Category: لاہور

لاہور ہائیکورٹ نے تین افراد کے قتل کے مقدمے میں تین مرتبہ عمر قید کی سزا پانے والے ملزم ریاست صفدر کو بری کردیا۔

جسٹس امجد رفیق نے ریاست صفدر کی اپیل پر فیصلہ سنایا۔ عدالت نے ایف آئی آر کے اندراج اور میڈیکل رپورٹ میں تاخیر جبکہ گواہوں کے بیانات میں موجود تضادات کو مدنظر رکھتے ہوئے ملزم کو بری کرنے کا حکم دیا۔ڈسکہ پولیس نے ریاست صفدر کے خلاف تین افراد کے قتل کا مقدمہ درج کر رکھا تھا، جس میں ماتحت عدالت نے ملزم کو تین مرتبہ عمر قید کی سزا سنائی تھی۔لاہور ہائیکورٹ نے اپیل پر سماعت کے بعد شواہد اور گواہوں کے بیانات کا جائزہ لیتے ہوئے ملزم کو شک کا فائدہ دیتے ہوئے بری کردیا۔

لاہور میں مسلم لیگ (ن) کے صدر نواز شریف کی زیر صدارت اہم اجلاس ہوا، جس میں ڈپٹی وزیراعظم اور مسلم لیگ (ن) کی دیگر قیادت نے شرکت کی۔ اجلاس میں ملک کی مجموعی صورتحال سمیت اہم سیاسی اور انتظامی معاملات پر تفصیلی مشاورت کی گئی۔

ذرائع کے مطابق اجلاس کے دوران نئے صوبوں کے حوالے سے معاملات بھی زیر غور آئے اور اس ضمن میں مختلف امور پر تبادلہ خیال کیا گیا۔ اجلاس میں ملکی صورتحال اور انتظامی معاملات کے ساتھ عوام کو ریلیف فراہم کرنے کے لیے کیے جانے والے اقدامات کا بھی جائزہ لیا گیا۔

ذرائع کا کہنا ہے کہ اجلاس میں عوام کو ریلیف دینے کے اقدامات پر بھی مشاورت کی گئی، جبکہ نواز شریف کی ہدایت پر وزیراعظم شہباز شریف نے پیٹرول میں ریلیف کا اعلان کیا۔

اجلاس میں مسلم لیگ (ن) کی قیادت نے مختلف سیاسی اور انتظامی امور پر اپنی تجاویز پیش کیں اور موجودہ صورتحال کے تناظر میں آئندہ کے اقدامات سے متعلق بھی غور کیا گیا۔

لاہور: صوبائی دارالحکومت لاہور میں مبینہ طور پر زہریلا کھانا کھانے سے دو بچے جاں بحق ہوگئے جبکہ ان کے والدین کی حالت تشویشناک بتائی جاتی ہے۔ پولیس کے مطابق واقعہ ہربنس پورہ کے علاقے میں پیش آیا، جہاں میاں بیوی اور ان کے دو بچوں نے گزشتہ رات کا بچا ہوا سالن اور آلو گوبھی کھایا۔

پولیس کے مطابق کھانا کھانے کے کچھ ہی دیر بعد چاروں افراد کی حالت اچانک بگڑ گئی، جس پر انہیں فوری طبی امداد کی ضرورت پیش آئی۔ واقعے کی اطلاع ملنے پر ریسکیو اہلکار موقع پر پہنچے اور متاثرہ افراد کو طبی امداد فراہم کرنے کے بعد ہسپتال منتقل کردیا۔

ہسپتال میں زیر علاج دونوں بچے دوران علاج دم توڑ گئے۔ حکام کے مطابق جاں بحق بچوں کی شناخت قدیر اور عاصمہ کے نام سے ہوئی ہے، جبکہ ان کے والدین کی حالت تشویشناک ہے اور انہیں ہسپتال میں طبی امداد فراہم کی جارہی ہے۔

واقعے کی اطلاع ملنے پر کرائم سین یونٹ اور فرانزک ماہرین بھی جائے وقوعہ پر پہنچ گئے۔ فرانزک ٹیم نے صورتحال کا جائزہ لینے کے بعد کھانے کے نمونے اور دیگر شواہد جمع کرنا شروع کردیئے ہیں تاکہ بچوں کی موت اور والدین کی بگڑتی ہوئی حالت کی اصل وجہ کا تعین کیا جاسکے۔ اس سلسلے میں فوڈ ڈپارٹمنٹ کی ٹیم کو بھی طلب کرلیا گیا ہے۔

فرانزک ماہرین کے مطابق ابتدائی طور پر شبہ ظاہر کیا جارہا ہے کہ کھانے میں چھپکلی گرنے کے باعث کھانا زہریلا ہوا، تاہم اس حوالے سے حتمی طور پر کچھ کہنا قبل از وقت ہے۔

حکام کا کہنا ہے کہ واقعے کی اصل وجہ فرانزک اور دیگر تحقیقات مکمل ہونے کے بعد ہی سامنے آئے گی۔ پولیس نے واقعے کی مزید تحقیقات شروع کردی ہیں جبکہ فرانزک ماہرین کی جانب سے جمع کیے گئے کھانے کے نمونوں اور دیگر شواہد کی جانچ کے بعد صورتحال مزید واضح ہونے کا امکان ہے۔

مسلم لیگ ن کے رہنما رانا ثناء اللّٰہ نے کہا ہے کہ صوبوں سے متعلق بحث کا معاملہ جب پارلیمنٹ میں آئے گا تو مسلم لیگ ن اپنا پالیسی بیان دے گی۔

لاہور میں میڈیا سے گفتگو کرتے ہوئے رانا ثناء اللّٰہ نے کہا کہ اگر عوام نئے صوبوں کے قیام کے خواہاں ہیں تو انہیں کوئی نہیں روک سکتا، تاہم عوام کی خواہش کا معاملہ پارلیمنٹ میں زیر بحث آئے گا اور وہیں اس پر فیصلہ ہوگا۔انہوں نے کہا کہ وفاقی وزیر نے پارلیمنٹ میں صوبوں سے متعلق ایسی کوئی بات نہیں کی، جبکہ نئے صوبوں کے معاملے پر بحث پارلیمنٹ میں ہی نتیجہ خیز ہوسکتی ہے۔ ان کے مطابق اکنامک فورم یا سیمینار میں صوبوں کے قیام پر بحث نتیجہ خیز ثابت نہیں ہوگی۔رانا ثناء اللّٰہ کا کہنا تھا کہ مسلم لیگ ن میں نئے صوبوں سے متعلق مؤقف پر مشاورت جاری ہے۔ پارٹی ڈسٹرکٹ اور یونین کونسل کی سطح پر کارکنوں کی سوچ اور رائے کو بھی مدنظر رکھے گی۔انہوں نے واضح کیا کہ نئے صوبے بننے یا نہ بننے کا معاملہ پارلیمنٹ نے طے کرنا ہے۔ ان کا کہنا تھا کہ عوام کی خواہش اور اس سے متعلق فیصلہ بھی پارلیمانی عمل کے ذریعے ہی ہوگا۔

مسلم لیگ ن کے رہنما نے مزید کہا کہ پیپلز پارٹی اور ن لیگ کے درمیان تلخیاں کم ہوئی ہیں۔ انہوں نے بتایا کہ جماعت اسلامی سے ملاقات کے دوران بھی درخواست کی گئی ہے کہ وہ اپنا لانگ مارچ ایک، دو ہفتے مؤخر کردیں۔

عظمیٰ بخاری کی فیک ویڈیو سوشل میڈیا پر وائرل کرنے کے کیس کی سماعت ہوئی

صوبائی وزیر عظمیٰ بخاری سیکیورٹی تھریٹس کے باعث عدالت میں پیش نہ ہو سکیں۔ایڈوکیٹ علی بخاری نے کہا کہ عظمیٰ بخاری کو سیکیورٹی تھریٹس ہیں، میاں علی اشفاق اور جوڈیشل مجسٹریٹ نعیم وٹو صاحب کے درمیان عظمیٰ بخاری کیس میں جملوں کا تبادلہ ہوا،بیرسٹر میاں علی اشفاق نے کہا کہ عظمیٰ بخاری کے وارنٹِ گرفتاری جاری کیے جائیں، ڈی آئی جی آپریشنز لاہور سے کہیں کہ انہیں گرفتار کرکے عدالت میں پیش کریں، آپ عظمیٰ بخاری صاحبہ کو فیور دیتے ہیں، جبکہ میری کلائنٹ فلک جاوید گزشتہ نو ماہ سے جیل میں قید ہیں ،، جوڈیشل مجسٹریٹ نعیم وٹو نے کہا کہ میں کسی کو فیور نہیں کر رہا، میں نے عظمیٰ بخاری کے خلاف کئی مرتبہ سخت آرڈر جاری کیے ،میاں علی اشفاق نے کہا کہ سر، کوئی ایک ایسا آرڈر بتا دیں جس پر عمل درآمد کروا سکے ہوں، فلک جاوید نے کہاکہ اگر عام آدمی عدالت آ سکتا ہے تو صوبائی وزیر عظمیٰ بخاری کیوں نہیں آ سکتیں؟ میاں علی اشفاق نے کہا کہ سیکیورٹی تھریٹ کے باعث عظمیٰ بخاری پیش نہیں ہو سکتیں تو کیا یہ اخذ کرلوں کہ آپ ایک سال تک انہیں فیور دے رہے ہیں؟ عظمیٰ بخاری عدالت میں وکلا اور باہر سیکیورٹی لے کر آتی ہیں، جوڈیشل مجسٹریٹ نعیم وٹو نے کہا کہ میں نے ایک جگہ بھی نہیں کہا کہ عظمیٰ بخاری ٹھیک کر رہی ہیں،

عظمیٰ بخاری فیک ویڈیو کیس کی سماعت کے دوران پولیس نے صحافیوں کو عدالتی کارروائی نوٹ کرنے سے روک دیا۔صحافیوں نے جوڈیشل مجسٹریٹ نعیم وٹو صاحب سے استفسار کیا کہ سر، پولیس ہمیں عدالتی کارروائی نوٹ کرنے سے روک رہی ہے، جس پر عدالت نے کہا کہ ثبوت اور شواہد کی کارروائی کے دوران کوئی صحافی کارروائی نوٹ نہیں کرے گا۔اس موقع پر بیرسٹر میاں علی اشفاق نے مداخلت کرتے ہوئے کہا کہ سر، یہ پبلک کورٹ ہے، صحافی عدالتی کارروائی نوٹ کر سکتے ہیں۔ میں اس حوالے سے آپ کو درخواست بھی دے دوں گا۔بیرسٹر میاں علی اشفاق صاحب کی مداخلت کے بعد صحافیوں کو عدالتی کارروائی رپورٹ کرنے اور نوٹ کرنے کی اجازت دے دی گئی۔

لاہور: پنجاب میں مون سون بارشوں کا نواں اور آخری اسپیل آج سے شروع ہونے کا امکان ہے، جس کے باعث 12 سے 17 ستمبر تک صوبے کے بیشتر اضلاع میں بارشوں کی پیشگوئی کی گئی ہے۔

ترجمان پی ڈی ایم اے کے مطابق راولپنڈی، جہلم، چکوال، تلہ گنگ اور اٹک میں بارش کا امکان ہے، جبکہ لاہور، سیالکوٹ، شیخوپورہ، نارووال، منڈی بہاؤالدین، گوجرانوالہ، گجرات، وزیرآباد، حافظ آباد، قصور، اوکاڑہ اور ننکانہ صاحب میں بھی بادل برس سکتے ہیں۔ترجمان کے مطابق سرگودھا، خوشاب، نورپور تھل، میانوالی، فیصل آباد، جھنگ، ٹوبہ ٹیک سنگھ، لیہ، بھکر، ساہیوال، ڈیرہ غازی خان اور ملتان میں بھی بارش متوقع ہے۔پی ڈی ایم اے نے مری، گلیات اور دیگر پہاڑی علاقوں میں لینڈ سلائیڈنگ کے خدشے سے بھی آگاہ کیا ہے۔

ڈی جی پی ڈی ایم اے کے مطابق راولپنڈی، لاہور، گوجرانوالہ اور فیصل آباد میں شدید بارش کے باعث اربن فلڈنگ کا خدشہ ہے، جس کے پیش نظر متعلقہ اداروں کو ضروری انتظامات مکمل رکھنے کی ہدایت کی گئی ہے۔

پاکستان اسلامک کونسل کے چیئرمین اور جامعہ سعیدیہ سلفیہ کے ڈائریکٹر ڈاکٹر حافظ مسعود اظہر نے سعودی عرب پر حوثی حملوں کی شدید مذمت کرتے ہوئے کہا ہے کہ سعودی عرب پر حملے ارض حرمین کو خطرے میں ڈالنے کے مترادف ہیں جبکہ ارض حرمین شریفین مسلمانوں کے دلوں کی دھڑکن اور پوری امت مسلمہ کی عقیدت و محبت کا مرکز ہے ۔سعودی عرب کی سلامتی اور حرمین شریفین کا امن دنیا بھر کے مسلمانوں کے لیے انتہائی اہم معاملہ ہے ۔کسی بھی قوت کو یہ حق حاصل نہیں کہ وہ مقدس سرزمین کے امن کو خطرے میں ڈالے یا خطے میں بد امنی کو ہوا دے۔ پاکستان کے عوام کے دل سعودی عرب کے ساتھ دھڑکتے ہیں اہل پاکستان کے لیے مکہ مکرمہ اور مدینہ منورہ مقدس شہرہی نہیں بلکہ ایمان عقیدت اور روحانی وابستگی کے عظیم مراکز ہیں ۔پاکستان کا بچہ بچہ ارض حرمین کی حرمت و سلامتی کے لیے اپنا سب کچھ قربان کرنے کے جذبے سے سرشار ہے۔ سعودی عرب کے خلاف کسی بھی جارحیت کو پاکستانی عوام انتہائی تشویش اور اضطراب کی نگاہ سے دیکھتے ہیں۔ ڈاکٹر حافظ مسعود اظہر نے اپنے بیان میں مزید کہا کہ حوثیوں کی جانب سے سعودی عرب کو نشانہ بنانا خطے کے امن کے لیے خطرناک طرز عمل ہے۔سب جانتے ہیں کہ یہ حملے کس کی شہ پر کیے جا رہے ہیں ۔ معاہدہ مکہ کی رو سے پاکستان سعودی عرب کا اتحادی ہے لہذا ضرورت اس امر کی ہے کہ حوثیوں کے پس پردہ قوت کو واضح پیغام دیا جائے کہ وہ آگ سے کھیلنا بند کرے۔ خطے میں کشیدگی بڑھانے کے بجائے امن استحکام اور ذمہ دارانہ طرز عمل اختیار کرے کسی بھی ملک کی سرزمین کو پراکسی تنازعات کے لیے استعمال کرنا پورے خطے کے امن کو تباہی کی طرف لے جا سکتا ہے۔ انہوں نے عالمی برادری اور مسلم ممالک سے مطالبہ کیا کہ سعودی عرب کی خود مختاری اور سلامتی کے تحفظ کے لیے موثر کردار ادا کیا جائے۔ امت مسلمہ کو ایسے تمام اقدامات کے حوصلہ شکنی کرنی چاہیے جو مقدس سرزمین معصوم شہریوں اور خطے کے امن کو خطرے میں ڈالتے ہیں۔

لاہور ہائیکورٹ،افغان میڈیکل طلبہ کو کالجز سے نکالنے کے خلاف لاہور ہائیکورٹ میں درخواست کی سماعت ہوئی

عدالت نے پنجاب کے تمام میڈیکل کالجز کو افغان طلبا کو نکالنے سے روک دیا ،جسٹس خالد اسحاق نے 30 سے زائد افغان طلبا کی درخواستوں پر سماعت کی ،وکیل پی ایم سی نے کہا کہ افغان طلبا کے پاس درستا ویزہی موجود نہیں ہے ،عدالت نے کہا کہ داخلہ دیتے ہوئے ایجوکیشن ویزہ کیسے دیا تھا،چار چار سال انکی زندگی کے ضائع کردیے اب واپس بھیج رہے ہیں،پی ایم ڈی سی کو شاہی حکم آیا جس کے بعد نوٹیفکیشن جاری کردیا ،طلبا کو نکالنے سے پہلے ایک بار تو ان طلبا کو سن لیتے ،جب ان پر پیار ایا ہوا تھا تب پوری دنیا میں ڈھنڈورا پیٹ رہے تھے ،وکیل پی ایم ڈی سی نے کہا کہ پوری دنیا کا اصول ہے کہ ویلڈ ویزہ نہ ہو تو آپ رہ نہیں سکتے ،جسٹس خالد اسحاق نے کہا کہ کل تک فیورٹ چائلڈ تھے اج پالیسی تبدیل ہوگئی،اپ انکو بھی بھیج دیں مگر میڈیکل کی تعلیم مکمل ہونے کے بعد ،مائی لارڈ امریکہ میں بھی آپ درست ویزہ کے بغیر نہیں رہ سکتے ،امریکہ کی عدالتیں آزاد ہیں اور پاکستان میں بھی عدالتیں آزاد ہیں ،آپ ان طلبا کو سزائے موت ہی دے دیں،وکیل پی ایم ڈی سی نے کہا کہ سر یہ ریاستی سکیورٹی کا مسئلہ ہے ،جسٹس خالد اسحاق نے کہا کہ کوئی ریاستی سکیورٹی کا معاملہ نہیں ہے ،کوئی میڈیکل کالج کسی طالب علم نا نکالے گا ،نا ہی انکا پیپر کینسل کرے گا ،عدالت نے درخواست پر کارروائی ائندہ جمعے تک ملتوی کردی

لاہور: پاکستانی پولٹری فارمز میں اینٹی بایوٹکس کے بے دریغ استعمال کے باعث خطرناک اور مزاحم جراثیم (سپر بگز) پھیلنے کا خدشہ پیدا ہوگیا۔

برطانوی اخبار فنانشل ٹائمز کی رپورٹ کے مطابق پاکستان میں پولٹری فارمز پر اینٹی بایوٹکس کے زیادہ استعمال سے ایسے جراثیم کے پھیلاؤ کا خطرہ بڑھ رہا ہے جن پر عام اینٹی بایوٹکس کا اثر کم یا ختم ہو سکتا ہے۔رپورٹ میں بتایا گیا ہے کہ 2023 میں دیہی پنجاب میں کیے گئے ایک سروے کے مطابق 60 فیصد پولٹری فارمز پر بغیر نسخے کے اینٹی بایوٹکس استعمال کی گئیں، جبکہ تقریباً نصف فارمز میں مرغیوں کی افزائش کے لیے بھی ان ادویات کا استعمال کیا گیا۔رپورٹ کے مطابق بعض کمپنیاں قوانین کی خلاف ورزی کرتے ہوئے مرغیوں کی خوراک میں بھی اینٹی بایوٹکس شامل کرتی ہیں۔فنانشل ٹائمز نے خبردار کیا ہے کہ اینٹی بایوٹکس کے بے دریغ استعمال سے مزاحم جراثیم کے زندہ رہنے اور تیزی سے افزائش پانے کے امکانات بڑھ جاتے ہیں، جس کے نتیجے میں عام بیماریوں کا علاج مشکل ہوسکتا ہے۔

لاہور: گورنمنٹ گریجویٹ کالج فار ویمن اسلام پورہ لاہور میں شعبہ علومِ اسلامیہ کے زیر اہتمام سیرت النبی ﷺ کانفرنس کا انعقاد کیا گیا، جس میں سیرتِ طیبہ ﷺ کی روشنی میں معاشرتی اخلاقیات، اصلاح اور تربیت کے مختلف پہلوؤں پر روشنی ڈالی گئی۔

کالج آڈیٹوریم میں منعقدہ کانفرنس کا موضوع ’’معاشرے کی اخلاقیات، اصلاح اور تربیت سیرت النبی ﷺ کی روشنی میں‘‘ تھا۔ کانفرنس کا مقصد سیرتِ طیبہ ﷺ کی روشنی میں کردار سازی، اخلاقی تربیت، معاشرتی اصلاح اور نوجوان نسل کی تربیت کی اہمیت اجاگر کرنا تھا۔کانفرنس سے انسٹیٹیوٹ آف اسلامک اسٹڈیز پنجاب یونیورسٹی لاہور کے سابق ڈین و ریٹائرڈ پروفیسر ڈاکٹر محمد حماد لکھوی، گورنمنٹ کالج یونیورسٹی لاہور کے شعبہ علومِ اسلامیہ و عربی کے ایسوسی ایٹ پروفیسر و چیئرپرسن ڈاکٹر محمد فاروق حیدر اور گورنمنٹ اسلامیہ گریجویٹ کالج کوپر روڈ لاہور کی ریٹائرڈ پروفیسر ڈاکٹر نصرت جبیں نے خطاب کیا،مقررین نے اپنے خطابات میں سچائی، دیانتداری، انصاف، رحمدلی، رواداری اور دوسروں کے احترام جیسی اعلیٰ اخلاقی اقدار کی اہمیت اجاگر کرتے ہوئے کہا کہ حقیقی معاشرتی اصلاح کا آغاز فرد کی اپنی اصلاح سے ہوتا ہے۔ انہوں نے سیرتِ طیبہ ﷺ کو حکمت، صبر، عدل، رحمدلی، عفو و درگزر اور انسانی وقار کا عملی نمونہ قرار دیتے ہوئے کہا کہ آج کے معاشرتی مسائل کے حل کے لیے بھی سیرت النبی ﷺ سے رہنمائی حاصل کی جا سکتی ہے۔

مقررین نے طالبات پر زور دیا کہ وہ اپنی کامیابی کو محض تعلیمی میدان تک محدود نہ رکھیں بلکہ ذمہ دار، بااخلاق اور باشعور شہری بننے کی کوشش کریں۔ انہوں نے طالبات کو ترغیب دی کہ سیرتِ طیبہ ﷺ کی تعلیمات اور اسلامی اقدار کو اپنی ذاتی، تعلیمی، خاندانی اور معاشرتی زندگی کا حصہ بنائیں۔

تقریب کا ایک یادگار اور خوبصورت لمحہ اس وقت سامنے آیا جب یہ معلوم ہوا کہ ڈاکٹر محمد حماد لکھوی اور ڈاکٹر محمد فاروق حیدر کے ساتھ کالج کی پرنسپل ڈاکٹر عابدہ بخاری بھی علمی تعلق رکھتی ہیں اور ڈاکٹر حماد لکھوی ان کے استاد رہ چکے ہیں۔ اس موقع نے استاد اور شاگرد کے دیرپا اور قابلِ احترام رشتے کی خوبصورت عکاسی کی۔کانفرنس کے دوران طالبات نے بھرپور توجہ اور نظم و ضبط کا مظاہرہ کیا۔ تقریب کے اختتام پر پرنسپل ڈاکٹر عابدہ بخاری نے مہمان مقررین کو ان کی گراں قدر علمی و تدریسی خدمات کے اعتراف میں شیلڈز پیش کیں، جبکہ بعد ازاں ڈاکٹر محمد حماد لکھوی نے دعا کروائی۔