Category: کراچی

سابق گورنر سندھ محمد زبیر نے کہا ہے کہ پی ٹی آئی سمیت کسی سیاسی جماعت پر پابندی نہیں لگنی چاہیے۔ انہوں نے نجی ٹی وی کے ایک پروگرام میں گفتگو کرتے ہوئے کہا کہ پی ٹی آئی پاکستان کی مقبول ترین سیاسی جماعت ہے اور 70 فیصد پاکستانی اس پر پابندی کے خلاف ہیں۔محمد زبیر نے کہا کہ پابندیاں ملک کو آگے نہیں بڑھا سکتیں، بلکہ ماضی کی پابندیوں نے ملک کو پیچھے دھکیل دیا تھا۔ انہوں نے مزید کہا کہ اقلیتی جماعتیں اکثریتی جماعت پر پابندی لگانے کی کوشش کر رہی ہیں، جو کہ درست نہیں ہے۔
انہوں نے ماضی کی مثال دیتے ہوئے کہا کہ 1958، 1969، 1977 اور 1999 میں آئین کی خلاف ورزیاں ہوئیں اور سوال اٹھایا کہ کیا آرٹیکل 6 صرف سیاسی جماعتوں اور سیاستدانوں کے لیے ہے؟ ان کا کہنا تھا کہ جب تک آئین کی حرمت برقرار نہیں رکھی جاتی، کسی پر آرٹیکل 6 کا اطلاق نہیں ہونا چاہیے۔سابق گورنر سندھ نے ماضی کی غلطیوں کی نشاندہی کرتے ہوئے کہا کہ کسی بھی سیاسی پارٹی پر پابندی لگانا ایک غلط فیصلہ تھا۔ انہوں نے کہا کہ مریم نواز کی گرفتاری بھی غلط تھی اور اس قسم کے اقدامات کو جواز بنا کر آج کے غلط فیصلوں کو درست نہیں کیا جا سکتا۔انہوں نے نو مئی کے واقعے کا ذکر کرتے ہوئے کہا کہ اس واقعے کو سوا سال گزر چکا ہے اور ن لیگ نے اسے اپنے سیاسی مقاصد کے لیے استعمال کیا۔ ان کا کہنا تھا کہ 2014 میں میرے ساتھ زیادتی ہوئی تھی تو اس کا یہ مطلب نہیں کہ میں ہٹ دھرمی سے حکومت کروں گا۔

امیر جماعت اسلامی حافظ نعیم الرحمان نے کہا ہے کہ اگر آج ہم حکومت کیخلاف کھڑے نہیں ہوئے تو آئندہ اس سے بھی بدتر حالات کا سامنا کرنا پڑے گا۔ وہ جماعت اسلامی کے تحت مقامی ہال میں منعقدہ تاجر کنونشن سے خطاب کر رہے تھے، جس میں مہنگائی اور بجلی کی قیمتوں میں اضافے کے خلاف آواز اٹھائی گئی۔حافظ نعیم الرحمان نے تاجر کنونشن میں خطاب کرتے ہوئے کہا کہ تاجر دوست کے نام پر ظالمانہ ٹیکس کسی صورت قبول نہیں ہیں۔ انہوں نے اس بات کی نشاندہی کی کہ تنخواہ دار طبقہ 375 ارب روپے کا ٹیکس ادا کرتا ہے جبکہ جاگیردار صرف 5 ارب روپے کا ٹیکس ادا کرتے ہیں۔ انہوں نے مطالبہ کیا کہ بجلی کے بلوں میں سلیب سسٹم اور اضافی ٹیکسز کو ختم کیا جائے۔
انہوں نے اعلان کیا کہ پہلے مرحلے پر ایک روز کی ہڑتال کی جائے گی اور اگر حکومت نے مطالبات تسلیم نہ کئے تو اسلام آباد میں دھرنا دیا جائے گا۔ ان کا کہنا تھا کہ کسی بھی سیاسی جماعت کو اس وقت کوئی تکلیف نہیں ہے، مگر ہم اپنے سیاسی حقوق کا استعمال کرنا جانتے ہیں۔امیر جماعت اسلامی نے مزید کہا کہ وہ سول نافرمانی نہیں چاہتے مگر حالات کے پیش نظر بجلی کے بلوں کا بائیکاٹ بھی کر سکتے ہیں۔ انہوں نے اعلان کیا کہ دھرنے اور ہڑتال کے ذریعے اپنے مطالبات منوائے جائیں گے اور اگر ضرورت پڑی تو پورے ملک میں ہڑتال ہوگی۔

وزیراعلیٰ سندھ سید مراد علی شاہ نے 1.27 ملین ایکڑ زرعی اراضی کو بچانے کے لیے ونگو موڑ کے مقام پر دھورو پُران تا شکور جھیل پانی کے قدرتی راستوں کی بحالی کی افتتاح تقریب سے خطاب کیا ہے

وزیراعلیٰ سندھ سید مراد علی شاہ نے ایل بی او ڈی پرانے قدرتی پانی کے راستے بحال کردیئے ،وزیراعلیٰ سندھ نے ڈھورو پران تا شکور ڈنڈھ تک پانی کے راستے کی بحالی کے منصوبے کا افتتاح کر دیا، صوبائی وزیر ایریگیشن جام خان شورو اور منتخب رہنما بھی موجود تھے۔وزیر اعلیٰ سندھ سید مراد علی شاہ نے آر ڈی 210 اسپائنل اسکیپ ریگولیٹر کا بھی افتتاح کر دیا ،اس موقع پر وزیراعلیٰ سندھ سید مراد علی شاہ کا کہنا تھا کہ اب بدین، میرپورخاص، سانگھڑ اور نواب شاہ اضلاع کی بارہ لاکھ ستر ہزار ملین ایکڑ سے زائد زمینیں سیلابوں میں نہیں ڈوبینگی،پانی کی نکاسی کے پرانے راستوں کی بحالی میرپور خاص اور نواب شاہ ڈویژن کے عوام کا پرانہ مطالبہ تھا، ایل بی او کی ڈیزائن پر شہید محترمہ بینظیر بھٹو نے بھی اعتراضات کئے تھے کیونکہ اس سے قدرتی پانی کے راستے بند ہو گئے تھے، ایل بی او ڈی 1980 کی دہائی کا منصوبہ تھا اور یہ منصوبہ واپڈا نے تعمیر کیا تھا،سندھ حکومت نے ایل بی او ڈی کے ڈزائن میں کچھ ترامیم کر کے پرانے پانی کے راستے بحال کر دیئے ہیں، چیئرمین بلاول بھٹو کا حکم تھا کہ پرانے پانی کے راستوں کی بحالی کا پروجیکٹ مکمل کر کے زرعی معیشیت کو ترقی دی جائے،

وزیراعلیٰ سندھ سید مراد علی شاہ کا کہنا تھا کہ بلدیاتی الیکشن کے بعد حکومت نے نوکریاں دینا شروع کیں، گریڈ 16 سے اوپر کی 16 ہزار سے زائد نوکریاں دے چکے ہیں، لیکن ایک جماعت کو سندھ کی ترقی پسند نہیں، اس نے اسٹے لے لیا، کورٹ سے بھی تاریخ پر تاریخ ملتی رہی، عوام سے کیے گئے سارے وعدے پورے کریں گے اور سرخرو ہوکر ان کے پاس جائیں گے،

وزیراعلیٰ سندھ سید مراد علی شاہ کا مزیدکہنا تھا کہ سندھ میں سیلاب آیا تو چیئرمین بلاول بھٹو زرداری نے کہا کہ مجھے اس مسئلے کا ہر صورت حل چاہیے۔ بلاول بھٹو کی ہدایت تھی کہ زرعی معیشت کو ترقی دی جائے، سانگھڑ سے عمر کوٹ تک ایک ڈرین اور انڈر پاس بنایا جارہا ہے، 2022 کا سیلاب آیا تو لوگوں نے کہا حکومت کو اپنی غلطیاں درست کرنی چاہئیں، میں جام خان شورو کو مبارکباد دیتا ہوں، کم وقت میں حل نکال کر دیا۔

امیر جماعت اسلامی پاکستان حافظ نعیم الرحمان نے ترجمان پاک فوج کے بیان کا خیر مقدم کیا ہے، جس میں کہا گیا تھا کہ عزم استحکام ایک فوجی آپریشن نہیں ہے۔ سوشل میڈیا پر جاری اپنے بیان میں حافظ نعیم الرحمان نے کہا کہ اس وضاحت سے کنفیوژن دور ہوگئی ہے اور اگر سیاسی حکومت اسٹیک ہولڈرز کے ساتھ مشاورت کے بعد اتفاق رائے سے فیصلے کرے تو مزید ابہام پیدا نہیں ہوں گے۔حافظ نعیم الرحمان نے مزید کہا کہ جماعت اسلامی کا اصولی مؤقف ہے کہ فوجی آپریشن سے مسائل حل نہیں ہوتے۔ انہوں نے اس بات پر زور دیا کہ ملک مزید کسی فوجی آپریشن کا متحمل نہیں ہوسکتا۔ انہوں نے کہا کہ مسائل کے حل کے لئے مشاورت اور اتفاق رائے سے فیصلے کرنا انتہائی ضروری ہے۔حافظ نعیم الرحمان نے کہا کہ جماعت اسلامی ہمیشہ سے اس بات کی حامی رہی ہے کہ مسائل کے حل کے لئے سیاسی اور پرامن طریقے اپنائے جائیں۔ انہوں نے کہا کہ فوجی آپریشن کے بجائے مکالمے اور مشاورت کے ذریعے ہی ملک میں پائیدار امن اور استحکام لایا جاسکتا ہے۔
امیر جماعت اسلامی کے بیان نے ایک بار پھر اس بات کو واضح کر دیا ہے کہ جماعت اسلامی ملک میں فوجی آپریشن کے بجائے سیاسی مشاورت اور اتفاق رائے پر یقین رکھتی ہے۔ ان کے بیان کا خیر مقدم کرتے ہوئے امید کی جا سکتی ہے کہ حکومت اور دیگر اسٹیک ہولڈرز بھی مشاورت کے ذریعے مسائل کے حل کے لئے کوششیں جاری رکھیں گے تاکہ ملک میں پائیدار امن اور استحکام یقینی بنایا جا سکے۔

امیر جماعت اسلامی حافظ نعیم الرحمان نے آئی پی پیز معاہدوں کو قوم کے سامنے لانے کا مطالبہ کردیا۔اپنے ایک بیان میں امیر جماعت اسلامی حافظ نعیم الرحمان کا کہنا تھا کہ پاکستان میں بجلی کا بحران ہے، اگربجلی زیادہ ہےتوپھرلوڈشیڈنگ کیوں ہورہی ہے؟ 1994سےآئی پی پیزمعاہدوں کا دھندا چل رہا ہے، مہنگی بجلی نےمعیشت اورمڈل کلاس طبقے کو برباد کر دیا ہے، جاگیردار اور وڈیرے حکومت میں بیٹھےہیں ان پرٹیکس نہیں لگایاگیا۔انہوں نے کہا کہ ہم کسی پارٹی سےنہیں عوام،تاجروں اور نوجوانوں کےساتھ اتحاد کر رہے ہیں، "حق دوعوام کو” تحریک شروع کررہےہیں، 26جولائی کو اسلام آباد ڈی چوک میں دھرنا ہوگا، بجلی کی قیمت اورغیرضروری ٹیکسزکم کیےجائیں، ہمارا کوئی ذاتی ایجنڈا نہیں، ہمارا یجنڈا عوام کوریلیف دلانا ہے۔انہوں نے کہا کہ تاجرٹیکس دینا چاہتا ہےلیکن سہولیات نہیں دی جاتیں، بڑے بڑے لوگوں کی مفت بجلی اورمراعات کوختم کیا جائے، آئی پی پیزمعاہدے ہمیں قبول نہیں، آئی پی پیزمعاہدوں پرنظرثانی کی جائے، آئی پی پیزمعاہدوں کو قوم کے سامنے لایا جائے۔
حافظ نعیم الرحمان کا کہنا تھا کہ امریکی جنگ کے نیتجے میں ہماری معیشت کو نقصان پہنچا، آپریشن کے نتیجے میں فوج اورعوام کےدرمیان فاصلے بڑھتے ہیں، امریکی جنگ کی وجہ سےخیبرپختونخوا کا محفوظ بارڈربھی غیرمحفوظ ہوگیا، افغانستان ہمارا ہمسایہ ملک ہے، خدانخواستہ اگر پاکستان اور افغانستان کی لڑائی ہوگی تواسرائیل،امریکا اور بھارت خوش ہوگا۔انہوں نے کہا کہ حکومت پاکستان کو اندھی لڑائی میں نہ جھونکے، قوم سےقربانی مانگنے والے پہلے خود قربانی دیں، بنوں واقعہ کے نتیجےمیں بداعتمادی کی فضا پیدا ہوئی ہے، موجودہ صورتحال میں نقصان عوام اور پاکستان کا ہورہا ہے، امن کےبغیر سیاست اور نہ ہی معیشت چلےگی۔امیر جماعت اسلامی کا مزید کہنا تھا کہ ری الیکشن نئی سودے بازی کےلیے کیا جائےگا، پاکستان کوجمہورکی رائےکےمطابق چلایا جائے، حکومت تمام سٹیک ہولڈرز کو اعتماد میں لے۔