میرپورخاص (باغی ٹی وی نامہ نگار سید شاہزیب شاہ)مرکزی مسلم لیگ میرپورخاص کی جانب سے 28 مئی یومِ تکبیر کے موقع پر ایک شاندار ریلی کا انعقاد کیا گیا، جس میں پارٹی رہنماؤں اور کارکنان نے بھرپور شرکت کی۔ ریلی سے خطاب کرتے ہوئے صدر مرکزی مسلم لیگ میرپورخاص اور دیگر مقررین نے کہا کہ یومِ تکبیر پاکستان کی قومی غیرت، خودمختاری اور ایٹمی دفاعی صلاحیت کی علامت ہے۔
مقررین نے کہا کہ 28 مئی 1998 وہ دن ہے جب پاکستان نے چاغی کے پہاڑوں میں کامیاب ایٹمی دھماکے کر کے دنیا کو بتا دیا کہ پاکستان نہ صرف ایک خودمختار ریاست ہے بلکہ اپنے دفاع کے لیے ہر ممکن اقدام کرنے کی طاقت بھی رکھتا ہے۔ یہ کامیابی ڈاکٹر عبدالقدیر خان اور اُن کی ٹیم کی برسوں کی انتھک محنت کا نتیجہ تھی، جس نے پاکستان کو دنیا کی ساتویں اور اسلامی دنیا کی پہلی ایٹمی طاقت بنا دیا۔
مقررین نے اس موقع پر بھارت کے 1974 اور 1998 کے ایٹمی دھماکوں کا حوالہ دیتے ہوئے کہا کہ پاکستان نے عالمی دباؤ، پابندیوں اور شدید اندرونی و بیرونی چیلنجز کے باوجود بروقت اور جرأت مندانہ فیصلہ کرتے ہوئے ایٹمی تجربات کیے، جو ملکی دفاع کو ناقابلِ تسخیر بنانے کی سمت ایک سنگِ میل ثابت ہوئے۔
ریلی کے شرکاء سے خطاب میں کہا گیا کہ یومِ تکبیر صرف ایٹمی طاقت بننے کی یادگار نہیں بلکہ قومی اتحاد، سائنسی ترقی اور حب الوطنی کا استعارہ ہے۔ اس دن پوری قوم نے تمام تر سیاسی، سماجی اور نظریاتی اختلافات کو بالائے طاق رکھتے ہوئے قومی سلامتی پر یکجہتی کا مظاہرہ کیا۔
مقررین نے زور دیا کہ آج کے دور میں بھی یومِ تکبیر ہمیں یہ پیغام دیتا ہے کہ صرف دفاعی صلاحیت نہیں، بلکہ تعلیم، معیشت، سائنس اور قومی اتحاد بھی ایک خودمختار اور باوقار ریاست کے اہم ستون ہیں۔ اس دن کی یاد ہمیں مسلسل ترقی، خودانحصاری اور قومی مفادات کے تحفظ کے عزم کی تجدید کا موقع فراہم کرتی ہے۔
ریلی کا اختتام دعاؤں اور قومی نغموں کے ساتھ کیا گیا، جہاں شرکاء نے وطن سے محبت اور دفاع پاکستان کے عزم کا اعادہ کیا۔
