Category: پشاور

9 نومبر کو سیکیورٹی فورسز نے ایک کارروائی کے دوران ایک مشتبہ فرد کو شناخت کیا جو خواتین کے لباس میں ملبوس تھا۔

سیکیورٹی ذرائع کے مطابق جب اہلکاروں نے اسے روکا اور تفتیش کی تو معلوم ہوا کہ وہ دراصل ایک مرد ہے اور اس کا تعلق کالعدم شدت پسند گروہ خوارج (فتنہ الخوارج) سے بتایا جا رہا ہے۔ذرائع کا کہنا ہے کہ ملزم کو فوری طور پر تحویل میں لے لیا گیا ہے اور اس سے مزید تفتیش جاری ہے تاکہ اس کے نیٹ ورک، مقاصد اور ممکنہ سہولت کاروں کے بارے میں معلومات حاصل کی جا سکیں۔ ابتدائی تحقیقات کے مطابق خواتین کے لباس کا استعمال سیکیورٹی چیک پوسٹس سے بچنے اور نقل و حرکت کو آسان بنانے کے لیے کیا گیا۔

سیکیورٹی حکام کے مطابق شدت پسند عناصر کی جانب سے خواتین کی آڑ میں چھپنے کی حکمتِ عملی ماضی میں بھی سامنے آتی رہی ہے، جس کا مقصد سیکیورٹی فورسز کی نگرانی سے بچنا ہوتا ہے۔ حکام کا یہ بھی کہنا ہے کہ گرفتاری کے بعد بعض حلقوں کی جانب سے بیانیہ بنانے کی کوششیں کی جاتی ہیں، تاہم قانون نافذ کرنے والے ادارے شواہد کی بنیاد پر کارروائیاں جاری رکھتے ہیں۔سیکیورٹی فورسز نے عوام سے اپیل کی ہے کہ مشتبہ سرگرمیوں کی فوری اطلاع متعلقہ اداروں کو دیں اور امن و امان کے قیام میں تعاون کریں۔ مزید پیش رفت اور تفتیش کے نتائج سامنے آنے پر تفصیلات جاری کی جائیں گی۔

شمالی وزیرستان کے علاقے میران شاہ میں قائم دینی درسگاہ دارالعلوم عربیہ میں دستار بندی کی پُروقار تقریب منعقد ہوئی، جس میں پاک فوج کے اعلیٰ افسران نے خصوصی شرکت کی۔ تقریب میں فارغ التحصیل ہونے والے طلبہ، اساتذہ، مدرسے کی انتظامیہ، مقامی عمائدین اور بڑی تعداد میں علاقہ مکینوں نے شرکت کی۔

تقریب کے دوران پاک فوج کے افسران نے دینی تعلیم مکمل کرنے والے طلبہ کی علمی و تعلیمی کاوشوں کو سراہتے ہوئے کہا کہ دینی مدارس معاشرے میں اخلاقی اقدار، رواداری اور امن کے فروغ میں اہم کردار ادا کر رہے ہیں۔ انہوں نے فارغ التحصیل طلبہ کو مبارکباد دیتے ہوئے اس عزم کا اظہار کیا کہ تعلیم یافتہ نوجوان ہی علاقے کے روشن مستقبل کی ضمانت ہیں۔ پاک فوج نہ صرف ملکی دفاع کی ذمہ دار ہے بلکہ قبائلی اضلاع میں تعلیم، صحت اور سماجی ترقی کے فروغ کے لیے بھی بھرپور کردار ادا کر رہی ہے۔ اسی سلسلے میں دارالعلوم عربیہ کی تعلیمی اور سماجی سرگرمیوں کی حمایت کے لیے پاک فوج کی جانب سے مالی معاونت بھی فراہم کی گئی، تاکہ ادارہ مزید بہتر انداز میں اپنی خدمات انجام دے سکے۔

تقریب کے اختتام پر مقامی عمائدین اور عوام نے پاک فوج کے اس اقدام کو خوش آئند قرار دیتے ہوئے کہا کہ تعلیمی اداروں کی سرپرستی سے علاقے میں مثبت سرگرمیوں کو فروغ ملے گا اور نوجوان نسل کو آگے بڑھنے کے مواقع میسر آئیں گے۔ شرکاء کا کہنا تھا کہ ایسے اقدامات سے پاک فوج اور عوام کے درمیان اعتماد اور تعاون کا رشتہ مزید مضبوط ہو رہا ہے۔آخر میں ملک کی سلامتی، ترقی اور امن کے لیے خصوصی دعائیں بھی کی گئیں۔

پاک فوج کی بروقت مدد کے باوجود باجوڑ کا جار پل صوبائی حکومت کی توجہ سے محروم ہے

اگست 2025ء میں آنے والے تباہ کن سیلاب کے باعث باجوڑ کی سب سے بڑی سڑک اور جارپل بھی تباہ ہو گئے تھے،عوامی مشکلات کو دیکھتے ہوئے پاک فوج کے انجینئرزنے فوری طور پر عارضی پل تعمیر کیا تھا،اسی عارضی پل کے ذریعے عوام کی آمدو رفت جاری رہی،پاک فوج کی فوری اور بروقت مدد اور صوبائی حکومت کی نااہلی کے بارے میں عوام کا کہنا ہے کہ ہم پاک فوج کے مشکور ہیں کیونکہ اس پل کے تباہ ہونے سے ہم بہت تکلیف میں تھے،پاک فوج نے ہماری مشکلات کو دیکھتے ہوئے عارضی طور پر پل قائم کیا، اس عارضی پل کے بعد صوبے کی جانب سے اس پر کوئی کام نہیں کیا گیا ، میں پاک فوج کا مشکور ہوں جس نے سیلاب کے فوراً بعد یہ عارضی پل بنایا،حکومت سے مطالبہ ہے کہ جو فنڈز مہیا کئے گئے ہیں اس پر جلد از جلد کام شروع کیا جائے،کچھ روز قبل ہمارے ایم پی اے بڑے دعوے کر رہے تھے کہ اس کی منظوری ہو چکی ہے ،صوبائی حکومت کہتی ہے کہ کام آج کل شروع کردینگے لیکن کوئی نہیں آیا اور پل خراب پڑا ہے،صوبائی حکومت کی جانب سے ابھی تک رابطہ پل پر کوئی کام نہیں ہوا اور نہ ہی کسی صوبائی وزیر کو اس کا خیال آیا ہے، نہ ہی اب تک مشینیں آئی ہیں اور نہ ہی کام شروع ہوسکا ہے، پاک فوج نے فوری طور پر لوہے کا پل بنایا، اللہ اسکا بھلا کرے.

ٹیکس آفس پشاور نے ضلع صوابی کے علاقے انبار میں بڑی کارروائی کرتے ہوئے لاکھوں کلوگرام غیر قانونی طور پر ذخیرہ شدہ تمباکو برآمد کر لیا۔ کارروائی کے دوران ایک جی ایل ٹی (Green Leaf Threshing) یونٹ مکمل طور پر فعال حالت میں پایا گیا، جہاں بھاری مقدار میں تمباکو موجود تھا جسے تحویل میں لے لیا گیا۔

ایف بی آر ذرائع کے مطابق کارروائی کے دوران مجموعی طور پر 5 لاکھ 14 ہزار 596 کلوگرام ہینڈ اسٹیمڈ لیمینا، 35 ہزار 280 کلوگرام تمباکو اسٹیم اور 74 ہزار 800 کلوگرام گرین لیف برآمد کیا گیا۔ ذرائع کا کہنا ہے کہ برآمد شدہ تمباکو کی مقدار غیر معمولی طور پر زیادہ ہے جو بڑے پیمانے پر غیر قانونی تمباکو مینوفیکچرنگ اور ذخیرہ اندوزی کی نشاندہی کرتی ہے۔حکام کے مطابق برآمد ہونے والا تمباکو ایک نجی ٹوبیکو کمپنی کے نام پر موجود تھا، جبکہ یونٹ کے مالک کی شناخت ربنواز کے نام سے ہوئی ہے۔ ابتدائی تحقیقات میں یہ بات سامنے آئی ہے کہ مذکورہ یونٹ میں تمباکو کی پروسیسنگ اور ذخیرہ فیڈرل ایکسائز ایکٹ 2005 کی کھلی خلاف ورزی کے تحت کی جا رہی تھی۔

ٹیکس حکام کا کہنا ہے کہ قانون کی خلاف ورزی ثابت ہونے پر گودام اور تمام مشینری کو سیل کر دیا گیا ہے، جبکہ ابتدائی شواہد کے مطابق اس غیر قانونی سرگرمی کے ذریعے اربوں روپے کی ٹیکس چوری کی جا رہی تھی۔ حکام نے واضح کیا ہے کہ غیر قانونی تمباکو مینوفیکچرنگ، ذخیرہ اندوزی اور ٹیکس چوری کے خلاف زیرو ٹالرنس پالیسی کے تحت کارروائیاں مزید تیز کی جائیں گی۔

ذرائع کے مطابق یہ کارروائی خصوصی عدالت سے حاصل کردہ سرچ وارنٹ کی بنیاد پر عمل میں لائی گئی، جبکہ کیس میں مزید قانونی کارروائی اور تفصیلی تحقیقات کا باقاعدہ آغاز کر دیا گیا ہے۔ ایف بی آر حکام نے عندیہ دیا ہے کہ اس نیٹ ورک سے جڑے دیگر افراد اور اداروں کے خلاف بھی جلد کارروائیاں متوقع ہیں۔

لکی مروت میں پولیس کی دہشتگردوں کے ساتھ جھڑپ میں سیمنٹ فیکٹری کی بس پر دھماکا کرنے والا ایک دہشت گرد مارا گیا، جھڑپ کے دوران ایک پولیس اہلکار بھی شدید زخمی ہوا۔

آج لکی مروت میں سیمنٹ فیکٹری کی بس کو بم دھماکے کا نشانہ بنایا گیا، واقعے میں ایک شخص جاں بحق اور متعدد افراد زخمی ہوئے تھے۔پولیس کے مطابق لکی مروت میں دہشت گردوں کے ساتھ جھڑپ ہوئی، فائرنگ کے تبادلے میں بس پر دھماکا کرنے والا دہشتگرد مارا گیا، جھڑپ میں ایک پولیس اہلکار بھی شدید زخمی ہوا۔پولیس کا کہنا ہے کہ علاقے میں سرچ آپریشن جاری ہے، ریجنل پولیس آفیسر سجاد خان اور ڈسٹرکٹ پولیس آفیسر نذیر خان بھی موقع پر موجود ہیں، پولیس کی مدد کیلئے پولیس امن کمیٹی کے سیکڑوں جوان بھی موقع پر پہنچ گئے۔