ماہ مقدس کی مناسبت سے مظفرگڑھ پولیس نے سکیورٹی پلان جاری کردیا۔ماہ رمضان کے دوران مظفرگڑھ کی 672مساجد کی سکیورٹی پر 915پولیس اہلکار و افسران سکیورٹی کے فرائض سر انجام دیں گے ۔پولیس اہلکاروں سحری، افطاری اور تراویح کے اوقات میں مساجد کی سکیورٹی پر مامور رہیں گے۔مظفرگڑھ پولیس کے ترجمان وسیم خان گوپانگ کے مطابق رمضان المبارک کے دوران شہر کے داخلی وخارجی راستوں پر بھی تلاشی کے نظام کو موثر بنا یا گیا ہے تاکہ تخریب کار عناصر کو روکا جا سکے اسی طرح پورا مہینہ گشت کا سحری ،افطاری اور تراویح کے اوقات میں گشت کا سلسلہ بھی تسلسل سے جاری رہے گا۔رمضان کے جمعہ کے اجتماعات کی سکیورٹی کے سخت انتظامات کئے جائیں گے۔ڈی پی او مظفرگڑھ صادق علی ڈوگر کے مطابق پولیس رمضان میں شہری کا تحفظ یقینی بنائے گی مساجد اور شہر کے داخلی خارجی راستوں کی سکیورٹی پر خصوصی توجہ دی جائے گی
Category: مظفرگڑھ
پٹرول پمپوں پرپٹرول کی قمیت میں ہیر پھیر
حکومت کی جانب سے پٹرول کی قیمتیں بڑھانے کے باعث عام شہری پہلے ہی پریشان تھا،رہی سہی کسر پٹرول پمپ مالکان نے پوری کردی،شہر کے اکثر پٹرول پمپس پر پٹرول 110 روپے فی لیٹر فروخت ہونے لگا.تفصیلات کیمطابق حکومت کی جانب سے پٹرول کی قیمتوں میں اضافے کے بعد پٹرول کی فی لیٹر قیمت 108 روپے مقرر کی گئی تھی مگر شہر کے بیشتر پٹرول پمپ مالکان دھڑلے سے فی لیٹر پٹرول کے 110 روپے وصول کررہے ہیں اور شہریوں سے روزانہ لاکھوں روپے غیرقانونی طور پر وصول کیے جارہے ہیں،دوسری جانب شہر کے گنجان آباد علاقوں میں موجود پٹرول پمپوں کی جانب سے زائد رقم وصول کرنے کے باوجود بھی ضلعی انتظامیہ نے کوئی کاروائی کرنا گوارا نہ کیا،فی لیٹر پٹرول کی زائد قیمت وصول کرنے پر نہ تو کسی پٹرول پمپ کو سیل کیاگیا اور نہ ہی کوئی نوٹس دیاگیا،،شہریوں نے ڈپٹی کمشنر مظفرگڑھ ڈاکٹر احتشام انور سے مطالبہ کیا ہے کہ من مانے ریٹ پر پٹرول کی فروخت کا سلسلہ بند کرایا جائے اور زائد رقم وصول کرنے والے پٹرول پمپوں کو سیل کیاجائے.
متوقع سیلابی صورتحال،ریسکیو1122کی امدادی مشقیں
متوقع سیلاب کے خطرے کے پیش نظر مظفرگڑھ میں ریسکیو1122 ملتان اسٹیشن کی جانب سے دریائے چناب پر مشقیں کی گئیں.ڈپٹی کمشنر ملتان عامر خٹک نے مشقوں کا معائنہ کیا.متوقع سیلاب کے پیش نظر ریسکیو1122 ملتان اسٹیشن کی جانب سے مظفرگڑھ میں دریائے چناب پر مشقیں کی گئیں.مشقوں میں ضلعی انتظامیہ ملتان کے محکموں محکمہ صحت،لائیوسٹاک،شہری دفاع،سکاؤٹس اور دیگر محکموں نے شرکت کی.مشقوں کے دوران سیلاب میں گھرے اور پانی میں ڈوبنے والے افراد کو نکالنے کا عملی مظاہرہ بھی کیاگیا جبکہ ڈپٹی کمشنر ملتان عامر خٹک نے سرکاری محکموں کی جانب سے لگائے گئے کیمپوں کا معائنہ کیا.مشقوں کے بعد میڈیا سے گفتگو کرتے ہوئے ڈپٹی کمشنر ملتان عامر خٹک اور ایمرجنسی آفیسر ریسکیو ملتان ڈاکٹر خالد کا کہنا تھا کہ سیلاب کے خطرے کے پیش نظر ریسکیو 1122 اور دیگر متعلقہ سرکاری محکموں کی تیاریاں مکمل ہیں،ان کا کہنا تھا کہ مشقوں کا مقصد سیلاب کے حوالے سے تمام سرکاری محکموں میں ہم آہنگی کو مزید بہتر بنانا ہے.
2018ءکےانتخابات کا امیر ترین امیدوار مسجد کی بجلی استعمال کرتارہا
میاں محمد حسین منا شیخ کا تعلق تحصیل وضلع مظفرگڑ ھ سے ہے اور انہوں نے 2018ءکے عام انتخابات کے دوران کاغذات نامزدگی میں اپنے اثاثوں کی مالیت4کھرب3ارب 77کروڑ روپے ظاہر کی تھی۔مناشیخ نے عام انتخابات میں مظفرگڑھ کے شہری آبادی پر مشتمل حلقہ این اے182اور پی پی 270سے آزاد امیدوار کی حثیت سے الیکشن لڑا تھا اور چند سو ووٹ حاصل کرکے اپنی ضمانت تک ضبط کروابیٹھے تھے۔گزشتہ دنوں میاں محمد حسین منا شیخ کے حوالے سے انکشاف ہوا ہے کہ وہ اپنے ڈیرہ سےمنسلک جامع مسجد مھریہ رضویہ کے میٹر سے بجلی حاصل کر استعمال کرتے رہے۔یہ راز اس وقت فاش ہوا جب جامع مسجد مھریہ رضویہ کے امام حافظ محمد الیاس نے مظفرگڑھ کے تھانہ سول لائن میں درخواست دائر کی کہ محمد حسین مناشیخ مسجد کے میٹر سے بجلی لیتا رہا اور بل کے پیسے طلب کرنے پر مناشیخ نے اپنے کارندوں کی مدد سے امام مسجد کو تشدد کا نشانہ بنایا۔پولیس نے مسجد کے امام کی مدعیت میں میاں محمد حسین مناشیخ کے خلاف مقدمہ درج کرلیا تاہم ابھی تک گرفتاری عمل میں نہیں لائی جاسکی۔
پنجاب فوڈاتھارٹی کی سرکاری گاڑی کا پرائیویٹ استعمال
مظفرگڑھ میں پنجاب فوڈ اتھارٹی جنوبی پنجاب کے ڈپٹی ڈائریکٹرکی گاڑی سکول وین بن گئی،سرکاری گاڑی میں سکول کے بچے اورسوداسلف لانے کی فوٹیج باغی ٹی وی نے حاصل کرلی۔باغی ٹی وی کو موصول ہونے والی فوٹیج میں دیکھا جاسکتاہے کہ پنجاب فوڈ اتھارٹی جنوبی پنجاب کے ڈپٹی ڈائریکٹر شہزاد مگسی کی مبینہ سرکاری گاڑی میں سکول یونیفارم میں ملبوس بچے سوار ہیں جبکہ گاڑی کے پچھلے حصہ میں سوداسلف کے بڑے بڑے تھلے رکھے گئے ہیں ۔گاڑی پر سبز رنگ کی سرکاری نمبر پلیٹ نصب ہے اور اس کانمبرLEG1199ہے۔صحافیوں نے جب سرکاری گاڑی میں بچوں اور دیگر سامان کی موجودگی کے حوالے سے ڈرائیور سے دریافت کیا تو ڈرائیور کا کہناتھاکہ وہ شہزاد مگسی صاحب کے بچوں کو سکول سے اٹھانے اور گھر کا سودا سلف لینے کے لئے بازار آیاہے۔
صوبائی وزیر کے ایک ٹکٹ میں دو مزے
صوبائی وزیر توانائی ڈاکٹر اختر ملک مظفرگڑھ میں پی ایم اے کی تقریب میں شرکت کے لئےنجی میرج کلب آئے تو تقریب تاخیر کا شکار ہوتی دیکھ کر چند قدم کے فاصلہ پر موجود ڈسٹرکٹ ہیڈ کوارٹر ہسپتال مظفرگڑھ کا "اچانک” دورہ کرڈالا،اس موقع پر انھوں نے ہسپتال کے مختلف وارڈز کا معائنہ کیا اور مریضوں سے انکے مسائل دریافت کئے.صوبائی وزیر توانائی ڈاکٹر اختر ملک پاکستان میڈیکل ایسوسی ایشن مظفرگڑھ کی تقریب میں شرکت کے لئے سیال میر ج کلب میں آئے تو تقریب کچھ تاخیر کا شکار ہوتی دیکھ انہوں نے اپنی کارکردگی دیکھانے کے لئے میرج ہال سے چند قدم کے فاصلہ پر موجود ڈی ایچ کیو ہسپتال مظفرگڑھ کا دورہ کرلیا،صوبائی وزیر توانائی نے مختلف وارڈز کا معائنہ کیا اور مریضوں سے مسائل دریافت کیے.اس موقع پر میڈیا سے گفتگو کرتے ہوئے صوبائی وزیر توانائی ڈاکٹر اختر ملک کا کہنا تھا کہ ڈی ایچ کیو ہسپتال میں بیڈز کی کمی ہے جس کے حوالے سے وہ صوبائی وزیر صحت ڈاکٹر یاسمین راشد سے بات کریں گے.صوبائی وزیر ڈاکٹر اختر ملک کا کہنا تھا کہ ملتان میں نشتر ہسپتال 2 کا افتتاح کردیا گیا ہے جو 2 سال کے عرصے میں مکمل ہوجائے گا.ان کا کہنا تھا کہ جنوبی پنجاب کے عوام کو بہترین سہولیات فراہم کی جائیں گی.
”خوابوں کے بند دروازے“ شائع ہو گیا
امین بھایانی کا افسانوی مجموعہ ”خوابوں کے بند دروازے“ شائع ہو گیا۔امریکہ میں مقیم معروف ادیب امین بھایانی کا تیسرا افسانوی مجموعہ ”خوابوں کے بند دروازے“ شائع ہو گیا ہے۔ کتاب کا تعارفی فلیپ ممتاز و نامور ادبا نے لکھا ہے جس میں انہوں نے شاندار الفاظ میں مصنف کو خراج تحسین پیش کیا ہے۔ امین بھایانی نے اس کتاب میں لوگوں کے عمومی مسائل کو کہانیوں کا موضوع بنایا ہے اور ان کی نفسیاتی توضیح بھی کی ہے جو کہ ایک کہنہ مشق ادیب ہی کر سکتا ہے۔مصنف نے اپنے دلچسپ اسلوب سے ہر عمر کے لوگوں کے لیے اس کتاب میں دلچسپی کا سامان کر دیا ہے۔ مصنف کی گہری سوچ اور فلسفہ ان افسانوں میں جھلکتا ہے۔ اس سے قبل امین بھایانی کے دو افسانوی مجموعے ”بھاٹی گیٹ کا روبن گوش“ اور ”بے چین شہر کی پُرسکون لڑکی“ شائع ہو کر ادبی حلقوں میں داد پا چکے ہیں۔ اس کتاب میں شامل افسانے پاک و ہند کے نامور ادبی جرائد میں شائع ہوکر داد پاچکے ہیں۔امین بھایانی مصنف منفرد طرز تحریر کی بدولت ادبی حلقوں میں اپنا ایک خاص مقام رکھتے ہیں۔ ان کی کتابوں کا شدت سے انتظار کیا جاتا ہے اور پذیرائی کے اعتبار سے یہ سر فہرست شمار ہوتی ہیں۔کتاب خوب صورت ٹائٹیل اور عمدہ طباعت سے مزین ہے۔ یہ افسانوی مجموعہ ”کتاب والا پبلشر“ اور ”فضلی سنز“ کے باہمی اشتراک سے شائع کیا گیا اور کتاب سرائے اردو بازار لاہور سے بھی دستیاب ہے۔
ڈپٹی کمشنر مظفرگڑھ کے گندم خریداری مرکز کے دورہ کے دوران محکمہ خوراک کا عملہ غائب
ڈپٹی کمشنر مظفرگڑھ ڈاکٹر احتشام انور نےآج گندم خریداری مہم کی نگرانی کے سلسلے میں گندم خریداری مرکز ریلوے سٹیشن مظفرگڑھ ون کا معائنہ کیا. اس موقع پر اسسٹنٹ کمشنر مظفرگڑھ ظہور حسین بھٹہ بھی ان کے ساتھ تھے.ڈپٹی کمشنر کے دورے کے دوران فوڈ سنٹر پر محکمہ فوڈ کا عملہ غائب .ڈپٹی کمشنر نے سخت برہمی کا اظہار کیا . غیر حاضری پر فوڈ انسپکٹر مہر جاوید کو شوکاز نوٹس جاری کرنے کا حکم دیا.اس موقع پر گفتگو کرتے ہوئے انہوں نے کہا کہ اس سال حکومت پنجاب نے ضلع مظفرگڑھ میں محکمہ خوراک کو 1لاکھ 41ہزار 285میٹرک ٹن گندم خریداری کا ہدف دیا ہے . گندم خریداری کی عمل کو نہایت شفاف بنایا جارہا ہے. اس سلسلے میں غفلت برتنے والوں کے خلاف سخت کارروائی کی جائے گی. انہوں نے کہا کہ ہر مرکز پر کاشتکارں کے بیٹھنے کیلئے سایہ دار جگہ، کرسیاں، پینے کے پانی اور بجلی پنکھوں کی سہولت فراہم کی گئی ہے .انہوں نے محکمہ خوراک کے عملے کو ہدایت کی کہ وہ تمام متعلقہ مراکز پر اپنی حاضری کو یقینی بنائیں.
مظفرگڑھ کے 8رمضان بازار 6مئی سے فنگشنل ہوجائیں گے
ڈپٹی کمشنر ڈاکٹر احتشام انور نے کہا ہے کہ حکومت پنجاب کی ہدایت پر اس سال بھی رمضان المبارک میں ضلع مظفرگڑھ میں مختلف مقامات پر 8رمضان بازار لگائے جارہے ہیں. جہاں سبزی، پھل، گوشت، مرغی اورانڈے سمیت دیگر ضروریات زندگی کی دیگر اشیاءسستے داموں وافر مقدار میں دسیتاب ہونگی. انہوں نے کہا کہ ان بازاروں میں آنے والوں کے لئے پینے کے پانی , سایہ دار شیڈ اور پنکھوں کا بھی انتظام ہوگا. اس کے ساتھ ساتھ امن وامان کے لیے سکیورٹی انتظامات بھی ہونگے. انہوں نے ہدایت کی کہ ضلع بھر کے بازاروں میں صفائی ستھرائی کا خاص خیال رکھا جائے انہوں نے کہا کہ ہم نے عوام کو ریلیف فراہم کرنا ہے اس سلسلے میں کسی قسم کی کوتاہی برداشت نہیں کی جائے گی.
یہ بات انہوں نے آج مظفرگڑھ شہر میں فیاض پارک سے متصل قائم رمضان بازار اور خان گڑھ رمضان بازار کے دورے کے موقع پر کہی. اسسٹنٹ کمشنر مظفرگڑھ ظہور حسین بھٹہ سمیت دیگر متعلقہ اداروں کے اعلیٰ حکام بھی موقع پر موجود تھے .انہوں نے انتظامات کا جائزہ لیا اور ہدایات جاری کیں.انہوں نے کہا کہ ضلع بھر میں رمضان بازار 6 مئی بروز پیر سے باقاعدہ طور پر فنکشنل کردئیے جائیں گے جہاں صبح سے شام تک عوام اپنی ضرورت کی اشیا خرید سکیں گے. انہوں نے بتایا کہ رمضان بازاروں میں نرخ نامہ آویزاں کیا جائے گاجس پر روزانہ کی بنیاد پر نرخ درج کئے جائیں گے، تمام رمضان بازاروں میں معیاری اشیاء خوردو نوش، سبزی، پھل، گوشت، مرغی کے علیحدہ علیحدہ سٹال لگائے جائیں گے. انہوں نے مزید کہا کہ اشیاء خوردو نوش کے معیار پر کوئی سمجھوتہ نہیں کیا جائے گا.انہوں نے کہا کہ رمضان پیکج کے تحت ضلع بھر میں آٹا، چینی، دالیں، بیسن، کجھور اور دیگر اشیا وغیرہ سبسڈائزڈ ریٹ پر عام مارکیٹ کی نسبت سستے داموں دستیاب ہونگے انہوں نے مزید بتایا کہ ضلع کے مخیر حضرات اور سماجی و فلاحی تنظیموں کے تعاون سے ضلع بھر میں مختلف مقامات پر مدنی دسترخوانوں کا بھی اہتمام کیا گیا ہے جہاں مسافر, غریب اور مستحق روزہ دار افطاری کر سکیں گے.ڈپٹی کمشنر نے تمام تحصیلوں کے اسسٹنٹ کمشنرز کو ہدایت کی کہ وہ روزانہ کی بنیاد پر رمضان بازاروں کا معائنہ کریں اور اشیاء خوردونوش کی سستے داموں فراہمی کو یقینی بنائیں .پیپلزپارٹی کے کارکن مہنگائی اور قیادت کے خلاف نیب کے کاروائی پر سراپا احتجاج
مہنگائی،حکومتی پالیسیوں اور نیب کی کاروائیوں کے خلاف مظفرگڑھ میں پیپلز پارٹی نے احتجاجمظاہرہ کیا اور حکومت کے خلاف شدید نعرہ بازی کی.مہنگائی،حکومتی پالیسیوں اور نیب کی کاروائیوں کے خلاف مظفرگڑھ میں پیپلز پارٹی کی جانب سے کچہری چوک پر احتجاجی مظاہرہ کیا گیا.مظاہرے میں شامل پیپلز پارٹی کے کارکنوں نے اس موقع پر حکومت کیخلاف شدید نعرہ بازی کی.احتجاجی مظاہرے میں شریک مظاہرین کا کہنا تھا کہ حکومتی پالیسیوں کے باعث مہنگائی میں بے تحاشا اضافہ ہوگیا اور مہنگائی نے غریب عوام کی کمر توڑ دی ہے.مظاہرین کا کہنا تھا کہ حکومت نیب کی ملی بھگت سے اپوزیشن کو دبانا چاہتی ہے جو قابل مذمت امر ہے.
