Category: قصور

قصور،باغی ٹی وی(طارق نوید سندھو سے) شہباز خاں روڈ شہر کی مصروف ترین گذرگاہ موت کے کنوئیں میں تبدیل ہو چکی ہے۔ یہاں 15 سے 20 فٹ گہرا کھلا نالہ انتظامیہ کی غفلت کا منہ بولتا ثبوت ہے۔ یہ نالہ نہ صرف شہریوں کے لیے خطرہ ہے بلکہ قصور کے ایم پی اے اور ایم این اے کے ڈیرے سے محض 100 میٹر کے فاصلے پر واقع ہے۔ حیرت کی بات یہ ہے کہ اس خطرناک صورتحال پر کسی افسر کی نظر نہیں پڑی۔

یونیک گروپ آف انسٹیٹیوشنز (قصور کیمپس) جیسے معروف تعلیمی ادارے کی موجودگی کے باوجودسکول انتظامیہ بھی خاموش تماشائی بنی ہوئی ہے۔ کیا کسی بڑے حادثے کا انتظار ہے؟ قصور کی سڑکیں خون سے رنگین ہو رہی ہیں۔یاد رہے کہ گذشتہ روز رائے ونڈ روڈ پر ایک اور المناک حادثہ پیش آیا، جہاں ایک وین بے قابو ہو کر نالے میں جا گری۔ اس حادثے میں 8 افراد اپنی جانوں سے ہاتھ دھو بیٹھے جبکہ 2 شدید زخمی ہیں۔ مرنے والوں میں خواجہ سرا بھی شامل تھا۔

قصور میں یہ پہلا موقع نہیں ہے جب اس طرح کا حادثہ پیش آیا ہے۔ گزشتہ سال دسمبر میں بھی 6 افراد اسی طرح کے حادثے میں جان سے ہاتھ دھو بیٹھے تھے۔ 2023 میں بھی ایک ڈرائیور اسی مقام پر جان کی بازی ہار گیاتھا ،ان تمام حادثات کی بنیادی وجہ اوور اسپیڈنگ اور کھلے نالے جن پر باؤنڈری والز کا نہ ہونا ہے۔

شہریوں نے ارباب اختیار سے سوال کیا ہے کہ کیا قصور کے شہری کب تک بے موت مرتے رہیں گے اور کب تک سڑکیں اور کھلے نالے خون سے رنگین ہوتے رہیں گے؟ کیا انتظامیہ کسی بڑے حادثے کا انتظار کر رہی ہے؟کوئی ہے جو فوری طور پر ان کھلے نالوں کو بندکرنے کے احکامات جاری کرے اور جاری موت کے رقص کو بندکرے اور شہریوں کوناگہانی موت مرنے سے بچائے .

قصور،باغی ٹی وی (ڈسٹرکٹ رپورٹرطارق نویدسندھوسے) قصور میں مبینہ پولیس مقابلے کے دوران ایک ڈاکو اپنے ہی ساتھیوں کی فائرنگ سے ہلاک ہو گیا۔

پولیس ذرائع کے مطابق شہری بلال احمد نے پولیس ہیلپ لائن نمبر 15 پر کال کی اوربتایا کہ چار ڈاکوؤں نے اس سے موٹرسائیکل چھین لی ہے، پولیس نے ڈاکوؤں کا تعاقب کیا تو اس دوران قبرستان دائم الحضوری کے قریب ڈاکوؤں نے پولیس پر فائرنگ شروع کر دی۔

ذرائع نے بتایا کہ پولیس نے بھی جوابی فائرنگ کی جس کے دوران ایک ڈاکو اپنے ہی ساتھیوں کی فائرنگ سے زخمی ہو گیا جسے پولیس نے گرفتار کر لیا جبکہ اس کے دیگر تین ساتھی فرار ہو گئے۔

پولیس کی جانب سے مزید بتایا گیا کہ زخمی ڈاکو رشید عرف بیٹری کو ہسپتال منتقل کیا جا رہا تھا کہ راستہ میں ہی وہ دم توڑ گیا۔

قصور،باغی ٹی وی (ڈسٹرکٹ رپورٹرطارق نوید سندھو) رائے ونڈ روڈ پر خوفناک حادثہ، وین نالے میں گرنے سے 8 افراد جاں بحق، 2 زخمی

قصورمیں رائے ونڈ روڈ پر افسوسناک ٹریفک حادثے میں 8 قیمتی جانیں ضائع ہوگئیں جبکہ 2 افراد شدید زخمی ہو گئے۔ حادثہ اس وقت پیش آیا جب ایک وین بے قابو ہوکر نالے میں جا گری۔

ریسکیو حکام کے مطابق، وین کھارا موڑ کے قریب نالے میں جا گری، جس کے نتیجے میں موقع پر ہی 8 افراد جاں بحق ہو گئے، جبکہ 2 افراد شدید زخمی ہوئے۔ اطلاع ملتے ہی ریسکیو ٹیمیں جائے حادثہ پر پہنچ گئیں اور امدادی کارروائیاں شروع کر دیں۔ لاشوں اور زخمیوں کو فوری طور پر ڈسٹرکٹ ہسپتال منتقل کر دیا گیا۔ وین میں سوار تمام افراد کا تعلق ایک ہی خاندان سے ہے۔

پولیس کے مطابق وین میں سوار افراد ایک شادی کی تقریب سے واپس آ رہے تھے۔ حادثے میں جاں بحق ہونے والوں میں خواجہ سرا بھی شامل ہیں، جس سے یہ واقعہ مزید افسوسناک ہو گیا ہے۔

ریسکیو ذرائع نے بتایا کہ جاں بحق ہونے والوں میں مقصود، سنی، سلیم، عمران، لبا شامل ہیں، 3 افراد کی شناخت نہیں ہوسکی۔

ریسکیو ذرائع کا کہنا ہے کہ ابتدائی تحقیقات کے مطابق حادثہ ڈرائیور کو نیند آنے کے باعث پیش آیا۔ تاہم پولیس مزید تحقیقات کر رہی ہے تاکہ حادثے کی اصل وجوہات کا تعین کیا جا سکے۔