Category: لاہور

مولانافضل الرحمان کا نقب زنوں کا ساتھ دینا اسلامی تعلیمات کے بھی منافی ہے، عثما ن سعید بسرا

لاہور ۔ یکم اگست(اے پی پی )پاکستان تحریک انصاف پنجاب کے سیکٹری اطلاعات عثما ن سعید بسراء نے کہاہے کہ مولانا فضل الرحمان چلے ہوئے کارتوس ہیں ، وہ جن رہزنوں کے چوری کے مال کا تحفظ کر نا چاہتے ہیں ان کے سیاہ کارنامے سے باخوبی واقف ہیں ، مولانہ فضل الرحمان کا نقب زنوں کا ساتھ دینا اسلامی تعلیمات کے بھی منافی ہے ۔ ایک بیان میں انہوں نے کہاکہ اپوزیشن احتجاج کا شوق پورا کرے لیکن کسی سزا یافتہ شخص کو جلسے جلوسوں کی اجازت نہیں دینگے، مولانا فضل الرحمن آج کل بیروزگار ہیں اور سیاست میں زندہ رہنے کیلئے مدرسے کے بچوں کا استعمال کررہے ہیں ، مولانا فضل الرحمن اصول کے نام پر وصول کی سیاست کرتے ہیں ، ان کا کام نوازشریف اور آصف زرداری کا پیغام ایک دوسرے کو پہنچانا ہے، آل شریف ٹبر قوم سے چار سو بیسی کرتا ہے، لندن میں ڈیلی میل میں شہبازشریف نے گلہ شکوہ کیا ہے ۔

سیاست کو ڈھال بنا کرملکی خزانے کو لوٹنے والوں کا مستقبل تاریک ہو چکا،غلام محی الدین دیوان

لاہور ۔ یکم اگست(اے پی پی )تحریک انصاف کے سینئر مرکز ی رہنما و ممبر کشمیر قانون سازاسمبلی غلام محی الدین دیوان نے کہاہے کہ زر داری اور نواز شریف کی سیاست ختم ہو چکی ۔ سیاست کو ڈھال بنا کرملکی خزانے کو لوٹنے والے سابق کرپٹ حکمرانوں کا مستقبل تاریک ہو چکا ہے ۔ جاری اپنے ایک بیان میں انہوں نے کہا کہ سیاست میں کرپشن کا زہر گھولنے والے آج قومی اداروں سے ریلیف کی بھیک مانگ رہے ہیں ۔ نئے پاکستان میں کرپشن کا قلع قمع کرکے پاکستانی قوم کو خوشحال زندگی دینے کیلئے کوشاں ہیں ۔ سیاسی انتقام کے بانی آج نیب کے احتساب سے کیوں گھبرا رہے ہیں ۔ انکا مزید کہنا تھا کہ اپوز یشن کا شیرازہ بکھر چکا ہے کیو نکہ سب اپنے آپ کو بچانے کی جنگ لڑ رہے ہیں ۔ انہوں نے مزےد کہا کہ سابق حکمرانوں کی وجہ سے آج ملک مشکلات کا شکار ہے ۔ اپوز یشن کا کو ئی احتجاج بھی ان کے سیاہ کامو ں کو سفید نہیں کر سکتا ۔

اپوزیشن منفی مقاصد کےلئے ملک میں افراتفری پیداکرنا چاہتی ہے، ایم شاہ زید خان

لاہور ۔ یکم اگست(اے پی پی )تحریک انصاف کے مرکزی رہنماء ایم شاہ زید خان نے کہاہے کہ (ن) لیگ اور پیپلزپارٹی منفی مقاصد کےلئے ملک میں افراتفری پیداکرنا چاہتی ہے ۔ مریم نواز اور بلاول زرداری اپنے بڑوں کی چوری چھپانے کےلئے شور مچارہے ہیں ۔ اپوزیشن جھوٹ بولنے کی بجائے کرپشن کا جواب دے ۔ ن لیگ اپنے بیانیوں کے تضادات کا شکار ہوچکی ہے ۔ آدھی قیادت ڈیل اور باقی احتجاج کرنا چاہتے ہیں ۔ ان خیالات کا اظہار انہوں نے پارٹی رہنماءوں سے ملاقات کے موقع پر گفتگو کرتے ہوئے کےا ۔ انکا مزید کہنا تھا کہ دن بدن لیگی کارکن بھی اپنی قیادت کا ساتھ چھوڑ رہے ہیں ۔ شہباز شرےف کے دور اقتدار مےں کرپشن کا راج رہا ۔ میگا منصوبوں کے نام پر لوٹ مار کا بازار گرم رکھا گیا ۔ وزیر اعظم کسی کرپٹ سے کوئی سمجھوتہ نہیں کرینگے اور قومی دولت کی ایک ایک پائی واپس لائی جائےگی ۔ ن لیگ ہو یا کوئی اور کسی سے رعایت نہیں ہوگی ۔ انہوں نے کہا کہ سابق حکمران اپنے دورہ امر یکہ پر کروڑوں روپے خر چ کرتے رہے مگر وزیر اعظم عمران خان کی قیادت میں پاکستانی وفد نے سادگی کی نئی مثال قائم کر دی ہے اور انکے دورے کا مقصد ذاتی مفادات نہیں بلکہ ملک وقوم کے مفادات کا تحفظ تھا ۔

لاہور سمیت پنجاب بھرمیں 810 ٹریفک حادثات میں 7افراد جاں بحق،875زخمی

لاہور ۔ یکم اگست(اے پی پی )صوبائی دارالحکومت لاہور سمیت پنجاب بھرمیں 810 ٹریفک حادثات میں 7افراد جاں بحق جبکہ875زخمی ہو گئے ، زخمیوں کوفوری طور پر نزدیکی ضلعی و تحصیل کے ہسپتالوں میں منتقل کیا گیا جبکہ351معمولی زخمی لوگوں کو ریسکیومیڈیکل ٹیمز نے جائے حادثہ پر بروقت پہنچ کرطبی امداد فراہم کی جس کی وجہ سے ہسپتالوں پر بوجھ بھی کم ہوا،ان حادثات میں زیادہ تر تعداد (66فیصد )موٹر سائیکلز حادثات کی ہے، اس لیے وقت کی ضرورت ہے کہ ٹریفک حادثات کی بڑھتی ہوئی شرح کو کم کرنے کے لیے ٹریفک قوانین پر سختی سے عمل کیا جائے اوراولین کے نظم و ضبط کا خیال رکھیں ، اعداد و شمار کے مطابق ریسکیو 1122کے صوبائی مانیٹرنگ سیل کو موصول ہونے والی ایمرجنسی کالز کے مطابق ان ٹریفک حادثات میں 398ڈرائیورز،کم عمرڈرائیور21،مسافر374اور110پیدل چلنے والے افراد متاثر ہوئے ،اعدادو شمار سے ظاہر ہوتا ہے کہ226ٹریفک حادثات کی فون کالز لاہور کنٹر ول روم میں موصول ہوئیں ، جن میں صوبائی دارالحکومت220متاثرین کے ساتھ پہلے، فیصل آباد 86حادثات میں 99متاثرین کے ساتھ دوسرے اورملتان66حادثات میں 74متاثرین کے ساتھ تیسرے نمبرپررہا ۔

انضمام الحق کے بطور چیف سلیکٹر عہدے کی معیاد ختم، پی سی بی حکام نئے چیف سلیکٹر کی تقرری کرینگے

لاہور ۔ یکم اگست(اے پی پی ) انضمام الحق کے بطور چیف سلیکٹر کے عہدے کی معیاد ختم ہوگئی ۔ اب قومی کرکٹ ٹیم کے چیف سلیکٹر کا عہدہ خالی ہوگیا اور پی سی بی کے حکام نئے چیف سلیکٹر کی تقرری کرینگے ۔ انضمام الحق کا کنٹریکٹ 31 جولائی تک تھا ۔ انضمام الحق نے اپریل 2016ء میں قومی کرکٹ ٹیم کے چیف سلیکٹر کا عہدہ سنبھالا تھا ۔ انضمام الحق نے پاکستانی ٹیم کی آخری سلیکشن ورلڈ کپ کےلئے کی تھی لیکن پاکستانی ٹیم ورلڈ کپ سیمی فائنل تک رسائی حاصل نہیں کرسکی ۔ انضمام الحق کے دور میں پاکستان ٹیسٹ ٹیم نے مجموعی طور پر 28 ٹیسٹ میچز کھیلے جن میں میں 10جیتے ،17 ہارے اور ایک برابر رہا جبکہ 68 ون ڈے میچز میں سے 32 میں فتح ،34 میں ناکامی اور 2 کا نتیجہ نہیں نکلا ۔ انضمام الحق کے دور میں پاکستان نے بھارت کو چیمپئنز ٹرافی کے فائنل میں ہرایا ۔ ٹیسٹ میں پاکستان کی ٹیم ساتویں ، ون ڈے میں چھٹے اور ٹی ٹونٹی میں پہلے نمبر پر رہی ۔

محکمہ توانائی کی سالانہ کارکردگی رپورٹ جلد وزیر اعلیٰ کو پیش کروں گا، ڈاکٹر اختر ملک

لاہور ۔ یکم اگست(اے پی پی )محکمہ توانائی نے پاکستان تحریک انصاف حکومت کے آنے کے بعد اپنی پہلی سالانہ رپورٹ تیار کر لی ۔ وزیر توانائی پنجاب ڈاکٹر اختر ملک نے کہا کہ وہ رپورٹ کا جائزہ لے رہے ہیں اور جلد وزیر اعلی پنجاب سردار عثمان بزدار کو پیش کریں گے ۔ انہوں نے کہا کہ وہ بہت جلد پریس کانفرنس کر کے اپنی پہلی سالانہ کارکردگی رپورٹ عوام کے سامنے رکھیں گے ۔ ڈاکٹر اختر ملک نے پنجاب’’سولرائزیشن پراجیکٹ‘‘ پر بات کرتے ہوئے کہا کہ یہ منصوبہ تعلیم اور صحت کے میدان میں واقعی ایک گیم چینجر ثابت ہوگا ۔ انہوں نے کہا کہ15ہزار پرائمری سکول،28سو بنیادی مراکز صحت کے علاوہ یونیورسٹیوں اور دوسرے سرکاری ادارے اس منصوبے سے شمسی توانائی پر منتقل کر دیئے جائیں گے ۔ اس منصوبے سے اسلامیہ یونیورسٹی بہاولپور کوتقریباً10 کروڑ تک سالانہ بجلی کے اخراجات کی مد میں فائدہ ہوگا ۔ ان کا مزید کہنا تھا کہ تقریباً 17 سو ایسے پرائمری سکول بھی اس منصوبے سے فائدہ اٹھا سکیں گے جہاں پچھلے بہتر سالوں میں بجلی نہیں آئی ۔ یہ منصوبہ مکمل عوامی فلاح کا ہے جس سے ماحول دوست بجلی کی فراہمی کے علاوہ شرح خواندگی میں بھی اضافہ ہوگا ۔