Category: ننکانہ

ننکانہ صاحب ،باغی ٹی وی (نامہ نگار احسان اللہ ایاز) ننکانہ صاحب میں پاکستان مرکزی مسلم لیگ کے زیر اہتمام یکجہتی فلسطین ریلی کا انعقاد کیا گیا، جس کی قیادت مرکزی صدر علماء و مشائخ ونگ قاری محمد یعقوب شیخ نے کی۔ ریلی میں صوبائی صدر وسطی پنجاب شیخ فیاض احمد، ضلعی صدر میاں محمد عابد، ضلعی جنرل سیکرٹری انجینئر ثاقب مجید، جنرل سیکرٹری ڈسٹرکٹ بار ایسوسی ایشن رائے شجر عباس، سابق صدر رائے قاسم مشتاق، سیاسی و سماجی رہنماؤں، علماء کرام، وکلاء، تاجروں اور شہریوں کی بڑی تعداد نے شرکت کی۔
یکجہتی فلسطین ریلی ریلوے اسٹیشن سے شروع ہوئی اور مختلف راستوں سے ہوتی ہوئی بیری چوک پر اختتام پذیر ہوئی۔ ریلی کے شرکاء نے ہاتھوں میں بینرز اور پلے کارڈز اٹھا رکھے تھے جن پر فلسطینیوں کی آزادی کے حق اور اسرائیلی مظالم کے خلاف نعرے درج تھے۔ فلسطین کے پرچم تھامے شرکاء نے فلسطین کی آزادی اور اسرائیل مخالف نعرے بازی بھی کی۔ ریلی کے دوران اسرائیلی پرچم بھی نذر آتش کیا گیا اور فلسطین کی جلد آزادی کے لیے خصوصی دعا بھی کی گئی۔

بیری چوک میں ریلی کے شرکاء سے خطاب کرتے ہوئے قاری محمد یعقوب شیخ نے کہا کہ دنیا میں امن کے لیے مسئلہ فلسطین کا جلد حل ضروری ہے۔ اسرائیل نہتے فلسطینیوں پر ظلم کے پہاڑ گرا رہا ہے اور امریکہ اور برطانیہ کی سربراہی میں فلسطینیوں پر ظلم ہو رہا ہے۔ انہوں نے کہا کہ اسرائیلی حملوں سے فلسطین میں صرف عمارتیں گری ہیں، فلسطینیوں کے حوصلے نہیں گرے اور وہ آج بھی اپنی آزادی کے لیے قربانیاں دے رہے ہیں۔ قاری محمد یعقوب شیخ نے کہا کہ اسرائیل نے اپنے آباؤ اجداد کی طرح معاہدے کو توڑا ہے۔ انہوں نے 57 اسلامی ممالک کے سربراہان سے ہوش کے ناخن لینے کا مطالبہ کیا اور زور دیا کہ اتحاد اور جہاد سے اسرائیل کو فلسطین سے نکالنے کی ضرورت ہے۔

ننکانہ صاحب،باغی ٹی وی( نامہ نگار احسان اللہ ایاز)ڈپٹی کمشنر ننکانہ صاحب محمد تسلیم اختر راؤ کی زیر صدارت ویساکھی میلے کے انتظامات کے حوالے سے اعلیٰ سطح اجلاس منعقد ہوا، جس میں ایڈیشنل ڈپٹی کمشنرز، اسسٹنٹ کمشنرز، واپڈا، اوقاف سمیت تمام متعلقہ محکموں کے افسران اور سکھ کمیونٹی کے نمائندگان نے شرکت کی۔

اجلاس میں بتایا گیا کہ ننکانہ صاحب میں ویساکھی میلے کی تقریبات 12 اپریل سے شروع ہو کر 15 اپریل تک جاری رہیں گی، جس میں بھارت سمیت دنیا بھر سے 7 ہزار سے زائد سکھ یاتری 12 اپریل کو ننکانہ صاحب پہنچیں گے، جبکہ مجموعی طور پر 20 ہزار سے زائد یاتریوں کی شرکت متوقع ہے۔

ضلعی انتظامیہ نے میلے کے لیے سکیورٹی، رہائش، ٹریفک اور طبی سہولیات سمیت تمام انتظامات مکمل کر لیے ہیں۔ گوردوارہ جات میں مارکیز لگا کر اندرون ملک سے آنے والے یاتریوں کے قیام کا بندوبست کیا جا رہا ہے جبکہ گوردوارہ جات کے داخلی راستوں پر صرف ضروری سرکاری اداروں کے سٹال لگیں گے۔

میلے کے دوران گوردوارہ جات اور اردگرد کے علاقوں میں بجلی اور گیس کی لوڈشیڈنگ نہیں کی جائے گی۔ یاتریوں کی سہولت کے لیے گورونانک ہائی سکول، کالج، یونیورسٹی، اور راستے میں آنے والے تعلیمی اداروں کو 14 اور 15 اپریل کو بند رکھا جائے گا۔ ٹریفک کنٹرول اور ریسکیو سروسز کے لیے خصوصی پلان جاری کر دیا گیا ہے۔

ڈپٹی کمشنر نے ہدایت کی کہ سٹیٹ بینک اور نیشنل بینک کے علاوہ کسی اور کو کرنسی ایکسچینج کی اجازت نہیں ہو گی، جبکہ میڈیا کارڈز صرف انفارمیشن ڈیپارٹمنٹ جاری کرے گا۔ یاتریوں کے علاج معالجہ کے لیے ڈسٹرکٹ ہیڈ کوارٹر ہسپتال میں خصوصی وارڈ قائم کیا جا رہا ہے۔

انہوں نے کہا کہ پولیس 24 گھنٹے تمام شاہراہوں پر گشت کرے گی، کنٹرول رومز گوردوارہ جات اور ڈی سی آفس میں قائم ہوں گے، سیکیورٹی فول پروف ہو گی، اور سکھ یاتریوں کو ہر ممکن سہولیات دی جائیں گی۔ ٹک ٹاک ویڈیوز بنانے پر پابندی ہو گی جبکہ تمام افسران اور عملے کو ہدایت کی گئی ہے کہ سکھ یاتریوں کے مذہبی جذبات کا مکمل خیال رکھا جائے۔

15 اپریل کو دعائیہ تقریب کے ساتھ ویساکھی میلے کی تقریبات اختتام پذیر ہوں گی، جبکہ ضلعی انتظامیہ کا کہنا ہے کہ دنیا بھر سے آنے والے سکھ یاتری ننکانہ صاحب سے خوشگوار یادیں لے کر واپس لوٹیں گے۔

ننکانہ صاحب (نامہ نگار احسان اللہ ایاز) ڈپٹی کمشنر ننکانہ صاحب محمد تسلیم اختر راؤ نے عید کے موقع پر ڈسٹرکٹ ہیڈ کوارٹر ہسپتال کا دورہ کیا۔ ان کے ہمراہ اسسٹنٹ کمشنر وجہیہ ثمرین، محکمہ صحت کے افسران ایم ایس ڈی ایچ کیو اطہر فرید، ڈاکٹر افتخار اور ڈاکٹر راحیل بھی موجود تھے۔

ڈپٹی کمشنر نے ہسپتال میں داخل مریضوں کی عیادت کی، انہیں عید کی مبارکباد دی اور ان میں مٹھائی اور عید گفٹس بھی تقسیم کیے۔ انہوں نے ہسپتال میں مریضوں کو فراہم کی جانے والی طبی سہولیات کا جائزہ لیا اور اطمینان کا اظہار کیا۔

اس موقع پر ڈپٹی کمشنر محمد تسلیم اختر راؤ نے کہا کہ وزیر اعلی پنجاب مریم نواز شریف کی ہدایت پر ضلع کے تمام ہسپتالوں میں بہترین طبی سہولیات کی فراہمی کو یقینی بنایا جا رہا ہے۔ انہوں نے کہا کہ ہسپتالوں میں مفت ادویات کی فراہمی اور ڈاکٹروں اور عملے کی حاضری کو بھی یقینی بنایا جا رہا ہے

ننکانہ صاحب (نامہ نگار احسان اللہ ایاز) پنجاب ایمرجنسی سروس ریسکیو 1122 ننکانہ صاحب کے جوانوں نے عید الفطر کے موقع پر ضلع بھر کی تمام جامع مساجد، عید گاہوں اور دیگر اہم مقامات پر اپنی ڈیوٹی احسن طریقے سے سرانجام دی۔

شہریوں کے تحفظ اور کسی بھی ہنگامی صورتحال سے نمٹنے کے لیے ریسکیو اہلکار ہمہ وقت ہائی الرٹ رہے۔ ڈسٹرکٹ ایمرجنسی آفیسر محمد اکرم پنوار نے خود تمام صورتحال کی نگرانی کی۔ ریسکیو 1122 کے جوانوں نے اپنی عید کی خوشیوں کو پس پشت ڈال کر عوام کی خدمت میں مصروف رہے۔

ڈسٹرکٹ ایمرجنسی آفیسر محمد اکرم پنوار نے کہا کہ ریسکیو 1122 کے جوانوں نے عید کے موقع پر عوام کی خدمت میں کوئی کسر نہیں چھوڑی اور کسی بھی ناخوشگوار صورتحال میں بروقت مدد فراہم کرنے کے لیے ہمہ وقت تیار رہے۔ انہوں نے عوام سے درخواست کی کہ وہ ان محنتی اور جانفشانی سے خدمات انجام دینے والے ریسکیو اہلکاروں کو اپنی دعاؤں میں یاد رکھیں۔

ننکانہ صاحب(نامہ نگاراحسان اللہ ایاز) اسپائر کالج موڑکھنڈا نے اپنے زیر اہتمام منعقدہ اسپائر انٹیلیجنس ٹیسٹ میں نمایاں پوزیشن حاصل کرنے والے طلباء و طالبات کے اعزاز میں ایک تقریب کا انعقاد کیا۔ تقریب کی صدارت کالج کے پرنسپل حافظ عظمت اللہ نے کی، جبکہ ڈائریکٹرز محمد طارق شہزاد، محمد امین آفتاب، محمد اشفاق، محمد بلال ارشد، فیض الرحمان پڈھیار، کرامت علی اور اساتذہ سمیت طلباء و طالبات کی کثیر تعداد نے شرکت کی۔

اسپائر انٹیلیجنس ٹیسٹ میں طالبات میں فاطمہ حیدر نے پہلی، منیہا دلشاد نے دوسری اور عائشہ مانگٹ حسین نے تیسری پوزیشن حاصل کی۔ اسی طرح، طلباء میں سعد علی افتخار نے پہلی، محمد عزیر سلیم نے دوسری اور عزیر رمضان اور سعد اویس نے تیسری پوزیشن حاصل کی۔

پہلی پوزیشن حاصل کرنے والے طلباء و طالبات کو پچاس ہزار روپے، دوسری پوزیشن والوں کو تیس ہزار روپے اور تیسری پوزیشن والوں کو بیس ہزار روپے نقد انعام دیا گیا۔ اس کے ساتھ ہی، انہیں کالج کی طرف سے دو سالہ انٹرمیڈیٹ کی مفت تعلیم بھی فراہم کی جائے گی۔ ٹیسٹ میں پہلی دس پوزیشنیں حاصل کرنے والے تمام طلباء و طالبات کو بھی دو سال تک مفت تعلیم دی جائے گی۔

تقریب سے خطاب کرتے ہوئے کالج کے ڈائریکٹر محمد طارق شہزاد نے کہا کہ ان کا ادارہ "خواب سے تکمیل تک” کے مشن پر کام کر رہا ہے۔ انہوں نے بتایا کہ کالج نے اپنے قیام کے صرف تین سالوں میں شاندار نتائج اور اعلیٰ روایات کی بدولت ایک منفرد مقام حاصل کیا ہے۔ انہوں نے مزید کہا کہ کالج جدید ترین لیب، منفرد لائبریری اور اعلیٰ تعلیم یافتہ تجربہ کار اساتذہ کی بدولت ہر طالب علم کی پہلی پسند بن گیا ہے۔ انہوں نے اس کامیابی پر اللہ کا شکر ادا کیا اور والدین اور طلباء کی توقعات پر پورا اترنے کے عزم کا اظہار کیا۔

ننکانہ صاحب(نامہ نگاراحسان اللہ ایاز) کنٹری گروپ آف کالجز کے زیر اہتمام اسکالرشپ ٹیسٹ 2025 میں نمایاں پوزیشن حاصل کرنے والے طلباء و طالبات کے اعزاز میں ایک پروقار تقریب کا انعقاد کیا گیا۔ اس تقریب میں سیاسی اور سماجی شخصیات، والدین اور طلباء و طالبات کی کثیر تعداد نے شرکت کی۔

تقریب کا آغاز ننھے طلباء و طالبات کی جانب سے مہمانوں کے پرجوش استقبال سے ہوا۔ بعد ازاں، طلباء و طالبات نے مختلف موضوعات پر دلچسپ اور معلوماتی ٹیبلوز پیش کیے، جنہیں حاضرین نے بے حد سراہا۔ خاص طور پر، نہتے فلسطینیوں پر اسرائیلی مظالم اور عالمی طاقتوں کی خاموشی کے موضوع پر پیش کیے گئے ٹیبلو کو بہت پسند کیا گیا اور بچوں کو دل کھول کر داد دی گئی۔

تقریب کے دوران، مہمانان گرامی نے اسکالرشپ ٹیسٹ میں نمایاں پوزیشن حاصل کرنے والے طلباء و طالبات میں شیلڈز، تعریفی سرٹیفکیٹس اور نقد انعامات تقسیم کیے۔ پہلی پوزیشن حاصل کرنے والے عزیر سلیم کو پچاس ہزار روپے، دوسری پوزیشن پر طلحہ عبدالرؤف کو چالیس ہزار روپے، جبکہ تیسری پوزیشن حاصل کرنے پر عروج فاطمہ اور سعد افتخار کو پچیس پچیس ہزار روپے نقد انعام سے نوازا گیا۔

کنٹری گروپ آف کالجز کی جانب سے اسکالرشپ ٹیسٹ میں پہلی دس پوزیشنیں حاصل کرنے والے طلباء و طالبات کو موڑکھنڈا میں واقع کنٹری کالج میں دو سالہ انٹرمیڈیٹ کی مفت تعلیم اور دیگر تعلیمی اخراجات میں معاونت فراہم کی جائے گی، تاکہ وہ اعلیٰ تعلیم حاصل کر کے زندگی میں آگے بڑھنے کے اپنے خوابوں کو پورا کر سکیں۔

ننکانہ صاحب (باغی ٹی وی نامہ نگار احسان اللہ ایاز) مرکزی جمعیت اہل حدیث ضلع ننکانہ صاحب کے ضلعی امیر مولانا عتیق الرحمان اظہر نے جمعۃ الوداع کے موقع پر مرکزی جامع مسجد کھیاڑے کلاں میں نماز جمعہ کے اجتماع سے خطاب کرتے ہوئے فلسطینیوں پر اسرائیلی مظالم کے خلاف بھرپور آواز اٹھائی۔ انہوں نے عالمی برادری کی خاموشی کو افسوسناک قرار دیتے ہوئے کہا کہ اسرائیل ہزاروں فلسطینیوں کا قاتل ہے۔

مولانا عتیق الرحمان اظہر نے کہا کہ مسلمانوں کا قبلہ اول آج ہماری راہ تک رہا ہے، جہاں اسرائیل ظلم کے پہاڑ ڈھا رہا ہے۔ انہوں نے اقوام متحدہ سمیت انسانی حقوق کی عالمی تنظیموں کی خاموشی پر تنقید کرتے ہوئے کہا کہ یہ وقت امت مسلمہ کے متحد ہونے کا ہے تاکہ فلسطین کی آواز کو یک زبان ہو کر بلند کیا جا سکے۔

انہوں نے مزید کہا کہ نہتے فلسطینیوں پر اسرائیلی مظالم پر عالمی برادری کی خاموشی ناقابل برداشت ہے۔ انہوں نے امت مسلمہ سے مطالبہ کیا کہ وہ یک زبان ہو کر اسرائیل کے خلاف آواز بلند کریں۔

اس موقع پر مولانا عتیق الرحمان اظہر نے پاکستان کی ترقی و سلامتی، امن و امان اور افواج پاکستان کی سلامتی کے لیے خصوصی دعا بھی کی۔ انہوں نے اللہ تعالیٰ سے دعا کی کہ وہ پاکستان کو ہر قسم کے خطرات سے محفوظ رکھے اور ملک میں امن و امان قائم کرے۔

ننکانہ صاحب (باغی ٹی وی نامہ نگار احسان اللہ ایاز) پاکستان مرکزی مسلم لیگ ڈسٹرکٹ ننکانہ صاحب کے زیر اہتمام اسرائیلی دہشت گردی اور قبلہ اول کی آزادی کے حق میں بعد از نماز جمعہ ایک بڑا احتجاجی مظاہرہ کیا جائے گا۔ جس کی قیادت جنرل سیکریٹری ثاقب مجید کریں گے اور یہ احتجاج ہاؤسنگ کالونی چوک میں بعد از نماز جمعہ کیا جائے گا۔ جس میں مختلف مکاتبِ فکر سے تعلق رکھنے والے افراد، سیاسی و سماجی شخصیات اور عوام کی بڑی تعداد شریک ہوگی۔

ثاقب مجید نے اپنے ایک بیان میں کہا کہ اسرائیل نے ایک بار پھر اپنے معاہدوں سے منحرف ہو کر وحشیانہ بمباری اور نہتے فلسطینیوں پر ظلم و ستم میں اضافہ کر دیا ہے۔ مسجد اقصیٰ پر حملے، معصوم بچوں اور خواتین کا قتل عام اور غزہ میں جاری تباہی انسانی تاریخ کا سیاہ ترین باب ہے۔ اسرائیل کی حالیہ کارروائیاں نہ صرف عالمی قوانین کی کھلی خلاف ورزی ہے بلکہ پوری امت مسلمہ کے جذبات کو مجروح کر رہی ہیں۔

انہوں نے مزید کہا کہ فلسطینی عوام پر مظالم کے باوجود عالمی برادری اور اقوام متحدہ کی خاموشی مجرمانہ ہے۔ وقت آ گیا ہے کہ مسلم امہ متحد ہو کر قبلہ اول کی آزادی کے لیے عملی اقدامات کرے۔ انہوں نے پاکستانی حکومت سے مطالبہ کیا کہ اسرائیل کے خلاف سخت سفارتی اقدامات کیے جائیں اور عالمی سطح پر فلسطینیوں کے حقوق کے لیے موثر آواز بلند کی جائے۔

ثاقب مجید نے تمام اہلِ اسلام، انسانی حقوق کے کارکنان اور عوام سے اپیل کی کہ وہ اس احتجاج میں بھرپور شرکت کریں تاکہ مظلوم فلسطینیوں کے ساتھ یکجہتی کا اظہار کیا جا سکے اور اسرائیلی جارحیت کے خلاف ایک مضبوط پیغام دیا جا سکے۔ واضح رہے کہ پاکستان سمیت دنیا بھر میں اسرائیلی مظالم کے خلاف احتجاجی مظاہروں کا سلسلہ جاری ہے جس میں عوام کی بڑی تعداد فلسطینی بھائیوں کے حق میں سڑکوں پر نکل رہی ہے۔

ننکانہ صاحب(نامہ نگاراحسان اللہ ایاز) ڈپٹی کمشنر محمد تسلیم اختر راؤ کی زیر صدارت عیدالفطر کے انتظامات کے حوالے سے ایک اہم اجلاس کمیٹی روم میں منعقد ہوا، جس میں ایڈیشنل ڈپٹی کمشنر ریونیو رائے ذوالفقار علی، تینوں تحصیلوں کے اسسٹنٹ کمشنرز سمیت تمام ضلعی افسران شریک ہوئے۔

ڈپٹی کمشنر نے اجلاس کے دوران واپڈا حکام کو ہدایت دی کہ عید الفطر، جمعتہ الوداع اور شب قدر پر بجلی کی لوڈشیڈنگ نہ کی جائے تاکہ شہری عبادات اور عید کی خوشیوں میں کسی قسم کی پریشانی کا شکار نہ ہوں۔

انہوں نے میونسپل اداروں اور لاہور ویسٹ مینجمنٹ کمپنی کے افسران کو سختی سے ہدایت کی کہ عید الفطر کے موقع پر ضلع کے تمام شہروں، قصبوں، دیہاتوں اور عبادت گاہوں کی صفائی کو یقینی بنایا جائے۔

ڈپٹی کمشنر نے اسسٹنٹ کمشنرز کو ہدایت دی کہ تحصیل سطح پر بڑے گراؤنڈز مختص کر کے نماز عید کے بہترین انتظامات کیے جائیں تاکہ زیادہ سے زیادہ افراد سہولت کے ساتھ عبادات کر سکیں۔

انہوں نے ہدایت کی کہ عید الفطر کے موقع پر سیکیورٹی کے فول پروف انتظامات کیے جائیں، نماز عید کے اجتماعات کے دوران عیدگاہوں اور مساجد کی حفاظت کو یقینی بنایا جائے اور ٹریفک کی روانی برقرار رکھنے کے لیے مؤثر اقدامات کیے جائیں۔

ڈپٹی کمشنر نے اسسٹنٹ کمشنرز، ضلعی ٹرانسپورٹ اتھارٹی اور پرائس کنٹرول مجسٹریٹس کو ہدایت دی کہ عید کے دوران ٹرانسپورٹ کرایوں اور اشیائے خورونوش کی قیمتوں کی سخت مانیٹرنگ کی جائے۔ انہوں نے واضح کیا کہ مقررہ کرایوں سے زائد وصولی اور گراں فروشی کرنے والوں کے خلاف سخت قانونی کارروائی کی جائے گی۔

ڈی سی ننکانہ نے مزید کہا کہ عید کے ایام میں تمام بس اڈوں اور پٹرول پمپس پر ٹوائلٹس کی صفائی یقینی بنائی جائے، تاکہ عوام کو کسی قسم کی پریشانی کا سامنا نہ کرنا پڑے۔

ڈپٹی کمشنر نے تاکید کی کہ عید کے دنوں میں تمام اسسٹنٹ کمشنرز اور پرائس کنٹرول مجسٹریٹس فیلڈ میں موجود رہیں اور گراں فروشوں کے خلاف سخت کریک ڈاؤن کریں تاکہ عوام کو مہنگائی اور زائد قیمتوں سے بچایا جا سکے۔

ضلعی انتظامیہ کی جانب سے کیے جانے والے یہ اقدامات عوام کی سہولت اور عید الفطر کے پرامن اور خوشگوار انعقاد کو یقینی بنانے کے لیے کیے جا رہے ہیں۔