انہوں نے کہا کہ مسلم لیگ (ن) پہلے بھی ترقیاتی کام کر چکی ہے اور اب ایک بار پھر خطے کی ترقی کے لیے سرگرم ہے۔

پنجاب حکومت کے ترقیاتی ایجنڈے پر بات کرتے ہوئے انہوں نے کہا کہ وزیراعلیٰ مریم نواز کی قیادت میں حکومت ہیومن ڈیولپمنٹ پر خصوصی توجہ دے رہی ہے۔ عام آدمی کو آسان کاروبار، اپنی چھت، کسان کارڈ، مینارٹی کارڈ اور گرین ٹریکٹر جیسے منصوبے فراہم کیے جا رہے ہیں۔ ڈیرہ غازی خان کو بھی ان ترقیاتی پروگراموں میں زیادہ حصہ دیا جائے گا۔

بلوچستان کے بارکھان واقعے پر تبصرہ کرتے ہوئے رانا ثناء اللہ نے کہا کہ یہ دہشت گردی ہے، جس کے پیچھے پاکستان دشمن عناصر ہیں۔ حکومت اور قانون نافذ کرنے والے ادارے ان دہشت گردوں کے خلاف سخت کارروائی کر رہے ہیں اور ان کا جلد خاتمہ ہوگا۔

مریم نواز کے ممکنہ وزیراعظم بننے کے سوال پر انہوں نے کہا کہ فیصلہ عوام اور پارٹی کرے گی، لیکن مریم نواز کی محنت اور عوامی خدمت انہیں مزید عزت بخشے گی۔

قبل ازیں، رانا ثناء اللہ نے سرکٹ ہاؤس میں مقامی پارلیمنٹرینز اور پارٹی رہنماؤں سے ملاقات کی، جس میں وزیراعظم کے متوقع دورے اور ترقیاتی منصوبوں پر مشاورت کی گئی۔ مقامی قیادت نے عوامی مسائل اور ترقیاتی تجاویز بھی پیش کیں۔ رانا ثناء اللہ نے یقین دلایا کہ وزیراعظم کے دورے میں ڈیرہ غازی خان کے لیے خصوصی ترقیاتی پیکج کا اعلان کیا جائے گا، جو علاقے کے بنیادی مسائل کے حل میں مددگار ثابت ہوگا۔