Category: قصور

قصور
نواحی قصبہ کھڈیاں خاص کے معروف کبڈی پلیئر نصراللہ عرف ناصر کو دورانِ ڈکیتی قتل کرنے کا معاملہ

تفصیلات کے مطابق قصور کی تحصیل چونیاں کے تھانہ الہٰ آباد کی حدود مائی رابو کے قریب کچھ عرصہ قبل ڈاکوؤں کی فائرنگ سے معروف کبڈی پلیئر کو قتل کیا گیا تھا

الہ آباد کے نواحی گاؤں گہلن ہٹھاڑ کے رہائشی دو ملزمان، رفاقت ولد رفیق ایبک اور مدثر بشیر ولد محمد بشیر، دونوں کو چونیاں کی مقامی عدالت نے 190 دنوں میں فیصلہ سناتے ہوئے عمر قید اور دس، دس لاکھ روپے جرمانے کی سزا سنا دی
فاضل جج واجد منہاس نے یہ فیصلہ سنایا

واضح رہے کہ ملزمان کا تیسرا ساتھی عامر پہلے ہی پولیس مقابلے میں مارا جا چکا ہے۔

لاہور
نیشنل اکاؤنٹیبلٹی بیورو کو ہاؤسنگ سوسائٹی کے خلاف درخواست موصول
نیشنل اکاؤنٹیبلٹی بیورو (NAB) کو نجی ہاؤسنگ سوسائٹی کے خلاف مبینہ فراڈ کی درخواست موصول ہوئی ہے جس میں شہری محمد عاصم ولد محمد اسماعیل نے سنگین الزامات عائد کئے ہیں
درخواست گزار کے مطابق اس نے نومبر 2021 میں زیتون سٹی ہاؤسنگ سکیم، لاہور میں 5 مرلہ کا رہائشی پلاٹ فائل نمبر ZR-00826-05-RS خریدا جس کے عوض اس نے 3,173,630 روپے ادا کیے ہیں شہری کا کہنا ہے کہ کئی سال گزرنے کے باوجود نہ تو اسے پلاٹ دیا گیا اور نہ ہی رقم واپس کی گئی ہے
درخواست میں مذید مؤقف اختیار کیا گیا ہے کہ متعلقہ سوسائٹی کے ذمہ داران کی جانب سے مسلسل ٹال مٹول سے کام لیا جا رہا ہے جبکہ درخواست گزار کے مطابق وہ مزدور پیشہ ہے اور اپنی جمع پونجی اس منصوبے میں لگا چکا ہے
شہری نے نیب سے مطالبہ کیا ہے کہ زیتون سٹی کی انتظامیہ کے خلاف فوری قانونی کارروائی کی جائے اور اس کی رقم واپس دلوائی جائے اور ذمہ داران کو انصاف کے کٹہرے میں لایا جائے
درخواست گزار نے انصاف کی فراہمی کے لیے اعلیٰ حکام سے فوری نوٹس لینے کی اپیل کی ہے

قصور: سی سی ڈی کی بڑی کارروائی، بدنام زمانہ ڈاکو حبیب عرف حبیبو پولیس مقابلے میں ہلاک
قصور میں جرائم پیشہ عناصر کے خلاف سی سی ڈی کی مؤثر کارروائی کے دوران بدنام زمانہ ڈاکو حبیب عرف حبیبو ہلاک ہو گیا، جو 50 سے زائد مقدمات میں ریکارڈ یافتہ تھا اور علاقے میں خوف کی علامت سمجھا جاتا تھا۔
تفصیلات کے مطابق سی سی ڈی صدر سرکل کی ٹیم قادیونڈ گاؤں کے قریب ریڈ پر مامور تھی کہ اطلاع ملی تین مسلح ڈاکو شہریوں سے لوٹ مار کر رہے ہیں۔ پولیس کے پہنچنے پر ملزمان نے مختلف اطراف سے سیدھی فائرنگ شروع کر دی، جس پر پولیس نے بھی جوابی کارروائی کی۔
فائرنگ کے تبادلے کے دوران ایک ڈاکو حبیب عرف حبیبو ہلاک ہو گیا جبکہ اس کے دو ساتھی فرار ہونے میں کامیاب ہو گئے۔ ہلاک ہونے والا ملزم تھانہ صدر قصور کے گاؤں کھارا کا رہائشی تھا اور سنگین جرائم میں مطلوب تھا۔
سی سی ڈی ٹیم نے موقع سے شہریوں سے چھینی گئی تین موٹر سائیکلیں اور دیگر سامان بھی برآمد کر لیا ہے، جبکہ فرار ہونے والے ملزمان کی گرفتاری کے لیے خصوصی ٹیم تشکیل دے دی گئی ہے
علاقہ مکینوں نے خطرناک ڈاکو کی ہلاکت پر اطمینان کا اظہار کرتے ہوئے سی سی ڈی پولیس کو بھرپور خراج تحسین پیش کیا ہے

قصور
اندرون کوٹ قتل گڑھی کے مکین پینے کے صاف پانی کی شدید قلت کا شکار ہو گئے۔ اہل علاقہ نے اعلیٰ حکام سے مطالبہ کیا ہے کہ ان کے دیرینہ مسئلے کا فوری اور مستقل حل کیا جائے
اہلیان علاقہ کے مطابق اندرون کوٹ قتل گڑھی کو ٹربائن دربار بابا شیر شاہ سے پانی کی فراہمی ہوتی ہے تاہم علاقے کا ایک بڑا حصہ شبہ نما ہونے کی وجہ سے عرصہ دراز سے پینے کے پانی سے محروم چلا آ رہا ہے
متاثرہ حصہ متعدد گھروں پر مشتمل ہے جہاں گرمیوں کے آغاز کے ساتھ ہی پانی کی فراہمی مکمل طور پر بند ہو جاتی ہے جبکہ سردیوں میں بھی صرف محدود وقت کے لیے پانی میسر آتا ہے
مکینوں کا کہنا ہے کہ پانی نہ ہونے کے باعث خواتین، بزرگوں اور بچوں کو دور دراز علاقوں سے پینے کا پانی لانا پڑتا ہے، جس سے شدید مشکلات کا سامنا ہے
شہریوں نے بتایا کہ اس سے قبل بھی متعدد بار متعلقہ محکمہ کو درخواستیں دی جا چکی ہیں اور مسئلے کے مستقل حل کا مطالبہ کیا گیا مگر تاحال کسی قسم کی شنوائی نہیں ہو سکی۔
اہلیان علاقہ مصطفی راجہ،سید منشاءمحسن انصاری، عمران احمد، ذوالفقار احمد، علی احمد و دیگر نے مطالبہ کیا ہے کہ پینے کے پانی کی مستقل فراہمی کو یقینی بنایا جائے، متاثرہ گلیوں میں تیس سال پرانے بوسیدہ پائپ فوری طور پر تبدیل کیے جائیں اور متعلقہ محکمہ کو اس سنگین مسئلے کے حل کے لیے فوری احکامات جاری کیے جائیں تاکہ علاقہ مکینوں کی مشکلات کا خاتمہ ممکن ہو سکے

قصور
کوٹ رادھا کشن میں ہسپتال ملازم کا عورتوں پا سرعام تشدد،ویڈیو وائرل ،پاکستان بھر میں غم و غصہ
تفصیلات کے مطابق گزشتہ دن قصور کی تحصیل کوٹ رادھا کشن کے تحصیل ہیڈ کوارٹر ہسپتال کوٹ رادھا کشن میں خواتین مریضوں پر ڈیوٹی پر موجود ملازم نے بیہمانہ تشدد کیا جس کے نتیجے میں حاملہ خاتون سمیت کئی خواتین زخمی ہو گئیں
عینی شاہدین کے مطابق کوٹ رادھا کشن کی رہائشی خواتین دوائی لینے ہسپتال پہنچیں تو رش کے باعث تقریباً دو گھنٹے تک خوار ہوتی رہیں اور جب مریض خواتین نے ڈاکٹر سے چیک اپ پر اصرار کیا تو ڈیوٹی پر موجود ملازم نے اچانک تشدد شروع کر دیا ملازم کا تھپڑوں، لاتوں اور مکوں کے وار سے سات ماہ کی حاملہ نادیہ بی بی سمیت ثمینہ بی بی اور کرن شہزادی زخمی ہو گئیں
ہسپتال میں موجود دیگر افراد نے فوری طور پر بیچ بچاؤ کر کے خواتین کو مذید تشدد سے بچایا
اس واقعہ کے بعد مریضوں اور شہریوں نے شدید احتجاج کرتے ہوئے کہا کہ حوا کی بیٹیاں محفوظ نہیں رہیں
عوام نے مطالبہ کیا ہے کہ واقعہ کی فوری تحقیقات کر کے ذمہ داروں کو سخت سزا دی جائے تاکہ آئندہ اس قسم کے واقعات کی روک تھام ہو سکے
اس سارے وقوعے کی ویڈیو سوشل میڈیا پر وائرل ہوئی ہے جس کے بعد پاکستان بھر سے اس وقوعہ پر سخت غم و غصہ کا اظہار کیا گیا ہے

قصور
مصطفی آباد (للہانی) نہر میں نہاتے ہوئے نوجوان جاں بحق، شہریوں کا نہروں پر نہانے پر پابندی کا مطالبہ
مصطفی آباد کے علاقے للیانی نہر میں گزشتہ روز ایک افسوسناک واقعہ پیش آیا جہاں ایک نوجوان نہاتے ہوئے ڈوب کر جاں بحق ہوگیا۔ عینی شاہدین کے مطابق نوجوان گرمی کی شدت کے باعث نہر میں نہانے کے لیے اترا، تاہم پانی کے تیز بہاؤ اور گہرائی کے باعث وہ خود کو سنبھال نہ سکا اور ڈوب گیا
واقعے کی اطلاع ملتے ہی ریسکیو اہلکار موقع پر پہنچ گئے اور فوری طور پر تلاش کا عمل شروع کیا گیا۔ کافی کوششوں کے بعد نوجوان کی لاش نکال لی گئی، جس کے بعد علاقے میں فضا سوگوار ہوگئی اور اہل خانہ پر غم کا پہاڑ ٹوٹ پڑا
مقامی شہریوں کا کہنا ہے کہ ہر سال گرمیوں کے موسم میں متعدد نوجوان اور بچے نہروں میں نہاتے ہوئے اپنی جانوں سے ہاتھ دھو بیٹھتے ہیں، لیکن اس سنگین مسئلے کے حل کے لیے مؤثر اقدامات نہیں کیے جاتے۔ شہریوں نے مطالبہ کیا ہے کہ نہروں پر نہانے پر مکمل پابندی عائد کی جائے، حفاظتی باڑ لگائی جائے اور متعلقہ مقامات پر وارننگ بورڈ نصب کیے جائیں تاکہ قیمتی انسانی جانوں کو بچایا جا سکے
شہریوں نے انتظامیہ سے اپیل کی ہے کہ نہروں کے کنارے نگرانی بڑھائی جائے اور خلاف ورزی کرنے والوں کے خلاف سخت کارروائی عمل میں لائی جائے تاکہ آئندہ ایسے افسوسناک واقعات سے بچا جا سکے
واضح رہے کہ حالیہ دنوں میں مختلف علاقوں میں نہروں میں ڈوبنے کے کئی واقعات رپورٹ ہوئے ہیں جہاں تیز بہاؤ اور گہرے پانی کے باعث نوجوان جان کی بازی ہار گئے

قصور
وفاقی حکومت نے پیٹرولیم مصنوعات کی قیمتوں میں بڑا اضافہ کرتے ہوئے عوام پر مہنگائی کا ایک اور بوجھ ڈال دیا۔ ذرائع کے مطابق پیٹرول کی قیمت میں 26 روپے 77 پیسے فی لیٹر اضافہ کیا گیا ہے، جس کے بعد نئی قیمت 393 روپے 35 پیسے فی لیٹر مقرر کر دی گئی ہے، جبکہ ہائی اسپیڈ ڈیزل کی قیمت بھی بڑھا کر 380 روپے 19 پیسے فی لیٹر کر دی گئی ہے۔
پیٹرولیم مصنوعات کی قیمتوں میں اضافے کے فوری اثرات بھی سامنے آنا شروع ہو گئے ہیں۔ گڈز ٹرانسپورٹرز نے کرایوں میں 10 فیصد اضافے کا اعلان کر دیا ہے، جس کے باعث روزمرہ استعمال کی اشیاء، سبزیاں، پھل، آٹا، چینی اور دیگر ضروری سامان مزید مہنگا ہونے کا خدشہ پیدا ہو گیا ہے۔
شہریوں کا کہنا ہے کہ پہلے ہی بجلی، گیس اور اشیائے خوردونوش کی قیمتوں میں مسلسل اضافے نے زندگی اجیرن بنا رکھی تھی، اب پیٹرول اور ڈیزل کی قیمتوں میں ہوشربا اضافے نے غریب اور متوسط طبقے کے لیے جینا مزید دشوار کر دیا ہے۔
عوامی حلقوں نے حکومت پر شدید تنقید کرتے ہوئے کہا ہے کہ حکمران طبقہ اپنی عیاشیاں، مراعات اور اشرافیہ کے اخراجات کم کرنے کے بجائے تمام بوجھ عوام پر ڈال رہا ہے۔ عوام کا کہنا ہے کہ مہنگائی کے اس طوفان میں سفید پوش طبقہ بری طرح پس چکا ہے جبکہ حکومتی ایوانوں میں بیٹھے لوگ اب بھی مراعات سے لطف اندوز ہو رہے ہیں۔
شہریوں نے مطالبہ کیا ہے کہ حکومت فوری طور پر پیٹرولیم قیمتوں میں کمی، اشرافیہ کی مراعات کے خاتمے اور عوام کو حقیقی ریلیف فراہم کرنے کے لیے عملی اقدامات کرے، بصورت دیگر مہنگائی کا یہ طوفان مزید سنگین معاشی بحران کو جنم دے سکتا ہے

قصور بلھے شاہ ڈسٹرکٹ ہسپتال میں سہولیات کا فقدان، مریضوں کو شدید مشکلات کا سامنا، شہریوں کا نوٹس لینے کا مطالبہ۔بلھے شاہ ڈسٹرکٹ ہسپتال قصور میں بنیادی سہولیات کی کمی اور انتظامی مسائل کے باعث مریضوں کو شدید مشکلات کا سامنا ہے۔ شہریوں کا کہنا ہے کہ ہسپتال، جو ضلع بھر کے غریب عوام کے لیے واحد بڑا سہارا سمجھا جاتا ہے، وہاں علاج معالجے کی صورتحال تسلی بخش نہیں رہی۔متاثرہ افراد کے مطابق گائنی وارڈ سمیت مختلف شعبوں میں مریضوں کو بروقت توجہ نہیں دی جاتی اور عملے کے رویّے پر بھی تحفظات کا اظہار کیا جا رہا ہے۔ شہریوں کا کہنا ہے کہ الٹرا ساؤنڈ اور ایکسرے جیسی بنیادی سہولیات کے لیے انہیں باہر نجی لیبارٹریز کا رخ کرنا پڑتا ہے، جبکہ ادویات کی فراہمی بھی محدود ہے اور اکثر دوائیں مارکیٹ سے مہنگے داموں خریدنے کا کہا جاتا ہے۔میڈیا سے گفتگو کرتے ہوئے جمیلاں بی بی، ہارون ثاقب اور احسن علی نے کہا کہ حکومت کی جانب سے صحت کے شعبے میں بہتری کے دعوؤں کے باوجود عملی طور پر مسائل جوں کے توں موجود ہیں۔ ان کا کہنا تھا کہ خاص طور پر خواتین وارڈز میں مریضوں کو زیادہ مشکلات پیش آ رہی ہیں، جس پر فوری توجہ دینے کی ضرورت ہے۔شہریوں نے وزیراعلیٰ پنجاب اور ضلعی انتظامیہ سے مطالبہ کیا ہے کہ ہسپتال میں سہولیات کی فراہمی، عملے کے رویّے کی بہتری اور مفت ادویات کی دستیابی کو یقینی بنایا جائے تاکہ عوام کو معیاری طبی سہولیات میسر آ سکیں اور انہیں دیگر شہروں کا رخ نہ کرنا پڑے

قصور
شہر و گردونواح میں موٹر سائیکل چور گینگ متحرک،شہری لاکھوں روپیہ قیمتی موٹر سائیکل سے محروم،ڈی پی او قصور سے نوٹس کی اپیل

تفصیلات کے مطابق قصور کوٹ غلام محمد کے رہائشی محمد اویس ولد محمد طارق کیساتھ تھانہ سٹی اے ڈویژن قصور کے علاقے سیٹھی کالونی میں موٹر سائیکل چوری کا واقعہ پیش آیا
شہری محمد اویس نے درخواست دی کہ وہ 18 اپریل 2026 کو رات تقریباً 10 بجے گھر پہنچا اور اپنی ہنڈا 125 موٹر سائیکل (رجسٹریشن نمبر AYV-3842، ماڈل 2024، سرخ رنگ بمعہ سیاہ ٹینکی) گھر کے باہر کھڑی کی تو کچھ دیر بعد موٹر سائیکل اسٹارٹ ہونے کی آواز سن کر باہر نکلا تو ایک نامعلوم شخص موٹر سائیکل لے کر فرار ہو چکا تھا
اس سے قبل بھی چوروں نے کئی شہریوں کو ان کی قیمتی موٹر سائیکلوں سے محروم کیا ہے
متاثرہ شہری نے ڈی پی او قصور سے نوٹس لے کر اپنی موٹر سائیکل برآمدگی کی استدعا کی ہے

قصور
بجلی چوروں اور سرکاری ملازمین پر حملہ کرنے والوں کے خلاف کریک ڈاؤن
متعدد مقدمات درج
قصور ضلع بھر میں بجلی چوروں کے خلاف جاری مہم کے دوران متعدد افراد رنگے ہاتھوں پکڑے گئے۔ تفصیلات کے مطابق کوٹ رادھا کشن کے علاقہ آرلہ چھینہ میں ایس ڈی او واپڈا مدثر سحر کی مدعیت میں وقاص وغیرہ کے خلاف مقدمہ درج کیا گیا، ملزمان نے بجلی چوری کی تصاویر بنانے پر واپڈا ٹیم پر دھاوا بول دیا اور تشدد کر کے ڈاکٹر افتخار کو شدید زخمی کر دیا، بعد ازاں ملزمان میٹر ریڈر اسلم اور ڈاکٹر افتخار کو گھسیٹتے ہوئے بیٹھک میں لے گئے اور حبس بے جا میں رکھ کر تشدد کا نشانہ بنایا۔ اسی طرح تھانہ تھہ شیخم کے علاقہ سدھو پورہ میں چوہدری الیاس اور تھانہ صدر پھول نگر کے علاقہ بھگیانہ کلاں میں محمد امین کو ڈائریکٹ تار لگا کر بجلی چوری کرتے ہوئے پائے جانے پر ایس ڈی او تنویر حسین کی مدعیت میں مقدمات درج کر لیے گئے