Category: مظفرگڑھ

اوچ شریف (باغی ٹی وی، نامہ نگار حبیب خان) دریائے سندھ میں طغیانی کے باعث مظفرگڑھ کی تحصیل علی پور میں دریائی کٹاؤ شدت اختیار کر گیا ہے، جس سے سیت پور، کندائی، گبر آرائیں اور خیرپور سادات کے علاقے شدید متاثر ہو رہے ہیں۔ مسلسل کٹاؤ کے باعث درجنوں ایکڑ زرعی اراضی دریا برد ہو چکی ہے جبکہ سپر بند بھی خطرناک حد تک متاثر ہو رہے ہیں۔

اہل علاقہ نے موضع گبر آرائیں میں سپر بند کی تعمیر میں سستی اور ناقص کام کے خلاف احتجاجی مظاہرہ کیا۔ ان کا کہنا ہے کہ اگر سپر بند ٹوٹا تو علی پور کے شہری علاقے بھی سیلاب کی لپیٹ میں آ سکتے ہیں۔ مظاہرین نے حکومت سے مطالبہ کیا کہ سپر بند کی تعمیر کا کام فوری طور پر مکمل کیا جائے تاکہ مزید نقصان سے بچا جا سکے۔

محکمہ انہار کے ترجمان کے مطابق سپر بند کی مضبوطی کا کام جاری ہے اور صورتحال پر کڑی نظر رکھی جا رہی ہے۔ تاہم، مقامی افراد کا الزام ہے کہ محکمہ انہار کی مبینہ بدعنوانی اور انتظامی غفلت کے باعث یہ صورتحال پیدا ہوئی ہے۔

یاد رہے کہ چند روز قبل ڈیرہ غازی خان کے علاقے سمینہ میں سپر بند آر ڈی 148 کے ٹوٹنے نے تین سال پرانے کرپشن اسکینڈل کی یاد تازہ کر دی تھی۔ ذرائع کے مطابق 2019 میں سپر بند 138 کی مرمت کے لیے کروڑوں روپے جاری ہوئے، ٹھیکیدار کو ایڈوانس ادائیگی بھی کی گئی، لیکن کوئی کام مکمل نہ ہو سکا۔ حیران کن طور پر، اب پھر اسی ٹھیکیدار کو نئے فنڈز جاری کرنے کے بعد بند ٹوٹنے کا واقعہ سامنے آیا ہے۔

مقامی لوگوں کا دعویٰ ہے کہ بند میں دراڑوں کی نشاندہی بارہا کی گئی، مگر حکام نے دانستہ نظرانداز کیا تاکہ دوبارہ مرمت کے نام پر فنڈز ہتھیائے جا سکیں۔ ذرائع کا انکشاف ہے کہ محکمہ انہار کے تین بڑے ڈویژنز — بہاولپور، ساہیوال اور ڈیرہ غازی خان — میں برسوں سے ایک ہی مخصوص ٹھیکیدار کو گھما پھرا کر ٹھیکے دیے جا رہے ہیں، اور اس عمل میں منظم کرپشن کا سلسلہ جاری ہے۔

اہل علاقہ نے وزیرِاعلیٰ پنجاب اور اعلیٰ عدلیہ سے مطالبہ کیا ہے کہ اس معاملے کی فوری عدالتی انکوائری کروا کر ملوث افسران اور ٹھیکیدار کے خلاف سخت کارروائی کی جائے، تاکہ عوام کی زمینیں اور جانیں محفوظ رہ سکیں۔

اوچ شریف(باغی ٹی وی،نامہ نگارحبیب خان)ضلع مظفرگڑھ کی تحصیل علی پور کے نواحی علاقے بستی ٹبی ارائیں میں ایک افسوسناک اور شرمناک واقعہ پیش آیا ہے جہاں ایک شخص نے اپنی ہی ذہنی معذور بھانجی کو مبینہ طور پر زیادتی کا نشانہ بنایا۔ پولیس نے ملزم کو حراست میں لے لیا ہے اور مزید قانونی کارروائی جاری ہے۔

تفصیلات کے مطابق بستی ٹبی ارائیں کا رہائشی ناصر ولد رستم ارائیں دو روز قبل اپنی بھانجی کو مبینہ طور پر ورغلا کر زیادتی کا نشانہ بنا رہا تھا۔ اہل علاقہ نے اس شخص کو رنگے ہاتھوں پکڑ لیا اور اس کی خوب پٹائی کی۔

متاثرہ لڑکی کے والد عبدالخالق ارائیں اور اس کا بھائی کراچی میں مزدوری کرتے ہیں۔ اہل علاقہ نے انہیں اس واقعے کی اطلاع دی جس کے بعد وہ فوری طور پر اپنی بستی پہنچے۔ انہوں نے پولیس تھانہ صدر علی پور کو اطلاع دی، جس پر پولیس نے فوری کارروائی کرتے ہوئے ملزم ناصر ارائیں کو حراست میں لے لیا۔ تاحال مقدمہ درج نہیں ہوا ہے۔

اہل علاقہ نے اس واقعے کو انتہائی شرمناک قرار دیتے ہوئے مطالبہ کیا ہے کہ ایسے گھناؤنے جرم کے مرتکب شخص کو سخت سے سخت سزا دی جائے۔

اوچ شریف (باغی ٹی وی، نامہ نگار حبیب خان) مظفرگرھ کی تحصیل علی پور شہر اور اس کے نواحی علاقے کندائی میں آوارہ کتوں کی بھرمار خطرناک صورت اختیار کر گئی ہے۔ حالیہ واقعے میں ایک خونخوار آوارہ کتے نے غریب شخص کے بھیڑوں کے ریوڑ پر حملہ کر کے پانچ بھیڑوں کو شدید زخمی کر دیا، جن میں سے دو موقع پر ہی دم توڑ گئیں۔

عینی شاہدین کے مطابق علی پور کے مختلف علاقوں میں آوارہ کتے شہریوں اور مال مویشیوں کے لیے مستقل خطرہ بن چکے ہیں، خاص طور پر رات کے وقت یہ کتے راہگیروں اور جانوروں پر حملہ آور ہو جاتے ہیں۔ مقامی انتظامیہ کی جانب سے آوارہ کتوں کے خلاف مؤثر کارروائی نہ ہونے پر شہریوں میں شدید اضطراب پایا جاتا ہے۔

پولیس کے مطابق کندائی کے علاقے میں پیش آنے والے واقعے کے بعد فوری کارروائی کرتے ہوئے کتے کے دو مبینہ مالکان کو حراست میں لے لیا گیا ہے اور ان کے خلاف تھانہ کندائی میں مقدمہ درج کر لیا گیا ہے۔ پولیس ترجمان کا کہنا ہے کہ حملہ آور کتے کو تلف کر دیا گیا ہے جبکہ بھیڑوں کے مالک کو پہنچنے والے مالی نقصان کا بھی ازالہ کروا دیا گیا ہے۔

اہل علاقہ نے ضلعی انتظامیہ سے مطالبہ کیا ہے کہ آوارہ کتوں کے خلاف بھرپور آپریشن کیا جائے تاکہ شہریوں اور مویشیوں کی جان و مال کو محفوظ بنایا جا سکے۔

اوچ شریف (باغی ٹی وی، نامہ نگار حبیب خان)ضلع مظفر گڑھ کی تحصیل علی پور کے نواحی گاؤں موضع مکول ہڈیر میں رشتہ نہ دینے کا سنگین نتیجہ غریب محنت کش خاندان کو بھگتنا پڑا۔ ساڑھے پندرہ سالہ سائرہ بی بی کو مبینہ طور پر بااثر ملزمان صفدر، راشد بڈو اور نذیر موہانہ زبردستی گھر سے اٹھا کر لے گئے، لیکن واقعہ کو گزرے پانچ دن بیت جانے کے باوجود پولیس مغوی لڑکی کو بازیاب نہ کرا سکی۔ پولیس تھانہ صدر علی پور نے مقدمہ تو درج کر لیا، لیکن تاحال کوئی گرفتاری عمل میں نہیں آئی، جس پر اہل علاقہ نے شدید احتجاج کرتے ہوئے ڈی پی او مظفر گڑھ سے فوری نوٹس لینے کا مطالبہ کر دیا ہے۔

متاثرہ لڑکی کے والد ملک انور آرائیں نے اپنی اہلیہ، بیٹوں اور محلہ داروں کے ہمراہ میڈیا سے گفتگو کرتے ہوئے بتایا کہ”چوبیس جولائی کی صبح دس بجے میں جانوروں کے لیے گھاس کاٹنے گیا ہوا تھا۔ اس وقت میری بیٹی سائرہ گھر میں اکیلی تھی۔ اسی دوران ملزمان موٹر سائیکلوں پر سوار ہو کر آئے اور میری بیٹی کو گھر سے زبردستی اٹھا کر لے گئے۔ ساتھ ہی گھر سے بکس میں رکھی رقم اور دیگر سامان بھی لے گئے۔ ہم نے شور سن کر ان کا پیچھا بھی کیا، مگر وہ فرار ہونے میں کامیاب ہو گئے۔”

انور آرائیں کا کہنا ہے کہ مقدمہ نمبر 862/25 تھانہ صدر علی پور میں تو درج ہو گیا، مگر ملزمان کے خلاف کوئی موثر کارروائی نہیں کی گئی۔ انہوں نے مزید الزام لگایا کہ ملزمان کریمنل ریکارڈ یافتہ ہیں اور مقامی بااثر زمیندار ان کی پشت پناہی کر رہے ہیں۔
"ہم غریبوں کی مدد کرنے کے بجائے ہمیں ہی دھمکیاں دی جا رہی ہیں کہ اگر زبان کھولی تو تمہارے خلاف بھی اغوا کا مقدمہ درج کر دیں گے۔”

اہل علاقہ نے اس واقعے کو ظلم و ناانصافی کی بدترین مثال قرار دیتے ہوئے مطالبہ کیا ہے کہ ڈی پی او مظفر گڑھ فوری طور پر اس واقعہ کا نوٹس لیں، لڑکی کو بازیاب کروائیں اور ملزمان کو قانون کے کٹہرے میں لایا جائے۔

رابطہ کرنے پر پولیس ذرائع نے مؤقف اختیار کیا کہ”تاحال یہ معلوم ہو رہا ہے کہ لڑکی اپنی مرضی سے گئی ہے، لیکن چونکہ وہ اٹھارہ سال سے کم عمر اور غیر شادی شدہ ہے، اس لیے معاملے کا قانونی پہلو سے جائزہ لے کر انصاف فراہم کیا جائے گا۔”

شہریوں نے سوال اٹھایا ہے کہ اگر قانون صرف طاقتور کے لیے ہے تو کمزور کہاں جائے؟ کیا ایک محنت کش کی بیٹی کی جان و عزت کی کوئی قیمت نہیں؟
اب دیکھنا یہ ہے کہ پولیس اور ضلعی انتظامیہ اس معاملے پر کب عملی قدم اٹھاتی ہے یا غریب خاندان انصاف کے لیے در بدر کی ٹھوکریں کھاتا رہے گا۔

مظفرگڑھ (باغی ٹی وی) کچے کے جرائم پیشہ عناصر نے ایک بار پھر مظفرگڑھ پولیس کی رٹ کو چیلنج کر دیا۔ گذشتہ روزتحصیل علی پور کے موضع لنگرواہ میں 30 سے زائد مسلح ڈاکوؤں نے دھاوا بول کر مقامی لوگوں کی 180 بھینسیں لوٹ لیں اور باآسانی فرار ہو گئے۔ واردات نے علاقے میں خوف و ہراس کی فضا پیدا کر دی ہے جبکہ عوام کی جانب سے قانون نافذ کرنے والے اداروں کی ناکامی پر شدید سوالات اٹھائے جا رہے ہیں۔

پولیس کے مطابق متاثرہ افراد نے واردات کے کئی گھنٹے بعد اطلاع دی، جس کے باعث ڈاکو باآسانی کچے کے علاقوں میں داخل ہو گئے۔ جائے واردات پہلے سے جاری کچے آپریشن کے علاقے میں واقع ہے، تاہم اس کے باوجود ڈاکوؤں کی منظم یلغار نے پولیس کی حکمتِ عملی پر سوالیہ نشان لگا دیا ہے۔

پولیس ترجمان کا کہنا ہے کہ واردات میں ملوث ڈاکو بوسن اور دیگر جرائم پیشہ گینگز سے تعلق رکھتے ہیں۔ ان کی گرفتاری کے لیے مظفرگڑھ اور راجن پور کے کچے دریائی علاقوں میں ناکہ بندیاں کر دی گئی ہیں، اور پولیس تعاقب میں ہے۔

مظفر گڑھ پولیس ترجمان نے کہا ہے کہ کچے کے گینگ کا خاتمہ ہی پولیس کی اولین ترجیح ہے۔ ڈی پی او ڈاکٹر رضوان احمد خود کچے آپریشن کی نگرانی کر رہے ہیں اور پولیس ٹیموں کو جدید ہتھیاروں، ڈرونز اور ٹیکنالوجی سے لیس کیا جا رہا ہے تاکہ ان سنگین وارداتوں کا خاتمہ ممکن بنایا جا سکے۔

علاقہ مکینوں کا کہنا ہے کہ اگرچہ پولیس آپریشن کی بات کرتی ہے، مگر کچے کے جرائم پیشہ گروہوں کا نیٹ ورک مزید مضبوط ہو رہا ہے۔ انہوں نے مطالبہ کیا ہے کہ کچے کے علاقوں میں مستقل بنیادوں پر سخت فوجی طرز کا آپریشن شروع کیا جائے تاکہ ان وارداتوں کا مستقل خاتمہ ممکن ہو۔

مزید یہ کہ حالیہ واردات نے پولیس کی موجودہ حکمت عملی پر بھی سوالیہ نشان کھڑا کر دیا ہے، کیونکہ ڈاکو دن دہاڑے اتنی بڑی تعداد میں مویشی لوٹ کر فرار ہو گئے اور کئی گھنٹوں تک کوئی مؤثر کارروائی نظر نہیں آئی۔ عوامی حلقے سوال کر رہے ہیں کہ آخر کب تک شہری کچے کے ڈاکوؤں کے رحم و کرم پر رہیں گے؟

ضلعی انتظامیہ اور پولیس نے عوام سے اپیل کی ہے کہ وہ مشتبہ سرگرمیوں کی فوری اطلاع دیں تاکہ کارروائی بروقت ممکن ہو سکے۔ کچے کے ان بدنام زمانہ گینگس کا خاتمہ اب صرف پولیس کا نہیں، بلکہ پورے ریاستی نظام کا امتحان بن چکا ہے۔