Category: ننکانہ

ننکانہ صاحب(باغی ٹی وی ،نامہ نگاراحسان اللہ ایاز) پاکستان مرکزی مسلم لیگ شاہکوٹ کی طرف سے ایک اہم یکجہتی فلسطین کانفرنس کا انعقاد کیا گیا، جس میں فلسطینی عوام کی جدوجہد آزادی کو خراج تحسین پیش کیا گیا اور اسرائیلی بربریت و مظالم کو بے نقاب کیا گیا۔

کانفرنس میں شرکاء نے اسرائیلی مظالم کا ایک سال مکمل ہونے پر یوم یکجہتی فلسطین منانے کا مطالبہ کیا۔ مدیر دعوت و اصلاح پاکستان مرکزی مسلم لیگ، حافظ عبدالرؤف نیک، نے کانفرنس سے خطاب کرتے ہوئے کہا کہ سات اکتوبر کو فلسطین میں معصوم لوگوں کے قتل عام کو ایک سال مکمل ہو جائے گا۔

انہوں نے اس بات پر زور دیا کہ اسرائیل کی جانب سے ہزاروں خواتین، بچوں، اور بوڑھوں کا قتل عام ہو چکا ہے، اور اب لبنان میں بھی حملے جاری ہیں۔ انہوں نے مزید کہا کہ سرزمین فلسطین پر قابض یہودیوں کو بے دخل کیے بغیر جزیرۃ العرب اور مشرق وسطیٰ میں امن قائم کرنا ممکن نہیں۔

جنرل سیکرٹری پاکستان مرکزی مسلم لیگ، ثاقب مجید، نے شرکاء سے خطاب کرتے ہوئے کہا کہ اسرائیل کا وجود خطے میں بدامنی اور سازشوں کا مرکز ہے۔ انہوں نے اس بات پر زور دیا کہ فلسطین مسلمانوں کی مقدس سرزمین ہے، اور اس کا دفاع صرف اہل غزہ کی ذمہ داری نہیں بلکہ پوری امت مسلمہ کا فریضہ ہے۔ کانفرنس میں شریک تمام افراد نے اس عزم کا اعادہ کیا کہ فلسطینی عوام کی مدد کے لیے متحد ہونا ضروری ہے

ننکانہ صاحب (باغی ٹی وی،نامہ نگار احسان اللہ ایاز)پاکستان مرکزی مسلم لیگ نے موجودہ ملکی سیاسی حالات اور عوام کی فلاح کے لیے ملک بھر میں بڑے پیمانے پر ممبر سازی مہم کا آغاز کر دیا ہے۔ اس کا مقصد سیاسی میدان میں ذاتی مفادات کے بجائے عوامی خدمت کو فروغ دینا ہے تاکہ عوام کی مشکلات کا ازالہ کیا جا سکے۔ یہ بات مرکزی مسلم لیگ کے جنرل سیکرٹری انجینئر ثاقب مجید اور مرکزی فنانس سیکرٹری انجینئر حارث ڈار نے مرکز المدینہ ضلعی سیکرٹریٹ میں ایک پریس کانفرنس کے دوران کہی۔

ملکی حالات اور سیاسی جماعتوں کی پالیسیوں پر کڑی تنقید
پریس کانفرنس کے دوران ثاقب مجید نے ملکی سیاسی جماعتوں پر تنقید کرتے ہوئے کہا کہ "موجودہ سیاسی جماعتیں ذاتی مفادات اور اقتدار کی جنگ میں مصروف ہیں۔ حالیہ آئینی ترامیم کے لیے جوڑ توڑ کی کوششیں اس بات کا ثبوت ہیں کہ عوام کی فلاح کے بجائے ذاتی ایجنڈے ترجیح ہیں۔” انہوں نے مزید کہا کہ عوام مہنگائی کی چکی میں پس رہی ہے اور ملک کو مزید تین سال کے لیے عالمی مالیاتی ادارے (آئی ایم ایف) کے پاس گروی رکھوا دیا گیا ہے، جس کا خمیازہ عام شہری بھگت رہا ہے۔

ممبر سازی مہم، عوامی خدمت کے لیے نیا راستہ
پاکستان مرکزی مسلم لیگ نے عوام کی خدمت کو سیاست کی بنیاد بنانے کا عزم ظاہر کیا ہے۔ انجینئر حارث ڈار نے کہا کہ بڑھتے ہوئے عوامی اعتماد کے پیش نظر مرکزی مسلم لیگ نے ملک بھر میں ممبر سازی مہم کا آغاز کیا ہے۔ اس مہم کا مقصد ہے کہ "یونین کونسل کی سطح پر مرد و خواتین کو مرکزی مسلم لیگ کا حصہ بنایا جائے تاکہ گراس روٹ لیول سے عوامی نمائندے سامنے آئیں اور عوامی مسائل کو حقیقی معنوں میں حل کیا جا سکے۔”

اس مہم کے تحت ملک کے چاروں صوبوں میں یونین کونسل کی سطح پر بھرپور ممبر سازی کی جائے گی، اور پہلے مرحلے میں لاکھوں افراد کو جماعت میں شامل کیا جائے گا۔ اس مہم کے لیے ملک بھر کی اہم شاہراہوں پر پارٹی پرچم، اسٹینڈیز اور بینرز آویزاں کیے جائیں گے۔

خواتین اور نوجوانوں کے لیے خصوصی اقدامات
مرکزی مسلم لیگ نے خواتین کو سیاست میں شامل کرنے کے لیے خصوصی اقدامات کیے ہیں۔ خواتین کے لیے الگ سے ٹیمیں تشکیل دی گئی ہیں جو مخصوص علاقوں میں کام کریں گی جبکہ خواتین کے حقوق کا تحفظ یقینی بنانے کے لیے بھی بھرپور کردار ادا کیا جائے گا۔ انجینئر حارث ڈار نے کہا کہ ہم خواتین کو ترقی کے یکساں مواقع فراہم کریں گے اور اقلیتوں کے حقوق کی حفاظت یقینی بنائیں گے تاکہ ہر طبقہ اس ملک کی ترقی میں شامل ہو سکے۔”

دیگر سیاسی جماعتوں کے کارکنان کو بھی دعوت
ثاقب مجید نے تمام سیاسی جماعتوں کے کارکنان کو بھی دعوت دی کہ وہ پاکستان مرکزی مسلم لیگ کا حصہ بنیں اور ملک کو مذہبی منافرت، لسانی تعصب اور سیاسی عصبیت سے نجات دلانے میں تعاون کریں۔ ان کا کہنا تھا کہ پاکستان کو وہ مقام دلانا ہمارا مشن ہے جس کا خواب علامہ اقبال نے دیکھا اور قائد اعظم محمد علی جناح نے عملی تعبیر دی۔”

مہم کا آن لائن آغاز اور مانیٹرنگ کا خصوصی نظام
پاکستان مرکزی مسلم لیگ نے اس ممبر سازی مہم کو جدید دور کے تقاضوں کے مطابق آن لائن بھی دستیاب کر دیا ہے جس سے شہری گھر بیٹھے ممبر شپ فارم بھر کر جماعت میں شامل ہو سکیں گے۔ اس کے علاوہ مرکزی قیادت اس مہم کی مانیٹرنگ کے لیے سنٹرل سیکرٹریٹ میں ایک خصوصی ڈیسک قائم کر چکی ہے جو ملک بھر میں ممبر سازی کی سرگرمیوں کی نگرانی کرے گا۔

پاکستان کے مسائل کے حل کے لیے عزم
پریس کانفرنس کے دوران پاکستان کے موجودہ مسائل جیسے مہنگائی، آئی ایم ایف کے قرضے، لوڈ شیڈنگ، اور تعلیم و صحت کی ناقص صورتحال پر بھی بات کی گئی۔ ثاقب مجید نے کہا کہ پاکستان مرکزی مسلم لیگ ملک کو ان مسائل سے نکالنے کے لیے سنجیدہ اقدامات کرے گی۔ انہوں نے کہا ہم چاہتے ہیں کہ پاکستان کو سودی قرضوں سے نجات دلائی جائے، اشرافیہ کے تسلط کو ختم کیا جائے اور ایک اسلامی فلاحی ریاست کا قیام عمل میں لایا جائے جہاں ہر شہری کو برابری کے حقوق حاصل ہوں۔”

ہم سب سے پہلے انسانیت کی خدمت کو فوقیت دیتے ہیں اور اسی بنیاد پر سیاست کو عبادت سمجھتے ہیں۔ ہمارا مقصد ہے کہ پاکستان کو مستحکم، متحد اور محفوظ بنایا جائے تاکہ ہر شہری خوشحال زندگی گزار سکے۔”

ملک بھر میں سرگرمیوں کا اعلان
ممبر سازی مہم کے دوران مرکزی مسلم لیگ کی قیادت ملک بھر کے اہم شہروں کا دورہ کرے گی تاکہ عوامی رابطے کو فروغ دیا جا سکے اور لوگوں کو جماعت کے منشور سے آگاہ کیا جا سکے۔ اس مہم کا مقصد ملک بھر میں ایک منظم اور ایماندار قیادت فراہم کرنا ہے جو ملک کو ترقی کی راہ پر گامزن کرے گی۔

ننکانہ صاحب(باغی ٹی وی نمہ نگار احسان اللہ ایاز )بچیکی کے نواحی گاؤں چک نمبر چار میں مسلم لیگ ن کے معروف سیاسی و سماجی رہنما چوہدری شہزاد جٹ کی جانب سے ورکرز کنونشن کا انعقاد کیا گیا۔ اس کنونشن میں مسلم لیگ ن کے اہم رہنماؤں اور کارکنان نے شرکت کی۔ خصوصی مہمان کے طور پر ایم پی اے آغا علی حیدر خاں شریک ہوئے، جبکہ دیگر مسلم لیگی رہنما جیسے راٸے امجد حیات کھرل، راٸے منظور احمد کھرل، چوہدری شہادت علی، چوہدری اشفاق جٹ، چوہدری ذوالفقار علی، حاجی شوکت علی آراٸیں اور حاجی مختار احمد بھی موجود تھے۔

کنونشن سے خطاب کرتے ہوئے آغا علی حیدر خاں اور دیگر مقررین نے کہا کہ مسلم لیگ ن ہمیشہ عوامی خدمت کی سیاست پر یقین رکھتی ہے اور پارٹی کے ورکرز اس کا قیمتی اثاثہ ہیں۔ انہوں نے کہا کہ پارٹی کے لیے بےلوث کام کرنے والے کارکنوں کو ہر ممکن تعاون فراہم کیا جائے گا۔ مقررین نے پی ٹی آئی حکومت پر تنقید کرتے ہوئے کہا کہ ان کی غلط پالیسیوں کے باعث ملک کو جمہوری اور اقتصادی میدان میں بھاری نقصان اٹھانا پڑا۔ انہوں نے دعویٰ کیا کہ مسلم لیگ ن کی حکومت میاں شہباز شریف کی قیادت میں جلد ملک کو بحرانوں سے نکالے گی اور ترقی کی راہ پر گامزن کرے گی۔

آغا علی حیدر نے مزید کہا کہ ملکی معیشت بہتر ہوتے ہی پی پی 135 سمیت ضلع بھر میں ترقیاتی کاموں کا آغاز کیا جائے گا۔ وزیراعلیٰ پنجاب مریم نواز شریف تعلیم، صحت، زراعت اور دیگر شعبوں کی بہتری کے لیے مسلسل کام کر رہی ہیں۔

کنونشن میں موجود ورکرز نے مسلم لیگ ن کی قیادت کے عزم کو سراہا اور اس امید کا اظہار کیا کہ آنے والے دنوں میں ملک میں استحکام اور خوشحالی آئے گی۔

ننکانہ صاحب (باغی ٹی وی ،نامہ نگاراحسان اللہ ایاز) ضلعی محکمہ تعلیم میں ایک سنگین بے ضابطگی کا انکشاف ہوا ہے جہاں ریگولر انکوائری میں الزامات ثابت ہونے کے باوجود گورنمنٹ پرائمری سکول چک نمبر 14 جی بی کے ہیڈ ٹیچر نذیر احمد کو مبینہ طور پر افسران کی ملی بھگت سے کلین چٹ دے دی گئی۔ اس غیر معمولی فیصلے پر شہریوں میں شدید تشویش پائی جا رہی ہے، اور انصاف کے تقاضے پامال کیے جانے کی شکایات سامنے آئی ہیں۔

تفصیلات کے مطابق مقامی شہری سمیع اللہ عثمانی نے سی ای او ڈسٹرکٹ ایجوکیشن اتھارٹی احسن فرید کو تحریری درخواست دی جس میں انہوں نے ہیڈ ٹیچر نذیر احمد پر سنگین الزامات عائد کیے۔ درخواست کے مطابق ہیڈ ٹیچر نے اختیارات کا ناجائز استعمال کرتے ہوئے اسکول کے لیے دیے گئے این ایس بی (Non-Salary Budget) اور ایف ٹی ایف (Federal Teachers Fund) کے فنڈز میں خردبرد کی اور اسکول کا سارا ریکارڈ بوگس تیار کیا۔ اس کے علاوہ انہوں نے رجسٹرڈ فرموں کی بجائے جعلی بل تیار کر کے فنڈز کا غلط استعمال کیا۔

اس معاملے پر انکوائری آفیسر عبدالسلام طیب نے تحقیقات کیں اور ریگولر انکوائری میں نذیر احمد کے خلاف لگائے گئے الزامات کو درست قرار دیتے ہوئے ان کی نااہلی کو واضح کیا۔ انکوائری رپورٹ میں صاف الفاظ میں لکھا گیا کہ ہیڈ ٹیچر نے اسکول کے فنڈز میں خردبرد کی اور ریکارڈ کو بوگس تیار کیا، جس سے محکمہ تعلیم اور سرکاری خزانے کو نقصان پہنچایا۔

انکوائری میں الزامات ثابت ہونے کے باوجود سابق ڈسٹرکٹ ایجوکیشن ایلیمنٹری میل، منیر احمد، نے مبینہ طور پر ہیڈ ٹیچر نذیر احمد کے ساتھ ملی بھگت کر کے انہیں کلین چٹ دے دی۔ منیر احمد کی جانب سے یہ اقدام شدید تنقید کا شکار ہو رہا ہے کیونکہ یہ انصاف کے بنیادی اصولوں کے بالکل منافی ہے۔ شہری سمیع اللہ عثمانی کے مطابق یہ ملی بھگت نہ صرف محکمہ تعلیم کی شفافیت پر سوالیہ نشان ہے بلکہ اس سے دیگر اسکولوں میں بھی بدعنوانی کی حوصلہ افزائی ہو سکتی ہے۔

اس سنگین بے ضابطگی پر شہریوں میں غم و غصے کی لہر دوڑ گئی ہے۔ شہریوں کا کہنا ہے کہ محکمہ تعلیم میں ایسی بدعنوانیوں کی روک تھام کے لیے سخت کارروائی کی جانی چاہیے اور ذمہ دار افسران کو جوابدہ ٹھہرایا جانا چاہیے۔ مقامی افراد کا کہنا ہے کہ اس طرح کے اقدامات محکمے کی ساکھ کو نقصان پہنچاتے ہیں اور بدعنوان عناصر کی حوصلہ افزائی کرتے ہیں۔

سمیع اللہ عثمانی کی درخواست پر سی ای او ایجوکیشن احسن فرید نے اس معاملے کو سنجیدگی سے لیتے ہوئے تحقیقات کا حکم دیا ہے۔ سی ای او نے ڈسٹرکٹ ایجوکیشن آفیسر سے تحریری وضاحت طلب کی ہے اور اس بات کی یقین دہانی کرائی ہے کہ اگر کسی قسم کی بدعنوانی ثابت ہوئی تو سخت کارروائی کی جائے گی۔

اس وقت کئی قسم کے سوالات جنم دے رہے کہ کیا یہ تحقیقات غیر جانبدار نہیں تھی؟کیا سیاسی دباؤ کی وجہ سے ملوث افراد کو بچایا گیا؟؟کیا سیاسی دباؤ کی وجہ سے ملوث افراد کو بچایا گیا؟کیا قانون میں کوئی ایسی کمزوری ہے جس کی وجہ سے کرپشن کے مقدمات میں سزا نہیں مل پاتی؟

شہریوں کی جانب سے مطالبہ کیا جا رہا ہے کہ اس کیس کی شفاف تحقیقات کی جائیں اور اگر نذیر احمد اور دیگر افسران قصوروار ثابت ہوں تو ان کے خلاف قانونی کارروائی کی جائے۔

ننکانہ صاحب (باغی ٹی وی، نامہ نگار احسان اللہ ایاز)غیر رجسٹرڈ پرائیویٹ سکولوں کے خلاف کریک ڈاؤن کا آغاز

تفصیل کے مطابق ضلع ننکانہ صاحب میں غیر رجسٹرڈ پرائیویٹ اسکولوں کے خلاف ضلعی محکمہ تعلیم نے سخت اقدامات کا آغاز کرتے ہوئے کریک ڈاؤن کا فیصلہ کیا ہے۔ ڈسٹرکٹ ایجوکیشن آفیسر ایلیمنٹری میل ایجوکیشن خالد محمود کی سربراہی میں جاری احکامات کے تحت تمام اسسٹنٹ ایجوکیشن افسران کو ہدایت دی گئی ہے کہ وہ اپنے اپنے علاقوں میں رجسٹرڈ اور غیر رجسٹرڈ اسکولوں کی تفصیلی فہرستیں مرتب کرکے ڈپٹی ڈسٹرکٹ ایجوکیشن افسران کے دفاتر میں جمع کرائیں۔

غیر رجسٹرڈ اسکولوں کے خلاف کارروائی
محکمہ تعلیم نے اعلان کیا ہے کہ وہ تمام غیر رجسٹرڈ اسکول جو ضلع بھر میں گلی محلوں میں قائم ہیں اور نامناسب عمارتوں میں بچوں کو تعلیم فراہم کر رہے ہیں، ان کو بند کرنے اور سیل کرنے کی کارروائی کی جائے گی۔ حکام کا کہنا ہے کہ ایسے اسکولوں میں کسی بھی وقت کوئی ناخوشگوار واقعہ رونما ہوسکتا ہے، اس لیے ان کے خلاف فوری ایکشن ناگزیر ہے۔

اسکول مالکان کو آخری مہلت
محکمہ تعلیم نے غیر رجسٹرڈ اسکول مالکان کو تین دن کی مہلت دی ہے کہ وہ اپنی اسکول رجسٹریشن کے لیے ڈسٹرکٹ ایجوکیشن اتھارٹی کو درخواستیں جمع کروائیں۔ اس دوران درخواست نہ دینے والے اسکولوں کو سیل کرنے کے ساتھ ساتھ قانونی کارروائی کا سامنا کرنا پڑے گا۔

ضلعی محکمہ تعلیم کی تشویش
محکمہ تعلیم کے افسران نے تشویش کا اظہار کرتے ہوئے کہا ہے کہ ضلع بھر میں بے شمار غیر قانونی اور غیر رجسٹرڈ اسکول بغیر کسی حفاظتی معیار کے چلائے جا رہے ہیں، جس سے بچوں کی حفاظت اور تعلیمی معیار دونوں خطرے میں ہیں۔ ان اسکولوں کی نہ صرف رجسٹریشن کی جائے گی بلکہ ان کے تعلیمی اور حفاظتی معیار کا بھی جائزہ لیا جائے گا تاکہ مستقبل میں کسی بھی ناخوشگوار واقعے سے بچا جا سکے۔

یہ کارروائی ضلع میں تعلیم کے معیار کو بہتر بنانے اور غیر قانونی اسکولوں کے خاتمے کے لیے کی جا رہی ہے تاکہ بچوں کو محفوظ اور معیاری تعلیمی ماحول فراہم کیا جا سکے۔

ننکانہ صاحب (باغی ٹی وی نامہ نگار احسان اللہ ایاز) وزیر اعلیٰ پنجاب مریم نواز شریف اور چیف سیکرٹری پنجاب کی اوپن ڈور پالیسی کے تحت ڈپٹی کمشنر ننکانہ صاحب محمد تسلیم اختر راؤ عوام الناس کے مسائل کے بروقت حل کے لیے روزانہ صبح 10 بجے سے 11:30 بجے تک شہریوں کے مسائل سن کر موقع پر متعلقہ محکموں کو احکامات جاری کرتے ہیں۔

تفصیلات کے مطابق، ڈپٹی کمشنر محمد تسلیم اختر راؤ اور دیگر ضلعی افسران بشمول ایڈیشنل ڈپٹی کمشنرز، اسسٹنٹ کمشنرز، اور ضلع کونسل کے افسران نے اوپن ڈور پالیسی کے تحت شہریوں کی شکایات سنیں اور ان کے فوری حل کے لیے اقدامات کیے۔

ڈپٹی کمشنر نے اوپن ڈور پالیسی کی اہمیت پر روشنی ڈالتے ہوئے کہا کہ یہ عوام دوست پالیسی وزیر اعلیٰ پنجاب مریم نواز شریف کی عوام کو فوری ریلیف فراہم کرنے کی ترجمانی کرتی ہے۔ انہوں نے مزید کہا کہ ضلع بھر کے شہری کسی بھی سرکاری محکمہ سے متعلق اپنے مسائل لے کر سرکاری دفاتر آسکتے ہیں تاکہ ان کا بروقت اور مناسب حل فراہم کیا جاسکے۔

ڈپٹی کمشنر محمد تسلیم اختر راؤ نے واضح کیا کہ عوامی مسائل کے حل میں کسی قسم کی کوتاہی برداشت نہیں کی جائے گی اور ضلعی انتظامیہ کی اولین ترجیح عوام کو بروقت انصاف فراہم کرنا ہے۔ تمام ضلعی افسران کو ہدایت کی گئی ہے کہ وہ صبح 10 بجے اپنے دفاتر میں موجود ہوں تاکہ شہریوں کو درپیش مسائل کے فوری حل کے لیے اقدامات کیے جاسکیں۔

ڈپٹی کمشنر نے اس عزم کا اظہار کیا کہ اوپن ڈور پالیسی کے تحت ان کے دفتر کے دروازے ہمیشہ عوام کے لیے کھلے رہیں گے، اور شہریوں کے مسائل کے حل میں کسی قسم کی غفلت ناقابل برداشت ہوگی۔

ننکانہ صاحب(باغی ٹی وی نامہ نگاراحسان اللہ ایاز) ڈپٹی کمشنر محمد تسلیم اختر راؤ کی زیر صدارت ناجائز تجاوزات کے خاتمے کے حوالے سے ایک اہم اجلاس منعقد ہوا، جس میں ایڈیشنل ڈپٹی کمشنر جنرل اور ضلعی افسران کے علاوہ تاجر تنظیموں کے نمائندے بھی شریک ہوئے۔ اجلاس میں ضلع بھر کے تاجران کو 25 ستمبر تک ناجائز تجاوزات ہٹانے کی ہدایت کی گئی۔

ڈپٹی کمشنر نے بتایا کہ 25 ستمبر کے بعد احکامات نہ ماننے والوں کے خلاف بھاری جرمانے، کاروبار کی سیل اور مقدمات کا اندراج کیا جائے گا۔ انہوں نے ضلعی افسران کو ہدایت کی کہ وہ اس حوالے سے 25 ستمبر تک کارروائی یقینی بنائیں۔

محمد تسلیم اختر راؤ نے کہا کہ شہریوں کی گزرگاہوں کی بندش برداشت نہیں کی جائے گی اور وزیر اعلی پنجاب کے ویژن کے مطابق فٹ پاتھ اور سروس روڈز کو ہر صورت کلیئر کروایا جائے گا۔ 25 ستمبر کے بعد ناجائز تجاوزات کے خلاف بڑے پیمانے پر کریک ڈاؤن کیا جائے گا۔