Category: میر پور خاص

میرپور خاص ( نامہ نگار سید شاہزیب شاہ کی رپورٹ)میرپور خاص ڈویژن میں تعلیم، آرٹس، سائنس، اسپورٹس، ثقافت اور ماحول کے تحفظ کے فروغ کے لیے ایک انڈومینٹ فنڈ قائم کیا جا رہا ہے۔ ان خیالات کا اظہار ایڈیشنل کمشنر ٹو سید ابرار علی شاہ نے کمشنر کمیٹی ہال میں نجی بینک کے نمائندوں کے ساتھ ایک اجلاس کی صدارت کرتے ہوئے کیا۔

انہوں نے مزید کہا کہ اس انڈومینٹ فنڈ کے آغاز سے ڈویژن بھر میں تعلیم، آرٹس، سائنس، اسپورٹس، کلچر اور ماحول کے تحفظ کے شعبوں میں مدد ملے گی اور ان شعبہ جات کی ترقی کے لیے بھی کام کیا جائے گا۔ سید ابرار علی شاہ نے بتایا کہ یہ انڈومینٹ فنڈ نجی بینک اور کمشنر آفس کے باہمی اشتراک سے شروع کیا جا رہا ہے۔

میرپورخاص (نامہ نگارسید شاہزیب شاہ) میرپورخاص تعلیمی بورڈ کے زیر اہتمام سالانہ امتحانات 2025 کے آغاز کے ساتھ ہی نقل کی روایت برقرار رہی۔ دسویں جماعت کے انگلش کے پرچے کے دوران نقل عروج پر رہی، اور طلبہ موبائل فون کے ذریعے کھلے عام پرچہ حل کرتے نظر آئے۔

کمپری ہینسو ہائیر سیکنڈری اسکول کی پرنسپل نوشین اقبال نے بتایا کہ سینٹر میں 300 سے 450 طلبہ کی گنجائش ہے، لیکن 600 سے زائد طلبہ امتحان دے رہے ہیں۔ فرنیچر کی کمی کے باعث کچھ طلبہ زمین پر بیٹھے نظر آئے۔ پرنسپل کے مطابق یہ مدرسے کے طلبہ تھے اور انہوں نے خود زمین پر بیٹھنے کو ترجیح دی۔

انچارج امتحانات نے بتایا کہ سینٹر میں 790 طلبہ امتحان دے رہے ہیں اور امتحانات پرامن ماحول میں ہو رہے ہیں۔ انہوں نے کہا کہ ابھی تک کوئی شکایت موصول نہیں ہوئی ہے اور جگہ کی کمی کے باوجود طلبہ کو خوشگوار ماحول فراہم کیا گیا ہے۔

میرپورخاص (باغی ٹی وی نامہ نگار سید شاہزیب شاہ کی رپورٹ)نیشنل پریس کلب میرپورخاص میں انفارمیشن سیکریٹری رضی انصار کی سالگرہ کے موقع پر ایک خوبصورت اور پروقار تقریب کا انعقاد کیا گیا۔ عید الفطر کے دوسرے روز منعقدہ یہ تقریب عید ملن پارٹی کے رنگوں سے سج گئی۔

تفصیلات کے مطابق نیشنل پریس کلب میرپورخاص میں صحافی رضی انصار، جو کلب کے انفارمیشن سیکریٹری بھی ہیں، کی سالگرہ کی تقریب منعقد ہوئی۔ تقریب کے دوران کیک کاٹنے کی رسم ادا کی گئی، جس کے بعد رضی انصار نے نیشنل پریس کلب کے تمام ممبران کو کیک پیش کیا۔ کلب کے ممبران نے اس اقدام پر خوشی کا اظہار کرتے ہوئے انفارمیشن سیکریٹری کو سالگرہ کی مبارکباد دی۔

تقریب میں شریک نیشنل پریس کلب کے تمام عہدیداران اور ممبران نے انتہائی نظم و ضبط کے ساتھ صحافت کرنے اور کلب کا نام روشن کرنے کا عہد کیا۔ اس موقع پر کلب کے سرپرست آفاق احمد خان، صدر حیات قریشی، سینئر نائب صدر لیاقت علی شاہ، جنرل سیکریٹری اقبال سولنگی، جوائنٹ سیکریٹری مبین چانہیوں، شہریار بلند، انفارمیشن سیکریٹری رضی انصار، اشفاق احمد قریشی، گورننگ باڈی کے ممبران سہیل احمد خان، وسیم خانزادہ، سید شاہزیب شاہ، امام الدین شاہ، احتشام قریشی، فرخ راجپوت سمیت دیگر بھی موجود تھے۔

میرپورخاص (باغی ٹی وی نامہ نگار سید شاہزیب شاہ) رمضان المبارک کی ستائیسویں بابرکت شب کے موقع پر ایم کیو ایم میرپورخاص ڈسٹرکٹ کے رہنماؤں نے شہر کے مختلف قبرستانوں میں تحریک کے شہداء کی قبروں پر حاضری دی۔

ڈسٹرکٹ انچارج خالد تبسم، جوائنٹ انچارجز آفاق احمد خان اور سلیم میمن سمیت ڈسٹرکٹ کمیٹی کے اراکین، یوسی ذمہ داران، اور حق پرست یوسی چیئرمین اور کونسلرز نے شہداء کو خراج عقیدت پیش کیا۔

رہنماؤں نے شہداء کی قبروں پر پھول چڑھائے اور فاتحہ خوانی کی۔ انہوں نے شہداء کے لیے جنت میں اعلیٰ درجات کے لیے دعا کی اور ان کی قربانیوں کو یاد کیا۔

اس موقع پر ایم کیو ایم رہنماؤں نے تحریک کے شہداء کی قربانیوں کو سراہا اور ان کے مشن کو جاری رکھنے کے عزم کا اعادہ کیا۔ انہوں نے کہا کہ شہداء نے تحریک کے لیے اپنی جانیں قربان کیں اور ان کی قربانیوں کو ہمیشہ یاد رکھا جائے گا۔

میرپورخاص (باغی ٹی وی نامہ نگار سید شاہزیب شاہ) ڈپٹی کمشنر میرپورخاص ڈاکٹر رشید مسعود خان نے کہا ہے کہ پولیو مرض کے خاتمے کے لئے ہم میں سے ہر ایک کو اپنا کردار ادا کرنا ہوگا۔ کیونکہ یہ ہمارے مستقبل کے معماروں کے روشن مستقبل سے جڑا ہوا ہے۔ ان خیالات کا اظہار انہوں نے دربار ہال میں 21 اپریل سے 25 اپریل 2025 تک ہونے والی انسداد پولیو مہم کے انتظامات کا جائزہ لینے کے متعلق اجلاس کی صدارت کرتے ہوئے کیا۔

انہوں نے مزید کہا کہ پولیو ایک وبائی مرض ہے جو ہمارے بچوں کو ہمیشہ کے لئے اپاہج بنا دیتا ہے، اس لیے ضروری ہے کہ پولیو مرض کا خاتمہ کیا جائے۔ جس کے لیے تمام اداروں کو کردار ادا کرنے کی ضرورت ہے۔ ڈپٹی کمشنر میرپورخاص ڈاکٹر رشید مسعود خان نے تعلقہ سپروائزروں کو سختی سے ہدایت کرتے ہوئے کہا کہ وہ اپنے اپنے علاقوں میں پولیو مہم میں پولیو کاموں کی موثر نگرانی کریں۔ انکاری کیسز اور موجود نہ ہونے والے پولیو کیسز ہونے کے ضمن میں کسی قسم کی کوتاہی ہرگز برداشت نہیں کی جائے گی۔

اجلاس میں ڈسٹرکٹ ہیلتھ آفیسر ڈاکٹر امجد اعظم بلوچ، ضلعی فوکل پرسن پولیو پروگرام ڈاکٹر نارائن داس، ضلعی کنٹرول روم پولیو پروگرام کے فوکل پرسن ڈاکٹر راجیش کمار نے بتایا کہ پولیو مہم کے دوران 6 تحصیلوں کے 41 یونین کونسلز کے 3 لاکھ 48 ہزار 463 پیدائش سے لے کر پانچ سال تک کے بچوں کو پولیو سے بچاؤ کے قطرے پلانے کا ہدف مقرر کیا گیا ہے۔ اس سلسلے میں 249 یو سی ایم اوز، 53 ٹرانزٹ ٹیمیں، 97 فکسڈ ٹیمیں اور 1090 موبائل ٹیمیں اور 766 لیڈی ہیلتھ ورکرز گھر گھر جا کر پیدائش سے پانچ سال تک کے بچوں کو پولیو سے بچاؤ کے قطرے پلائیں گی۔

اجلاس میں ایڈیشنل ڈپٹی کمشنر ون محمد علی بلوچ، ایڈیشنل ڈپٹی کمشنر ٹو فیصل علی سومرو، ایڈیشنل ڈسٹرکٹ ہیلتھ آفیسر ڈاکٹر سجن راہموں، اسسٹنٹ کمشنر شجاع آباد مہوش اعجاز، اسسٹنٹ کمشنر میرپورخاص غلام حسین کانہیو، اسسٹنٹ کمشنر سندھڑی عبدالغفار لاکھیر، ایریا کوآرڈینیٹر ڈبلیو ایچ او ڈاکٹر تہور حسین، ڈپٹی ڈائریکٹر پرائیویٹ اسکولز رجسٹریشن انسٹی ٹیوٹ سید خان محمد شاہ، لیڈی ہیلتھ ورکرز پروگرام انچارج ڈاکٹر بینظیر اور تعلقہ سپروائزرز اور ہینڈز کے ڈسٹرکٹ مینیجر مظہر حسین کپری سمیت دیگر متعلقہ افسران نے شرکت کی۔

میرپورخاص( نامہ نگار سید شاہزیب شاہ) میرپورخاص میں تین روزہ سالانہ پھلوں اور آموں کی نمائش 30 مئی سے یکم جون 2025 تک منعقد کی جائے گی۔ اس بات کا اعلان ڈویژنل کمشنر میرپورخاص فیصل احمد عقیلی نے ڈپٹی کمشنر میرپورخاص ڈاکٹر رشید مسعود خان کے ہمراہ دربار ہال میرپورخاص میں آموں کی نمائش کے انعقاد کے سلسلے میں انتظامات کا جائزہ لینے کے متعلق اجلاس کی صدارت کرتے ہوئے کیا۔

انہوں نے مزید کہا کہ سالانہ آموں کی نمائش کو کامیاب بنانے کے لیے مختلف سب کمیٹیاں بھی تشکیل دی جائیں گی۔ انہوں نے متعلقہ افسران و ممبران کو ہدایت کی کہ نمائش کے تمام تر انتظامات کو جلد مکمل کیا جائے۔

اجلاس میں ایڈیشنل کمشنر ون سبھاش چندر، اسٹنٹ کمشنر میرپورخاص غلام حسین کانیہوں، چئیرمین مینگو فیسٹیول مینجمنٹ کمیٹی رئیس عارف خان بھرگڑی، فاریسٹ آفیسر دوست محمد، حاجی محمد عمر بگھیو، منصور چیمہ، تنویر احمد گوندل اور دیگر متعلقہ افسران و ممبران نے شرکت کی۔

میرپورخاص (نامہ نگارسید شاہزیب شاہ) میرپورخاص شہر میں بڑھتے ہوئے ٹریفک مسائل پر نیشنل پریس کلب میرپورخاص کی نشاندہی کے بعد ٹریفک انچارج حیدر بلوچ پریس کلب پہنچے۔ انہوں نے کہا کہ انتہائی کم وسائل کے باوجود وہ میرپورخاص میں ٹریفک کے مسائل حل کرنے میں مصروف ہیں۔

تفصیلات کے مطابق میرپورخاص شہر میں تقریباً ہر وقت ہی ٹریفک جام کا منظر نظر آتا ہے۔ نیشنل پریس کلب کے ممبران نے جب ٹریفک انچارج حیدر بلوچ سے اس مسئلے پر گفتگو کی تو وہ اپنا موقف دینے نیشنل پریس کلب میرپورخاص پہنچ گئے۔

ٹریفک انچارج حیدر بلوچ نے بتایا کہ ان کے پاس ٹریفک پولیس اہلکار میرپورخاص کے موجودہ ٹریفک مسائل حل کرنے کے لیے ناکافی ہیں۔ انہوں نے مزید کہا کہ میرپورخاص کے ٹریفک مسائل حیدرآباد سے دیکھے جاتے ہیں اور شہر میں رکشہ یا چنگچی موٹر سائیکل کا کوئی اسٹینڈ موجود نہیں ہے۔

نیشنل پریس کلب کے صحافیوں نے ٹریفک انچارج کی مشکلات کو اعلیٰ انتظامی افسران تک پہنچانے اور مسائل حل کرانے کی کوشش کرنے کا یقین دلایا۔ جس پر ٹریفک انچارج حیدر علی نے نیشنل پریس کلب کے صحافیوں کا شکریہ ادا کیا۔

اس موقع پر ٹریفک انچارج حیدر بلوچ نے نیشنل پریس کلب کے ممبران کی تحقیقی صحافت کو سراہا اور کہا کہ میرپورخاص میں نیشنل پریس کلب ایک ایسا صحافتی ادارہ ہے جہاں سے تحقیقی صحافت پروان چڑھ رہی ہے۔ انہوں نے نیشنل پریس کلب کے نو منتخب عہدیداران کو مبارکباد بھی دی۔

نیشنل پریس کلب کے سرپرست آفاق احمد خان، صدر حیات قریشی، نائب صدر سید لیاقت علی شاہ، جنرل سیکریٹری اقبال سولنگی، جوائنٹ سیکریٹری مبین چانہیوں، جوائنٹ سیکریٹری شہریار بلند، انفارمیشن سیکریٹری اشفاق قریشی، گورنر باڈی کے ممبران وسیم خانزادہ، محمد علی بھرگڑی، احتشام قریشی، سید شاہ زیب علی شاہ اور دیگر نے ٹریفک انچارج حیدر بلوچ کے انتہائی کم وسائل میں ٹریفک کے نظام کو کنٹرول کرنے کے انداز کو سراہا۔

اس موقع پر ٹریفک انچارج حیدر بلوچ کے ہمراہ دیگر ٹریفک پولیس اہلکار بھی موجود تھے۔

میرپورخاص (نامہ نگارسید شاہزیب شاہ) ڈپٹی کمشنر میرپورخاص ڈاکٹر رشید مسعود خان نے کہا ہے کہ بچوں کو 12 مختلف وبائی امراض سے محفوظ بنانے میں ویکسنیٹرز کا کلیدی کردار ہے۔ انہوں نے یہ بات دربار ہال میرپورخاص میں حفاظتی ٹیکوں کی مہم کے دوران نمایاں کارکردگی پیش کرنے والے ویکسنیٹرز اور لیڈی ہیلتھ وزیٹرز میں سرٹیفکیٹ اور شیلڈ تقسیم کرتے ہوئے کہی۔

ڈپٹی کمشنر میرپورخاص ڈاکٹر رشید مسعود خان نے مزید کہا کہ حفاظتی ٹیکوں سے ہی پولیو مرض کے روک تھام میں مدد ملتی ہے۔ اس لیے ویکسنیٹرز کو چاہیے کہ وہ والدین کو اپنے بچوں کو حفاظتی ٹیکے لگوانے کے لیے پابند کریں۔

اس موقع پر ڈسٹرکٹ ہیلتھ آفیسر ڈاکٹر امجد اعظم بلوچ نے کہا کہ ویکسنیٹرز کی بہتر کارکردگی سے ہی حفاظتی ٹیکوں کی مہم کے دوران حفاظتی ٹیکوں کی کارکردگی بہتر ہوئی ہے۔ انہوں نے امید ظاہر کی کہ آئندہ بھی ویکسنیٹرز اسی جذبے کے ساتھ کام کریں گے۔

اس تقریب میں ایڈیشنل ڈپٹی کمشنر ٹو فیصل علی سومرو، ایڈیشنل ڈسٹرکٹ ہیلتھ آفیسر ڈاکٹر سجن راہموں، ضلعی پولیو پروگرام فوکل پرسن ڈاکٹر نارائن داس، لیڈی ہیلتھ ورکرز پروگرام انچارج ڈاکٹر بینظیر لغاری اور ویکسنیٹرز نے شرکت کی۔