Category: حیدرآباد

سانگھڑ (باغی ٹی وی/نامہ نگار مشتاق علی لغاری)سانگھڑ کے علاقے چوٹیاری کے قریب پیش آنے والا واقعہ انسانیت کو جھنجھوڑ کر رکھ دینے والا ہے، جہاں ایک معصوم بچی پر مبینہ طور پر بااثر وڈیرے کے بیٹے وزیر راجڑ کی جانب سے درندگی، شدید تشدد اور زبان کاٹنے جیسے ہولناک الزامات سامنے آئے ہیں۔ واقعے کی نوعیت اس قدر سنگین ہے کہ سن کر روح کانپ اٹھتی ہے، مگر اس سے بھی زیادہ افسوسناک پہلو ریاستی اداروں کی پراسرار خاموشی ہے۔

ذرائع کے مطابق واقعے کو کئی دن گزر جانے کے باوجود نہ مقدمہ درج کیا گیا ہے اور نہ ہی کسی قسم کی گرفتاری عمل میں آئی ہے۔ سوال یہ پیدا ہوتا ہے کہ کیا بااثر ہونا قانون سے بالاتر ہونے کا لائسنس بن چکا ہے؟ کیا ایک معصوم بچی کا خون اور چیخیں بھی طاقتوروں کے سامنے بے معنی ہیں؟

علاقہ مکینوں کا کہنا ہے کہ متاثرہ خاندان پر دباؤ ڈالا جا رہا ہے، جبکہ پولیس مبینہ طور پر اثر و رسوخ کے آگے بے بس نظر آتی ہے۔ واقعے کے بعد علاقے میں شدید خوف، غم و غصہ اور اضطراب پایا جاتا ہے، جبکہ سماجی اور انسانی حقوق کے حلقے اسے کھلا انسانی المیہ قرار دے رہے ہیں۔

عوامی، سماجی اور صحافتی حلقوں کی جانب سے وزیراعلیٰ سندھ، آئی جی سندھ، ڈی جی رینجرز اور اعلیٰ عدالتی حکام سے مطالبہ کیا جا رہا ہے کہ اس دلخراش واقعے کا فوری ازخود نوٹس لیا جائے، غیر جانبدار اور شفاف تحقیقات کرائی جائیں، مبینہ ملزمان کو فوری گرفتار کر کے قانون کے کٹہرے میں لایا جائے اور مظلوم بچی کو مکمل تحفظ اور انصاف فراہم کیا جائے۔

عوام سے اپیل کی گئی ہے کہ وہ اس ظلم پر خاموش نہ رہیں، کیونکہ آج اگر ایک بچی کے ساتھ ہونے والے ظلم پر آواز نہ اٹھی تو کل کوئی بھی محفوظ نہیں رہے گا۔

ٹھٹھہ (ڈسٹرکٹ رپورٹر، بلاول سموں)درگاہ امیر شاہ جیلانی کے قریب ہالیجی جھیل کے علاقے گاؤں حاجی میر بحر میں اچانک آگ لگنے کے باعث مزدور ممتاز میر بحر اور اس کے بھائیوں کے دو کچے مکانات مکمل طور پر جل کر خاکستر ہو گئے۔ آتشزدگی کے نتیجے میں گھروں میں موجود بستر، راشن، کپڑے اور روزمرہ استعمال کا تمام سامان جل کر راکھ ہو گیا۔

واقعے کے بعد متاثرہ خاندان شدید سردی میں کھلے آسمان تلے بے یار و مددگار پڑا ہے، جبکہ حادثے کو چوبیس گھنٹے گزر جانے کے باوجود کسی سرکاری یا فلاحی ادارے کی جانب سے کوئی امداد فراہم نہیں کی گئی۔

آگ سے متاثرہ افراد نے صحافیوں سے گفتگو کرتے ہوئے منتخب نمائندوں، مخیر حضرات اور متعلقہ اداروں سے فوری مالی امداد کی اپیل کی ہے تاکہ معصوم بچوں کو شدید سردی سے بچایا جا سکے۔ متاثرین کا کہنا تھا کہ وہ غریب مزدور ہیں اور ان کے کچے مکانات ہی ان کا واحد سہارا تھے، جو اس حادثے میں جل کر خاکستر ہو گئے، جس کے باعث انہوں نے سرد راتیں شدید اذیت میں گزاریں۔

ٹھٹھہ (ڈسٹرکٹ رپورٹر، بلاول سموں)ایس ایس پی ٹھٹھہ فاروق احمد بجارانی کی زیر صدارت ایس ایس پی آفس ٹھٹھہ میں ضلع بھر کے تمام افسران کے ساتھ ایک اہم جرائم اجلاس منعقد ہوا، جس میں مجموعی امن و امان، جرائم کی صورتحال اور پولیس کارکردگی کا تفصیلی جائزہ لیا گیا۔

اجلاس میں ضلع بھر کے ایس ڈی پی اوز، ایس ایچ اوز، انچارج سی آئی اے ٹھٹھہ، انچارج پولیس پوسٹس، انچارج 15 مددگار بیس ٹھٹھہ اور تمام ہیڈ آف برانچز نے شرکت کی۔ میٹنگ کے دوران رپورٹڈ اور انرپورٹڈ جرائم، جاری پولیس کارروائیوں اور مجموعی کارکردگی پر تفصیلی تبادلہ خیال کیا گیا۔

ایس ایس پی ٹھٹھہ نے آئی جی پی سندھ جاوید عالم اوڈھو اور ڈی آئی جی حیدرآباد رینج طارق رزاق خان دھاریجو کے احکامات کی روشنی میں افسران کو ہدایات جاری کرتے ہوئے کہا کہ ضلع بھر میں جرائم پر کنٹرول کو مزید مؤثر بنایا جائے، جبکہ لسٹڈ عادی، اشتہاری اور انعام یافتہ ملزمان کی گرفتاری کے لیے اقدامات میں تیزی لائی جائے۔

انہوں نے ہدایت کی کہ سنگین نوعیت کے مقدمات میں ملوث اشتہاری، روپوش اور مطلوب ملزمان کے خلاف بلا تاخیر اور ٹھوس کارروائیاں عمل میں لائی جائیں تاکہ قانون کی بالادستی کو یقینی بنایا جا سکے، جبکہ تمام گرفتار ملزمان کا CRO بروقت مکمل کیا جائے۔

ایس ایس پی ٹھٹھہ نے جرائم پیشہ عناصر کے خلاف روزانہ کی بنیاد پر سرچنگ اور کومبنگ آپریشنز کو یقینی بنانے، پولیس پیٹرولنگ اور پکٹنگ کے نظام کو مزید مؤثر بنانے اور دورانِ ڈیوٹی تمام افسران و اہلکاروں کو ہائی الرٹ رہنے کی بھی ہدایات جاری کیں۔

اجلاس میں اسپیشل برانچ کی جانب سے مرتب کردہ منشیات فروشوں کی کیٹیگری وائز فہرستوں (A+, A, B, C) کی روشنی میں ضلع بھر میں مربوط حکمت عملی کے تحت کارروائیاں مزید تیز کرنے پر زور دیا گیا۔ خاص طور پر تعلیمی اداروں اور ان کے اطراف منشیات فروشوں کے خلاف بلا امتیاز سخت کارروائی کی ہدایت کی گئی۔

ایس ایس پی ٹھٹھہ نے تمام تھانوں اور پولیس دفاتر میں صفائی، نظم و ضبط اور ڈسپلن کو بہتر بنانے، جبکہ تھانوں میں آنے والے سائلین کے ساتھ خوش اخلاقی سے پیش آنے اور ان کے مسائل کو ترجیحی بنیادوں پر حل کرنے کی بھی ہدایات دیں۔

اجلاس کے اختتام پر ایس ایس پی ٹھٹھہ نے واضح کیا کہ بہترین کارکردگی کا مظاہرہ کرنے والے افسران اور اہلکاروں کو تعریفی اسناد اور نقد انعامات سے نوازا جائے گا، جبکہ غفلت یا ناقص کارکردگی کے مرتکب اہلکاروں کے خلاف سخت محکمانہ کارروائی عمل میں لائی جائے گی۔

ٹھٹھہ (ڈسٹرکٹ رپورٹر بلاول سموں) بن قاسم پولیس نے خفیہ اطلاع پر کارروائی کرتے ہوئے پاکستان اسٹیل ملز سے کروڑوں روپے مالیت کی مشینری اور قیمتی دھاتیں چوری کرنے والے منظم گروہ کو گرفتار کر لیا۔ کارروائی کے دوران 22 ویلر ٹرک سمیت بڑی مقدار میں چوری شدہ سامان بھی تحویل میں لے لیا گیا۔

پولیس کے مطابق کارروائی میں 6 ملزمان کو گرفتار کیا گیا جن میں اسٹیل ملز کے ملازمین بھی شامل ہیں، جو اندرونی سہولت کاری کے ذریعے پلانٹ کی قیمتی مشینری اور دھاتیں باہر منتقل کر رہے تھے۔

پولیس کا کہنا ہے کہ گرفتار ملزم ندیم حسین اس گروہ کا مرکزی کردار تھا، جو چوری شدہ سامان کی سہولت کاری اور فروخت کا نیٹ ورک چلا رہا تھا۔ برآمد ہونے والا لوہا اور مشینری اسٹیل ملز کے پلانٹ سے تعلق رکھتی ہے۔

گرفتار ملزمان کی شناخت ندیم حسین، نصار، عبدالوحید، لیاقت خان، زاہد خان اور خالد شام کے نام سے ہوئی ہے۔ کارروائی کے دوران پولیس نے 36 ہزار کلوگرام سے زائد، یعنی تقریباً 36 ٹن مشینری اور لوہے کا سامان برآمد کیا، جس کی مالیت کروڑوں روپے بتائی جا رہی ہے۔

پولیس کے مطابق ملزمان چوری شدہ سامان 22 ویلر ٹرک کے ذریعے منتقل کر رہے تھے اور مختلف گوداموں میں فروخت کیا جاتا تھا، جبکہ دیگر ملزمان اس نیٹ ورک میں معاونت فراہم کرتے تھے۔

گرفتار ملزمان کے خلاف ضابطے کے تحت مقدمہ درج کر کے مزید تفتیش شروع کر دی گئی ہے، جبکہ دیگر ممکنہ سہولت کاروں کی گرفتاری کے لیے بھی چھان بین جاری ہے۔