Category: میر پور خاص

میرپورخاص، باغی ٹی وی (نامہ نگار سید شاہزیب شاہ) ڈویژنل کمشنر میرپورخاص فیصل احمد عقیلی کی ہدایت پر ایڈیشنل کمشنر ٹو سید ابرار علی شاہ نے میرپورخاص، عمرکوٹ اور تھرپارکر کے تمام اسسٹنٹ کمشنرز سے کمشنر کمیٹی ہال میں ویڈیو لنک کے ذریعے اجلاس منعقد کیا۔

اجلاس میں ایڈیشنل کمشنر ٹو سید ابرار علی شاہ نے ڈویژن بھر کے اسسٹنٹ کمشنرز کو ہدایت کی کہ وہ ریونیو معاملات کے مسائل کے حل، سرکاری زمینوں سے ناجائز قبضہ ہٹانے، اور روزمرہ اشیائے خورد و نوش کی ذخیرہ اندوزی کرنے والے دکانداروں کے خلاف کارروائیوں کو روزانہ کی بنیاد پر اجاگر کریں۔ انہوں نے کہا کہ ان اقدامات کا فائدہ عوام تک پہنچنا چاہیے۔

انہوں نے مزید ہدایت کی کہ ڈویژن اور ضلع سطح پر عوامی فلاحی سرگرمیوں کو بھی فوری طور پر اجاگر کیا جائے اور اس ضمن میں کسی بھی قسم کی مشکلات درپیش ہوں تو انہیں حل کیا جائے۔ تاکہ ڈویژن سطح کی حکومتی سرگرمیوں کو اجاگر کرنے میں مدد مل سکے اور ان کے ثمرات عوام تک پہنچ سکیں۔

اجلاس میں اسسٹنٹ کمشنر شجاع آباد مہوش اعجاز، اسسٹنٹ کمشنر ریونیو مس ارم ناریجو اور دیگر متعلقہ افسران موجود تھے۔

میرپورخاص، باغی ٹی وی (نامہ نگار سید شاہزیب شاہ) ایم کیو ایم پاکستان میرپورخاص کے ڈسٹرکٹ انچارج خالد تبسم اور اراکین زونل کمیٹی نے یونٹ 7 کے انچارج شہزاد بھائی کو عمرے کی ادائیگی پر مبارکباد دی۔

تفصیلات کے مطابق، ایم کیو ایم پاکستان کے ڈسٹرکٹ انچارج خالد تبسم اور ڈسٹرکٹ کمیٹی کے اراکین نے یونٹ 7/C کے انچارج شہزاد بھائی کو عمرے کی ادائیگی پر مبارکباد پیش کی، انہیں پھولوں کے ہار پہنائے اور نیک خواہشات کا اظہار کیا۔

شہزاد بھائی حال ہی میں عمرے کی سعادت حاصل کر کے واپس لوٹے ہیں۔ ان کی واپسی پر میرپورخاص ڈسٹرکٹ کے انچارج خالد تبسم اور زونل کمیٹی کے اراکین نے انہیں مبارکباد دی۔

اس موقع پر سابق ڈسٹرکٹ ممبر سہیل احمد اور یونٹ 7/B کے انچارج علی مرزا بھی موجود تھے۔

میرپورخاص،باغی ٹی وی( نامہ نگار سید شاہزیب شاہ) ک میرپورخاص میں نئے تعینات ہونے والے ایس ایس پی ڈاکٹر سمیر نور چنہ نے چارج سنبھال لیا۔

ایس ایس پی آفس پہنچنے پر پولیس کے چاک و چوبند دستے نے انہیں سلامی دی۔ آفس سپرنٹنڈنٹ علی حسن دل، آر آئی لائن منور آرائیں، انچارج کمپلین سیل اسماعیل قائمخانی، اکاؤنٹنٹ راجہ آفتاب اور دیگر افسران نے ان کا استقبال کیا۔

چارج سنبھالنے کے بعد ایس ایس پی نے مختلف برانچز کا دورہ کیا اور متعلقہ افسران کو ہدایات جاری کیں کہ محکمے کی بہتری اور عوام و ملازمین کے مسائل بروقت حل کیے جائیں۔ انہوں نے اسٹاف کو ہر صورت ڈسپلن برقرار رکھنے، میرٹ کو یقینی بنانے اور پولیس یونیفارم کی عزت و وقار کو بحال رکھنے کے لیے ٹیم ورک کے تحت کام کرنے کی ہدایت کی۔

میرپورخاص،باغی ٹی وی (نامہ نگار سید شاہزیب شاہ) میرپورخاص میں صفائی کی ناقص صورتحال پر شہریوں اور تاجروں کا شدید احتجاج، میئر اور یو سی چیئرمین ایک دوسرے پر ذمہ داری ڈالنے لگے۔

بھانسنگھ آباد کے مکین اور دکاندار غلاظت کے ڈھیر اور گندے پانی کے جوہڑوں میں گھرے ہوئے ہیں، مگر میونسپل انتظامیہ اور منتخب نمائندے خاموش تماشائی بنے بیٹھے ہیں۔

جامع فضل ربی مسجد کے خطیب مفتی ایوب سکندری نے انتظامیہ کو خبردار کرتے ہوئے کہا کہ اگر جمعرات سے پہلے صفائی نہ ہوئی تو احتجاج کریں گے اور میونسپل حکام کو بتائیں گے کہ حق کیسے لیا جاتا ہے۔

انہوں نے مزید کہا کہ شب برأت عبادت اور توبہ کا موقع ہے، لیکن گندگی اور تعفن نے شہریوں کو پریشان کر رکھا ہے۔ انہوں نے میئر میرپورخاص عبدالرؤف غوری کو تنقید کا نشانہ بناتے ہوئے کہا کہ وہ پھولوں کی نمائش کے اجلاس کر رہے ہیں جبکہ شہری بدبو اور گندگی میں زندگی گزارنے پر مجبور ہیں۔

دکانداروں کا کہنا ہے کہ میئر اور یو سی چیئرمین ایک دوسرے پر ذمہ داری ڈال رہے ہیں، عوام جائے تو کہاں جائے؟۔ یو سی چیئرمین رزاق ہاشوانی نے عارضی طور پر مسئلہ حل کیا، مگر دو دن بعد ہی ڈرینج کا پانی دوبارہ سڑکوں پر آ گیا۔

عوام نے الزام لگایا کہ فنڈز آ رہے ہیں، مگر شہریوں کو اس کا فائدہ نہیں پہنچ رہا، تمام پیسے انتظامیہ ہڑپ کر جاتی ہے۔ دوسری جانب میئر میرپورخاص عبدالرؤف غوری کا مؤقف ہے کہ اب صفائی کا کام یونین کونسل چیئرمینوں کی ذمہ داری ہے۔

شہریوں نے حکام بالا سے فوری ایکشن لینے کا مطالبہ کیا ہے تاکہ صفائی کی صورتحال کو بہتر بنایا جا سکے اور عوام کو بنیادی سہولیات فراہم کی جا سکیں۔

میرپورخاص،باغی ٹی وی (نامہ نگار سید شاہزیب شاہ) الخدمت فاؤنڈیشن میرپورخاص نے اپنی روایت برقرار رکھتے ہوئے اس سال بھی غریب اور بے سہارا افراد میں ونٹر پیکج کے تحت لحاف، رضائیاں، گدے اور تکیے تقسیم کیے۔

اس سلسلے میں جامعۃ الہدی میرپورخاص میں ایک خصوصی تقریب منعقد کی گئی، جہاں شہر بھر سے 80 مستحق مرد و خواتین کو سردی سے بچاؤ کے لیے ضروری سامان فراہم کیا گیا۔

تقریب سے خطاب کرتے ہوئے الخدمت فاؤنڈیشن میرپورخاص کے صدر عرفان الحق قریشی، سماجی خدمات کے انچارج نادر خان اور نائب امیر جماعت اسلامی میرپورخاص مفتی تحسین احمد بھٹو نے کہا کہ الخدمت فاؤنڈیشن نہ صرف ملک بلکہ عالمی سطح پر بھی ناگہانی آفات میں ہمیشہ پیش پیش رہتی ہے اور عوام کو ہر ممکن مدد فراہم کرنے کے لیے ہر وقت تیار ہے۔

انہوں نے مزید کہا کہ الخدمت فاؤنڈیشن کا بنیادی مقصد معاشرتی خدمات کے ذریعے ضرورت مند افراد کی مدد کرنا اور انہیں شدید سردی سے محفوظ رکھنا ہے۔ تنظیم آئندہ بھی فلاحی سرگرمیوں کا سلسلہ جاری رکھے گی تاکہ معاشرتی بہبود میں مزید بہتری لائی جا سکے۔

میرپورخاص (باغی ٹی وی نامہ نگار سید شاہزیب شاہ) پاکستان تحریک انصاف (پی ٹی آئی) میرپورخاص ڈویژن کے صدر افتاب حسین قریشی اور سندھ کے نائب صدر ملک راجا عبدالحق نے عمرکوٹ روڈ پر بچہ بند کے قریب غیر قانونی ٹول ٹیکس کے خلاف سول سوسائٹی اور مقامی مکینوں کے احتجاج میں شرکت کی۔

مظاہرین نے غیر قانونی ٹول ٹیکس کو عوام پر اضافی بوجھ قرار دیتے ہوئے اس کے فوری خاتمے کا مطالبہ کیا۔ مقررین نے کہا کہ یہ غیر قانونی وصولی عوام کے ساتھ زیادتی ہے اور اسے کسی صورت قبول نہیں کیا جائے گا۔

پی ٹی آئی رہنماؤں نے احتجاجی مظاہرین سے خطاب میں کہا کہ پارٹی عوامی حقوق کے لیے ہر سطح پر آواز بلند کرے گی، اور اگر ٹیکس فوری طور پر ختم نہ کیا گیا تو مزید سخت احتجاج کیا جائے گا۔

احتجاج میں شہریوں، ٹرانسپورٹرز اور مختلف طبقہ فکر سے تعلق رکھنے والے افراد کی بڑی تعداد نے شرکت کی اور حکومت سے فوری اقدامات کا مطالبہ کیا۔

میرپورخاص (باغی ٹی وی، نامہ نگار سید شاہزیب شاہ): ملک بھر میں طلبہ یونین کی بحالی کے مطالبے کے حق میں طلبہ اتحاد نے ریلی نکالی اور پریس کلب کے سامنے احتجاج کیا۔

سرمد لغاری، واجد لغاری، کامریڈ پرشوتم داس اور دیگر رہنماؤں نے خطاب کرتے ہوئے کہا کہ 9 فروری 1984 کو ایک آمر نے طلبہ یونین پر پابندی عائد کی، جس کے منفی اثرات آج بھی سیاست اور تعلیمی اداروں پر نمایاں ہیں۔ انہوں نے اعلان کیا کہ یونین کی بحالی کے لیے ہر فورم پر آواز بلند کی جائے گی تاکہ طلبہ کو اپنی نمائندگی کا حق مل سکے۔

"طلبہ یونین کی غیر موجودگی سے سیاست جاگیرداروں کے قبضے میں چلی گئی”
مقررین کا کہنا تھا کہ طلبہ یونین پر پابندی سے سیاست پر منفی اثرات مرتب ہوئے اور جاگیردار و سرمایہ دار طبقے نے اس پر قبضہ جما لیا۔ انہوں نے طلبہ یونین کو "حقیقی عوامی قیادت کی نرسری” قرار دیتے ہوئے کہا کہ اس کی بحالی ناگزیر ہے تاکہ طلبہ کے حقوق کا تحفظ کیا جا سکے۔

"اجتماعات پر پابندی آئینی حقوق کی خلاف ورزی”
مقررین نے تعلیمی اداروں میں طلبہ اجتماعات پر پابندی کو آئین کے آرٹیکل 17 اور آزادیٔ اظہارِ رائے کی خلاف ورزی قرار دیا۔ انہوں نے حکومت سے مطالبہ کیا کہ طلبہ یونین کو فوری بحال کیا جائے تاکہ تعلیمی اداروں میں جمہوری روایات کو فروغ ملے اور نوجوان نسل کو قیادت کے مواقع فراہم کیے جا سکیں۔

میرپورخاص (باغی ٹی وی، نامہ نگار سید شاہزیب شاہ): وفاقی حکومت کی جانب سے دریائے سندھ سے چھ نئے کینال نکالنے، ایگریکلچر انکم ٹیکس کے نفاذ اور سندھ کی زمینوں کو کارپوریٹ فارمنگ کے نام پر تقسیم کرنے کے خلاف قومی عوامی تحریک نے بھرپور احتجاج کیا۔

مرکزی صدر ایاز لطیف پلیجو، مرکزی نائب صدر کرڑ رباری، جنرل سیکریٹری مظہر راہوجو، سینئر رہنما منظور احمد رضی اور دیگر قائدین کی قیادت میں اسٹیشن چوک سے مقامی پریس کلب تک احتجاجی ریلی نکالی گئی، جس میں آبادگاروں، کسانوں، تاجروں، وکلاء اور شہریوں کی بڑی تعداد شریک تھی۔

احتجاجی ریلی کے شرکاء نے شدید نعرے بازی کی۔ مقررین نے خطاب میں کہا کہ سندھ حکومت اور آصف علی زرداری دریائے سندھ کے پانی کو فروخت کر رہے ہیں، جبکہ حکومت پنجاب اسے خرید رہی ہے، جو کسی صورت قبول نہیں۔ انہوں نے واضح کیا کہ یہ صرف کسانوں اور آبادگاروں کا نہیں بلکہ پورے سندھ کی معیشت کا مسئلہ ہے۔

قومی عوامی تحریک کے رہنماؤں نے خبردار کیا کہ اگر دریائے سندھ سے نئے کینال نکالے گئے تو سندھ کی زراعت، شوگر ملز، کاٹن فیکٹریاں، آئل ملز اور زرعی صنعتیں تباہ ہو جائیں گی، جس سے ہزاروں افراد بے روزگار ہو جائیں گے۔ انہوں نے کہا کہ پہلے کالاباغ ڈیم کے ذریعے سندھ پر حملے کی کوشش کی گئی، اب نئے کینال کے ذریعے سندھ کے مستقبل کو تباہ کرنے کی سازش ہو رہی ہے۔

مقررین نے کہا کہ زرعی ٹیکس کسانوں پر ظلم کے مترادف ہے اور سندھ کی زمینوں کی بندر بانٹ کسی صورت قابل قبول نہیں۔ انہوں نے حکومت سے مطالبہ کیا کہ فوری طور پر اس فیصلے کو واپس لیا جائے، بصورت دیگر احتجاج کا دائرہ مزید وسیع کیا جائے گا۔

ریلی میں سندھیانی تحریک کی مرکزی صدر زینت سموں، جنرل سیکریٹری نصرت خاصخیلی، کامریڈ رازو مل کولہی، انور نوحانی سمیت سینکڑوں افراد شریک تھے، جنہوں نے حکومت مخالف شدید نعرے بازی کی۔

میرپورخاص،باغی ٹی وی(نامہ نگارشاہزیب شاہ کی رپورٹ) نیشنل پریس کلب کا اہم اجلاس، صحافت کی بہتری کے لیے لائحہ عمل طے

تفصیل کے مطابق نیشنل پریس کلب میرپورخاص میں تمام ممبران کا ایک اہم اجلاس منعقد ہوا، جس کا باقاعدہ آغاز تلاوتِ قرآنِ مجید سے کیا گیا۔ اجلاس میں ممبران نے صحافت کی بہتری اور درپیش چیلنجز پر تبادلہ خیال کیا اور آئندہ کے لائحہ عمل پر غور کیا گیا۔

اجلاس میں سینئر ممبران نے اس بات پر زور دیا کہ نئے صحافیوں کو آگے آکر صحافت کی خدمت کرنی چاہیے، تاکہ شعبہ مزید ترقی کرے۔ جونیئر ممبران نے اس بات پر اتفاق کیا کہ سینئر صحافیوں کی عزت کرنا اور ان سے سیکھنا ہی کامیاب صحافت کی بنیاد ہے۔

اجلاس کے دوران تمام ممبران نے محبت، یگانگت اور نظم و ضبط کے ساتھ کام کرنے کا عزم کیا اور ایک دوسرے سے مستقل رابطے میں رہنے کا فیصلہ کیا۔

اجلاس میں نیشنل پریس کلب کے سرپرست آفاق احمد خان کو خصوصی طور پر مدعو کیا گیا، جنہوں نے صحافت کے نشیب و فراز اور اس کے اصولوں پر روشنی ڈالی۔

اجلاس میں آفاق احمد خان، قمرالدین شیخ، سہیل احمد خان، حیات قریشی، اقبال سولنگی، لیاقت علی شاہ، محمد خالد، اسد بلوچ، وسیم خانزادہ، مبین چانہیو، رضی انصار، محمد علی بھرگڑی، سید شاہزیب شاہ، اشفاق قریشی، شہریار بلند، احتشام قریشی، محمد رضوان ملک، سید آصف علی شاہ، امام الدین شاہ اور وقاص سمیت دیگر ممبران نے شرکت کی۔

اجلاس کا اختتام اس عزم کے ساتھ کیا گیا کہ نیشنل پریس کلب میرپورخاص کی روایات کو برقرار رکھتے ہوئے صحافت کی ترقی اور سچائی کی ترجمانی جاری رکھی جائے گی۔