Category: ننکانہ

ننکانہ صاحب(باغی ٹی وی،نامہ نگاراحسان اللہ ایاز) پاکستان مرکزی مسلم لیگ کے مرکزی نائب صدر پروفیسر حافظ محمد طلحہٰ سعید نے کہا ہے کہ بھارت کشمیر کے بعد بلوچستان پر بھی حملہ آور ہوا ہے، لیکن بلوچستان میں بھارت کے تمام منصوبے ناکام ہو جائیں گے۔ انہوں نے یہ بات پاکستان مرکزی مسلم لیگ ضلع ننکانہ صاحب کے زیراہتمام یکجہتی کشمیر کانفرنس سے خطاب کرتے ہوئے کہی۔

کانفرنس میں پاکستان مرکزی مسلم لیگ کے ضلعی صدر میاں محمد عابد، جنرل سیکرٹری ثاقب مجید سمیت دیگر عہدیداران، کارکنان اور شہریوں کی بڑی تعداد نے شرکت کی۔ پروفیسر حافظ طلحہٰ سعید نے کہا کہ امت مسلمہ، پاکستان اور کشمیر کے دفاع کے لیے پوری قوم متحد ہے اور کلمہ طیبہ کے نام پر قائم ہونے والا ملک پاکستان قیامت تک آباد رہے گا، جبکہ اس کے تمام دشمنوں کی سازشیں ناکام ہوں گی۔

انہوں نے کہا کہ پاکستان مرکزی مسلم لیگ خدمت، عبادت اور برداشت کی سیاست پر یقین رکھتی ہے اور ہم جمہوری و پرامن جدوجہد کے ذریعے اللہ کا نظام ملک میں نافذ کریں گے۔ انہوں نے چور دروازے سے بننے والی حکومتوں پر تنقید کرتے ہوئے کہا کہ یہ عوامی مسائل حل نہیں کر سکتیں۔

پروفیسر حافظ طلحہٰ سعید نے مزید کہا کہ اسلام اور نبی رحمت صلی اللہ علیہ وسلم نے ہمارے تمام مسائل کا حل بتا دیا ہے، جس پر عمل پیرا ہونا ہر مسلمان کا فرض ہے۔ ملکی معیشت کی بہتری کے لیے سنجیدگی اور ایمانداری سے ہر شخص کو اپنا کردار ادا کرنا ہوگا۔

انہوں نے الزام تراشی، گالم گلوچ اور عدم برداشت کی سیاست کو افسوسناک قرار دیتے ہوئے کہا کہ پاکستان مرکزی مسلم لیگ ملک سے ایسی سیاست کا خاتمہ کرے گی۔ انہوں نے اسرائیل کی فلسطین پر قبضے کی مذمت کرتے ہوئے کہا کہ یہ بدترین ظلم ہے۔

پروفیسر حافظ طلحہٰ سعید نے بتایا کہ پاکستان مرکزی مسلم لیگ وہ واحد سیاسی جماعت ہے جو ملک بھر میں یونین کونسل کی سطح پر انٹرا پارٹی انتخابات کروا رہی ہے۔ انہوں نے کہا کہ نومنتخب عہدیداران بلا تفریق رنگ، مذہب اور مسلک عوام کی خدمت کریں گے۔

کانفرنس کے دوران ضلعی جنرل سیکرٹری ثاقب مجید نے پی پی حلقوں اور یونین کونسل کی سطح پر نومنتخب عہدیداروں سے حلف لیا اور ان کی استقامت کے لیے دعا کی۔ بعد ازاں پروفیسر حافظ طلحہٰ سعید نے مدرسہ معاذ بن جبل میں حفظ قرآن مکمل کرنے والے نو حفاظ کرام میں اسناد تقسیم کیں اور گونگے بہرے بچوں سے ملاقات کرتے ہوئے انہیں نصیحت کی کہ وہ اللہ کی نعمتوں پر شکر ادا کرتے ہوئے اس کی تعلیمات پر عمل کریں تاکہ دنیا و آخرت میں کامیابیاں حاصل کر سکیں۔

ننکانہ صاحب (نامہ نگار احسان اللہ ایاز)مشیر وزیراعلیٰ پنجاب برائے پولیو عظمیٰ کاردار نے ننکانہ صاحب کا دورہ کیا، جہاں ان کی زیرِ صدارت ڈپٹی کمشنر آفس کے کمیٹی روم میں جاری پولیو مہم کے حوالے سے جائزہ اجلاس منعقد ہوا۔

اجلاس میں ایڈیشنل ڈپٹی کمشنرز، اسسٹنٹ کمشنرز، سی ای او ہیلتھ، محکمہ صحت کے افسران اور میڈیا نمائندگان نے شرکت کی۔ ڈپٹی کمشنر ننکانہ صاحب محمد تسلیم اختر راؤ نے مشیر وزیراعلیٰ کو ضلع میں جاری پولیو مہم سے متعلق تفصیلی بریفنگ دی۔

بریفنگ میں بتایا گیا کہ ضلع ننکانہ صاحب میں پانچ سال تک کی عمر کے 2 لاکھ 88 ہزار سے زائد بچوں کو پولیو کے قطرے پلانے کا ہدف مقرر کیا گیا ہے، جس کے حصول کے لیے مجموعی طور پر 1198 پولیو ٹیمیں فیلڈ میں قومی فریضہ سرانجام دے رہی ہیں۔ بتایا گیا کہ ضلع میں پولیو مہم کا آج آخری روز ہے اور ہدف کو ہر صورت مکمل کیا جائے گا۔

اس موقع پر مشیر وزیراعلیٰ پنجاب عظمیٰ کاردار نے کہا کہ وزیراعلیٰ پنجاب مریم نواز شریف خود بچوں کو معذوری سے بچانے کے لیے انسدادِ پولیو مہم پر کڑی نظر رکھے ہوئے ہیں، اور پنجاب بھر میں تمام اداروں کے لیے پولیو مہم کے سو فیصد اہداف کا حصول اولین ترجیح ہونی چاہیے۔ انہوں نے ہدایت کی کہ پانچ سال تک کی عمر کا کوئی بھی بچہ پولیو سے بچاؤ کے قطرے پینے سے محروم نہ رہے۔

عظمیٰ کاردار نے انسدادِ پولیو ٹیموں پر زور دیا کہ وہ فیلڈ میں مزید متحرک ہو کر قومی جذبے کے تحت فرائض انجام دیں۔ انہوں نے ہدایت کی کہ جھگیوں، بس اسٹینڈز، شہر کے داخلی و خارجی راستوں اور گھروں تک جا کر بچوں کو پولیو کے قطرے پلائے جائیں تاکہ سو فیصد اہداف کا حصول یقینی بنایا جا سکے۔

بعد ازاں مشیر وزیراعلیٰ پنجاب نے ڈپٹی کمشنر ننکانہ صاحب کے ہمراہ گوردوارہ جنم استھان میں قائم پولیو کیمپ کا بھی دورہ کیا، جہاں انہوں نے بچوں کو پولیو کے قطرے پلائے اور کیمپ میں فراہم کی جانے والی سہولیات کا جائزہ لیا۔

ننکانہ صاحب (نامہ نگار احسان اللہ ایاز)یومِ یکجہتی کشمیر کے موقع پر ضلعی انتظامیہ ننکانہ صاحب کے زیرِ اہتمام ایک پُرامن اور باوقار ریلی کا انعقاد کیا گیا، جس کا مقصد مظلوم کشمیری عوام کے ساتھ یکجہتی کے عہد کی تجدید کرنا تھا۔

ریلی ڈی سی آفس سے شروع ہو کر گوردوارہ جنم استھان پر اختتام پذیر ہوئی۔ ریلی کی قیادت ڈپٹی کمشنر ننکانہ صاحب محمد تسلیم اختر راؤ اور ڈسٹرکٹ پولیس آفیسر فراز احمد نے کی۔ ریلی میں ضلعی افسران، علماء اکرام، سکھ کمیونٹی، تاجر، وکلاء، میڈیا تنظیموں کے نمائندگان اور سول سوسائٹی کے افراد کی بڑی تعداد نے شرکت کی۔

ریلی کے شرکاء نے کشمیری اور پاکستانی پرچموں کے ساتھ بینرز اور پلے کارڈز اٹھا رکھے تھے، جبکہ فضا ’’کشمیر بنے گا پاکستان‘‘ اور ’’افواجِ پاکستان زندہ باد‘‘ کے نعروں سے گونجتی رہی۔

اس موقع پر مقررین نے کہا کہ یومِ یکجہتی کشمیر کشمیری عوام کے ساتھ یکجہتی کے عہد کی تجدید کا دن ہے۔ کشمیری عوام کی قربانیاں، جدوجہد اور استقامت پوری امتِ مسلمہ کے لیے باعثِ فخر ہیں، اور ہر پاکستانی دل کی گہرائیوں سے اپنے کشمیری بھائیوں اور بہنوں کے ساتھ کھڑا ہے۔

مقررین نے کہا کہ مقبوضہ کشمیر میں بھارتی مظالم اور انسانی حقوق کی سنگین خلاف ورزیاں عالمی اداروں کے لیے ایک بڑا سوالیہ نشان ہیں۔ کشمیری عوام کئی دہائیوں سے اپنے حقِ خودارادیت کے لیے جدوجہد کر رہے ہیں، جبکہ اقوامِ متحدہ کی قراردادوں پر عملدرآمد ہی خطے کے امن اور سلامتی کا واحد حل ہے۔

انہوں نے واضح کیا کہ حکومتِ پاکستان کشمیری عوام کی سیاسی، اخلاقی اور سفارتی حمایت جاری رکھے گی۔ کشمیر پاکستان کی شہ رگ ہے اور کشمیری عوام کی آزادی تک ان کی حمایت جاری رہے گی۔ مقررین نے اس امید کا اظہار کیا کہ انشاءاللہ بہت جلد مقبوضہ کشمیر میں بھارتی مظالم کا خاتمہ ہو گا اور کشمیری عوام اقوامِ متحدہ کی قراردادوں کے مطابق اپنے مستقبل کا فیصلہ خود کریں گے۔

ننکانہ صاحب (باغی ٹی وی/احسان اللہ ایاز) ڈپٹی کمشنر محمد تسلیم اختر راؤ نے تحصیل ننکانہ صاحب کا دورہ کرتے ہوئے فوری کارروائی کرتے ہوئے بچیکی بڑا گھر کے اسکول میں کلاس سے غیر حاضر ٹیچر کو معطل کر دیا اور اسکول کے بدانتظامی پر دونوں ہیڈ ماسٹرز کو منتقل کرنے کا حکم جاری کیا ہے۔

تفصیلات کے مطابق ڈپٹی کمشنر نے بچیکی بڑا گھر میں پولیو کیمپس کا وزٹ کیا، جہاں کلاس سے غیر حاضر ہونے اور اسکول میں چھڑی برآمد ہونے کے معاملے پر دو ٹیچرز کو فوری طور پر معطل کر دیا گیا۔ بدانتظامی کے تدارک کے لیے دونوں اسکولوں کے ہیڈ ماسٹرز کو منتقل کرنے کا فیصلہ کیا گیا تاکہ اسکولوں میں نظم و ضبط کو یقینی بنایا جا سکے۔

ڈپٹی کمشنر نے بچیکی اور سیدوالہ کے مختلف بازاروں میں تجاوزات اور صفائی کے جائزے کے لیے بھی دورے کیے اور موٹروے انٹرچینج پر بیوٹیفکیشن اور سپورٹس ارینا کے جاری کاموں کا معائنہ کیا۔ انہوں نے کہا کہ سپورٹس ارینا میں روزانہ کی بنیاد پر فٹ بال اور کرکٹ کے میچز منعقد ہوں گے اور میچز کی آن لائن بکنگ بھی دستیاب ہوگی۔

ڈپٹی کمشنر نے ہدایات جاری کرتے ہوئے کہا کہ ضلع کونسل اور پیرا فورس تجاوزات کے خلاف گرینڈ آپریشن جاری رکھیں، اور ہسپتالوں کی ری ویمپنگ کو جلد مکمل کرنے کے احکامات بھی دیے گئے۔ انہوں نے کہا کہ ہر منصوبے اور اسکول کی صورتحال پر فوری توجہ دی جائے تاکہ ضلع میں نظم و ضبط اور ترقیاتی کاموں کی رفتار برقرار رکھی جا سکے۔

ننکانہ صاحب (باغی ٹی وی/نامہ نگار احسان اللہ ایاز)ننکانہ صاحب کے صحافیوں کے لیے خوشخبری، شہر میں پریس کلب کی اسٹیٹ آف دی آرٹ عمارت کا سنگ بنیاد رکھ دیا گیا۔ ڈپٹی کمشنر ننکانہ صاحب محمد تسلیم اختر راؤ نے صحافتی تنظیموں کے عہدیدران کے ہمراہ نئی عمارت کا سنگ بنیاد رکھا۔

سنگ بنیاد رکھنے کی تقریب میں ایس پی انویسٹیگیشن حناء نیک بخت، ایڈیشنل ڈپٹی کمشنر ریونیو ماہین فاطمہ، اسسٹنٹ کمشنر ثناء شرافت، صدر پریس کلب ننکانہ صاحب چوہدری افضل حق خاں، جنرل سیکرٹری محمد آصف بھٹی سمیت پریس کلب کے دیگر عہدیدران اور ممبران نے شرکت کی۔

تقریب سے خطاب کرتے ہوئے مقررین نے کہا کہ سکھ مذہب کے بانی بابا گورو نانک کی جائے پیدائش ہونے کے باعث عالمی اہمیت کے حامل شہر ننکانہ صاحب میں پریس کلب کی باقاعدہ عمارت نہ ہونے کی وجہ سے صحافیوں کو اپنے پیشہ ورانہ فرائض کی انجام دہی میں شدید مشکلات کا سامنا تھا۔ پریس کلب کی اپنی عمارت کا قیام صحافی برادری کا دیرینہ مطالبہ اور خواب تھا، جو اب شرمندۂ تعبیر ہونے جا رہا ہے۔

مقررین کا کہنا تھا کہ عمارت کی تکمیل کے بعد نہ صرف مقامی صحافیوں کو سہولیات میسر آئیں گی بلکہ سکھوں کے مختلف مذہبی تہواروں اور عالمی تقاریب کی کوریج کے لیے آنے والے ملکی و غیر ملکی صحافیوں کو بھی آسانی ہوگی۔

اس موقع پر ڈپٹی کمشنر محمد تسلیم اختر راؤ نے صحافیوں کو پریس کلب کی تعمیر کے آغاز پر مبارکباد دیتے ہوئے پنجاب حکومت اور ضلعی انتظامیہ کی جانب سے مکمل تکنیکی اور مالی معاونت فراہم کرنے کی یقین دہانی کروائی۔

تقریب کے اختتام پر پریس کلب ننکانہ صاحب کی جانب سے معزز مہمانوں کو یادگاری شیلڈز بھی پیش کی گئیں

ننکانہ صاحب (باغی ٹی وی،نامہ نگاراحسان اللہ ایاز) چیمبر آف کامرس اینڈ انڈسٹری کے صدر میاں ندیم جالندھر نے حکومت سے مطالبہ کیا ہے کہ جنوری 2026 کی مانیٹری پالیسی میں شرحِ سود کو فوری طور پر 11 فیصد سے کم کیا جائے تاکہ صنعتی پہیہ گردش کر سکے۔ اپنے دفتر میں پریس کانفرنس سے خطاب کرتے ہوئے انہوں نے کہا کہ دسمبر 2025 میں کنزیومر پرائس انڈیکس (CPI) محض 2.7 فیصد رہا ہے، جبکہ خطے کے دیگر ممالک میں شرحِ سود پاکستان کے مقابلے میں نمایاں طور پر کم ہے، لہٰذا صنعتوں کی بقا کے لیے سود کی شرح میں بڑی کمی ناگزیر ہو چکی ہے۔ انہوں نے زور دیا کہ حکومت صنعتوں کو سستی بجلی فراہم کرے اور لائف لائن صارفین کو دی جانے والی سبسڈی کا بوجھ صنعت پر ڈالنے کے بجائے اسے حکومتی بجٹ سے پورا کیا جائے، کیونکہ کراس سبسڈی ایک بالواسطہ ٹیکس ہے جسے صنعت اب مزید برداشت کرنے کی سکت نہیں رکھتی۔

صدر چیمبر آف کامرس نے برآمدات میں اضافے کے لیے فائنل ٹیکس ریجیم کی بحالی، 1.25 فیصد ٹرن اوور ٹیکس کے خاتمے اور کمپنیوں پر عائد 39 فیصد ٹیکس کو کم کر کے 20 فیصد تک لانے کا مطالبہ بھی کیا۔ میاں ندیم جالندھر کا کہنا تھا کہ تنخواہ دار طبقے پر ٹیکس کی زیادہ سے زیادہ شرح 15 فیصد مقرر کی جائے اور صنعت کے لیے گیس کی قیمت 2300 روپے فی MMBTU فکس کی جائے۔ انہوں نے حکومت کو مشورہ دیا کہ ملک میں سرمایہ کاری اور روزگار کے مواقع پیدا کرنے کے لیے کم از کم 10 سالہ طویل المدتی صنعتی پالیسی کا اعلان کیا جائے، جس میں ٹیکسوں اور توانائی کی قیمتوں کا پہلے سے تعین ہو تاکہ صنعت کار اعتماد کے ساتھ اپنی سرمایہ کاری کو وسعت دے سکیں اور ملک معاشی ترقی کی راہ پر گامزن ہو سکے۔