Category: میر پور خاص

میرپورخاص(باغی ٹی وی رپورٹ)میرپورخاص اور سانگھڑ سمیت سندھ کے بعض شہروں میں بارش سے سردی کی شدت بڑھ گئی۔

جمعہ کی رات میرپورخاص اور سانگھڑ سمیت سندھ کے مختلف شہروں میں بارش سے سردی میں اضافہ ہوگیا۔

محکمہ موسمیات کے مطابق لاہور، قصور، سیالکوٹ، ناروال،بہاولپور میں آج بارش کا امکان ہے۔پاکپتن،بہاولنگر،شیخوپورہ،ساہیوال اور اوکاڑہ میں بھی بارش متوقع ہے۔

محکمہ موسمیات کا کہنا ہے کہ ملک کے بیشتر علاقوں میں موسم سرد اورخشک رہنے کی توقع ہے،غیر معمولی شدت یا تاریخی سردی کی کوئی تصدیق نہیں کی گئی۔

میرپورخاص،باغی ٹی وی (نامہ نگارسیدشاہزیب شاہ کی رپورٹ) مہنگائی کے طوفان نے عوام کی چیخیں نکال دیں، ضلعی انتظامیہ بے بس

تفصیلات کے مطابق میرپورخاص میں مہنگائی کا نیا طوفان نے شہر بھر میں عوام کی مشکلات میں اضافہ کر دیا ہے، جس سے روزمرہ استعمال کی اشیاء کی قیمتوں میں ہوشربا اضافہ ہوگیا ہے۔ گوشت، سبزیاں، دالیں، گھی، تیل اور دیگر اشیاء کی قیمتوں میں یکمشت اضافے نے عوام کی قوتِ خرید کو سخت متاثر کیا ہے اور ضلعی انتظامیہ قیمتوں پر کنٹرول کرنے میں ناکام ہو گئی ہے۔

میرپورخاص میں گوشت، سبزیوں، دالوں، گھی، تیل اور دیگر روزمرہ اشیاء کی قیمتوں میں اچانک 80 سے 100 روپے تک کا اضافہ ہوگیا ہے۔ پیاز کی قیمت 150 روپے فی کلو، لہسن 680 روپے فی کلو، ادرک 480 روپے فی کلو اور ٹماٹر 180 روپے فی کلو تک فروخت ہو رہے ہیں۔ اسی طرح مرغی کا گوشت بھی 660 روپے فی کلو کے حساب سے فروخت ہو رہا ہے، جس نے عوام کی چیخیں نکال دی ہیں۔

مصالحہ جات اور دیگر ضروری اشیاء کی قیمتوں میں بھی ہوشربا اضافہ کیا گیا ہے، جس نے شہریوں کی زندگی مزید دشوار کر دی ہے۔ دوسری جانب ضلعی انتظامیہ قیمتوں پر کنٹرول کرنے میں بری طرح ناکام ہو گئی ہے، جس سے عوام میں شدید بے چینی اور احتجاج کا ماحول ہے۔

میرپورخاص کی عوام حکومت سندھ، کمشنر اور ڈپٹی کمشنر سے مطالبہ کرتی ہے کہ وہ فوری طور پر روزمرہ استعمال کی اشیاء کی قیمتوں پر قابو پائیں اور منافع خوروں کے خلاف سخت کارروائی کریں تاکہ غریب عوام کو ریلیف مل سکے۔

میرپورخاص(باغی ٹی وی، نامہ نگار سید شاہزیب شاہ کی رپورٹ )ایم کیو ایم پاکستان کے رہنماﺅں نے ایس ای حیسکو امیر میمن سے ملاقات کی، جس میں نئے ٹرانسفارمرز کی تنصیب، بلاجواز ڈیڈیکشن بلز، کمرشل اور رہائشی علاقوں میں بجلی کی طویل بندش، اور واجبات کی وصولی کے مسائل پر بات چیت کی گئی۔

وفد میں شامل ڈاکٹر ظفر کمالی، سلیم رزاق، شفیق احمد، خالد تبسم اور آفاق احمد خان نے کوٹ غلام محمد، میرواہ اور میرپورخاص میں بجلی کے مسائل پر اپنے تحفظات کا اظہار کیا اور ان کے فوری حل کی ضرورت پر زور دیا۔

بات چیت کے دوران متحدہ رہنماؤں اور حیسکو حکام نے آئندہ مسائل کو باہمی مشاورت سے حل کرنے پر اتفاق کیا۔ ایس ای حیسکو امیر میمن نے تعاون کی مکمل یقین دہانی کرائی۔

میرپورخاص (باغی ٹی وی،نامہ نگار سید شاہزیب شاہ کی رپورٹ) میرپورخاص میں جلد وفاقی یونیورسٹی کیمپس کا قیام عمل میں لایا جائے گا، جس سے نہ صرف میرپورخاص بلکہ سانگھڑ، عمر کوٹ، اور تھرپارکر کے باصلاحیت طلباء مستفید ہوں گے۔ یہ بات ایم کیو ایم پاکستان کے چیئرمین ڈاکٹر خالد مقبول صدیقی نے انسٹی ٹیوٹ فار ٹیکنالوجی اینڈ مینجمنٹ سائنسز حیدرآباد کی افتتاحی تقریب کے بعد میرپورخاص ڈسٹرکٹ کے عہدیداران سے ملاقات کے دوران کہی۔

ڈاکٹر خالد مقبول صدیقی نے کہا کہ آرٹیفیشل انٹیلی جنس اور بائیوٹیکنالوجی جیسے جدید علوم مستقبل کی دنیا کو یکسر تبدیل کر دیں گے اور ان چیلنجز کا سامنا کرنے کے لیے جدید تعلیم کا حصول ناگزیر ہے۔ انہوں نے کہا کہ وفاقی یونیورسٹی کے طلباء میرپورخاص سمیت صوبے اور ملک کی ترقی میں اہم کردار ادا کریں گے۔

ایم کیو ایم پاکستان کے چیئرمین نے کہا کہ ان کی جماعت پورے ملک میں جامعات قائم کرکے علم و آگہی کی روشنی پھیلانے کے لیے پرعزم ہے۔ جلد ہی میرپورخاص میں وفاقی یونیورسٹی کیمپس کا سنگ بنیاد رکھا جائے گا، جو تعلیمی ترقی کا ایک اہم سنگ میل ہوگا۔

اس موقع پر ایم کیو ایم پاکستان میرپورخاص ڈسٹرکٹ کے انچارج خالد تبسم، جوائنٹ ڈسٹرکٹ انچارج آفاق احمد خان، اور رکن ڈسٹرکٹ کمیٹی اسلم قریشی سمیت دیگر اہم عہدیداران موجود تھے۔ ایس ٹی سی انچارج سلیم رزاق، نواب شاہ ڈسٹرکٹ کے انچارج معظم خان، اور سندھ تنظیمی کمیٹی کے دیگر اراکین نے بھی تقریب میں شرکت کی اور یونیورسٹی کے قیام کے لیے ایم کیو ایم کے اقدامات کو سراہا۔

ڈاکٹر خالد مقبول صدیقی نے اس بات پر زور دیا کہ یونیورسٹی کے قیام سے مقامی طلباء کو بہتر تعلیمی مواقع میسر آئیں گے اور یہ خطہ تعلیمی میدان میں نمایاں ترقی کرے گا۔

میرپورخاص(باغی ٹی وی نامہ نگار سید شاہزیب شاہ ) دی زیبیسٹ اسکول میں فوڈ فیسٹیول کا شاندار انعقاد

میرپورخاص کے معروف دی زیبیسٹ پرائیویٹ اسکول اینڈ کالج میں انتظامیہ کی جانب سے فوڈ فیسٹیول کا اہتمام کیا گیا۔ تقریب کے مہمان خصوصی ڈپٹی ڈائریکٹر پرائیویٹ اسکول عبدالہادی داؤدپوتہ اور ڈائریکٹر پرائیویٹ اسکول مظفر حسین بھرگڑی تھے، جنہیں سندھی ثقافت کی علامت اجرک کا تحفہ پیش کیا گیا۔

ڈپٹی ڈائریکٹر عبدالہادی داؤدپوتہ نے فیسٹیول کی تعریف کرتے ہوئے کہا کہ زیبیسٹ اسکول کا تعلیمی معیار مثالی ہے، اور ایسے تقریبات طلباء و طالبات کی تخلیقی صلاحیتوں کو ابھارنے میں اہم کردار ادا کرتی ہیں۔ انہوں نے دیگر اسکولوں کو بھی اس قسم کے پروگرام منعقد کرنے کی تجویز دی۔

اس موقع پر اسکول کے پرنسپل رمیش کمار مالھی نے بتایا کہ اسکول نہ صرف معیاری تعلیم فراہم کرتا ہے بلکہ طلباء و طالبات میں معاشرتی شعور بیدار کرنے کے لیے فوڈ فیسٹیول جیسی سرگرمیاں ہر سال منعقد کرتا ہے۔

تقریب میں طلباء و طالبات نے نت نئے کھانوں کے اسٹال لگائے، جن میں کے ایف سی سمیت دیگر ریسٹورنٹس اور طلباء کے گھریلو تیار کردہ پکوان شامل تھے۔ پروگرام کے دوران طلباء نے اپنی تخلیقی صلاحیتوں کا مظاہرہ کیا، جبکہ کمپیئرنگ دی زیبیسٹ کالج کے ہونہار طالب علم نعمان سعید نے کی۔

آخر میں مہمان خصوصی، طلباء اور انتظامیہ کے ساتھ فوٹو سیشن کے ذریعے تقریب کا اختتام ہوا۔

میرپورخاص (باغی ٹی وی،نامہ نگارسیدشاہزیب شاہ)برٹش ڈپٹی ہائی کمشنر اور ڈائریکٹر ٹریڈ پاکستان سارہ مونی نے جناح ہال میونسپل کارپوریشن میں ایم این اے نوابزادہ میر منور علی خان ٹالپر اور میئر میرپورخاص عبدالرؤف غوری سے ملاقات کی۔

میئر عبدالرؤف غوری نے ملاقات کے دوران شہر کے مسائل پر ڈپٹی ہائی کمشنر کو تفصیلی بریفنگ دیتے ہوئے کہا کہ شہر کے بنیادی مسائل کے حل کے لیے کوششیں جاری ہیں۔

ایم این اے نوابزادہ میر منور علی خان ٹالپر اور میئر میرپورخاص نے ڈپٹی ہائی کمشنر کو سندھ کی ثقافت کی علامت اجرک اور لنگی کے تحائف پیش کیے۔

اس موقع پر نوابزادہ میر اللہ داد خان ٹالپر، ڈپٹی میئر سمیرہ بلوچ، چیئرمین ٹاؤن سید خادم علی شاہ، شازل شاہ اور یوسی چیئرمین بھی موجود تھے۔