Category: ننکانہ

ننکانہ صاحب (باغی ٹی وی نامہ نگار احسان اللہ ایاز)مسلم سٹوڈنٹس لیگ پاکستان کے صدر انس محصی نے ضلع ننکانہ صاحب کا دورہ کیا اور رفاء انٹرنیشنل کالج اور گورنمنٹ ڈگری کالج ننکانہ کے طلبہ سے خطاب کیا۔ انہوں نے "مایوسی کے اس دور میں طلبہ کا کردار” کے موضوع پر بات کرتے ہوئے نوجوانوں کو حوصلہ دیا اور انہیں موجودہ حالات میں مثبت کردار ادا کرنے کی ترغیب دی۔

دورے کے دوران انس محصی نے ڈپٹی ڈائریکٹر کالجز ننکانہ، چوہدری محمد ارشد سے خصوصی ملاقات کی، جہاں مسلم سٹوڈنٹس لیگ کی سرگرمیوں اور مقاصد پر تبادلہ خیال کیا گیا۔ اس موقع پر تنظیم کے زونل کوآرڈینیٹر حماد اور ضلعی کوآرڈینیٹر عمر بھی ان کے ہمراہ تھے۔

بعد ازاں مسلم سٹوڈنٹس لیگ ننکانہ کے پی پی اور یو سی کوآرڈینیٹرز کا اجلاس بھی منعقد ہوا، جس میں تنظیم کے سابقہ کاموں کا جائزہ لیا گیا اور آئندہ ماہ کی سرگرمیوں پر مشاورت کی گئی۔ انس محصی نے کہا کہ مسلم سٹوڈنٹس لیگ پاکستان طلبہ کے حقوق اور تعلیم کے بہتر مواقع کے لیے اپنی جدوجہد جاری رکھے گی۔

ننکانہ صاحب (باغی ٹی وی،نامہ نگاراحسان اللہ ایاز) ڈپٹی کمشنر محمد تسلیم اختر راو نے پولیو مہم کے حوالے سے ایک اہم اجلاس میں ہدایات جاری کرتے ہوئے کہا کہ مہم کے دوران غیر متعلقہ افراد پولیو ٹیموں کے ساتھ ہرگز موجود نہ ہوں۔ کسی بھی غیر متعلقہ فرد کی موجودگی کی اطلاع پر فوری سخت ایکشن لیا جائے گا۔ انہوں نے واضح کیا کہ ضلع بھر میں مہم کی خود نگرانی کریں گے اور پولیو کے خاتمے میں رکاوٹ بننے والے افسران و ملازمین کے خلاف سخت کارروائی کی جائے گی۔

ڈپٹی کمشنر نے اجلاس میں تمام متعلقہ اداروں خاص طور پر محکمہ صحت اور محکمہ تعلیم کے افسران کو ہدایت کی کہ وہ مل کر ایک مشترکہ حکمت عملی بنائیں تاکہ مہم کے دوران کوئی بچہ حفاظتی قطرے پینے سے محروم نہ رہ جائے۔ انہوں نے کہا کہ پولیو مہم کو قومی فریضہ سمجھا جائے اور تمام ادارے باہمی تعاون کے ساتھ کام کریں۔

سرکاری اور نجی سکول فوری طور پر 5 سال سے کم عمر بچوں کی فہرستیں محکمہ صحت کے حوالے کریں تاکہ ان بچوں تک رسائی یقینی بنائی جا سکے۔
ہر یونین کونسل میڈیکل آفیسر (UCMO) پولیو ٹیموں کے ساتھ مل کر روزانہ کی بنیاد پر کمیونٹی سیشنز کا انعقاد کرے۔ریونیو عملے اور یو سی ایم اوز کو ہدایت کی گئی ہے کہ وہ مساجد میں بچوں کو پولیو کے قطرے پلانے کے بارے میں اعلانات کروائیں۔

ڈپٹی کمشنر نے پولیو ورکرز اور UCMOs کو حکم دیا کہ گھر گھر جا کر تفصیلی سروے کریں اور درج ذیل سوالات ضرور پوچھیں:
آپ کے گھر میں کتنے بچے موجود ہیں؟،کتنے افراد شادی شدہ ہیں؟کتنے بچے اسکول جاتے ہیں اور وہ کس اسکول میں زیرِ تعلیم ہیں؟،اسکول جانے والے بچوں کی عمریں کیا ہیں؟،کیا کوئی مہمان حالیہ دنوں میں آپ کے گھر آیا ہے؟،کیا کوئی بچہ سو رہا ہے؟

ڈپٹی کمشنر نے واضح کیا کہ ننکانہ صاحب میں صرف وہی افراد کام کریں گے جو اپنی ڈیوٹی کو ذمہ داری سمجھ کر انجام دیں گے۔ انہوں نے کہا کہ نااہل افسران و ملازمین کی ضلع میں کوئی جگہ نہیں ہوگی اور ان کے خلاف فوری کارروائی کی جائے گی۔

ڈپٹی کمشنر نے کہا کہ پولیو ٹیموں کی خود نگرانی کروں گا تاکہ یہ یقینی بنایا جا سکے کہ ہر گھر میں قطرے پلانے کا عمل مکمل ہو۔ کسی بھی قسم کی کوتاہی برداشت نہیں کی جائے گی اور مہم کی راہ میں رکاوٹ ڈالنے والوں کے خلاف سخت ایکشن لیا جائے گا۔

اجلاس کے اختتام پر ڈپٹی کمشنر محمد تسلیم اختر راؤ نے کہا کہ تمام اداروں اور افسران کو نیک نیتی اور لگن کے ساتھ کام کرنا ہوگا۔ انہوں نے کہا کہ حکومت ہمیں عوامی خدمت کے لیے تنخواہ دیتی ہے، لہٰذا سب کا اولین مقصد ذمہ داری اور ایمانداری کے ساتھ عوامی خدمت ہونا چاہیے۔

ڈپٹی کمشنر کے بیانات اور پولیو مہم کے حوالے سے سخت ہدایات کو عوامی سطح پر سراہا جا رہا ہے۔ شہریوں نے امید ظاہر کی ہے کہ ان اقدامات سے پولیو کے خلاف مہم مزید مؤثر ہوگی اور ننکانہ صاحب کو جلد ہی پولیو فری ضلع بنایا جا سکے گا۔

ننکانہ صاحب (باغی ٹی وی،نامہ نگاراحسان اللہ ایاز) چھاتی کے کینسر سے بچاؤ کے لیے میموگرام ضروری ہے، ڈاکٹر سائرہ نوید چوہدری

تفصیل کے مطابق پاکستان میں ہر سال تقریباً 40 ہزار خواتین چھاتی کے کینسرکے باعث جان سے ہاتھ دھو بیٹھتی ہیں، جبکہ بروقت تشخیص اس مہلک بیماری کا کامیاب علاج ممکن بنا سکتی ہے۔

ڈسٹرکٹ ہیڈ کوارٹر ہسپتال ننکانہ صاحب کی معروف گائناکالوجسٹ، ڈاکٹر سائرہ نوید چوہدری نے بریسٹ کینسر سے آگاہی کے حوالے سے گفتگو کرتے ہوئے کہا کہ اکتوبر میں گلابی رنگ کا تھیم اپناتے ہوئے کینسر سے آگاہی مہم چلائی جاتی ہے، مگر افسوس کہ خواتین کی جانب سے میموگرام کروانے میں غفلت برتی جاتی ہے۔

انہوں نے کہا کہ میموگرام کے ذریعے چھاتی کے کینسر کی جلد تشخیص ممکن ہے، جو علاج کی کامیابی میں اہم کردار ادا کرتی ہے۔ لیکن خواتین میں بیماری کی تشخیص اور علاج سے جڑے خوف اور سماجی رویوں کے باعث یہ عمل متاثر ہو رہا ہے۔ ڈاکٹر سائرہ نے زور دیا کہ 35 سے 40 سال کی عمر کی خواتین کو سال میں کم از کم ایک بار میموگرام ضرور کروانا چاہیے۔

انہوں نے بتایا کہ دنیا بھر کے اعداد و شمار کے مطابق ہر آٹھویں عورت کو زندگی کے کسی مرحلے میں چھاتی کا کینسر لاحق ہو سکتا ہے۔ جنوب مغربی ایشیا خاص طور پر پاکستان میں اس بیماری کی شرح تشویشناک حد تک زیادہ ہے۔ ڈاکٹر سائرہ نے مزید کہا کہ اگر کسی ماں کو چھاتی کا کینسر ہو چکا ہے تو اس کی بیٹیوں میں بھی یہ مرض ہونے کا خطرہ بڑھ جاتا ہے لہٰذا انہیں بھی باقاعدہ اسکریننگ اور الٹراساؤنڈ کروانا چاہیے۔

ڈاکٹر سائرہ نوید چوہدری نے نشاندہی کی کہ اب یہ مرض کم عمر خواتین میں بھی عام ہوتا جا رہا ہے حالانکہ پہلے یہ بیماری عموماً 50 سے 60 سال کی عمر کی خواتین میں پائی جاتی تھی۔ انہوں نے خواتین پر زور دیا کہ اپنی صحت کا خاص خیال رکھتے ہوئے بروقت میموگرام کروائیں تاکہ اپنی اور اپنے خاندان کی زندگی محفوظ بنا سکیں۔

ننکانہ صاحب(باغی ٹی وی، نامہ نگار احسان اللہ ایاز)محکمہ تعلیم کو پولیومہم میں شامل کرنے پر محکمہ صحت کے کرپٹ ٹولے کی چیخیں ساتویں آسمان پر پہنچنے لگیں،محکمہ صحت کے افسران اور ملازمین محکمہ تعلیم کے اساتذہ اور عملے کو پولیو مہم میں شامل ہونے سے روکنے کیلئے کسی بھی حد تک جانے کو تیار: ذرائع

تفصیلات کے مطابق ڈپٹی کمشنر ننکانہ صاحب محمد تسلیم اختر راؤ اور سی ای او ہیلتھ ڈاکٹر طلحہ بن ضیاء نے کرپشن کے خلاف بڑا قدم اٹھاتے ہوئے 28 اکتوبر سے شروع ہونے والی پولیو مہم کو محکمہ تعلیم کے تعاون سے مکمل کرنے کا فیصلہ کیا ہے، جس کے نتیجے میں ضلعی ہیلتھ کے کرپٹ مافیا میں شدید بےچینی پھیل گئی ہے۔

معتبر ذرائع کے مطابق اس فیصلے سے متاثر ہونے والے افسران اور ملازمین نے سیاسی اور سماجی مہم کا آغاز کر دیا ہے تاکہ محکمہ تعلیم کے اساتذہ اور عملے کو پولیو مہم میں شامل ہونے سے روکا جا سکے۔ ماضی کی روایات کے مطابق یہ افسران چاہتے ہیں کہ سول افراد اور رضاکاروں کے ذریعے مہم مکمل کی جائے تاکہ بدعنوانی کے دروازے کھلے رہیں۔

پولیو مہم 28 اکتوبر سے شروع ہو کر 3 نومبر تک جاری رہے گی، جس دوران 2 لاکھ 80 ہزار 300 سے زائد بچوں کو پولیو ویکسین اور وٹامن اے کے قطرے پلائے جائیں گے۔ مہم کے لیے مجموعی طور پر 1198 ٹیمیں تشکیل دی گئی ہیں جن میں:1096 موبائل ٹیمیں،72 فکسڈ ٹیمیں،30 ٹرانزٹ ٹیمیں ہوں گی

ڈپٹی کمشنر نے تمام اداروں کے افسران کو ہدایت دی ہے کہ پولیو مائیکرو پلان پر عملدرآمد یقینی بنایا جائے تاکہ مہم کامیابی سے ہمکنار ہو۔ اس فیصلے کے بعد ضلعی محکمہ صحت کے افسران پر واضح پابندیاں عائد کر دی گئی ہیں اور انہیں اس فیصلے پر عملدرآمد سے روکا نہیں جا سکتا۔

پولیو مہم میں محکمہ تعلیم کے 1434 ملازمین خدمات انجام دیں گے جس سے نہ صرف شفافیت کو یقینی بنایا جائے گا بلکہ بدعنوانی کے تمام امکانات کا خاتمہ بھی ممکن ہوگا۔

یہ اقدام صحت کے شعبے میں اصلاحات کی جانب ایک اہم قدم ہے جو کرپٹ مافیا کے لیے ایک واضح پیغام ہے کہ اب غیرشفاف سرگرمیوں کی کوئی گنجائش باقی نہیں۔ عوامی و سماجی حلقوں نے ڈپٹی کمشنر کے اس دانشمندانہ اقدام کو خوب سراہا ہے .

ننکانہ صاحب (باغی ٹی وی، نامہ نگار احسان اللہ ایاز) – بابا گورو نانک کے 555ویں جنم دن کی تقریبات 14 سے 16 نومبر تک جاری رہیں گی۔ ڈپٹی کمشنر ننکانہ محمد تسلیم اختر راو کی زیرِ صدارت ایک اہم اجلاس منعقد ہوا، جس میں ضلعی انتظامیہ کے تمام اعلیٰ افسران، ایڈیشنل ڈپٹی کمشنرز، اسسٹنٹ کمشنرز، محکمہ اوقاف اور دیگر متعلقہ اداروں کے نمائندوں نے شرکت کی۔

تمام تعلیمی ادارے 14، 15 اور 16 نومبر کو بند رہیں گے، جبکہ 15 نومبر کو ضلع ننکانہ میں عام تعطیل کا اعلان کیا گیا ہے۔گوردواروں کے اطراف گوشت اور پان شاپس بند رہیں گی۔تمام افسران کو گوردواروں میں ڈیوٹی کے دوران ممنوعہ سرگرمیوں سے اجتناب کی ہدایت دی گئی ہے۔

سپیشل پرائس کنٹرول مجسٹریٹس 24 گھنٹے کے لیے تعینات کیے جائیں گے۔ہنگامی حالات سے نمٹنے کے لیے ہیوی مشینری مکمل طور پر فعال رکھی جائے گی۔گوردوارہ جنم استھان میں مختلف ممالک کی کرنسی کے تبادلے کے لیے کاؤنٹرز قائم کیے جائیں گے۔

میونسپل اداروں کو شہر کو زیرو ویسٹ بنانے کے لیے فوری پلان تیار کرنے کی ہدایت دی گئی ہے۔ شہر بھر کو خوبصورت بنانے کے لیے خصوصی اقدامات اور پیچ ورک مکمل کرنے کا حکم دیا گیا ہے۔ تمام بینرز اور فلیکسز کو فوری طور پر ہٹانے کی ہدایت بھی جاری کی گئی۔

پولیس کو تھری لیئر اور روف ٹاپ سیکیورٹی کے علاوہ پارکنگ ایریاز کو حتمی شکل دینے کی ہدایت کی گئی ہے۔
شہر میں سیکورٹی کیمروں کی تنصیب کا عمل جلد مکمل کرنے اور کنٹرول رومز کے ذریعے نگرانی کا عمل یقینی بنایا جائے گا۔
محکمہ صحت تمام گوردواروں میں اسپرے کے ذریعے بیماریوں سے بچاؤ یقینی بنائے گا اور جنم استھان پر منی ہسپتال قائم کیا جائے گا۔

ریسکیو 1122 تقریبات کے دوران دوسرے اضلاع سے ایمبولینسز اور عملے کی تعیناتی کے اقدامات کرے گا۔ فوڈ اتھارٹی اور محکمہ صحت کی ٹیمیں ساتوں گوردواروں میں لنگر کی چیکنگ کے بعد تقسیم یقینی بنائیں گی۔

ڈپٹی کمشنر محمد تسلیم اختر راو نے کہا کہ تقریبات کے دوران ضلعی انتظامیہ کے تمام افسران اور ملازمین کی چھٹیاں منسوخ رہیں گی۔ انہوں نے اس بات پر زور دیا کہ پاکستان آنے والے تمام سکھ یاتریوں کو بہترین سہولیات فراہم کرنا ہماری ذمہ داری ہے۔ ان تقریبات کے ذریعے پاکستان کا عالمی سطح پر مثبت امیج اجاگر ہوگا۔

دنیا بھر سے آنے والے سکھ یاتریوں کو خوش آمدید کہتے ہوئے، ڈپٹی کمشنر نے کہا کہ یہ مہمان ہمارے لیے باعثِ عزت ہیں، اور انہیں بلا تفریق اعلیٰ سہولیات فراہم کی جائیں گی۔

ننکانہ صاحب (باغی ٹی وی، نامہ نگار احسان اللہ ایاز) ننکانہ صاحب میں بینک اسلامی پاکستان لمیٹڈ کی نئی برانچ کی شاندار افتتاحی تقریب کا انعقاد کیا گیا۔ برانچ کا افتتاح برانچ مینیجر عدیل خالد کی والدہ محترمہ نے کیا۔ تقریب کے مہمان خصوصی عاصم سلیم (برانچ بینکنگ ہیڈ) اور جی ایم فیصل آباد آنس خالد تھے۔

اس موقع پر جی ایم لاہور سید جہازیب، ایریا مینیجر عقیل احمد، ڈپٹی جنرل مینیجر میاں ناصر محمود اور قیصر حیات سمیت مختلف بینکنگ شعبوں کے افراد، سول سوسائٹی، وکلا، صحافی حضرات، ڈاکٹر صاحبان اور علمائے کرام نے شرکت کی۔

تقریب کے دوران اسلامی بینکاری کے حوالے سے شرکا کو آگاہ کیا گیا کہ یہ بینک سود سے پاک اسلامی نظام کے تحت کام کرتا ہے۔ تقریب کے اختتام پر پاکستان کی سلامتی کے لیے خصوصی دعا کی گئی۔

اس کے بعد مہمان خصوصی بینک اسلامی پاکستان کے وفد نے گردوارہ جنم استھان کا دورہ کیا، جہاں انہیں گیانی بلون سنگھ کی جانب سے سروپے دیے گئے۔ آنے والے مہمانوں نے برانچ مینیجر عدیل خالد کی شاندار کارکردگی کو سراہا اور انہیں بہترین خدمات کے اعتراف میں خصوصی سرٹیفکیٹ سے نوازا گیا۔

ننکانہ صاحب (باغی ٹی وی، نامہ نگار احسان اللہ ایاز) ضلعی محکمہ صحت ننکانہ صاحب کی کارکردگی طویل عرصے سے مسائل کا شکار رہی ہے، تاہم 6 ماہ کی مدت کے بعد بالآخر ڈاکٹر طلحہ بن ضیاء خان کو سی ای او ہیلتھ کے عہدے پر تعینات کر دیا گیا ہے۔

ڈاکٹر طلحہ بن ضیاء خان نے اپنے عہدے کا چارج سنبھال کر فوری طور پر کام کا آغاز کر دیا ہے۔ اس موقع پر ڈسٹرکٹ ہیلتھ آفیسر (ڈی ایچ او) ڈاکٹر ذیشان، ایم ایس ڈی ایچ کیو ہسپتال ڈاکٹر عمران شاہ، اور سی ای او آفس کے دیگر عملے نے ان کا پرتپاک استقبال کیا اور انہیں پھولوں کے گلدستے پیش کیے۔

ذرائع کے مطابق، ننکانہ صاحب میں محکمہ صحت مسائل کا شکار تھا، اور مستقل سی ای او ہیلتھ کی عدم تعیناتی کی وجہ سے ضلعی محکمہ صحت کی کارکردگی انتہائی مایوس کن رہی۔ اب جب کہ ڈاکٹر طلحہ بن ضیاء خان کو یہ بھاری ذمہ داری سونپی گئی ہے، ان سے توقع کی جا رہی ہے کہ وہ مسائل کو حل کرنے میں اہم کردار ادا کریں گے۔

سی ای او ہیلتھ نے عہدہ سنبھالنے کے بعد مختلف برانچوں کا معائنہ بھی کیا اور محکمہ کے عملے سے ملاقاتیں کیں۔ اس دوران سپرٹنڈنٹ سی ای او آفس محمد آصف نے انہیں برانچوں کے حوالے سے تفصیلی بریفنگ دی۔ ڈاکٹر طلحہ بن ضیاء خان کی تعیناتی سے ضلعی محکمہ صحت کے حالات میں بہتری کی امید کی جا رہی ہے۔

ننکانہ صاحب (باغی ٹی وی نامہ نگار احسان اللہ ایاز) کرمانی ویلفیئر فاؤنڈیشن موڑ کھنڈا کے زیر اہتمام کنٹری کالج میں مقابلہ حسن قرات کا انعقاد کیا گیا، جس میں پچاس سے زائد طلباء نے حصہ لیا۔ اس مقابلے میں مختلف سرکاری و نجی سکولوں اور دینی مدارس کے طلباء نے شرکت کی۔ کنٹری گروپ آف کالجز کے ڈائریکٹر مہر احمد علی پڈھیار نے پروگرام کی صدارت کی۔

مقابلے میں امیدواروں نے خوبصورت انداز اور منفرد آواز میں تلاوتِ کلام پاک پیش کی، جس سے محفل میں سماں بندھ گیا۔ حافظ افتخار احمد، حافظ محمد بلال، اور حافظ محمد ذوہیب نے ججز کے فرائض انجام دیے۔

مقابلے کے نتائج میں گورنمنٹ ہائر سیکنڈری سکول موڑکھنڈا کے حافظ غلام مصطفیٰ نے پہلی پوزیشن، جامعہ غوثیہ تعلیم القرآن کے حافظ محمد اکرام نے دوسری اور جامعہ محمد سیفیہ کے حافظ علی حسنین نے تیسری پوزیشن حاصل کی۔ کرمانی ویلفیئر فاؤنڈیشن کی جانب سے پہلی پوزیشن پر دس ہزار روپے، دوسری پوزیشن پر پچھتر سو روپے، اور تیسری پوزیشن پر پانچ ہزار روپے نقد انعام دیا گیا، جبکہ تمام امیدواروں کو یادگاری سرٹیفکیٹس بھی دیے گئے۔

اس موقع پر فاؤنڈیشن کے چیئرمین ملک محمد ساجد، صدر وقار علی گھگھ، جنرل سیکرٹری حافظ کاشف محمود اور دیگر مقررین نے کہا کہ قرآنی تعلیمات پر عمل پیرا ہوکر دنیا و آخرت میں کامیابی حاصل کی جا سکتی ہے۔ انہوں نے اس مقابلے کا مقصد بچوں کو تلاوتِ کلام پاک کی طرف راغب کرنا اور قرآنی تعلیمات پر عمل پیرا ہونے کی ترغیب دینا قرار دیا تاکہ وہ باعمل مسلمان بن کر دنیا و آخرت میں کامیابی حاصل کر سکیں۔