Category: ننکانہ

ننکانہ صاحب: ڈسٹرکٹ ایمرجنسی آفیسر محمد اکرم پنوار اور اسسٹنٹ کمشنر وجیہہ ثمرین کے باہمی تعاون سے سموگ اور دھند کے خطرات کے پیش نظر آگاہی واک کا انعقاد کیا گیا۔ واک میں ریسکیو افسران، ٹریفک پولیس اہلکار، اور کمیونٹی ایمرجنسی ریسپانس ٹیم کے ریسکیو محافظوں نے بڑی تعداد میں شرکت کی۔

شرکاء نے آگاہی بینرز اور پلے کارڈز اٹھا رکھے تھے۔ واک کے بعد ٹریفک حادثات سے بچاؤ کے لیے ٹریکٹر ٹرالیوں، موٹر سائیکلوں، رکشوں، اور دیگر گاڑیوں پر چمکدار تکونی پٹیاں لگائی گئیں۔

ڈسٹرکٹ ایمرجنسی آفیسر محمد اکرم پنوار نے کہا کہ دھند کے دوران حادثات کی بڑی وجہ گاڑیوں پر سیفٹی لائٹس اور چمکدار پٹیوں کی عدم موجودگی ہے۔ انہوں نے فوگ لائٹس اور چمکدار پٹیوں کی تنصیب کو یقینی بنانے پر زور دیا تاکہ پیچھے سے آنے والی گاڑیاں موجودہ گاڑیوں کو دیکھ سکیں۔

اسسٹنٹ کمشنر وجیہہ ثمرین نے کہا کہ فوگ سیزن کے دوران انڈیکیٹرز، فوگ لائٹس، اور حفاظتی پٹیاں لگانے سے حادثات میں نمایاں کمی کی جا سکتی ہے اور قیمتی انسانی جانوں کو محفوظ بنایا جا سکتا ہے۔ انہوں نے تمام شہریوں سے حفاظتی اقدامات اپنانے کی اپیل کی۔

ریسکیو سیفٹی آفیسر علی عمران اور دیگر حکام نے شہریوں کو آگاہ کیا کہ سڑک پر حفاظتی لائٹس اور پٹیوں کا استعمال زندگیوں کو محفوظ رکھنے کے لیے ضروری ہے۔ واک کا مقصد عوام میں شعور پیدا کرنا اور سڑکوں پر حادثات کی روک تھام کے لیے عملی اقدامات کرنا تھا۔

ننکانہ صاحب، باغی ٹی وی (نامہ نگار احسان اللہ ایاز)ننکانہ صاحب میں قرآن و سنہ موومنٹ کی طرف سے مرکز نور الہدی میں ورکر کنونشن کا انعقاد کیا گیا، جس میں قرآن و سنہ موومنٹ پاکستان کے چیئرمین علامہ ابتسام الہی ظہیر نے خصوصی شرکت کی۔ پروگرام کا آغاز تلاوت قرآن پاک سے ہوا۔

کنونشن سے خطاب کرتے ہوئے علامہ ابتسام الہی ظہیر نے کہا کہ پاکستان کی ترقی کے لیے قرآن اور اللہ کے نبی صلی اللہ علیہ وسلم کی سنت پر عمل کرنا ضروری ہے۔ انہوں نے کہا کہ پاکستان 1947 میں اس مقصد کے لیے آزاد ہوا کہ یہاں اسلام کا جھنڈا بلند ہو اور اللہ کے نبی کا قانون نافذ ہو۔ آج ہم مسلمان کافر کے ظلم کا شکار ہیں کیونکہ ہم اپنے مقصد کو بھول چکے ہیں۔

علامہ ابتسام الہی ظہیر نے مزید کہا کہ جب ہم قرآن اور سنت کے مطابق زندگی گزاریں گے، تو ملک کی خوشحالی اور ترقی ہمارا مقدر بنے گی۔

کنونشن کے دوران ضلع ننکانہ صاحب کی ممبر سازی بھی کی گئی۔ مولانا عمران ناصر کو ضلع ننکانہ صاحب کا سرپرست اعلی، حافظ حسان جبار کو چیف آرگنائزر، اور پیر عارف نواز شاہ کو قرآن و سنہ موومنٹ کا صدر مقرر کیا گیا۔ چیئرمین حافظ ملک زکریا اور جنرل سیکرٹری پیر مدثر شاہ نے نوٹیفکیشن جاری کیے۔

پروگرام کے اختتام پر مہمانوں کے لیے مرکز نور الہدی کی جانب سے بہترین کھانے کا انتظام کیا گیا۔

ننکانہ صاحب،باغی ٹی وی( نامہ نگار احسان اللہ ایاز)موجودہ حالات میں یوتھ اور طلباء کا کردار ملک کی ترقی اور استحکام کی ضمانت ہے، شیخ فیاض احمد

پاکستان مرکزی مسلم لیگ کے ضلعی سیکرٹریٹ ننکانہ صاحب میں ایک اجلاس منعقد ہوا، جس کی صدارت پاکستان مرکزی مسلم لیگ سینٹرل پنجاب کے صدر شیخ فیاض احمد نے کی۔ اجلاس میں ضلعی جنرل سیکرٹری ثاقب مجید سمیت ضلع بھر سے نوجوانوں اور طلباء کی بڑی تعداد نے شرکت کی۔ اجلاس میں پاکستان مرکزی مسلم لیگ کی رکنیت سازی مہم کا جائزہ لیا گیا۔

شیخ فیاض احمد نے اجلاس سے خطاب کرتے ہوئے کہا کہ موجودہ حالات میں پاکستان کو معاشی بحران، سیاسی عدم استحکام، اور سماجی مسائل جیسے چیلنجز کا سامنا ہے۔ ایسے میں نوجوانوں اور طلباء کا کردار ملک کی ترقی اور استحکام کے لیے کلیدی حیثیت رکھتا ہے۔ انہوں نے کہا کہ نوجوانوں کی تعلیم یافتہ سوچ ہی پاکستان کو درپیش مسائل کا حل فراہم کر سکتی ہے اور نوجوان نسل کو تعلیم کے زیور سے آراستہ کرنا اولین ترجیح ہونی چاہیے۔

انہوں نے مزید کہا کہ یونیورسٹیوں اور کالجوں میں زیر تعلیم طلباء اپنی تحقیقی صلاحیتوں کے ذریعے جدید ٹیکنالوجی اور سائنسی ترقی کو فروغ دے سکتے ہیں، جو ملکی معیشت کے استحکام میں مددگار ثابت ہو سکتی ہیں۔ شیخ فیاض احمد نے اس بات پر زور دیا کہ نوجوان طبقہ فرقہ واریت اور تعصب کے خاتمے میں اہم کردار ادا کر سکتا ہے۔ ان کی سرگرمیاں امن و امان کے قیام اور سماجی ہم آہنگی کے فروغ میں بھی معاون ہیں۔

انہوں نے کہا کہ نوجوانوں کے لیے روزگار کے مواقع پیدا کرنے سے نہ صرف بے روزگاری کم ہوگی بلکہ ملک کی معیشت بھی مضبوط ہوگی۔ موجودہ حالات میں نوجوان نسل میں سیاسی شعور بیدار کرنا وقت کی اہم ضرورت ہے۔ یوتھ کو ملکی سیاست میں شامل کر کے شفافیت، انصاف، اور بہتر حکمرانی کو فروغ دیا جا سکتا ہے۔

اجلاس میں ضلعی جنرل سیکرٹری ثاقب مجید نے بھی خطاب کیا اور کہا کہ حکومت کو چاہیے کہ نوجوانوں کو تعلیمی اور معاشی مواقع فراہم کرے تاکہ وہ ملک کی ترقی میں بھرپور حصہ لے سکیں۔ انہوں نے کہا کہ یوتھ اور طلباء پاکستان کی ترقی اور استحکام کے اہم ستون ہیں۔ ان کی صلاحیتوں اور جذبے کو صحیح سمت میں استعمال کیا جائے تو پاکستان ترقی کی نئی راہوں پر گامزن ہو سکتا ہے۔

ننکانہ صاحب،باغی ٹی وی (نامہ نگاراحسان اللہ ایاز)ڈپٹی کمشنر کا شاہکوٹ ہسپتال کا دورہ، طبی سہولیات پر اطمینان کا اظہار
تفصیل کے مطابق ڈپٹی کمشنر ننکانہ صاب محمد تسلیم اختر راؤ نے تحصیل ہیڈ کوارٹر اسپتال شاہکوٹ کا رات گئے اچانک دورہ کیا اور اسپتال میں فراہم کی جانے والی طبی سہولیات اور عملے کی کارکردگی کا جائزہ لیا۔

دورے کے دوران ڈپٹی کمشنر نے مختلف شعبہ جات کا معائنہ کیا اور مریضوں سے سہولیات کے حوالے سے دریافت کیا۔ مریضوں نے اسپتال میں طبی سہولیات کی بہترین فراہمی پر اطمینان کا اظہار کیا۔ ڈپٹی کمشنر نے سخت سردی کے باوجود ڈیوٹی سرانجام دینے والے ڈاکٹرز اور عملے کی مکمل حاضری پر اطمینان کا اظہار کرتے ہوئے ان کی کارکردگی کو سراہا۔

ڈپٹی کمشنر نے کہا کہ ضلعی انتظامیہ ہسپتالوں میں ادویات کی دستیابی، معیاری سہولیات کی فراہمی اور عملے کی حاضری یقینی بنانے کے لیے اقدامات جاری رکھے ہوئے ہے۔ ان کا مزید کہنا تھا کہ حکومت پنجاب عوام کو معیاری طبی سہولیات فراہم کرنے کے لیے دن رات کوشاں ہے۔

ننکانہ صاحب،باغی ٹی وی (نامہ نگاراحسان اللہ ایاز)پاکستان مرکزی مسلم لیگ کا 2025 کو ‘خدمت کا سال’ قرار دینے کا اعلان

پاکستان مرکزی مسلم لیگ کے جنرل سیکرٹری ثاقب مجید نے کہا ہے کہ پاکستان کو قائد اعظم کے اسلامی فلاحی ریاست کے خواب کے قریب لے جانے کے لیے عملی اقدامات کی ضرورت ہے۔

انہوں نے اس عزم کا اظہار کیا کہ 2025 کو "خدمت کا سال” قرار دیتے ہوئے ضلع بھر میں خدمت خلق کے نئے منصوبے شروع کیے جائیں گے۔ ان منصوبوں میں فری میڈیکل کیمپس، سستے تندور اور دستر خوان کا قیام شامل ہوگا تاکہ کم آمدنی والے افراد اور محنت کشوں کو سہولت فراہم کی جا سکے۔

ثاقب مجید نے کہا کہ حقیقی سیاست کا مقصد عوام کی بلا تفریق رنگ و نسل اور مذہب خدمت کرنا ہے اور ان منصوبوں کے ذریعے پاکستان مرکزی مسلم لیگ کا مقصد عوامی خدمت کے کاموں کو پھیلانا ہے تاکہ پاکستان کو قائد اعظم کے اسلامی فلاحی ریاست کے تصور کے مطابق ایک مضبوط اور خوشحال ملک بنایا جا سکے۔

ننکانہ صاحب ،باغی ٹی وی( نامہ نگار احسان اللہ ایاز)پاکستان مرکزی مسلم لیگ کے ضلعی دفتر ننکانہ صاحب میں رکنیت سازی مہم کے حوالے سے ایک اجلاس منعقد ہوا، جس کی صدارت لاہور ڈویژن کے صدر چوہدری محمد سرور نے کی۔ اجلاس میں ضلعی جنرل سیکرٹری ثاقب مجید اور دیگر عہدیداران سمیت کارکنان کی بڑی تعداد نے شرکت کی۔

چوہدری محمد سرور نے اس موقع پر کہا کہ پاکستان اس وقت عالمی دباؤ کے باعث شدید مشکلات سے دوچار ہے۔ معیشت تباہ حالی کا شکار ہے، اور سودی قرضوں نے قومی سطح پر بے پناہ مسائل پیدا کر دیے ہیں۔ انہوں نے نوجوانوں کو مخاطب کرتے ہوئے کہا کہ پاکستان کی ترقی میں یوتھ کا کردار کلیدی ہے اور انہیں آگے آ کر اپنا اہم رول ادا کرنا ہوگا۔

انہوں نے کہا کہ پاکستان مرکزی مسلم لیگ ملک کو مایوسیوں سے نکال کر روشن مستقبل کی طرف گامزن کرے گی اور سیاست کو انبیاء کے طرز پر کھڑا کرے گی، تاکہ ملک دن رات ترقی کی منازل طے کر سکے۔ چوہدری محمد سرور نے کہا کہ پاکستان مرکزی مسلم لیگ عوامی خدمت کے کئی منصوبے کامیابی سے چلا رہی ہے، جن سے سینکڑوں افراد مستفید ہو چکے ہیں۔

انہوں نے کارکنان پر زور دیا کہ رکنیت سازی مہم کو مزید تیز کیا جائے اور اللہ سے تعلق کو مضبوط کر کے ملک کی خدمت کے لیے عملی اقدامات کیے جائیں۔ انہوں نے امید ظاہر کی کہ پاکستان مرکزی مسلم لیگ عوام کے تعاون سے ملک کو موجودہ بحرانوں سے نکالنے میں کامیاب ہو گی۔

ننکانہ صاحب ،باغی ٹی وی(نامہ نگاراحسان اللہ ایاز) ڈپٹی کمشنر کےبنیادی مرکز صحت کھیاڑے کلاں کے عملے کی معطلی احکامات ہوامیں اُڑگئے

ڈپٹی کمشنر محمد تسلیم اختر راؤ کے احکامات کے باوجود چار روز گزرنے کے بعد بھی بنیادی مرکز صحت کھیاڑے کلاں کے غیر حاضر عملے کی معطلی کا نوٹیفکیشن جاری نہیں ہو سکا۔

29 دسمبر کی رات ڈپٹی کمشنر نے اچانک بنیادی مرکز صحت کا دورہ کیا، جہاں عملہ، بشمول ایل ایچ وی، آیا، اور چوکیدار، غیر حاضر پایا گیا۔ ڈپٹی کمشنر نے فوری طور پر عملے کو معطل کرنے کے احکامات جاری کیے تھے، لیکن سی ای او ہیلتھ ڈاکٹر طلحہ شیروانی کی جانب سے تاحال کوئی کارروائی نہیں کی گئی۔

ضلعی محکمہ صحت کے معتبر ذرائع کے مطابق ڈپٹی کمشنر کے احکامات کو جان بوجھ کر نظر انداز کیا جا رہا ہے، جو کئی سوالات کو جنم دے رہا ہے۔ یہ صورتحال نہ صرف ضلعی انتظامیہ کے لیے باعث تشویش ہے بلکہ عوام میں بھی بے چینی پیدا کر رہی ہے۔

شہریوں نے مطالبہ کیا ہے کہ ڈپٹی کمشنر کے احکامات پر فوری عمل درآمد کیا جائے اور ذمہ داران کے خلاف سخت کارروائی کی جائے تاکہ آئندہ اس قسم کی غفلت نہ ہو۔

ننکانہ صاحب، باغی ٹی وی( نامہ نگار احسان اللہ ایاز)پروفیسر حافظ عبدالرحمن مکی کی علمی و فکری خدمات کو ہمیشہ یاد رکھا جائے گا، میاں عابد

تفصیل کے مطابق پاکستان مرکزی مسلم لیگ کے ضلعی سیکرٹریٹ میں ممتاز مذہبی اسکالر پروفیسر ڈاکٹر حافظ عبدالرحمن مکی کے انتقال پر تعزیتی نشست منعقد ہوئی جس کی صدارت ضلعی صدر میاں عابد علی نے کی۔ اس موقع پر ضلعی جنرل سیکرٹری ثاقب مجید سمیت ضلع بھر کے پاکستان مرکزی مسلم لیگ کے عہدیداران نے شرکت کی۔

میاں عابد علی نے تعزیتی نشست میں گفتگو کرتے ہوئے کہا کہ پروفیسر حافظ عبدالرحمن مکی کی امت مسلمہ بالخصوص پاکستان کے لیے علمی و فکری خدمات کو ہمیشہ یاد رکھا جائے گا۔ ان کی مذہبی فرقہ واریت کے خلاف جدوجہد اور فتنہ خوارج کے رد میں کی جانے والی کاوشیں امت مسلمہ کے لیے مشعلِ راہ ہیں۔

ضلع جنرل سیکرٹری ثاقب مجید نے کہا کہ حافظ عبدالرحمن مکی کشمیری اور فلسطینی مظلوم مسلمانوں کی آواز تھے اور ان کا وصال ایک ایسے علمی و فکری خلا کا باعث بنا ہے جس کو کبھی پر نہیں کیا جا سکتا۔ ان کی جدوجہد نے پاکستان میں اتحادِ امت کے تصور کو مضبوط کیا اور ان کی رہنمائی سے ہمیں بہت کچھ سیکھنے کو ملا۔

تعزیتی نشست میں شریک دیگر احباب نے بھی پروفیسر حافظ عبدالرحمن مکی کو ایک بہترین متقی اور پرہیزگار انسان قرار دیا اور ان کی علمی خدمات کو خراجِ تحسین پیش کیا۔

تعزیتی نشست کے اختتام پر ضلعی جنرل سیکرٹری ثاقب مجید نے اعلان کیا کہ ضلع بھر میں مختلف پروگراموں کا انعقاد کیا جائے گا، جس میں حافظ عبدالرحمن مکی کی دینی، سیاسی، سماجی اور جماعتی خدمات پر ان کو خراجِ تحسین پیش کیا جائے گا۔

ننکانہ صاحب،باغی ٹی وی( نامہ نگار احسان اللہ ایاز)ڈپٹی کمشنر ننکانہ صاحب محمد تسلیم اختر راؤ نے شدید دھند اور سرد موسم کے باوجود شہریوں کو بہترین طبی سہولیات کی فراہمی کا جائزہ لینے کے لیے رات کے وقت بنیادی مراکز صحت نتھوالا اور بورالہ کا اچانک دورہ کیا۔

دورے کے دوران ڈپٹی کمشنر نے ڈاکٹرز اور عملے کی حاضری، ادویات کے اسٹاک اور دیگر سہولتوں کا معائنہ کیا۔ اس موقع پر انہوں نے طبی عملے کی کارکردگی کو سراہا اور ان کی محنت کو خراج تحسین پیش کیا۔

ڈپٹی کمشنر نے گفتگو کرتے ہوئے کہا کہ ڈسٹرکٹ ہیڈ کوارٹر ہسپتال، تحصیل ہیڈ کوارٹرز، رورل ہیلتھ سنٹرز اور دیہی مراکز صحت کا عملہ رات کے وقت بھی شہریوں کو طبی سہولیات فراہم کرنے کے لیے کوشاں ہے۔ انہوں نے سخت موسم میں خدمات انجام دینے والے افسران اور ملازمین کی کاوشوں کو سراہا اور ان کی حوصلہ افزائی کی۔

محمد تسلیم اختر راؤ نے سی او ہیلتھ کو ہدایت دیتے ہوئے کہا کہ ضلع کے تمام دیہی مراکز صحت پر رات کے وقت 02 فی میل اور 01 میل سٹاف کو تعینات کیا جائے اور کسی بھی ہسپتال میں تین افراد سے کم عملہ نہ ہو، ان ہدایات پر سختی سے عملدرآمد کیا جائے۔

اس دورے کا مقصد شہریوں کو صحت کی بہترین سہولتیں فراہم کرنا اور ہسپتالوں میں عملے کی حاضری کو یقینی بنانا تھا تاکہ شدید موسم کے باوجود لوگوں کو فوری طبی امداد مل سکے۔